ꞌThianaattõ 50

Ũũk ada Yothebo maaꞌnyĩ liga Kanaana

1Ma baa adtuuha Yothebo ngaatĩ adaaknĩ maaꞌnyia ho, arabũũt ĩnõõnnõ nẽ odohonoothĩk ĩꞌthõng hĩ ulwa nĩĩcĩ noho. 2Ma uruta, ũtũvva Yothebo akĩĩmĩt hiita hõõt hẽtẽẽcõ hẽẽng cĩ maacõnĩ nẽ ũtũũnyĩtõ ẽgẽrnẽẽnĩĩ ꞌcĩg gõõng aaꞌnyĩk eet ꞌcĩ adaak hiittiõõ hõllõngaa ahũhũt hĩdĩĩkoothong. 3Baa adtican akĩĩmĩta dtiic icci waathinniook hẽẽn ꞌwec, hĩnĩngĩtĩ baa waathinniook ꞌcĩg adiim nyattalĩ cĩ eet cĩg Ijjibi nicciag. Nĩngĩtĩ aluyyi eeta cĩg Ijjibi buúk Yakobo waathinniook hẽẽn tũrkĩramma.

4Ma baa aiili lõõcĩ ho, ũũk ala Yothebo ꞌgaala cĩg õlõ cĩ habuuo ĩĩnnĩk, “Má nuun amaannĩkaangu, õõt uduktaakaangu habu ĩĩttĩk, 5‘Baa aaꞌnya nyakangaan hũbũtan hĩĩnnĩk, má iittiõõ nẽẽ tõõ, hõkõ hatĩ hammuti ĩnõõnnõ Kanaana ꞌlooha ĩbaa adawa nẽẽ hatĩ hadaõõĩ. Nẽ kõr niccia hẽlẽma hĩĩnnĩha, “Hokooyyi hatĩnĩ.” Má nuun ẽlẽmaaka habuui ngaatĩ hadĩmanĩĩ noho, occa hõkõ hõbõda ngaati hataman.’

6“Ma baa ho, ẽdẽc habuui Yothebo ĩĩnnĩk, ‘Bĩĩt ꞌmũũt maaꞌnyu Kanaana hĩcĩ baa abũtaneehi ĩnõõnnõ ho.’ ”

7Nĩngĩtĩ ĩꞌngaannĩ Yothebo õkõõyyĩ. Baa ittioon ĩnõõnnõ makayyiooha cĩg õlõ cĩ habuuo vẽlẽk hĩ makayyiook cĩg looc cĩ Ijjibi hũtũrũũr. 8Baa allũnganni eeta cĩg halang cĩ Yothebo hũtũrũũr hĩ ꞌgõtõõnõgĩ hĩ hattũũg cĩ õlõ cĩ maacõnĩ vẽlẽk hũtũngtoothĩk lohollia dioo hĩ hẽlẽggĩ õlõ ꞌGõcẽna. 9Kõr tĩho, baa mẽẽlĩg eeta ꞌcĩg ittioon Yothebo gẽrrẽẽt, baa õõ ũgẽẽgĩ ꞌgadiggadiꞌnyanĩĩ ꞌcĩg agurut nyangõõllẽẽꞌnya, nẽ õõt ũgẽẽgĩ nyangõõllẽẽꞌnyanĩĩ cĩggĩĩng. Baa ꞌthẽk lothippit hũtũrũũr ꞌcĩ õõkõr hĩ Yothebo õõ ammũt maaꞌnyĩ Kanaana ho.

10Ma baa õdõlan nẽẽg hilonganĩ umwa ngaatĩ haĩ Atad, ngaatĩ õbõhõõ hĩ hidioo cĩ ꞌJõrdanĩ, õõt õlõmatteek nẽẽg ulwa ꞌcĩ aꞌnyak waathinniook tũrkĩramma. 11Ma baa adtuuha eeta cĩg Kanaanĩ ĩhõõggõ ngaatĩ aattiyyi ulwaana hilongana nĩngaata ho, ĩtĩnaacõ ĩĩtõ, “Ulu, ippiikia ulwaanĩ ꞌcĩ ara eeta cĩg Ijjibi!” Ĩnõõ ꞌcĩ akannõõthĩkĩ nĩngĩtĩ õbõhõõ hĩ ꞌJõrdan ko ꞌthaara ꞌcĩg haĩ, Abel Mĩthiraim#50:11 Abel Mĩthiraim: Aĩ ꞌthaara ꞌcĩg haĩ Abel Mĩthiraim ko Ebereeiyyi, ulwaan cĩ eet cĩg Ijjibi. ko.

12Nĩngĩtĩ õõĩ buul cĩg Yakobo ho ẽlẽ cĩ maacõnĩ nẽ õõt ũmmũtĩt ilooma Makpẽẽlattĩ, ngaatĩ õbõhõõ hĩ Mamre hĩ baa ꞌthẽk aduhaak maaꞌnyia ĩhõõggõ. 13Baa irriongan nẽẽg ẽlẽ cĩnnĩ õõĩ ĩĩcĩ looc cĩ Kanaanĩ nẽ õõt adaacõ ĩnõõnnõ iloomaa cĩ Makpẽẽla ngaatĩ õbõhõõ hĩ Mamre. Baa ilom ꞌcĩ ũũta Abũrahamĩ hĩ Evoron eet cĩ Hiiti, hĩĩ nĩngĩtĩ daiitto ũdũt cieeni. 14Ma baa ũmmũtĩt nẽẽg maaꞌnyĩ ẽlẽk, iita oboddioothĩ Yothebo hĩ ꞌgõtõõnõgĩ, hĩ eet baag ittioona ĩhõõggõ vẽlẽk Ijjiba.

