ꞌThianaattõ 41

Honoothi cĩ habuuo

1Ma urutaa cĩ irkiꞌnyia ꞌramma, ikiaak habu honoothi umwaa ꞌcĩ ꞌrĩĩng. Ohonooꞌthi nẽẽ abĩlĩ dẽmẽtaa cĩ hidioo ꞌcĩ haĩ Naaĩl. 2Ma nĩngaata, udtuuha tĩĩn tũrkĩramma ꞌcĩg adĩhĩ hĩĩtõ lũlũlũlũ adukna hidiaatõõ nĩĩcĩ nẽ iita ẽgẽẽcõ dẽmẽta. 3Ma hĩdĩĩkoothong, udtuuha tĩĩn ũgĩ tarĩ tũrkĩramma ꞌcĩg dtõkõrĩk gẽrrẽẽt, adukna hidiaatõõ cĩ Naaĩlĩ nẽ iita ĩbĩlĩt ngadiiha hõbõktõ hĩ ꞌgõõnõgĩ ꞌcĩg abĩlĩ dẽmẽtaa cĩ hidioo ho. 4Ma ngaati, ĩtĩngaayyik tĩĩna ꞌcĩg dtõkõrĩk ko ꞌgõõnõgĩ ꞌcĩg adĩhĩ ho nẽ adahit hĩĩ lõõcĩ ꞌthĩĩ. Nĩngĩtĩ acĩnẽẽnĩ habuui.

5Ma baa ohoddia habu ũꞌnyaaha tarĩ, ikia õhõnõõthĩ tarĩ. Ohonooꞌthi aattĩ adtuuha ooti tũrkĩramma cĩg haal ꞌcĩg accawana bahaalitooca hõdẽẽthõng. Baa abbiiri ooti ꞌcĩg ĩĩn tũrkĩramma hĩĩtõ tũdũddũng. 6Ma tarĩ ho, accawatta ooti ũgẽẽgĩ ꞌcĩg ĩĩn tũrkĩramma tarĩ ꞌcĩg atũũth ngõõtĩ ꞌcĩ uuhana ĩĩcĩ uruto. 7Ma hĩdĩĩkoothong, ĩtĩngaayyik ooti cĩg haalu ꞌcĩg uwwatan ko ꞌcĩg abbiiri, nĩngĩtĩ akuui ĩhõõggõ noho ũthaac ũthaac hĩĩ lõõcĩ ꞌthĩĩ. Nĩngĩtĩ acĩnẽẽnĩ habuui.

8Ma loohoth cĩnnĩ, ĩĩ habu ꞌthĩnĩt cadũũng cadũũng, nĩngĩtĩ ĩꞌthõõĩ dticcianniook cĩgĩnnĩg hõõt huluttia ngarĩt hĩ ꞌgeeꞌnyiak vẽlẽk cĩg looc cĩ Ijjibi, hiita õlõõ cĩnnĩ. Ma nĩngaata, ẽdtẽbanaak habuui ĩhõõggõ honoothi cĩnnĩ ho. Ammũdeek hinnia hiꞌthihi eet umwa ꞌcĩ occa ẽbẽanaak ĩnõõnnõ thõõth cĩ honoothi cĩnnĩ ho ũdũt.

9Nĩngĩtĩ ĩꞌngaannĩ makayyioohiti cĩ eet ꞌcĩg aaꞌnyĩk habu mẽrtĩ baa ooggiaa baabuutha nẽ ĩĩnnĩk habu, “Hummuhunootha naa ꞌthẽccan baa nannĩ kõr nicci. 10Baa aliillihi nii makayyioohit ꞌcĩ ĩwaad ũbũnẽẽt nẽ ĩlĩĩlĩeehaa nganĩĩt buúk nẽ aarĩheet baabuutha halaangatõõ cĩ makayyioohit cĩ bekioohu. 11Nẽ baa akuunakeet honoothi umwaa ꞌcĩ ꞌrĩĩng kõr umwa baal ngagĩĩt ꞌrammaattĩg. Baa aꞌnyak honoothiniti caannĩ thõõth cĩnnĩ ẽmmẽn nẽ aꞌnyak cĩ ꞌgoonona buúk thõõth cĩnnĩ ẽmmẽn. 12Nẽẽthĩ, baa ammũdeek aaĩ buuleniti umwaa ꞌcĩ ĩĩn Ebereeinit nĩngaata, ꞌcĩ baa ĩĩn appahaca cĩ Potivarẽ. Ma baa haduhaaka ĩnõõnnõ honoothi cĩnaang ko, ikia ẽbẽanaaheet thooꞌthiok cĩg honoothi cĩnaang ko. 13Ma waathinnioohĩĩ ꞌcĩg ĩĩn iyyio ho, ikia edeeꞌnyia thõõth tĩho ĩĩ dĩdĩ. Ikia obodeeka nii nganĩĩt dtiicaa baa nannĩ haau hĩĩ ꞌyioko ho nẽ itithinguu makayyioohit baa tukurrioohu hadaak.”

14Ma athĩhĩ habuui thõõth icci hoti ho, ĩꞌthõ eet ũgĩ nĩĩcĩ noho hõõt hõõgta Yothebo baabuuthatõõ, hátĩ hikia hẽbẽanaak habu thõõth cĩ honoothi cĩnnĩ ho. Ma baa õõgta nẽẽg Yothebo, aanytĩk hũtũhũũca camũn cĩgĩnnĩg nẽ itihim ceremwa ꞌcĩg tẽllĩg hataman, nĩngĩtĩ õõĩ ĩnõõnnõ ĩĩcĩ õlõ cĩ habuuo.

15Ma nĩngaata, ũũk ĩĩnnĩk habuui Yothebo, “Haꞌnyahi honoothinit ꞌcĩ aꞌnyaman eet vẽlẽk thõõth cĩnnẽẽnĩ. Ma ꞌcĩ hathiknii aĩ aga ngaatĩ occa ẽbẽanaanĩ honoothi ꞌcĩ aaĩ hoti.” 16Ẽdẽcĩ Yothebo habu anneek, “Hõllõngaa nganĩĩt ꞌcĩ hẽbẽanaakii thõõth icci ho. Nyekuc ꞌcĩ hatĩ ẽbẽanaaki thõõth cĩ honoothi cunni ho.”

17Ma nĩngaata, iꞌthianaaĩ habuui uduha honoothinit cĩnnĩ ho ĩĩ, “Hohonooꞌthi habili dẽmẽtaa cĩ Naaĩlĩ. 18Ma nĩngaata, hĩcĩna tĩĩn tũrkĩramma ꞌcĩg adĩhĩ hĩĩtõ lũlũlũlũ adukna hidiaatõõ nĩĩcĩ nẽ iita ẽgẽẽcõ ĩhaõõnnĩtõõ. 19Ma urutaa cĩnnĩ, hudtuuha tĩĩn tũrkĩramma tarĩ ꞌcĩg dtõkõrĩk gẽrrẽẽt, adukna hidiaatõõ nĩĩcĩ dioo nẽ iita ĩbĩlĩt ngadiiha hõbõktõ hĩ ꞌgõõnõgĩ ꞌcĩg abĩlĩ dẽmẽtaa cĩ hidioo ho. Tĩĩn ũgĩ ꞌcĩg dtõkõrĩk ꞌcĩg nga hĩcĩn nganĩngĩtĩ harittiaanĩ. 20Ma ngaati, ĩtĩngaayyik tĩĩna ꞌcĩg dtõkõrĩk ko ꞌgõõnõgĩ ꞌcĩg adĩhĩ ho nẽ adahit hĩĩ lõõcĩ ꞌthĩĩ. 21Ma adak ꞌgõõnõgĩ niccig ꞌtẽl ko, hacini tarĩ aalla aꞌnyavvaaddi haauto hĩcĩ hatĩ nga hatarit ꞌgiimwa ũdũt.

22“Ma urutaa cĩnnĩ, hõhõnõõthĩ tarĩ. Hohonooꞌthi aattĩ hadtuuha ooti tũrkĩramma cĩg haalu ꞌcĩg accawana bahaalitooca hõdẽẽthõng. Baa abbiiri ooti ꞌcĩg ĩĩn tũrkĩramma ho hĩĩtõ tũdũddũng. 23Ma hĩdĩĩkoothong, iita accawatta ooti ũgẽẽgĩ ꞌcĩg ĩĩn tũrkĩramma tarĩ ꞌcĩg uwwatanĩ, hĩnĩngĩtĩ baa aku atũũthĩ ngõõtĩ ꞌcĩ uuhana ĩĩcĩ uruto. 24Ma nĩngaata, ĩtĩngaayyik haala ꞌcĩg uwwatan ko ꞌcĩg abbiiri ho, nĩngĩtĩ akuui ĩhõõggõ noho ũthaac ũthaac hĩĩ lõõcĩ ꞌthĩĩ. Ma haduhaahi ngarĩt haini, hátĩ hẽbẽattaaha honoothinit caannĩ ho, ẽbẽka hinnia muguruur noho.”

25Ma nĩngaata, ẽdẽc Yothebo habu ĩĩnnĩk, “Ĩĩn nganiit honoothiniti cunni ho hõdẽẽthõng. Uppulanaahi nganiit Nyekuci ꞌgii ꞌcĩ hatĩ õkõ adĩman nẽẽnĩ. 26Acini tĩĩn ꞌcĩg ĩĩn tũrkĩramma ꞌcĩg adĩhĩ hĩĩtõ lũlũlũlũ ho, ĩthakꞌthoothĩk irkiꞌnyia tũrkĩramma. Nẽ ooti cĩg haalu ꞌcĩg ĩĩn tũrkĩramma ꞌcĩg abbiiri hĩĩtõ tũdũddũng ko buúk, ĩthakꞌthoothĩk irkiꞌnyia tũrkĩramma buúk. 27Nẽ tarĩ tĩĩna ꞌcĩg dtõkõrĩk hĩ ooti cĩg haal ꞌcĩg uwwatan, hĩnĩngĩtĩ atũũth ngõõtĩ ꞌcĩ uuhana ĩĩcĩ uruto ho, ĩthakꞌthoothĩk irkiꞌnyia tũrkĩramma cĩg nyarõnaak.

28“Thõõth aa huduhaahii naa nganiit habuu ẽlẽk ciee hiinnihii, uppulanaahi Nyekuci nganiit thõõth ꞌcĩ hatĩ õkõ adĩman nẽẽnĩ. 29Irkiꞌnyiaannĩĩ ꞌcĩg hatĩ ĩĩn tũrkĩramma, abatan hatĩ ꞌgẽẽn looc cĩ Ijjibi hũtũrũũr. 30Nẽẽthĩ urutaa cĩnnĩ, anũẽẽkĩ hatĩ irkiꞌnyia tũrkĩramma tarĩ cĩg nyarõn ꞌcĩ abathĩ dtẽc. Acũda hatĩ nyarõnĩ ciee looc ĩꞌthõng hataarriothĩ eeta irkiꞌnyia baag abatanĩ ꞌgẽẽn Ijjiba. 31Ataarrothi hatĩ eeta irkiꞌnyia baag abatanĩ ꞌgẽẽn, hĩnĩngĩtĩ maka hatĩ nyarõnĩ ꞌcĩ anũẽẽkĩ ho gẽrrẽẽt. 32Ẽttẽẽd Nyekuci thõõth icci ẽlẽk, ĩnõõ ꞌcĩ aaꞌnyi nganiit hõnõõthĩ tabattĩ ꞌramma ho habuu. Adtican hatĩ ꞌthẽk nẽẽ authet icci hĩdĩĩkoothong.

33“Nẽẽthĩ ꞌyioko habuu, diima eet umwa ꞌcĩ aꞌnyak ꞌgẽẽnyĩth nẽ aaꞌnyĩhuu mĩĩ hĩĩ makayyioohit cĩ thõõth icci Ijjiba hũtũrũũr. 34Aꞌnyĩĩk habu haarĩk makayyiook cĩg lootu ꞌcĩg alũta haal ꞌcĩg õhõwa eeta Ijjiba vẽlẽk irkiꞌnyiaannĩĩ ꞌcĩg ĩĩn tũkĩramma ĩcĩg abatanĩ ꞌgẽẽn ko. 35Nẽ aꞌnyĩĩk ꞌthẽk makayyiook tĩko makaaꞌthĩt cĩ habuuo ꞌcĩ alũtaanĩ haal irkiꞌnyiaannĩĩ ꞌcĩg nga abbiirri lõõcĩ ho nẽ athaddieek ĩragẽẽt ꞌtaaũnnioohĩ. 36Aꞌnyĩĩk haal niccig hẽrẽẽcõ irkiꞌnyia ꞌcĩg ĩĩn tũrkĩramma ꞌcĩg hatĩ adhukiaakĩ nyarõnĩ looc cĩ Ijjibi ho, hátĩ hiittiõõ nyarõnĩ hõllõngaa acũda looc.”

Eberria Yothebo hĩĩ Makayyioohit Ijjiba

37Baa adtuuha habuui hĩ ꞌgaala cĩgĩnnĩg thõõth icci aaĩ hĩcĩ abũnnaa. 38Nĩngĩtĩ annẽẽkĩ habuui ꞌgaala cĩgĩnnĩg ko vẽlẽk, “Aitiõõ ẽẽtĩ umwaa ꞌcĩ occa ũũlũ thõõth icci ꞌcĩ ĩllõõan Yothebo tõõ, hĩnĩngĩtĩ aggameek Lorii cĩ Nyekuci ĩnõõnnõ aꞌthiit.” 39Ma ngaati noho, uduhaak habuui Yothebo ĩĩnnĩk, “Nyekuc ꞌcĩ eterꞌtheeki nganiit gaa thooꞌthiok iccig ko. Aitiõõ ẽẽtĩ umwaa ꞌcĩ ẽggẽẽnyĩth haau hĩ nii tõõ. 40Hẽbẽraaii naa nganiit ĩĩ makayyioohit cĩ õlõ caannĩ nẽ athikni hatĩ gõõng eeta cĩg õlõ caannĩ vẽlẽk nganiita. Nganiit hatĩ ꞌcĩ anũeeka nganĩĩt dtaabawa cĩ makaaꞌthĩtõõ.” 41Nĩngĩtĩ annẽẽkĩ habuui Yothebo, “Hẽbẽraaii naa nganiit kõr nicci iinu ꞌgaalac cobbi looccaa cĩ Ijjibi ho vẽlẽk.”

42Nĩngĩtĩ appũrccaanĩ habuui maccĩreenit cĩ makaaꞌthĩtõõ#41:42 Maccĩreenit cĩ makaaꞌthĩtõõ: Maccĩreeniti ꞌcĩ aaꞌnyĩk habuui cĩ Ijjibi Yothebo ho, aĩ aaꞌnyĩk habuui Yothebo makaaꞌthĩt ꞌcĩ aduhaakĩ eet cĩg Ijjibi thõõth ꞌthaarĩ cĩg habuuak. attiaa cĩnnĩ nẽ itihimẽẽhĩ Yothebo. Nẽ tarĩ itihimẽẽhĩ ceremwa ꞌcĩ ẽllẽẽmĩth buúk nẽ aarĩhĩ nyerikooc ꞌcĩ ĩĩn ꞌdaab iꞌnyiaawa. 43Ma ho, aaꞌnyĩk habuui Yothebo huꞌthuhan nyangõõllẽẽ ꞌcĩ agurut ꞌgadiggadi ꞌcĩ anũẽẽkĩ cĩnnĩ nẽ awacahit eeta ĩĩtõ, “Ẽꞌnyẽẽktĩ, ũtũngtẽẽhĩ Yothebo ꞌgõõl, hĩnĩngĩtĩ ĩĩ nẽẽ ꞌgaalac cĩ Ijjibi.” Ẽbẽra habuui ĩnõõnnõ hĩĩ ꞌgaalac cĩ Ijjibi hũtũrũũr.

44Ma uruta, ikia ĩĩnnĩk habuui Yothebo, “Tananga hĩĩnĩ habu, hiꞌthihi hatĩ eet ꞌcĩ adtican ꞌgii umwa hode ꞌcĩ õvvõ tahatak looccaa cĩ Ijjibi ho hatĩ nga duha niina.” 45Nĩngĩtĩ akannẽẽkĩ habuui Yothebo ꞌthaar ꞌcĩg haĩ Thavẽnath Panẽa nẽ ũꞌthũwanaak bũhẽẽc ꞌcĩ haĩ Athẽnath. Baa ĩĩn bũhẽẽcĩ ciee tĩnaatĩ ngarĩ umwa ꞌcĩ haĩ Potivẽra paadĩr cĩ ꞌtaaũn cĩ Õõnĩ.#41:45 Paadĩr cĩ ꞌtaaũn cĩ Õõnĩ: Baa ala paadĩrĩ ciee kõr hĩĩ nyekuc. Nĩngĩtĩ aku õvvõõĩ Yothebo looc cĩ Ijjibi vẽlẽk.

46Baa ĩĩn Yothebo irkiꞌnyia hẽẽn iyyio baa irkit ꞌcĩ eberriaanĩ hĩĩ makayyioohit ko. Ma ngaati, ĩtĩnga nẽẽ ũtũngeek habu nẽ ũũk õtõõĩ looc cĩ Ijjibi hũtũrũũr. 47Baa abbiiri lõõcĩ gẽrrẽẽt irkiