ꞌThianaattõ 48
48
Ũttũũrak Yakobo lõhõlĩ cĩg Yothebo ammũta
1Ma baa urutaa cĩ waathinniook ũgĩ, okollia ꞌthõõtĩ aĩ, “Anneek Yothebo appĩĩrna maaꞌnyu gẽrrẽẽt.” Nĩngĩtĩ õkõõĩ Yothebo lõhõlĩ cĩgĩnnĩg Manaaꞌthe hĩ Evaraim buúk ĩꞌthõng õlõ cĩ maacõnĩ. 2Ma baa athĩhĩ Yakobo aĩ uppwaanna ngeerĩnĩ Yothebo ho, õdõnga õõ hĩdĩĩc nẽ aau ꞌjieena ꞌrõõhaa cĩnnĩ.
3Ma nĩngaata, uduhaak Yakobo Yothebo ĩĩnnĩk, “Yothebo, baa uppwannakaa nganĩĩt Nyekuci ꞌTirriannioohiti ꞌcĩ ĩllõõan vẽlẽk ꞌLuutha looccaa cĩ Kanaanĩ, nĩngĩtĩ aggatanna 4nẽ ĩnnĩhaa, ‘Haaꞌnyihi hatĩ lõhõlĩ cĩg hattũũg cunni hĩĩtõ mẽẽlĩg ꞌrĩng. Haaꞌnyihi hatĩ naa ĩhõõggõ looc icci hĩĩ cĩnĩĩng ũdũt ĩꞌthõng hittirriaak lõhõlĩ cĩggĩĩng.’ ”
5“Nẽẽthĩ ꞌyioko, ĩĩtõ hatĩ lohollia cugunnig ĩĩn ꞌramma Evaraim hĩ Manaaꞌthe, baag arittiaa Ijjiba baa nga hõdõlan naa ngaati lõhõlĩ cĩgannĩg, aauto hatĩ nẽẽg hĩcĩ ĩĩn ꞌRuubenĩ hĩ ꞌThimiõõnẽ cĩgannĩg. 6Nẽ hatĩ má aaꞌnyi Nyekuci ũgĩ urutaa cĩnĩĩng, cugunnig hatĩ nicciag. Nẽ au hatĩ arigith nẽẽg looc, hĩnĩngĩtĩ Manaaꞌthẽ hĩ Evaraim. 7Hothoothi naa hoti, hĩnĩngĩtĩ alĩĩlĩ hẽẽng gẽrrẽẽt thõõth ꞌcĩ aggamaanna lõõcĩ ngaanu Rakĩlẽ Kanaana baa hõbõda Paddan Arama ẽlẽk. Adhukiaaka daahĩthĩ cĩ ngaanonu ngaatĩho, nĩngĩtĩ hammũtĩ ĩnõõnnõ ꞌgõõla ngadiiha ngaatĩ hoboktooa hĩ Ẽvarath.” Haĩ Ẽvarath ꞌthaar ũgĩ Bẽtẽlẽm.
8Nẽ ĩĩnnĩk Ĩꞌthĩraẽlĩ Yothebo tarĩ, “Aꞌnyĩĩk dako buul niccig hiita ngaati hatĩ haggatan ĩhõõggõ.”
9Nĩngĩtĩ aduhaakĩ Yothebo maaꞌnyĩ annẽẽkĩ, “Buul ꞌcĩg baag aaꞌnya Nyekuci nganĩĩt Ijjiba cieegi.”
Nẽ ĩĩnnĩk Ĩꞌthĩraẽlĩ ngeerĩnĩ, “ꞌNyaha da ĩhõõggõ ngaati, hátĩ haggatanõ.” 10Nẽẽthĩ ꞌyioko, baa ĩĩtõ Ĩꞌthĩraẽl hẽbẽrĩ ꞌtauꞌtau, hĩnĩngĩtĩ baa atahaany nẽẽ nẽ iittiõõ hõllõngaa occa nga acĩnĩ. Nĩngĩtĩ aꞌnyahaakĩ Yothebo buul cĩgĩnnĩg hõbõktõ hĩ maaꞌnyĩ nẽ arabũũt maaꞌnyia ĩhõõggõ taliittaa cobbi gẽrrẽẽt.
11Ma ho, ĩĩnnĩk nẽẽ ngeerĩnĩ Yothebo, “Ẽlẽ maac ciee hammuhi baa nẽẽ haini nga hatĩ hacciinnii tarĩ? Nẽ thĩ hĩ ꞌyioko ho, aaꞌnya Nyekuci hĩcĩn lõhõlĩ cugunnig buúk.”
