ꞌThianaattõ 46

Uluugothoothĩk Yakobo Ngeerĩnĩ

1Ma baa hoti ho, ũlũt Ĩꞌthĩraẽlĩ#46:1 Ĩꞌthĩraẽl: Baa ꞌthaar ꞌcĩg akanneek Nyekuci Yakobo cieegi. ijjio cĩgĩnnĩg vẽlẽk, nĩngĩtĩ ĩꞌngaannĩ hĩ eet cĩg halang cĩnnĩ vẽlẽk ĩꞌthõng Bẽẽrthẽba. Ma baa õdõlan Bẽẽrthẽba ho, ĩbboorĩk Nyekuc cĩ maacõnĩ Iꞌthaako ꞌgaarrieenit nĩngaata.

2Ma baa baal, õthõõthak Nyekuci ĩnõõnnõ honoothittatõõ ĩĩnnĩk, “Yakobo! Yakobo!”

Nĩngĩtĩ ẽdẽcĩ nẽẽ aĩnnĩ, “Ee, nganĩĩt cieeni.”

3Nẽ ĩĩnnĩk Nyekuci ĩnõõnnõ, “Nganĩĩt Nyekuc, Nyekuc cĩ maaconu ꞌcĩ hõthõõthakii ho. Ma hiꞌngolli ngaatĩ õkõõĩ Ijjiba. Haaꞌnyihi hatĩ naa hattũũg cunni ho hũũk hĩtĩlĩtha looccaa ĩĩca hiita hĩĩtõ eet ꞌcĩg mẽẽlĩg. 4Hõõkõr hatĩ naag hĩ nganiit ĩꞌthõng looc cĩ Ijjibi nẽ nganĩĩt hatĩ dioo ꞌcĩ hõkõ hõbõdaanĩ lõhõlĩ cĩg lõhõlĩ cugunnig ĩꞌthõng looc icci tarĩ. Õkõ hatĩ adayyi nganiit ngeeruni Yothebo dẽẽdẽ.”

5Ma nĩngaata, ĩtĩngaacõ Yakobo hĩ eet cĩg halang cĩnnĩ Bẽẽrthẽbattĩ õõt Ijjiba. Baa otodeek buula cĩgĩnnĩg ĩnõõnnõ hĩ ngaaĩ cĩggĩĩng hĩ lõhõlĩ ꞌgadiggadiꞌnyanĩĩ baag ĩꞌthõõak habuui hotooyyiaĩ ꞌgõõla. 6Baa aluugi nẽẽg kõr tĩho hẽlẽggĩ cĩggĩĩng hĩ ijjio vẽlẽk ꞌcĩg baag aaꞌnyĩk lõõcĩ ĩhõõggõ looccaa cĩ Kanaanĩ. Nĩngĩtĩ õkõõĩ Yakobo halang cĩnnĩ vẽlẽk Ijjiba. 7Baa õõkõr nẽẽ hĩ lõhõlĩ cĩgĩnnĩg ꞌcĩg maacĩg, hĩ lõhõlĩ cĩg lõhõlĩ cĩgĩnnĩg ꞌcĩg maacĩg, hĩ lõhõlĩ cĩgĩnnĩg ꞌcĩg arrita lohollia cĩgĩnnĩg ꞌcĩg ngayyig, õõ Ijjiba.

Hattũũg cĩ Yakobo

8Nẽẽthĩ, ꞌthaarriok cĩg lõhõlĩ cĩg hattũũg cĩ Ĩꞌthĩraẽlĩ ꞌcĩg baag õõkõr hĩ ĩnõõnnõ õõ Ijjiba cieegi:

Baa haĩ ngeertĩ Yakobo cobbi ꞌRuuben.

9Ma urutaa cĩnnĩ, ikia aꞌnyak ꞌRuubenĩ lõhõlĩ cĩgĩnnĩg ꞌcĩg maacĩg ꞌwec ꞌcĩg haĩ:

Hanok hĩ Paallu hĩ Hethoron hĩ ꞌcĩ haĩ Karmi.

10Baa haĩ ngeertĩ Yakobo umwa ꞌThimiõõnẽ. Ma baa ittiho ꞌThimiõõnẽ buúk, ikia aꞌnyak buul tõrkõnõn ꞌcĩg haĩ:

ꞌJemueele hĩ ꞌJamin hĩ Õhad hĩ ꞌJakin hĩ ꞌThõhar hĩ ꞌcĩ haĩ ꞌThaaulo. Ĩĩn ꞌcĩ haĩ ꞌThaaulo ho ꞌcĩ baa arrita ngaa umwaa ꞌcĩ ĩĩn Kanaaneenit.

