ꞌThianaattõ 43

Oboddioothĩ ꞌgõtõõnõgĩ Yothebo Ijjiba

1Waathinniook nicciag, baa ꞌthẽk nga maka nyarõnĩ Kanaana noho. 2Ma baa edecciaak nẽẽg haal baag õõ ũũta Ijjiba, ikia ĩĩnnĩk Yakobo buul cĩgĩnnĩg ko tarĩ, “ꞌYioko hadĩman hutuno hõlõ? Oboddiooth mĩĩ ꞌthẽk ĩbaalĩ tarĩ, õõt utuuyyia haal ũgĩ.”

3Ẽdẽcĩ hinnia ꞌJuuda maaꞌnyĩ anneek, “Nyakangaan, ẽrẽhaai thõõth baa haduhaaki ngaati thõng? Hõllõngaa nooyyia eggerꞌnyeekeet ẽẽtĩ caa anneekeet, ‘Má hõllõngaa õõkõraannu hĩ ꞌgotonu ꞌcĩ hidici ho, agayyiooth thĩ ꞌgõõl ꞌcĩ ooyyu.’ 4Má hõllõngaa aaꞌnyeet hookorria hĩ Benyemiino, hõllõngaa occa hooyyia hũũtakii haal ũgĩ tarĩ. 5Nẽẽthĩ, ma hõllõngaa aaꞌnyeet Benyemiino hookorria, aitiõõ thĩ naag buúk hõllõngaa hooyyia. Muhooth thõõth baa aduhaakeet ẽẽtĩ caa anneekeet, ‘Ma huppwaannannu ngaati hatĩ hõllõngaa aꞌnyahaannu ꞌgotonu ꞌcĩ hidici ho.’ ”

6Ma ho, ẽdẽc maaꞌnyia Ĩꞌthĩraẽlĩ#43:6 Ĩꞌthĩraẽl: ꞌThaar ꞌcĩg baag akanneek Nyekuci Yakobo cieegi. ĩĩnnĩk, “Õttõccaaku baa ꞌthẽk eet iccia thooꞌthiok vẽlẽk, ĩꞌthõng aattĩ uppulatta loholeec ꞌcĩ nga hidici ho buúk inni? Ahacciaangu mĩĩ niig nganĩĩta!”

7Ẽdẽcĩ nẽẽg aĩ, “Ma baa tarĩ ara ajinneet nẽẽ thooꞌthiok cĩg olu hiriiri anneekeet, ‘Nga arũgĩ maaꞌnyu?’ nẽ tarĩ ijineet ĩĩ, ‘Aaĩ ꞌgotonu umwaa õlõ?’ Nĩngĩtĩ thĩ mĩĩ hẽdẽcca ĩnõõnnõ thooꞌthiohĩĩ ꞌcĩg ajin nẽẽ ho. Hagayyia baa tarĩ naag haĩnna anneekeet hatĩ, ‘Õõt aꞌnyakta ꞌgotonu ꞌcĩ aaĩ õlõ ho’?”

8Ma ho, ĩĩnnĩk ꞌJuuda maaꞌnyĩ Ĩꞌthĩraẽl, “Nyakangaan, aaꞌnyeet loholeec hookorria, hátĩ heelliawa ꞌgõõla. Acũdaanneet hatĩ magĩthĩ ngagĩĩt hĩ lõhõlĩ cĩggaac haaga. 9Haꞌthũũnnĩ hatĩ naa dẽẽdẽ ĩnõõnnõ. Nẽ má hõllõngaa hõbõdaanĩ, aꞌnyĩĩk thõõth cĩnnĩ haggama nganĩĩt ĩꞌthõng daahĩth caannĩ. 10Cĩĩn nõõ ngaatĩ haraĩ thõõth ĩꞌthõng hĩĩ noho, occa ꞌyioko hoboddiootha tabattĩ ꞌramma.”

