ꞌThianaattõ 42

Õõt ꞌgõtõõnõgĩ Yothebo Ijjiba

1Ma baa athĩhĩ Yakobo aĩ, aattĩg haala ꞌcĩg tũũwak Ijjiba ho, ikia uduhaak buul cĩgĩnnĩg ĩĩnnĩk, “Ebehoonnu nĩnga noho ꞌrẽl ꞌrẽl, hõllõngaa ooyyu Ijjiba inni? 2Ma ꞌcĩ hathihi naa aĩ, aattĩg haala Ijjiba ho. Õõt mĩĩ utuuyyia hiita heelli nyarõn icci.”

3Nĩngĩtĩ ĩꞌngaannĩ ꞌgõtõõnõgĩ Yothebo õmmõtõ õõ ũũtanĩ haal Ijjiba. 4Baa ẽdẽnĩ Yakobo ngeerĩnĩ ꞌcĩ hidici ꞌcĩ haĩ Benyemiino ho ꞌgõtõnĩ Yothebo dẽẽdẽ, ngaatĩ õõkõrĩ hĩ ꞌgõtõõnõgĩ niccig, hĩnĩngĩtĩ baa iꞌngolli nẽẽ aĩ horoong hatĩ õõ õmmõtõõ hĩ thõõth ꞌcĩ abathĩ ꞌgõõla. 5Nĩngĩtĩ õõkõrĩ buul cĩg Ĩꞌthĩraẽlĩ ho hĩ eet ꞌcĩg õõ ũũta haal Ijjiba, hĩnĩngĩtĩ baa ĩĩ maka nyarõnĩ Kanaana buúk gẽrrẽẽt.

Aarĩk Yothebo ꞌgõtõõnõgĩ baabuuth

6Hĩnĩngĩtĩ baa Yothebo ꞌcĩ ĩĩn makayyioohit cĩ haalu Ijjiba, õõt akattieek ꞌgotoonoggia ĩnõõnnõ huruꞌnyia noho karabuk nẽ akatti hẽbẽrĩ looc. 7Ma baa adtuuha Yothebo ꞌgõtõõnõgĩ ho, agaõõthĩ ngaatĩ ĩĩnnĩ ĩhõõggõ nẽ aau hĩcĩ hõllõngaa aga ĩhõõggõ buúk. Ma ho, ijin ĩhõõggõ ngaꞌngaritta ĩĩnnĩk, “Iiginnu eet ꞌcĩg auunnu ĩĩna?”

Ẽdẽcĩ ꞌgotoonoggia anneek, “Hĩĩgĩnna eet ꞌcĩg haaunna looccaa cĩ Kanaanĩ, haĩ nuun hiita hutuuyyiawa haal ꞌcĩg abadtẽc.”

8Tananga baa aga Yothebo ꞌgõtõõnõgĩ, baa hõllõngaa aga ꞌgotoonoggia ĩnõõnnõ. 9Ma adtuuha Yothebo ĩhõõggõ ngaatĩ akannẽẽkĩ ĩnõõnnõ huruꞌnyia ho, ummuhunõõthĩ honoothi baa nĩnnĩ nẽ ũtũhũoothĩk ĩhõõggõ ĩĩnnĩk, “Aitiõõ hõllõngaa auunnu uuttu niig haala, iiginnu niig ꞌrootti ꞌcĩg auunnu oroottu looc cĩnaang.”

10Ẽdẽcĩ nẽẽg aĩ, “Hõllõngaa nohotaa makayyioohit, hĩĩgĩnna eeta eet haaga. Haaunna tũũwa diooni. 11Hĩĩgĩnna naag vẽlẽk ngaati ꞌgõtõn, hõllõngaa hĩĩgĩnna ꞌrootti.”

12Ẽdẽcĩ hinnia Yothebo ĩhõõggõ anneek, “Aitiõõ ũdũt! Iiginnu niig ꞌrootti ꞌcĩg au oroottu looc cĩnaang.”

13Ma athĩhĩ nẽẽg õbõdẽẽkĩ Yothebo thõõth icci tarĩ hoti ho, ẽddẽẽbta thõõth cĩnĩĩng jurrung ĩĩtõ “Hĩĩgĩnna baaĩ nuun lõhõlĩ cĩg eet hõdẽẽthõng. Baa hĩĩgĩnna õmmõtõ hĩ ꞌramma õlõõ cĩnaang Kanaana. Baa iittiõõ umwaa tõõ nẽ aayyiaa ꞌcĩ hidici õlõ arũmĩ hĩ nyakangaan.”

14Edecoothĩk hinnia Yothebo ĩhõõggõ anneek, “Iittiõõ thõõth umwaa ꞌcĩ haduhaakuung tõõ, iiginnu ꞌthẽk niig ꞌrootti. 15Má ẽppẽhannu, aitiõõ niig hõllõngaa ooyyu ĩĩmwaanĩ, ĩꞌthõng haꞌnyakia ꞌgotonu ꞌcĩ hidici ho ngaati! Hadiimi haꞌthalanaannuung naa ngagiita. Habũtani ꞌthaarĩĩ cĩg habu cĩ Ijjibi hũtũrũũr. 16Ĩꞌthõõc eet umwa hõrggẽẽnaa cunuung, hũũk haꞌnyaha ĩnõõnnõ. Nẽ niig ũgẽẽgĩ, ooyyu baabuutha, hátĩ hũmmũda naa hatĩ aduhaannu thõõth ꞌcĩ ĩĩn dĩdĩ. Má ummuddia thõõth cunuung ko ĩĩn õlõng, bũtĩ hĩ habuui, ĩko thĩ iiginnu ꞌrootti dĩdĩ.” 17Nĩngĩtĩ mĩĩ adhuhẽẽkĩ Yothebo ꞌgõtõõnõgĩ baabuuthatõõ waathinniook iyyio.

18Ma baa kõr ꞌcĩ ĩĩn iyyio, ikia ũũk uduhaak Yothebo ĩhõõggõ ĩĩnnĩk, “Hĩĩnĩ naa eet ꞌcĩ hiteelli Nyekuc. Má adĩmannu thõõth hĩcĩ haduha naa ho, arũgnu thĩ hatĩnĩ. 19Má aduhaannu thõõth ꞌcĩ ĩĩn dĩdĩ, itikta eet umwa hõrggẽẽnaa cunuung hidiongan baabuutha ngaati, hĩĩ nĩngĩtĩ occa ecebiinnu niig vẽlẽk, hátĩ ootti niig ũgẽẽgĩ haal hõõt heelito eet õlõ. 20Nẽẽthĩ, má õdõlattu, aꞌnyaktahaangu ꞌgotonu ꞌcĩ hidici ho dẽẽdẽ, hátĩ haga, hatĩ aduhaannu thõõth dĩdĩ. Nẽ thĩ hatĩ ũrũgtu.” Nĩngĩtĩ au ẽlẽmmĩ ꞌgotoonoggia thõõth cĩnnĩ ho.

21Ma nĩngaata noho, othoothito nyaagwaana ĩĩtõ, “Uukeet ꞌthẽk ngagĩĩt Nyekuci, hĩnĩngĩtĩ ꞌgotooneet baa hũũtẽnĩ naaga. Baa ꞌmẽr ĩĩlaleekeet gẽrrẽẽt, aalla hinnia hadĩĩtĩ naag pĩd noho.”

22Nẽ ẽdẽc ꞌRuubenĩ ĩĩnnĩk, “Nga baa huduhaahuung naa hiinnihuung, ma hadĩmannu buulenit ꞌbuth? Aitiõõ hinnia niig hõllõngaa athĩkneennu ũdũt! Nẽẽthĩ ꞌyioko, heteheelit thõõth cĩ daahĩth cĩnnĩ ho.” 23Baa hõllõngaa aga nẽẽg ngaatĩ agaĩ Yothebo thõõth ꞌcĩ õthõõth nẽẽg ko, hĩnĩngĩtĩ baa aaĩ ẽẽtĩ umwaa hõrggẽẽnaa cĩnĩĩng ꞌcĩ õkõbanaak Yothebo thooꞌthiok ꞌcĩg aduha ꞌgotoonoggia niccieeg ko. 24Nĩngĩtĩ ũũnnĩkĩ Yothebo ĩhõõggõ nẽ ũũk utulu ngadiiha, ma nĩngaata, õbõda ikia othoothĩk ĩhõõggõ tarĩ. Ma ho, ẽbẽra nẽẽ ꞌThimiõõnẽ nẽ aaꞌnyĩk hẽcẽbĩ hẽbẽrẽẽnnĩĩ ĩcĩggĩĩng vẽlẽk.

Ĩnĩhẽẽhĩ Yothebo ꞌrabbẽẽt lohoddwaanĩtõõ

25Ma baa idiimito oboddioothĩ ꞌgotoonoggia ĩĩcĩ olu, uduhaak Yothebo dticcianniook cĩgĩnnĩg haarrik haal lohoddwaanĩĩ cĩg ꞌgotoonogiinni nẽ uduhaak ĩhõõggõ hĩnĩktẽẽhĩ ꞌrabbẽẽt baag au ũũtĩ ꞌgotoonoggia haal lohoddwaanĩtõõ cĩggĩĩng, nẽ tarĩ uduhaak hũkũmattẽẽhĩ ꞌgẽẽn ꞌcĩ adahoothi ꞌgõõla buúk. Ma baa ĩdĩmanit dticcianniooha thooꞌthiok iccig ẽlẽk, 26iita odongteek ꞌgõtõõnõgĩ Yothebo lohoddwa thigirẽẽtĩ, nĩngĩtĩ õbõdõõꞌthĩ ĩĩcĩ olu.