Aaꞌnyĩk Yothebo ꞌgõtõõnõgĩ hĩĩtõ ꞌthinneeti ꞌwuang

15Ma baa urutaa cĩ daahĩth cĩ Yakobo, iita ummuhit ꞌgõtõõnõgĩ Yothebo ĩĩtõ, “Aaĩ mõnõ hatĩ Yothebo nẽ idiim ĩcaaca oolo baa hadĩmani ĩnõõnnõ ꞌbuth thõng?” 16Nĩngĩtĩ õkõlẽẽkĩ nẽẽg Yothebo ꞌthooc annẽẽkĩ, “Baa aduhaakeet ngagĩĩt nyakangaan baa nga arũgĩ anneekeet, 17‘Uduktaak hatĩ Yothebo ĩĩttĩk haini naa, ma nga haarihi thõõth baa adĩmanni ꞌgotoonogu ꞌbuth ꞌthĩnĩt.’ Ẽlẽ, baa ꞌthẽk hĩdĩmattii ꞌbuth dĩdĩ, tamaatĩheet baaĩ nuun ngagĩĩt dticcianniook cĩg Nyekuc cĩ maaconu.” Ma baa õdõlan nyeemuut ciee Yothebo ho, akannĩ hinnia ulwa nĩĩcĩ noho.

18Ma hĩdĩĩkoothong, unuyyia ꞌgotoonoggia buúk nyeemuut cĩnĩĩng ko nẽ iita ummuddiaak ĩnõõnnõ, nĩngĩtĩ akannĩ huruꞌnyia hẽbẽrẽẽnnĩĩ cĩgĩnnĩg nẽ ĩĩttĩk, “Ngagĩĩt cieeg hiitaawa ho, aaꞌnyeet mĩĩ ꞌthẽk hĩĩtta appahacaaꞌnya cugunnig.”

19Ẽdẽcĩ hinnia Yothebo ĩhõõggõ anneek, “Hõlõ, ma hiꞌngolinnaangu. Hõllõngaa hĩĩnĩ naa Nyekuc. Hĩnĩngĩtĩ hõllõngaa aduhõõ makaaꞌthĩt caannĩ hĩ cĩnnĩ. 20Baa adĩmannaangu niig nganĩĩt ꞌbuth dĩdĩ, ũũhũ hinnia Nyekuci thõõth niccia haꞌnyaha bũnnai ꞌcĩ ꞌyioko acinnu niig buúk ko. Bũnnai cĩ ẽẽlanĩ nẽẽ rũgẽt cĩ eet ꞌcĩg mẽẽlĩg ꞌrĩng. 21Haduhaakuung dĩdĩ, ma haaꞌnyiku ꞌthinneeti hĩĩtõ cadũũng cadũũng haaga, haꞌthuunnuung hatĩ naa ngagiit hĩ lõhõlĩ cugguung vẽlẽk.” Nĩngĩtĩ aaꞌnyĩkĩ Yothebo ꞌgõtõõnõgĩ hĩĩtõ ꞌthinneeti ꞌwuang.

Daahĩth cĩ Yothebo

22Baa arũmĩ Yothebo hĩ ꞌgõtõõnõgĩ Ijjiba ĩꞌthõng hatahaany hĩĩ hõrõdtõr, nĩngĩtĩ adaaknĩ baa ũũppanit irkiꞌnyia cĩgĩnnĩg ĩĩtõ ꞌmiia hõdẽĩ hĩ õmmõtõ (110). 23Baa arũgĩ nẽẽ ĩꞌthõng hĩcĩn lõhõlĩ cĩg lõhõlĩ cĩg Evaraimi. Nẽ tarĩ aau ĩꞌthõng hĩcĩn lõhõlĩ cĩg Manaaꞌthe ngeertĩ Makĩrĩ ꞌcĩ baa aar nẽẽ haauto hĩ lohollia cĩgĩnnẽẽgĩ.

24Ma baa ĩcĩnõõthĩ Yothebo õbõhĩ daahĩthĩ, ũtũvva ꞌgõtõõnõgĩ nẽ ĩĩnnĩk, “Hõlõ lõggõõ cieegi, nganĩĩt mĩĩ ciee ĩcĩttaangu hõbõhĩ hadaaha ho. Nẽ ma hammuku ainnu eelluung occa hatĩ nganĩ. Aꞌthuunnuung hatĩ Nyekuci ĩꞌthõng hobodduung looccaa ĩbaa ippotaneek nẽẽ Abũrahaamõ hĩ Iꞌthaako hĩ Yakobo.” 25Nẽ aaꞌnyĩk Yothebo lõhõlĩ cĩg Ĩꞌthĩraẽlĩ hũbũtanit hĩĩtõ, “Aku hatĩ eelluung Nyekuci ngagiit dĩdĩ, nẽẽthĩ, adiim ocooddu ẽmmẽ cĩgannĩg looccaa ĩĩcĩ.”

26Nĩngĩtĩ adaaknĩ Yothebo Ijjiba baa ũũppanit irkiꞌnyia cĩgĩnnĩg ĩĩtõ ꞌmiia hõdẽĩ hĩ õmmõtõ (110). Baa ẽẽt akĩĩmĩta ĩnõõnnõ hẽẽng nẽ ũtũũnyĩtõ ẽgẽrnẽẽnĩĩ ꞌcĩg gõõng aaꞌnyĩk eet hiittiõõ hõllõngaa ahũhũt hĩdĩĩkoothong nẽ ittikta aarrik cadduhatõõ Ijjiba.

Currently Selected:

ꞌThianaattõ 50: did

Highlight

Copy

Compare