ꞌThianaattõ 49
49
Aggatan Yakobo buul cĩgĩnnĩg
1Ma urutaa cĩnnĩ, ũtũvva Yakobo buul cĩgĩnnĩg vẽlẽk nẽ ĩĩnnĩk, “Aauto daho loota huduhaahuung thooꞌthiok ꞌcĩg hatĩ au hĩ ngagiit horumwa.
2“Iita niig vẽlẽk ĩthĩktaangu nganĩĩt maaꞌnyu Yakobo.
Ĩthĩhĩt thõõth ꞌcĩ haduha naa maaꞌnyu Ĩꞌthĩraẽlĩ.
3Nii ꞌRuubenĩ, hagayyii ĩĩnĩ loholeec caannĩ ꞌcĩ oou.
Hagayyii nganiit ꞌcĩ ĩĩnĩ terethiinit cĩ maacĩꞌthẽẽt caannĩ.
Ĩĩnĩ nii loholeec caannĩ ꞌcĩ attirani nẽ irrianu ꞌlõõan ꞌgoonogu vẽlẽk.
4Loholeec caannĩ ꞌcĩ õpõppaan hĩ tawanĩ.
Nẽẽthĩ, baa aduhuni ꞌcieeth caannĩ nẽ õõt atagguuꞌthu hĩ ngaa caannĩ,#49:4 Atagguuꞌthu hĩ ngaa caannĩ: Baa aduhun ꞌRuubenĩ ꞌcieeth cĩ ngamaacõnĩ nẽẽ õõt atagguuꞌthu hĩ ngamaacõnĩ hĩ ngaa cĩnnẽẽnĩ. Tigiil ꞌBuuk cĩ ꞌThianaattõ 35:22.
haduhaakiina, iittiõõ hatĩ gõõng ꞌtirriani hĩ ꞌrianĩĩth tõõ.
5Nẽ niig ꞌThimiõõnẽ hĩ ꞌLeevi,
iiginnu ꞌyioko niig ꞌgõtõn ꞌcĩg hẽẽng hõdẽẽthõng,
nẽ ĩĩtõ dĩlaꞌnya cugguung hẽlẽggĩ cĩg joraak.
6Hõllõngaa occa hadiimi naa ngaatĩ hõõkõrĩ
hode ngaatĩ haarĩkĩ thõõth ꞌcĩ hadĩmani ꞌgiimwa hõdẽĩ hĩ ngagiita.
Iiginnu niig eet ꞌcĩg aruku eet,#49:6 Iiginnu niig eet ꞌcĩg aruku eeta: Baa aruk lohollia cieeg Yakobo ho eet ꞌcĩ aggam ngõõnĩ cĩnĩĩng nẽ ittik ꞌtirriaana. Tigiil thõõth icci ꞌBuuhaa cĩ ꞌThianaattõ 34:1-29. hĩnĩngĩtĩ liilii haaga,
nẽ tarĩ etteeddu hẽlẽggĩ hũũrũ cĩg ꞌthoonu.
7Ĩccĩĩtteu niig ẽlẽk,
hĩnĩngĩtĩ liilii hĩ bathi cunuung ko.
Ĩꞌthanothoothĩk hatĩ lohollia cugguung
looc vẽlẽk cĩ hattũũgẽt cĩg Ĩꞌthĩraẽlĩ.
8Nẽẽthĩ nii ꞌJuuda, adĩhĩꞌthii hatĩ gõõng nganiit ꞌgotoonogu
nẽ akattieehi huruꞌnyia,
hĩnĩngĩtĩ arratani hatĩ gõõng nii mĩrõk cugunnig vẽlẽk.
9ꞌJuuda loholeec caannĩ, aaĩ nii hĩ ꞌmaa ꞌcĩ hidicẽẽnĩ.
Ma aggam iding cĩnnĩ, aitiõõ hatĩ eet ꞌcĩ occa õkõ aĩnana tõõ.
Aaĩ hatĩ hĩ ꞌmaa ꞌcĩ ngayyĩẽẽnĩ,
nganĩ occa ꞌthẽk ꞌcĩ occa aĩnana ꞌmaa ꞌcĩ ngayyi hatĩ aꞌnyak lõhõlĩ?