12Nĩngĩtĩ aggamaanĩ Yothebo maaꞌnyĩ lõhõlĩ nẽ akateek maaꞌnyĩ huruꞌnyia nĩngaata. 13Ma ĩꞌngaathĩ ho, ittiha Yothebo ngeerĩnĩ ꞌcĩ hidici Evaraim nẽ aaꞌnyĩk maaꞌnyĩ haggam attiaa ꞌcĩ hidici nẽ aaꞌnyĩk Manaaꞌthe haggam attiaa cobbi, hátĩ haggatan maaꞌnyia.
14Baa hinnia abarĩc maaꞌnyia athĩn thõng, attiha aꞌthiit cobbi ataadĩk õõa cĩ loholeec ꞌcĩ hidici Evaraim nẽ ittiha aꞌthiit ꞌcĩ hidici ataadĩk õõa cĩ loholeec cobbi Manaaꞌthe.
15Nĩngĩtĩ aggatanĩ nẽẽ Yothebo annẽẽkĩ,
“Aꞌnyĩĩk Nyekuc baa adticanoothĩk
Abũrahamĩ hĩ Iꞌthaako,
nẽ ĩĩ tũhayyioohit caannĩ
rũgẽtaa caannĩ vẽlẽk,
16hĩ Aajĩlõ#48:16 Aajĩlõ: Avvĩ Yakobo Nyekuc anneek Aajĩlõ, hĩnĩngĩtĩ baa gõõng ĩꞌthõõa Nyekuci aajĩlõ hikia hẽẽl ĩnõõnnõ. baa ẽẽlannaa nganĩĩt thooꞌthiohĩ ĩĩcĩg abathĩ vẽlẽk,
haggatan buul iccig.
Aꞌnyĩĩk ꞌthaar cĩgannĩg
hĩ cĩg hĩbaangĩ cĩgannĩg Abũrahaamõ hĩ Iꞌthaako haallattia hĩ ĩhõõggõ.
Aꞌnyĩĩk Nyekuc hĩbbaan ĩhõõggõ
lõhõlĩ ꞌcĩg mẽẽlĩg loota nĩnga.”
17Ma baa adtuuha Yothebo ngaatĩ ataadĩkĩ maaꞌnyia aꞌthiit cobbi õõa cĩ Evaraimi ho, ikia ĩlĩĩlĩ, nĩngĩtĩ õdõngaanĩ aꞌthiit cĩ maacõnĩ õõa cĩ Evaraimi nẽ ataadĩk õõa cĩ Manaaꞌthe. 18Ma nĩngaata, ĩĩnnĩk maaꞌnyĩ, “Abarici tarĩ nii athĩn thõng inni? Manaaꞌthe mĩĩ cobbiẽẽnĩ, taadĩk aꞌthiit cobbi õõa cĩnnĩ. Arĩĩk mĩĩ athĩn cugunnig hoti.”
19Ma aĩ hõdõnga aꞌthiit cĩ maacõnĩ õõa cĩ Evaraimi nẽ aĩ hataadĩk ĩĩcĩ Manaaꞌthe ho, abũrĩ hinnia maaꞌnyia nẽ ĩĩ, “Haga ꞌthẽk, aku hatĩ ciee buúk maka hattũũgaa cĩ õlõ cĩnnĩ, abuli hatĩ nẽẽ buúk. Nẽẽthĩ ꞌthẽk hatĩ ubuli ciee hidici ho hĩllõõan cobbi ho. Aku hatĩ ĩĩn ꞌcĩ hidici ho maaꞌnyĩ eet cĩg loonyin ꞌcĩg mẽẽlĩg ꞌrĩng.”
20Ma nĩngaata, aggatan ĩhõõggõ tarĩ nẽ ĩĩnnĩk,
“Aggataniini hatĩ eeta cĩg Ĩꞌthĩraẽlĩ ꞌthaarriok cugguung aĩ,
‘Aaꞌnyuung occa hatĩ Nyekuci aauto hĩ Evaraimi hĩ Manaaꞌthe nuun!’ ”
Nĩngĩtĩ ꞌthẽk aaꞌnyĩkĩ Yakobo Evaraim makaaꞌthĩt cĩ ĩllõõanĩ ꞌgõtõnĩ cobbi ho.
21Nẽ kõr tĩho, ĩĩnnĩk nẽẽ ngeerĩnĩ Yothebo, “Hĩcĩ ꞌyioko ĩcĩttaangu hõbõhĩ hadaaha ho, aggameekuung hatĩ Nyekuci aꞌthiit ĩꞌthõng hobodduung ligaa baa hĩbaangĩ cĩgannĩg. 22Nẽ hĩcĩ ꞌyioko aꞌnyahi nii makaaꞌthĩt ꞌcĩ aggamĩ ꞌgotoonogu ho, bĩĩt bĩtĩ lokor baa haggama naa hĩ eet cĩg Amoorĩ hata.”
Currently Selected:
ꞌThianaattõ 48: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