11Ĩĩn lohollia cĩg ꞌgõtõnĩ ꞌRuubenĩ ꞌcĩ haĩ ꞌLeevi iyyio,

ꞌcĩ haĩ ꞌGerthon hĩ Kohath hĩ ꞌcĩ haĩ Meraari.

12Haĩ ngeertĩ Yakobo umwa ꞌJuuda.

Baa aꞌnyak nẽẽ buul ꞌtur ꞌcĩg haĩ Ẽẽr hĩ Õnaan hĩ ꞌThẽẽla hĩ Pẽrẽth hĩ ꞌcĩ haĩ ꞌThẽẽra. Baa aggama lõõcĩ ĩnõõnnõ Ẽẽr hĩ Õnaan baa nga aattĩg nẽẽg Kanaana.

Ma baa urutaa cĩ irkiꞌnyia ũgĩ, ikia ittiho Pẽrẽthĩ buúk, nĩngĩtĩ aꞌnyahĩ buul ꞌramma ꞌcĩg haĩ:

Hethoron hĩ Hamul.

13Haĩ ngeertĩ Yakobo umwa tarĩ Iꞌthakar. Baa aꞌnyak nẽẽ buúk buul ꞌwec ꞌcĩg haĩ:

Tõõla hĩ Puua hĩ ꞌJathub hĩ ꞌcĩ haĩ ꞌThimirõõnẽ.

14Aꞌnyak ꞌcĩ haĩ ꞌThebulun lõhõlĩ iyyio ꞌcĩg haĩ:

Thẽrẽd hĩ Elon hĩ ꞌcĩ haĩ ꞌJahalẽẽl.

15Baa arrita Lẽẽa hĩ Yakobo buul iccig hĩ ngõõnĩ cĩnĩĩng ꞌDiina Paddan Arama. Baa au ĩĩn lohollia cĩg hattũũg cĩ Lẽẽa vẽlẽk hẽẽn iyyio hĩ iyyio.

16Baa haĩ lõhõlĩ cĩg ꞌGadĩ:

ꞌThevvon hĩ Haggi hĩ ꞌThuuni hĩ Ethbon hĩ Eri hĩ Arodi hĩ ꞌcĩ haĩ Areli.

17Nẽ baa haĩ ngeertĩ Yakobo umwa cĩ ngaa ꞌcĩ haĩ ꞌThĩlpa ho Aathẽr.

Ma baa ĩĩ maka Aathẽrĩ, ikia ittiho nẽ aꞌnyak buul ꞌwec ꞌcĩg haĩ Imna hĩ Ithva hĩ Ithvi hĩ ꞌcĩ haĩ Beria.

Baa haĩ ngõõnĩ buul ꞌcĩg ĩĩn ꞌwec ko ꞌThẽẽra.

Nẽ tarĩ ngaati, ikia ittiho Beria nẽ aꞌnyak lõhõlĩ ꞌramma ꞌcĩg maacĩg halaangatõõ.

Haĩ umwa Hẽbẽr nẽ hĩĩtõ umwa Malakiẽl.

18Baa ĩĩn cieeg lõhõlĩ ꞌcĩg baag arrita Yakobo hĩ ꞌThĩlpa, ꞌcĩ baa aaꞌnyĩk Labanĩ bũhaanyĩnĩ Lẽẽa. Baa ĩĩn nẽẽg vẽlẽk õmmõtõ hĩ tõrkõnõn.

19Ĩĩn lohollia cĩg Yakobo hĩ Rakĩlẽ ꞌramma, ĩhõõggõ Yothebo hĩ Benyemiino. 20Haĩ lõhõlĩ cĩg Yothebo ꞌcĩg arrittiaa Ijjiba Manaaꞌthe hĩ Evaraim. Haĩ aattĩ lõhõlĩ iccig Athẽnath, tĩnaatĩ ngarĩ ꞌcĩ haĩ Potivẽra paadĩr cĩ ꞌtaaũn cĩ Õõnĩ.

