ꞌThianaattõ 47

Aggatan Yakobo habu

1Nĩngĩtĩ õkõ acĩnĩ Yothebo habu cĩ Ijjibi nẽ ĩĩnnĩk, “Õdõlanit nganĩĩt nyakangaan hĩ ꞌgotoonoga, au looccaa cĩ Kanaanĩ. Aꞌnyaha nẽẽg hẽlẽggĩ hĩ ijjio cĩggĩĩng vẽlẽk, aattĩg ꞌyioko ꞌGõcẽna.” 2Ma ho, ẽbẽra Yothebo ꞌgõtõõnõgĩ ꞌtur nẽ ũũhĩ hĩ habu.

3Nĩngĩtĩ ajini habuui ꞌgõtõõnõgĩ Yothebo ho annẽẽkĩ, “Hõlõ, ĩĩgĩnnu gõõng niig eet ꞌcĩg adticannu dtiic tĩhathini looccaa cunuung?”

Ẽdẽcĩ nẽẽg aĩ, “Hĩĩgĩnna eeta tũhayyiook hĩ baa hĩbaangĩ cĩggaang.” 4Nẽ ittoorrik ĩĩttĩk habu, “Haĩ nuun hiita haautta ngaati hĩdĩhĩdĩĩc, hĩnĩngĩtĩ ĩĩ maka nyarõnĩ Kanaana gẽrrẽẽt. Hairanna ꞌyioko ꞌthẽk eeta hẽlẽggĩ buúk haĩnna, hátĩ hummudiaaha arteenit looccaa cunni ho. Aaꞌnyeet mĩĩ ꞌthẽk hõlõmatta ꞌGõcẽna.”

5Nĩngĩtĩ aduhaakĩ habuui Yothebo annẽẽkĩ, “Nyakangaan cunni hĩ eet cĩg halang cunuung hũtũrũũr cieeg iita ngaati ho. 6Nẽ ꞌyioko aaĩ lõõcĩ cĩ Ijjibi ho vẽlẽk athĩnĩĩ cugunnig, bẽraak mĩĩ ꞌthẽk ĩhõõggõ nĩngĩtĩ ũũppan hẽbẽrĩ cĩggĩĩng. Hammuhi occa ꞌthẽk aaꞌnyihi hõlõmanit ꞌGõcẽna. Nẽ ma aaĩ ꞌgotonu umwa ꞌcĩ aganeek tũhaiinit, ꞌnyaha hikia hũtũhaothĩhaanĩ.”

7Nĩngĩtĩ õkõ aꞌnyahaanĩ Yothebo maaꞌnyĩ ĩꞌthõng hikia heteretheek habu. Ma urutaa cĩnnĩ, aggatan Yakobo habu cĩ Ijjibi ho nĩngaata. 8Ma nĩngaata noho, ijin habuui Yakobo ĩĩnnĩk, “ꞌYioko hinnia ĩĩn irkiꞌnyia cugunnig thõng nyakangaan?”

9Ẽdẽcĩ Yakobo habu anneek, “Ẽlẽ maac ciee ĩĩn irkiꞌnyia cĩgannĩg ꞌcĩg hõvvõõyyĩ ꞌjieena ꞌmiia hõdẽĩ hĩ hẽẽn iyyio. Hĩdĩcĩg irkiꞌnyia cĩgannĩg ꞌcĩg happĩĩrnanĩĩ hõvvõõyyĩ ꞌjieena ho haaga. Hõllõngaa occa aduhõõ hĩ baag hĩbaangĩ baagannĩg õvvõ ꞌjieena hĩ ꞌyioko naa ho.” 10Ma urutaa ꞌcĩ aggatanĩ Yakobo habu ẽlẽk, ĩtĩnga nẽẽ ũtũngeek habu nĩngaata.

11Nĩngĩtĩ aaꞌnyĩkĩ Yothebo maaꞌnyĩ hĩ ꞌgõtõõnõgĩ hõlõmanit looc ꞌcĩ haĩ Rametheth,#47:11 Rametheth: Baa aaĩ ꞌtaaũnĩ cobbi ꞌcĩ haĩ Rametheth ko looccaa ꞌcĩ haĩ ꞌGõcẽn. ꞌcĩ ĩllõõan Ijjiba hũtũrũũr hĩ baa aduhaak habuui ĩnõõnnõ. 12Nĩngĩtĩ iroktĩ Yothebo maaꞌnyĩ hĩ ꞌgõtõõnõgĩ hĩ eet ꞌcĩg õlõ cĩnĩĩng vẽlẽk loholeecaa ꞌcĩ hidici noho.

