ꞌThianaattõ 45
45
Uppulana Yothebo ẽlẽ
1Õthõõth ꞌJuuda nĩnga ĩꞌthõng haarria Yothebo ꞌthĩnĩt. Ma ꞌthẽk nĩngaata noho, itiggia dticcianniook cĩgĩnnĩg ĩĩnnĩk, “Õõt niig vẽlẽk battaala!” 2Ma baa aduhun eeta vẽlẽk battaala hidionganit ꞌgotoonoggia dioo ho, okoleek luulu ĩꞌthõng hĩthĩkta eeta cĩg Ijjibi olooyyiohĩĩ ꞌcĩg õbõhõõ hĩ õlõ cĩnnĩ nĩngaata. Ma hĩdĩĩkoothong, ĩthĩhĩt eeta cĩg õlõ cĩ habuuo buúk aĩ, arruui Yothebo õlõõ cĩnnĩ.
3Ma ꞌthẽk nĩngaata, uppulanaak Yothebo ꞌgõtõõnõgĩ ẽlẽ ĩĩ, “Hõlõ, nganĩĩt Yothebo cieeni! Nga ꞌthẽk arũgĩ nganĩĩt nyakangaan dĩdĩ?” Adhiriaaꞌngi hinnia ꞌgotoonoggia niccieeg noho, hĩnĩngĩtĩ baa aggam ĩhõõggõ barriti cobbi gẽrrẽẽt.
4Ma ho, ĩĩnnĩk ĩhõõggõ, “Ẽẽjẽkta dako ngaati.” Ma baa eejehoothĩk ꞌgotoonoggia ĩnõõnnõ ho, ẽddẽẽbak ĩhõõggõ thõõth jurrung ĩĩnnĩk, “Nganĩĩt ꞌgotonu Yothebo baa ũũtennaangu hĩ eet baag au Ijjiba cieeni. 5Nẽẽthĩ ꞌyioko, ma nga hammuku gẽrrẽẽt, hĩnĩngĩtĩ baa Nyekuc ꞌcĩ ĩꞌthõõannaa nganĩĩt ĩĩcĩ oou, aĩ hátĩ hikia hẽẽlauung ngagiit hĩ eet vẽlẽk. 6Ĩĩ ꞌyioko lõõcĩ nyarõn irkiꞌnyia ꞌramma, nganĩngĩtĩ irkit baa gõlla nẽ nga idionganniaa irkiꞌnyia ꞌtur tarĩ, ꞌcĩg hatĩ nga ẽꞌngẽjjĩ lõõcĩ. 7Ĩnõõ ꞌcĩ baa uwwattaanna nganĩĩt Nyekuci ꞌgõõlaa ꞌcĩ aga nẽẽ dioo, aĩ hátĩ ũrũgĩt niiga, hiittiõõ hõllõngaa acuddiaa eeta cĩg halaꞌngiook cugguung buúk. 8Ĩko baa ꞌthẽk Nyekuc ꞌcĩ ĩꞌthõõannaa nganĩĩta. Ĩcĩnĩt da ngaatĩ aarĩka hĩĩ eet cobbi ꞌcĩ hanũẽẽkĩ habu nẽ tarĩ hĩĩna mukungu ꞌcĩ haggami õlõ icci vẽlẽk hĩ looc cĩ Ijjibi hũtũrũũr.
9“Nẽẽthĩ ꞌyioko, õõt uduktaakaangu nyakangaan ĩĩttĩk, ‘Nga arũgĩ ngeeruni Yothebo “Ijjia nĩĩcĩ noho. Aaꞌnya Nyekuci makaaꞌthĩt cĩ haggamĩ looc cĩ Ijjibi. 10Hakuu hatĩ haaꞌnyii lõman looccaa ꞌcĩ haĩ ꞌGõcẽn ngaatĩ hõbõhõõnĩ thõng. ꞌNyaha ꞌthẽk hattũũg cĩ õlõ cĩnaac vẽlẽk. Ma aattĩg hẽlẽggĩ buúk, ꞌnyaha hĩ ꞌgii vẽlẽk ꞌcĩ aꞌnyahi nĩĩca. 11Haꞌthuunni hatĩ naa nganiit ngaatĩho, hĩnĩngĩtĩ nga idionganniaa irkiꞌnyia ꞌtur vẽlẽk cĩg nyarõnaak. Haduha naa hoti, hĩnĩngĩtĩ hõllõngaa hadiimmuung ngagiit adaahit magĩth.” ’ ”
12Ma ho, uduhaak ꞌgõtõõnõgĩ tarĩ ĩĩnnĩk, “Udtuuktau ꞌyioko niig vẽlẽk hĩ Benyemiino buúk ngaatĩ hĩĩnnĩ naa ꞌcĩ hothoothi ho Yothebo dĩdĩ. 13Õõt thĩ ꞌthẽk uduktaak nyakangaan makaaꞌthĩt caannĩ ꞌcĩ haꞌnyahi looccaa cĩ Ijjibi ho, hĩ ꞌgii vẽlẽk ꞌcĩ acinnu niig ngaati nẽ iittihu haini naa tooyyia hĩdĩĩkoothong.”
