ꞌThianaattõ 44

Hooppo ꞌcĩ aꞌnginoothi

1Ma baa ꞌjiaatĩn niccia, uduhaak Yothebo dticciannioohit cĩnnĩ ho ĩĩnnĩk, “Arĩĩhĩ dako eet niccig haal lohoddwaanĩĩ cĩggĩĩng ko hĩbbĩtĩt. Nĩhẽẽhĩ nẽẽ nii ꞌrabbẽẽt cĩggĩĩng ũtũgeetinii cĩg lohoddwaanu tarĩ. 2Nĩhẽẽhĩ hooppo caannĩ aa ĩĩn maccĩreenit gõõng hahũdẽẽnĩ lohodatõõ cĩ nyahaappan iccia hidici hata, hĩ ꞌrabbẽẽt aag ũũtĩ haal buúk.” Nĩngĩtĩ mĩĩ ꞌthẽk adĩmanĩ dticciannioohiti nicciee hĩcĩ aduhaak Yothebo ho.

3Ma baa ngerrenita, ĩtĩngaacõ thigirẽẽtĩĩ cĩggĩĩng ko noho, nĩngĩtĩ õõĩ. 4Ma baa nga hõdõlanit nẽẽg nĩngĩtĩ ꞌrẽẽnĩ buúk, ũtũvva Yothebo eet aa anĩhẽẽkĩ ꞌrabbẽẽt hĩ hooppo lohoddwaanĩtõõ nẽ ĩĩnnĩk, “Viir hataman dõlan eet icciag. Bĩĩt bĩlĩ nẽ ĩĩnnĩhuu, ‘Haꞌthuunnuung occa gõõng lõꞌngõõc nẽ ĩdĩmattaangu ꞌbuth inni? 5Ĩgorꞌtheekaangu occa gõõng hooppo ꞌcĩ gõõng ahũdẽẽnĩ makayyioohiti inni?’ Duhaak anneek, ‘Hooppo ꞌcĩ gõõng hattĩmanĩĩ bõllõõk buúk niccieeni. Ĩdĩmattu thõõth ꞌcĩ abathĩ gẽrrẽẽt ũdũt dẽẽdẽ.’ ”

6Ma baa õdõlan ẽẽtĩ nicciee ĩhõõggõ ho, õbõdẽẽhĩ thõõth aa aduhaak Yothebo ĩnõõnnõ nĩĩcĩ noho. 7Ẽdẽcĩ hinnia eeta niccieeg anneek, “Aduha nẽẽꞌthẽk thõõth dĩdĩ ẽlẽ? Hattihaanna occa ꞌthinneeti ꞌcĩg hadĩmanna thõõth ꞌcĩ aaĩ noho ho ngaana? 8Nga nooyyia hoboddiaaki ꞌrabbẽẽt baag anĩhẽẽkĩ ẽẽtĩ ũtũgeetinii cĩg lohoddwaanu? Hõbõdaanna ꞌrabbẽẽt tĩko ꞌmany, looccaa cĩ Kanaanĩ. Inni occa higoriꞌthia maccĩrẽẽn hĩ ꞌdaab cĩ ꞌcieeth cĩ ꞌgaalac cunni ho? 9Má aaĩ noho, ijjia tarraabaneeta. Ma ummuddia ẽẽtĩ ꞌcĩ aꞌnyak hooppo tĩho hõrggẽẽnaa cĩnaang, aꞌnyĩĩk hadaak nẽ nuun hĩĩtta naag ũgẽẽgĩ appahacaaꞌnya cugunnig.”

10Ẽdẽcĩ ẽẽtĩ nicciee aĩ, “Eei, nẽẽꞌthẽk hammuhi eet ꞌcĩ hatĩ ammuddiaanĩ hooppo ho dioo, ꞌcĩ hatĩ ĩĩn appahaca caannĩ, nẽẽthĩ nẽẽ oottu niig ũgẽẽgĩ lõꞌngõõc.”