Edeccia ꞌrabbẽẽta ꞌcĩg uuttianĩ haala

13Baa irkit niccia, baa nga ꞌthẽk maka nyarõnĩ Ijjiba noho õkõ looc cĩ Kanaanĩ vẽlẽk ĩꞌthõng hakaranit eeta hodtokoorri habathit dtẽc. 14Nĩngĩtĩ ũũtĩ eeta haal ĩꞌthõng hedeccia ꞌrabbẽẽta Ijjiba hĩ Kanaana hĩĩ lõõcĩ ꞌthĩĩ. Baa athadeek Yothebo ꞌrabbẽẽt ꞌcĩg ũũtĩ eeta haal ko, õlõõ cĩ habuuo. 15Ma baa edecciaak eeta vẽlẽk Ijjiba hĩ Kanaana ꞌrabbẽẽta, iita õõt ĩĩlallieek eeta cĩg Ijjibi Yothebo ĩĩttĩk, “Inni occa ꞌthẽk hadaakta magĩth muumaa cuuni ho? Iittiõõ ꞌrabbẽẽta tõõ ĩĩ ꞌthĩĩ. Aaꞌnyeet mĩĩ ꞌthẽk ꞌgẽẽn noho.”

16Nĩngĩtĩ annẽẽkĩ Yothebo ĩhõõggõ, “Má aattĩg hẽlẽggĩ, Iꞌngiddia mĩĩ ꞌthẽk iita ataalliaĩ ꞌgẽẽn hatĩ edeccia ꞌrabbẽẽta.” 17Ma baa ho, iita ataallia eeta haal hĩ Yothebo nĩngaata hẽlẽggẽẽnnĩ. Baa aꞌngĩda ũgẽẽgĩ nyangõõllẽẽꞌnya hode thigirẽẽta irkit niccia hedeccia.

18Ma urutaa cĩ irkit niccia, oboddia eeta hĩ Yothebo tarĩ nẽ iita ĩĩttĩk, “Hõllõngaa occa haggunyuꞌtha ꞌgiimwa hĩ makayyioohit cĩnaang thõõth ꞌcĩ edecciaaĩ ꞌrabbẽẽta cĩggaang nẽ ĩĩtõ hẽlẽggĩ cugunnig, iittiõõ aattĩ ꞌgii ꞌcĩ nga haꞌnyaka tõõ, ĩĩ eleeti cĩggaang dioo hĩ looc cĩnaang ꞌcĩ aaĩ. 19Occa ꞌyioko ꞌthẽk aaꞌnyeet hadaakta hẽbẽrẽẽnnĩĩ cugunnig hoti? Ma mĩĩ adiimi, tũũeet thĩ mĩĩ ꞌthẽk ngagĩĩt vẽlẽk hĩ manẽẽn cĩggaang buúk, hátĩ hĩĩtta appahacaaꞌnya cĩg habuuak. Aaꞌnyeet ꞌgẽẽn nẽ mĩĩ ꞌthẽk ũũhĩ manẽẽn cĩggaang.”

20Nĩngĩtĩ ũũtanĩ Yothebo manẽẽn cĩg eetuk vẽlẽk nẽ aaꞌnyĩk hĩĩtõ cĩg habuuak, hĩnĩngĩtĩ ommogeek nyarõnĩ ꞌcĩ ahahatĩĩ dtum ho eet Ijjiba hĩdĩmanit noho. 21Nẽ tarĩ aar eet cĩg Ijjibi hũtũrũũr hĩĩtõ appahacaaꞌnya cĩg habuuak. 22Baa ũũt nẽẽ manẽẽn vẽlẽk hidionganit cĩg paadĩrꞌnyaannu diooni. Baa ngarĩt#47:22 Paadĩrꞌnya: Baa aaꞌnyĩk habuui cĩ Ijjibi eet hĩĩtõ paadĩrꞌnya halaacõ nyekuꞌnya ꞌcĩg mẽẽlĩg ꞌcĩg hõllõngaa ĩĩn dĩdĩ. dioo ꞌcĩg hõllõngaa ũũtẽnĩ manẽẽn cĩggĩĩng, hĩnĩngĩtĩ baa gõõng aggameek habuui ĩhõõggõ ꞌrabbẽẽta.