10Aitiõõ hatĩ ẽẽtĩ ꞌcĩ occa aggama makaaꞌthĩt cĩ ꞌJuuda tõõ,
hode nẽẽ hĩbahĩt cĩnnĩ cĩ makaaꞌthĩtõõ haaga,
ĩꞌthõng hikia baattĩ hĩbahĩtõ,
nẽ elemit loonyini vẽlẽk thõõth cĩnnĩ.
11Ecebeek hatĩ nẽẽ thigir cĩnnĩ hẽẽtaa cĩ viinoo,
nẽ ecebeek moolĩt cĩ thigir cĩnnĩ tabaacaa cĩ viinoo.
Ũũny hatĩ nẽẽ ceremwa cĩgĩnnĩg viinoa,#49:11 Ũũny ceremwa viinoa: Aduha thõõth cĩ Yakobo aĩ aku hatĩ aballi ꞌJuuda horumwa hĩllõõan.
nẽ ũtũũny ceremwa cĩgĩnnĩg mẽrtaa cĩ viino ꞌcĩ marihi.
12Hollik hatĩ gõõng ĩnõõnnõ hẽbẽrĩ cĩgĩnnĩg hĩllõõanit viino,
nẽ ĩĩtõ hatĩ gõõng õõrĩg nyĩgĩta cĩgĩnnĩg hĩllõõanit ira.
13Nii ꞌThebuluni, õlõmani hatĩ nii dẽmẽtaa cĩ bũlũcõ,
nẽ ikia iinu nĩngĩtĩ abĩllĩ haahũlnya;
õdõlan hatĩ lõkõõrĩ cunni looc cĩ ꞌThidõõnẽ.
14Nẽẽthĩ nii Iꞌthakarĩ, attirani hatĩ nii au hĩ thigiri
ꞌcĩ oongi hõrggẽẽnaa cĩ lohoddwa ꞌramma.#49:14 Lohoddwa ꞌramma: Aduha lohoddwaana ꞌcĩg ĩĩn ꞌramma ho aĩ, aaĩ lõõcĩ cĩ Iꞌthakarĩ hõrggẽẽnaa cĩ hattũũgẽt ꞌramma cĩg eet cĩg Ĩꞌthĩraẽlĩ.
15Nẽ ma hatĩ adtuuha nii ngaatĩ ẽllẽẽmmĩ nĩngĩtĩ iyyiomanĩĩ
ne udtuuha ꞌlẽẽmĩth cĩ lootu,
aggiingi hatĩ nii iꞌnyia cunni cõõdĩ ijjio,
nẽ elemu ngaatĩ ĩĩnnĩ appahaca ꞌcĩ attĩnganoothĩk dtiici ꞌcĩ õkõmĩ.
16Nẽ nii ꞌDaanĩ, etteedi hatĩ nii thooꞌthiok cĩg eet cugunnig ꞌgõõlaa ꞌcĩ abũnnaa,
eetinii cĩg hattũug cĩ eet cĩg Ĩꞌthĩraẽlĩ hũtũrũũr.
17Aaĩ hatĩ nii ꞌDaanĩ hĩ hũkaat ꞌcĩ ooꞌngiyyieek nyangõõllẽẽꞌnya ꞌgõõla,
nẽ adak ꞌthoo cĩggĩĩng,
hátĩ hudhukia ꞌthukannioohiti nyangõõllẽẽa.
18Hẽrẽ naa elliaanĩt cunni Makayyioohit.
19Nẽ nii ꞌGadĩ, akatĩ hatĩ mĩrõha õlõ cunni.
Nẽẽthĩ nẽẽꞌthẽk, anuoothi hatĩ ĩhõõggõ nĩĩcĩ noho
nẽ aggamma hẽlẽggĩ cugunnig.
20Nẽẽthĩ nii Aathẽrĩ, aduhi hatĩ gõõng nii ꞌgeenniok
ꞌcĩg ẽmmẽdĩ ooo hĩ habuui.
21Nẽ nii Navtali, aaĩ hatĩ nii hĩ mẽggẽẽrĩ ꞌcĩ accamanoothĩk#49:21 Mẽggẽẽr ꞌcĩ accamanoothihi: Aĩ thõõth ciee õthõõth hatĩ Navtali thooꞌthiok ꞌcĩg abũnnaa.
nẽ ittira lõhõlĩ ꞌcĩg ẽllẽẽmĩthĩ.