11Ma nĩngaata, õõgta lohoddwa thigirẽẽtĩ, nĩngĩtĩ abbuuhi. 12Ma ho, atarraaban ẽẽtĩ nicciee lohoddwa, iꞌthianaanĩ nyahaappanaa cobbi ĩꞌthõng hõdõlan Benyemiino. Ma abbuuk cĩ Benyemiino ho, ahutanniaa hinnia hooppo nicciee lohodatõõ cĩ Benyemiino. 13Ma adtuuha ꞌgotoonoggia ho, ĩlĩĩllẽẽcõ herreecito ceremwa.#44:13 Erreecito ceremwa: Baa ẽrrẽẽc ꞌgõtõõnõgĩ Yothebo ceremwa hĩnĩngĩtĩ, baa ommoꞌthi nẽẽg gẽrrẽẽt. Oboddiẽẽhĩ lohoddwa thigirẽẽtĩ, nĩngĩtĩ õbõdõõꞌthĩ ĩĩcĩ õlõõ cĩ Yothebo.

14Baa nga aaĩ Yothebo halaangatõõ baa õdõlan ꞌJuuda hĩ ꞌgõtõõnõgĩ õlõ. Nĩngĩtĩ akannĩ huruꞌnyia muuma cĩnnĩ nĩngaata. 15Ma ngaati, ijin Yothebo ĩhõõggõ nĩĩcĩ noho ĩĩnnĩk, “Ne ꞌyioko ꞌthẽk hatĩ ꞌcĩ aĩ ĩdĩmanit niig ko? Hõllõngaa agayyu niig ngaatĩ aduhaaka nganĩĩt bõllõõha thooꞌthiok?”

16Ma ho, ẽdẽc ꞌJuuda Yothebo ĩĩnnĩk, “ꞌYioko ꞌthẽk occa haduhaaki ꞌcĩg haĩ nganĩ makayyioohit? Anyamanneet thõõth ꞌcĩ occa haĩnna hammĩrra authetaa cĩ bũtĩ. Uppulana Nyekuci ꞌthẽccanẽẽt cĩggaang. Nẽẽthĩ ꞌyioko, hĩĩtta naag vẽlẽk hĩ eet aa amuddiaanĩ hooppo ho, appahacaaꞌnya cugunnig.”

17Nganĩngĩtĩ athĩknĩ Yothebo ꞌJuuda õthõõthĩ hoti ho, ẽdẽc ĩĩ, “Ayyia, aitiõõ nẽẽ thõõth niccia tõõ. Eet aa ĩgõrĩth hooppo caannĩ dioo ꞌcĩ hatĩ ĩĩn appahaca caannĩ nẽ nẽẽ oboddioothu niig ũgẽẽgĩ hĩ maaꞌnyu lõꞌngõõc.”

Ĩĩlaleek ꞌJuuda Yothebo hĩnĩngĩtĩ Benyemiino

18Ma ꞌthẽk nĩngaata noho, ĩĩthahoothĩk ꞌJuuda Yothebo nẽ ĩĩnnĩk, “Makayyioohit, ĩcca occa nuun athĩknaanĩ? Hajinnii nuun lõꞌngõõc, ma halĩĩllĩkaanĩ, habu ꞌthẽk nii buúk, hĩnĩngĩtĩ aduhoonnu hĩ habu cobbi thõng. 19Baa ajinneet kõr baa haaunna ĩĩcĩ oou anneekeet, ‘Nga ꞌthẽk aaĩ maaꞌnyu hode ꞌgotonu umwaanĩ?’ 20Hedecci tarĩ hanneeki, ‘Aaĩ umwaa ꞌcĩ hidici cĩ arrittiaa morwaꞌthẽẽtaa cĩ nyakangaanõ. Arũmĩ ꞌyioko nẽẽ hĩ nyakangaan õlõ.’ Haduhaaki tarĩ hanneeki, ‘Baa aggamaeet ꞌgõtõnĩ cobbi lõõcĩ nẽ ĩĩ ĩnõõnnõ dioo ꞌcĩ õdõĩ ꞌcieethaa cĩnĩĩng. Nyahaappan ꞌcĩ ammĩnan maaꞌnyia gẽrrẽẽt.’

21“Ma ho, ĩĩnnĩheet, ‘Õõt aꞌnyaktahaangu ĩnõõnnõ, hátĩ hikia hĩcĩnõ.’ 22Nẽ hiittihii, ‘Nyahaappan ꞌcĩ iitirẽẽnĩ maaꞌnyia caa gẽrrẽẽt. ꞌYioko hoottia haꞌnyaktaahi ĩnõõnnõ, occa hinnia hatĩ ẽttẽẽda maaꞌnyia ꞌthĩnĩt.’ 23Ma athĩkneet hõthõõꞌtha hoti ho, ĩĩnnĩheet, ‘Má hõllõngaa õõ aꞌnyahaakaangu ĩnõõnnõ, agayyiooth thĩ ꞌgõõl ꞌcĩ ooyyu.’ 24Ma baa hobodooꞌtha ĩĩcĩ olu ho, hoottia huduktaaha nyakangaan hĩ baa aduhaakeet niina.

25“Ma kõr umwa, ĩĩnnĩheet nyakangaan, ‘Oboddiooth mĩĩ ꞌthẽk ĩbaalĩ tarĩ, õõt utuuyyia haal ũgĩ.’ 26Nẽ hedeccia ĩnõõnnõ hĩĩttĩha, ‘Má hõllõngaa aaꞌnyeet hookorria hĩ Benyemiino, occa thĩ hõllõngaa hooyyia, hĩnĩngĩtĩ aduhaakeet ẽẽtĩ caa aĩ, “Ma huppwaannannu ngaati hatĩ aitiõõ ꞌgotonu ꞌcĩ hidici ho tõõ.” ’

27“Nẽ kõr tĩho, ĩĩnnĩheet nyakangaan, ‘Agayyu niig buúk baa ĩĩn lõggõõ niccieeg ꞌcieetõõ cĩnĩĩng ꞌramma thõng. 28Baa aggamaawa lõõcĩ umwa nĩngĩtĩ haĩnnĩ, “Iittiõõ ꞌthẽk caa tõõ.” Nẽ ꞌthẽk nga hĩcĩn ĩnõõnnõ hebereeca hĩĩ noho. 29Agayyu ꞌyioko niig buúk ngaatĩ hatahaanyĩ naana, adiimmaangu niig nganĩĩt hadaak thõng, hatĩ ũũk udhukiaak icci hidici ho buúk thõõth ꞌcĩ abathĩ?’

30“Nẽẽthĩ ꞌyioko, má huppwaattea naag õlõ nẽ ĩcĩneet nyakangaan hatĩ aitiõõ Benyemiino tõõ dẽẽdẽ, occa hinnia hatĩ ẽttẽẽda ꞌthĩnĩt nĩĩcĩ noho, hĩnĩngĩtĩ ammĩnan nẽẽ buulenit nicci gẽrrẽẽt. 31Nẽ nganĩ occa hinnia hatĩ ꞌcĩ ẽhẽẽl thõõth cĩ daahĩth cĩ nyakangaanõ ho? 32Nẽ ꞌgii ꞌcĩ baa õkõmĩ dẽẽdẽ ꞌcĩ baa habũtanẽẽkĩ ĩnõõnnõ hannẽẽkĩ, ‘Má hõllõngaa hõbõdaanĩ buulenit, aꞌnyĩĩk hatĩ gõõng ĩnõõnnõ hadaka nganĩĩt lohouli rũgẽtaa caannĩ vẽlẽk.’

33“Nẽ ma aaĩ hĩ ꞌyioko ho, nga thĩ hõkõ ningina, aꞌnyaa mĩĩ ꞌthẽk hĩĩ naa appahaca cunni hĩĩ nĩngĩtĩ loholeeco nẽ õbõdõõthĩ nẽẽ hĩ ꞌgotoonoga ꞌcĩg ũgĩ ho. 34Hõkõ nõõ occa huppwaanothoothihi nyakangaan hutuno dẽẽdẽ, hatĩ hũtũngeeha buulenit ngaati? Ayyia, aitiõõ! Ma nuun haaꞌnyaa hũũk hĩcĩn tamaati ꞌcĩ occa õkõ aꞌnyak nyakangaana.”

Currently Selected:

ꞌThianaattõ 44: did

Highlight

Copy

Compare