14Ma ꞌthẽk nĩngaata noho, ĩꞌtha Yothebo Benyemiino nẽ akatĩ ulwa, nĩngĩtĩ alui Benyemiino buúk. 15Ma tarĩ ho, ikia ĩꞌtha nẽẽ ꞌgõtõõnõgĩ ꞌcĩg ũgĩ ho buúk nĩngĩtĩ allwẽẽkĩ ĩhõõggõ. Ma uruta, iita othooꞌthio ꞌgotoonoggia hĩ ĩnõõnnõ lõꞌngõõc.
16Ma baa õdõlan nyeemuut ꞌcĩ auuni ꞌgõtõõnõgĩ Yothebo õlõ cĩ habuuo ho, ikia accamanoothĩk habuui hĩ ꞌgaala cĩgĩnnĩg vẽlẽk gẽrrẽẽt. 17Ma nĩngaata, okoleek habuui Yothebo ꞌthooc ĩĩnnĩk, “Aꞌnyĩĩk ꞌgotoonogu hocooddik ꞌgẽẽn thigirẽẽtĩ nẽ oboddioothĩ ĩĩcĩ looc cĩ Kanaanĩ. 18Aꞌnyĩĩk hõõt huluugtaĩ nyakangaan hĩ eet cĩg halang cĩnnĩ vẽlẽk. Duhaak anneek, hakuu hatĩ hẽbẽraahi naa ĩhõõggõ looc ꞌcĩ ĩllõõan Ijjiba hũtũrũũr, hátĩ haauto nẽẽg vẽlẽk lõꞌngõõc. 19Nẽ duhaak ũtũũgaa cunni dẽẽdẽ hothohotit ꞌgadiggadiꞌnya gõõng agurut nyangõõllẽẽꞌnya cĩg Ijjibi, hátĩ hõõt hiitaaĩ lohollia hĩ ngaaggi hĩ maaꞌnyu. 20Anneek ma haallaku ijjio ꞌcĩg uunniku uruta, hĩnĩngĩtĩ aku ĩĩn hatĩ ꞌgii vẽlẽk ꞌcĩ aaĩ Ijjiba cĩnĩĩng.”
21Nĩngĩtĩ ẽlẽmmĩ buul cĩg Ĩꞌthĩraẽlĩ ho thõõth ꞌcĩ aduha habuui ho. Ma urutaa cĩnnĩ, ikia ẽꞌngẽra Yothebo ꞌgadiggadiꞌnya ũgĩ ꞌcĩg agurut nyangõõllẽẽꞌnya hĩ baa aduha habuui nẽ tarĩ ittihaak ĩhõõggõ ꞌgẽẽn cĩ ꞌgoolu buúk. 22Ma ho, eꞌngereek ꞌgõtõõnõgĩ cĩg ꞌcieethi ũgĩ ceremwa ꞌcĩg ĩĩn ngeju hõdẽĩ hõdẽĩ nẽ aaꞌnyĩk Benyemiino ceremwa ꞌgoolliok ꞌtur hĩ maccĩrẽẽn ꞌmiiaꞌnya iyyio. 23Ma nĩngaata, ĩꞌthooĩk maaꞌnyĩ thigirẽẽt õmmõtõ nẽ aaꞌnyĩk hirrionganit kadĩkadĩngĩ cĩg Ijjibi ꞌcĩg ẽllẽẽmĩth gẽrrẽẽt ꞌcĩg õõ aaꞌnyĩhoothĩk maaꞌnyĩ. Ma tarĩ ho, ahala thigirẽẽt ꞌcĩg ngayyig õmmõtõ nẽ aaꞌnyĩk hirrionganit haal hĩ ꞌgẽẽn cĩ ꞌgoolu. 24Ma baa ẽdẽcaak dtiic icci vẽlẽk, ikia itilooĩk ꞌgõtõõnõgĩ ꞌgõõl ĩĩnnĩk, “Ma hooyyu hegernyoonnu ꞌgõõla.”
25Nĩngĩtĩ ĩꞌngaananĩ ꞌgotoonoggia Ijjiba noho warawara nẽ õõt ĩꞌthõng õlõ cĩ maacõnĩ Kanaana. 26Ma baa uppwaanoothĩk nẽẽg maaꞌnyĩ ho, õõt uduktaak ĩĩttĩk, “ꞌWui! Nyakangaan, ĩko nga arũgĩ Yothebo! Ĩko ĩnõõnnõ baa hanneeki naag ĩĩn makayyioohit Ijjiba.” Ẽbẽk hinnia maaꞌnyia ĩhõõggõ muguruur noho, hõllõngaa aĩ ꞌthĩnĩt kithik buúk. 27Ma baa eterꞌtheek nẽẽg maaꞌnyĩ kadĩkadĩngĩ ꞌcĩg ĩꞌthõõa Yothebo nẽ uduktaak thooꞌthiok baag aduhaak Yothebo ĩhõõggõ ho, ikia ĩĩ ꞌthĩnĩt cĩ maacõnĩ ꞌroyyii, nĩngĩtĩ ẽlẽmmĩ thõõth icci.
28Ma nĩngaata, õthõõth Ĩꞌthĩraẽlĩ ĩĩ, “Ĩko bẽrẽ nga arũgĩ loholeec caannĩ Yothebo! Hõkõ hatĩ hacini naa ĩnõõnnõ nga harugi ho.”
Currently Selected:
ꞌThianaattõ 45: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