22Nẽ nii Yothebo, aaĩ hatĩ nii hĩ hẽẽt cĩ viinoo ꞌcĩ õddõngõt hĩĩ tĩdĩddĩng
ngaatĩ õbõhõõ hĩ ũꞌngeec cĩ hidioo,
nẽ otodit tabana cĩgĩnnĩg araan.
23Irriamaneeki hatĩ nganiit mĩrõha cĩg lĩꞌthaanitu.
Oorri hatĩ nẽẽg nganiit lĩlĩẽẽtta.
24Nẽẽthĩ, aalla attiran iriggia cĩnnẽẽnĩ,
nẽ ittiranit ĩbaati cĩgĩnnẽẽgĩ,
hĩnĩngĩtĩ aꞌthiit cĩ ꞌTirriannioohit ꞌcĩ ĩllõõan vẽlẽk cĩ Yakobo,
hĩnĩngĩtĩ Tũhayyioohit Lõbarab cĩ Ĩꞌthĩraẽlĩ.
25Aꞌnyĩĩk Nyekuc cĩ maaconu heeli nganiita,
aꞌnyĩĩk ꞌTirriannioohit ꞌcĩ ĩllõõan vẽlẽk, haggatanii nganiit,
ꞌgattaanaa cĩ hẽẽtkujjieen,
hĩ ꞌgattaanaa cĩ tammwo hĩ ĩĩcĩ maam ꞌcĩg aattĩg loota,
aꞌnyĩĩk ngaaĩ cugunnig hittirit.
26Nẽ ꞌgattanĩ cĩ maaconu ho,
maka ĩllõõan ꞌgattan cĩ muurriok baag baarkit,
nẽ ĩllõõan ꞌgattanĩ cĩ muurriok ꞌcĩg kidicig ko baag baarkit.
Aꞌnyĩĩk ꞌgattan icci vẽlẽk haau hĩ nganiit Yothebo.
Iinu nii habu cĩ ꞌgotoonogu cugunnig.
27Nẽẽthĩ nii Benyemiino, alĩhĩ hatĩ gõõng nii hĩ huduumotĩ;
aruhi hatĩ gõõng iding ngerrenita,
nẽ eꞌngeru ꞌjiaat.”
28Thooꞌthiok ꞌcĩg baag aduhaak Yakobo lõhõlĩ cĩgĩnnĩg ko cieegi, baa aggatan nẽẽ ĩhõõggõ kõr niccia hõdẽĩ hõdẽĩ. Au hattũũgẽta cĩg Ĩꞌthĩraẽlĩ ho lõhõlẽẽnĩĩ cĩg ĩĩn õmmõtõ hĩ ꞌramma ho.
Daahĩth cĩ Yakobo
29Nĩngĩtĩ aduhaakĩ Yakobo lõhõlĩ cĩgĩnnĩg annẽẽkĩ, “Hõbõhĩ ꞌyioko naa hadaaha. Nẽ ma hadaaha, õõt adayyiaangu nga baa adaiini nyakangaan caannĩ hĩ hĩbaangĩ manaa cĩ Evoronĩ eet cĩ Hiiti Makpẽẽlattĩ. 30Baa ilom ꞌcĩ aaĩ Makpẽẽlattĩ cieeni, ngaatĩ baa õbõhõõ hĩ Mamre Kanaana, ꞌcĩ baa ũũta Abũrahamĩ hĩ Evoron eet cĩ Hiiti hĩĩ ilom cĩ daiitto. 31Baa ꞌthẽk nĩngĩtĩ adaiini Abũrahamĩ hĩ ngaa cĩnnĩ Thaara niccia. Baa ada eeta Iꞌthaako hĩ ngaa cĩnnĩ Rẽbẽka buúk nĩngaata. Ĩnõõ ꞌcĩ baa hadaĩ naa Lẽẽa nĩngaata buúk ko. 32Baa mana hĩ ilom ꞌcĩ uuttiaa hĩ eet cĩg hattũũg cĩ Hiiti niccia.”
33Ma baa ẽdẽcaak Yakobo ngaatĩ aggatanĩ buul cĩgĩnnĩg nĩngaata ho, obodoothĩk looc ꞌrõõha, nĩngĩtĩ adaaknĩ.
Currently Selected:
ꞌThianaattõ 49: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