23Ma nĩngaata, uduhaak Yothebo eet ĩĩnnĩk, “Ĩthĩhĩt jurrung, hĩcĩ ꞌyioko hũtũũwauung naa ngagiit hĩ manẽẽn cugguung vẽlẽk haalĩ iittu cĩg habuuak ko, erito hinyomo cieeg õõt akattio. 24Nẽẽthĩ, má ibbiirito manẽẽna, eꞌngerriaak hatĩ gõõng habu haal waathinnioohĩĩ cĩg janiittak vẽlẽk. Ẽẽtĩ ꞌcĩ ajana lohoddwa ꞌtur, aꞌnyĩĩk hẽꞌngẽra nẽ aꞌnyahaak habu lohod hõdẽĩ nẽ ꞌcĩ ajana lohoddwa õmmõtõ, aꞌnyĩĩk hẽꞌngẽra nẽ aꞌnyahaak habu lohoddwa ꞌramma. Nẽ haala ꞌcĩg anyiꞌthiaa, ĩĩn hinyomo hĩ ꞌgẽẽn cunuung.”

25Nĩngĩtĩ ẽdẽcĩ eeta aĩnnĩ, “Ayyia, ẽẽlaeet daahĩtha ẽlẽk. Ũũppan aaĩ noho, hĩĩtta ꞌthẽk hatĩ appahacaaꞌnya cĩg habuuak. Cĩneet baaĩ nuun ꞌthĩnĩtaa cĩ õõrĩ.”

26Nĩngĩtĩ aarĩkĩ Yothebo thõõth cĩ ẽꞌngẽraakĩ eeta habu haal ko, hĩĩ nyattal ꞌcĩ adĩman eeta hĩĩ noho Ijjiba. Baa manẽẽn cĩg ngaritu dioo ꞌcĩg aalla athĩnĩĩ ĩcĩggĩĩng, hĩnĩngĩtĩ baa nga hũtũ habuui manẽẽn cĩggĩĩng.

Ũbũtan Yothebo ngaatĩ õkõ ammũtĩ Maaꞌnyĩ

27Ma baa õlõman eeta cĩg Ĩꞌthĩraẽlĩ Ijjiba ngaatĩ haĩ ꞌGõcẽn ko, ikia ĩtĩlĩtha hattũũg cĩ õlõ cĩ Ĩꞌthĩraẽlĩ ĩĩ maka nẽ tarĩ abalõ gẽrrẽẽt buúk.

28Baa aaĩ Yakobo Ijjiba irkiꞌnyia õmmõtõ hĩ tũrkĩramma nẽ ma au arũmoothĩk irkiꞌnyia cieeg hĩ baag nga akuuni nẽẽ Kanaana ho thõng, au ĩĩn irkiꞌnyia vẽlẽk ꞌmiia hõdẽĩ hĩ hẽẽn ꞌwec hĩ tũrkĩramma (147). 29Ma baa ĩcĩnõõthĩ Ĩꞌthĩraẽlĩ aĩ hadaaha hatĩnĩ, ũtũvvũ ngeerĩnĩ Yothebo nẽ ĩĩnnĩk, “Má ammĩnannaa nii nganĩĩt maaꞌnyu, taadĩk aꞌthiit cunni athaanaa caannĩ nẽ ũbũtanuu, hatĩ athihi thõõth ꞌcĩ hõkõ haduhaakii naa hanneekii, ma hadaaha, ma hadayya looccaa cĩ Ijjibi. 30Ma hadaaha naana, oottiaangu Ijjiba battaala nẽ õõt adayyiaangu hũrũmteea hĩ hĩbaangĩ cĩgannĩg.”

Ma ho, ẽdẽc Yothebo maaꞌnyĩ ĩĩnnĩk, “Nyakangaan, hadĩmani ꞌthẽk hatĩ naa hĩcĩ aduha nii hataa.”

31Ma nĩngaata, ĩĩnnĩk maaꞌnyia, “Bũtan da hĩthĩk naa buúk.” Nĩngĩtĩ abũtanĩ Yothebo hẽbẽrẽẽnnĩĩ cĩg maacõnĩ nĩngaata noho. Nẽ iggiing maaꞌnyia õõ ngaatĩ oongiyyi ho, nĩngĩtĩ abulꞌthĩ Nyekuc.

Currently Selected:

ꞌThianaattõ 47: did

Highlight

Copy

Compare