21Ma ho, ikia ittiho Benyemiino nẽ ittira ngaa cĩnnĩ buul õmmõtõ ꞌcĩg haĩ:

ꞌBẽẽla hĩ Beker hĩ Acbel hĩ ꞌGẽẽra hĩ Naaman hĩ Ehi hĩ Roc hĩ Muppim hĩ Huppim hĩ ꞌcĩ haĩ Arad, hĩĩtõ nẽẽg vẽlẽk õmmõtõ. 22Au ĩĩn lohollia cĩg Yakobo ĩĩcĩ hattũũg cĩ Rakĩlẽ vẽlẽk õmmõtõ hĩ ꞌwec.

23Baa aꞌnyak ꞌDaanĩ ngeerĩnĩ ꞌcĩ odoyyii ꞌcĩ haĩ:

Huthim.

24Nẽ aꞌnyak ꞌcĩ haĩ Navtali ho buul ꞌwec ꞌcĩg haĩ:

ꞌJathiel hĩ Guni hĩ ꞌJether hĩ ꞌcĩ haĩ Thillem.

25Baa ĩĩn cieeg lõhõlĩ ꞌcĩg baag arrita Yakobo hĩ Bĩlha apahaca baa aaꞌnyĩk Labanĩ bũhaanyĩnĩ Rakĩlẽ. Baa ĩĩn nẽẽg vẽlẽk tũrkĩramma.

26Hattũũg vẽlẽk cĩ õlõ cĩ Yakobo ꞌcĩ baa õõkõr hĩ ĩnõõnnõ õõ Ijjiba cieeni, au ĩĩn nẽẽg vẽlẽk hẽẽn tõrkõnõn hĩ tõrkõnõn nẽ hõllõngaa agiilothoothĩk ngaaĩ. 27Nẽ má hĩttorriothoothĩk lohollia cĩg Yothebo baag arrittiaa looccaa cĩ Ijjibi, occa hinnia au ĩĩn lohollia cĩg Yakobo vẽlẽk ꞌcĩg baag õõ looccaa cĩ Ijjibi ho, hẽẽn tũrkĩramma.

Õdõlan Yakobo Ijjib

28Ma baa õdõlanit Ijjib, ĩꞌthõ Yakobo ꞌJuuda hutuanĩ hũũk huduhaak Yothebo hiita hommottio hĩ ĩhõõggõ ꞌGõcẽna. 29Ma nĩngaata, õtõd Yothebo ꞌgadiggadi cĩnnĩ, hõõt hommottio hĩ maaꞌnyĩ Ĩꞌthĩraẽl nĩĩca. Ma baa ꞌthẽk õmmõtõõ hoti ho, ĩꞌthaayyio hĩ maaꞌnyĩ gẽrrẽẽt hĩccĩnĩt ulwa nĩĩcĩ noho. 30Nĩngĩtĩ annẽẽkĩ maaꞌnyia Yothebo, “Ĩko bẽrẽ nga arugi dĩdĩ loholeec caannĩ! Ac, hadaaha thĩ hatĩ maaꞌnyu lõꞌngõõc hĩcĩ ꞌyioko hicinii ho.”

31Ma nĩngaata, ĩtĩnga Yothebo noho nẽ uduhaak eet ꞌcĩg halang cĩnĩĩng ĩĩnnĩk, “Hõlõ, nga hõkõ haduhaahi naa habu hanneehi uluuktau niig looccaa cĩ Kanaanĩ iitiaau ngaati. 32Hõkõ hatĩ haduhaahi hanneehi iiginnu tũhayyiook nẽ tarĩ hatĩ hĩĩnnĩha, auunnu niig hẽlẽggẽẽnnĩĩ cugguung vẽlẽk noho.”

33Nĩngĩtĩ annẽẽkĩ Yothebo ꞌgõtõõnõgĩ, “Má õkõ ajinnuung habuui anneekuung, ‘Ĩĩgĩnnu niig eet ꞌcĩg gõõng adticannu dtiic tĩhathini?’ 34Ĩĩttĩk, ‘Hĩĩgĩnna eeta tũhayyiook hĩcĩ baa gõõng ĩĩn hĩbaangĩ cĩggaang.’ Athinnuung thĩ hatĩ nẽ aaꞌnyuung nyadaharĩt cĩ ꞌGõcẽnĩ ho.” Aduhaak nẽẽ ꞌgõtõõnõgĩ hoti, hĩnĩngĩtĩ baa gõõng athim eeta cĩg Ijjibi tũhayyiook.

Currently Selected:

ꞌThianaattõ 46: did

Highlight

Copy

Compare