11Ma nĩngaata, ẽdẽc maaꞌnyia ĩhõõggõ ĩĩnnĩk, “Má aaĩ noho, aꞌnyaktoothĩk thĩ makayyioohit tĩho ꞌbaaninit buúk. Eberria ꞌgeenniok cĩg looc cĩnaac ꞌcĩg ẽmmẽdĩ gẽrrẽẽt. Loteec hĩ ꞌrũkanĩ hĩ ngõõrrõ hĩ ꞌmũũnĩ nẽ ũrũmteehu hẽlẽggĩ aag õꞌngõlĩ ẽmmẽdĩ nĩnga buúk. 12Oboddi ꞌrabbẽẽt baag anĩheekuung ẽẽtĩ lohoddwaanĩtõõ cugguung baa ĩĩcĩ oou buúk. Horoong ꞌyioko baa ẽrẽha eet tĩho thõng. Nẽ tarĩ, aꞌnyahit ꞌrabbẽẽt ꞌcĩg aduhõõ hĩ baag anĩheekuung ẽẽtĩ lohoddwaanĩtõõ ho thõng. 13Aggamteek Benyemiino aꞌthiit, oboddiooth hĩdĩĩkoothong. 14Aꞌnyĩĩk Nyekuc ꞌTirriannioohit ꞌcĩ ĩllõõan vẽlẽk, haaꞌnyĩk makayyioohit tĩho halal ꞌthĩnĩt, hátĩ haaꞌnyĩk Benyemiino hĩ ꞌgotonu baa uunniku nĩĩcĩ buúk, hoboddia lõꞌngõõc. Má idiim lõõcĩ aggamaawa lõhõlĩ hĩĩ ꞌthĩĩ buúk, aꞌnyĩĩk haggamawaanĩ.”

15Nĩngĩtĩ õõkõrĩ buul cieeg hĩ Benyemiino, aꞌnyahĩ ꞌrabbẽẽt ꞌcĩg õõ ũũtanĩ haala nẽ othohotit baag anĩhẽẽkĩ ẽẽtĩ lohoddwaanĩtõõ, hĩ ꞌbaaninit ꞌcĩ õõ acĩnĩ makayyioohit cĩ haalu ho Ijjiba. Nĩngĩtĩ õõ õdõlanĩ Ijjib nẽ ummuddoothĩk Yothebo. 16Ma baa adtuuha Yothebo ĩhõõggõ ngaatĩ õõkõraanĩ hĩ Benyemiino hoti ho, uduhaak dticciannioohit cĩnnĩ ĩĩnnĩk, “Bĩtĩ eet niccig ĩĩcĩ olu. Bĩĩt mĩĩ tarraaban hẽlẽggĩ aag ngaata nẽ ucuhanuu umwa, hátĩ huduktõõĩ hatĩ aau kõrra lokora.”

17Nĩngĩtĩ õkõõĩ dticciannioohiti tĩho ĩhõõggõ õlõ nẽ ũũk ĩdĩman hĩcĩ aduhaak Yothebo ho. 18Ma baa õdõlan buul cieeg halang cĩ Yothebo ho, ommoꞌthi gẽrrẽẽt ĩĩtõ, “Haꞌnyakiaa naag ngaati, hĩnĩngĩtĩ ꞌrabbẽẽt baag aarĩhoothĩk lohoddwaanĩtõõ cĩggaac. Aarĩk ꞌyioko baa ꞌrabbẽẽt niccig lohoroor, aĩ hátĩ hõhõppõcatteetu ngagĩĩta nẽ aggamtaaeet thigirẽẽt nẽ aarrieet hĩĩtõ appahacaaꞌnya.”

19Nĩngĩtĩ õõ aduhaakĩ dticciannioohit cĩ Yothebo hattũũgaa cĩ ꞌcieethu annẽẽkĩ, 20“ꞌGaalac, haꞌnyaka thõõth umwa ngaati. Baa haaunna kõr ꞌcĩ ꞌrẽẽnĩ ngaati tũũwa nẽ hoboddiootha. 21Ma ngaatĩ baa hõõ hooginna, hubbuukta lohoddwa. Ma ho, hammũdaanna hinnia naag vẽlẽk ꞌrabbẽẽt baag hutuyyiawa haal ẽlẽk, ũtũgeetinii cĩg lohoddwaanu aattĩg hũtũrũũr nganĩngĩ baa haꞌnyahaanna. Ĩhõõggõ cieeg hoboddiaayya ho. 22Erekeet ẽẽtĩ ꞌcĩ õbõdaakeet ho ũdũt nẽ haꞌnyahaanna ꞌrabbẽẽt ũgĩ buúk ꞌcĩg haau hũũtanna haal ũgĩ tarĩ.”

23Nẽ ẽdẽc dticciannioohiti ĩĩ, “Ayyia, ma haaꞌnyiku ꞌthinneeti cugguung hĩĩtõ cadũũng cadũũng haaga. Aarikuung Nyekuci cĩ maaconu ꞌrabbẽẽt tĩko. Haggama naa ꞌrabbẽẽt baag aꞌnyahaannu niig ẽlẽk.” Ma ẽdẽcaak ẽẽtĩ ciee thõõth ngaati ho, ũũk õõga ꞌThimiõõnẽ baa ĩĩn baabutheenit nĩngĩtĩ aꞌnyahaakĩ ĩhõõggõ.

24Ma ho, ũũhĩ dticciannioohiti nicciee ĩhõõggõ ꞌcieetõõ cĩ Yothebo, nĩngĩtĩ aaꞌnyĩkĩ maam ꞌcĩg ũũnyanĩ ꞌthoo nẽ tarĩ aꞌnyaktaak thigirẽẽt cĩggĩĩng buúk arteenit. 25Ma baa ho, uduhaak ĩhõõggõ ĩĩnnĩk, aku hatĩ Yothebo buúk duhẽẽtta hatĩ aau kõrra lokora, ma nĩngaata, iꞌthiattaaĩ nẽẽg ũkũmatteek kadĩkadĩngĩ baag ĩĩn ꞌbaaninit cĩ Yothebo.

26Ma baa uppwaanna Yothebo dĩdĩ ho, iita akattieek ĩnõõnnõ huruꞌnyia nẽ akatti hẽbẽrĩ looc, nĩngĩtĩ aaꞌnyĩkĩ ꞌbaaninit tĩho. 27Ma nĩngaata, ĩꞌtha Yothebo buúk ĩhõõggõ nẽ ijin authet cĩ õlõ cĩnĩĩng ĩĩnnĩk, “Anneekaangu ibiaali atahaany maaꞌnyu gẽrrẽẽt, nga ꞌthẽk arũgĩ nuun?”

28Nĩngĩtĩ ẽdẽcĩ nẽẽg aĩnnĩ, “Eei, nga ẽdẽddẽr dticciannioohiti cunni lõꞌngõõc.” Ma ho, akattieek ĩnõõnnõ huruꞌnyia nĩngaata tarĩ.

29Ma baa adtuuha Yothebo Benyemiino ꞌgõtõnĩ cĩ hẽẽng hõdẽẽthõng hoti ho, ijin ĩhõõggõ ĩĩnnĩk, “ꞌGotonu baa ainnu ꞌcĩ hidici cieeni?” Nĩngĩtĩ õthõõthĩkĩ nẽẽ Benyemiino annẽẽkĩ, “Aꞌnyĩĩk Nyekuc heeliina loholeec caannĩ.” 30Ma ngaati, ũũppanẽẽhĩ thõõth cĩ Benyemiino Yothebo ꞌthĩnĩt, nĩngĩtĩ ĩꞌngaannĩ hataman hũũk hutulu ĩĩcĩ õkĩc cĩ ũũda cĩnnĩ umwa. 31Utulu ĩĩca noho, nĩngĩtĩ attihanẽẽkĩ ꞌthĩnĩt bẽẽ. Ma baa ũcũũra hẽbẽrĩ ẽlẽk, ikia ĩĩnnĩk eet, “Eꞌngerit ꞌgẽẽn.”

32Baa iirkak dticcianniooha Yothebo ꞌgẽẽn cĩnnĩ ẽmmẽn, nẽ iiriktaak ꞌgõtõõnõgĩ buúk ẽmmẽn nẽ aanytĩk eet cĩg Ijjibi ꞌcĩg gõõng arũmĩ hĩ Yothebo nĩngaata buúk hudukto ẽmmẽn. Baa aꞌngiran eeta cĩg Ijjibi ngaatĩ aduhẽẽnĩ hĩ Ebereei, hĩnĩngĩtĩ baa gõõng athim nẽẽg ĩhõõggõ. 33Ma nĩngaata, eteretheek Yothebo ꞌgõtõõnõgĩ, ꞌgoolliok ꞌcĩg iccioloonganĩ, ẽꞌthẽdaneek ꞌgõtõõnõgĩ, iꞌthianaanĩ ĩcĩ hidici hõdõlan cobbi. 34Ma baa ẽꞌngẽrĩ ꞌgẽẽna, baa eꞌngerriaak Benyemiino ꞌcĩ ĩllõõan cĩ ꞌgotoonogiinni tabattĩ ꞌtur. Nĩngĩtĩ aduhẽẽnĩ nẽẽg vẽlẽk nẽ uhuddi ĩꞌthõng hatanyarit.

Currently Selected:

ꞌThianaattõ 43: did

Highlight

Copy

Compare