27Ma baa ũũk abaalinẽẽhĩ lõõcĩ ꞌgõõla, ũũk õõg eet umwaa lohod cĩnnĩ, aĩ hadamutaak thigir cĩnnĩ haala, ammũda hinnia ꞌrabbẽẽt baagĩnnĩg lohodatõõ. 28Ma acĩn nẽẽ ꞌrabbẽẽt hoti ho, ukuleek ꞌjieen ĩĩ, “ꞌWui! Õbõdaaka occa gõõng hatĩ ẽẽtĩ ꞌrabbẽẽt cĩgannĩg inni? Ĩhõõggõ cieeg hammũda lohodatõõ ho!”

Ma acĩn nẽẽg vẽlẽk hoti ho, obooyyi ꞌthinneeti habathit dtẽc nĩngĩtĩ ajinõõnĩ nyaagwaana aĩnnĩ, “Adĩmanneet occa Nyekuci hutuno hõlõ?”

29Ma õdõlan nẽẽg maaꞌnyĩ Yakobo Kanaana ho, õõt uduktaak maaꞌnyĩ thõõth vẽlẽk anneek, 30“Ĩdĩmaneet makayyioohiti cĩ looc cĩ Ijjibi ꞌbuth. Õkõ akanneet hẽbẽrĩ nĩĩcĩ noho, aĩ hĩĩgĩnna ꞌrootti ꞌcĩg hõõ hõrõõtta looc cĩnĩĩng. 31Ma ho, huduktaaha hĩĩttĩha, ‘Hõllõngaa hĩĩgĩnna naag ꞌrootti, hĩĩgĩnna eeta eet haaga. 32Hĩĩgĩnna naag buul cĩg eet hõdẽẽthõng. Baa hĩĩgĩnna naag vẽlẽk õmmõtõ hĩ ꞌramma õlõ cĩnaang Kanaana. Nẽẽthĩ, baa ũũhĩ lõõcĩ hõdẽĩ nẽ aayyiaa ꞌcĩ hidici õlõ arũmĩ hĩ nyakangaan.’

33“Anneekeet hinnia ẽẽtĩ tĩho, ‘Hadiimi haꞌthalanaannuung naa ngagiita. Má aduhaannu thõõth ꞌcĩ ĩĩn dĩdĩ, itikta eet umwa hõrggẽẽnaa cunuung hidiongan hĩ nganĩĩt ngaati nẽ oottu niig ũgẽẽgĩ haal hõõt heelito eet õlõ. 34Nẽẽthĩ, má õdõlattu, aꞌnyaktahaangu ꞌgotonu ꞌcĩ hidici ho dẽẽdẽ, hátĩ haga hatĩ aduhaannu thõõth dĩdĩ. Nẽ hatĩ hõbõdaakuung ꞌgotonu, hátĩ utuuyyio lõꞌngõõc looccaa cĩ.’ ”

35Ma baa õõg nẽẽg lohoddwa ho, ammũda hinnia ꞌrabbẽẽt baag ũũtanĩ haal aattĩg ũtũgeetinii cĩg lohoddwaanu. Ma nĩngaata, uduktaak maaꞌnyĩ nĩngĩtĩ abarti nẽẽg vẽlẽk hĩ maaꞌnyĩ hõdẽĩ. 36Ma ho, õppõdan maaꞌnyia Yakobo ĩĩ, “Ucuddiaahaangu mĩĩ niig nganĩĩt lõhõlĩ hĩĩ ꞌthĩĩ! Iittiõõ Yothebo hĩ ꞌThimiõõnẽ tõõ, nẽ ꞌyioko idiimtu tarĩ oottu Benyemiino buúk? Hõlõ ĩdĩmanaa lõõcĩ ꞌbuth ꞌgiiaa vẽlẽk!”

37Ma nĩngaata, edecoothĩk ꞌRuubenĩ maaꞌnyĩ ĩĩnnĩk, “Ĩꞌnya nganĩĩt dẽẽdẽ haggameek Benyemiino aꞌthiit ĩꞌthõng hõbõdaaĩ ngaati. Má hõllõngaa hõbõdaanĩ, ruuk lõhõlĩ aagannĩg maacĩg ĩĩn ꞌramma hĩ hẽbẽrĩ nĩnga.”

38Ẽdẽcĩ hinnia maaꞌnyia anneek, “Aitiõõ loholeec caannĩ hõllõngaa õkõ ĩĩmwaanĩ. Baa aggamaawa ꞌgõtõnĩ lõõcĩ nẽ idiongan ꞌyioko nẽẽ õdõĩ hĩ tiitiniti cĩ hoodo. Hatahaanya ꞌyioko naana, má da hatĩ hũũk hudhukiaak ĩnõõnnõ buúk bathi ꞌgõõla, aꞌnyahaaka hinnia hatĩ mothiiniti cĩnnĩ nganĩĩt daahĩth.”

Currently Selected:

ꞌThianaattõ 42: did

Highlight

Copy

Compare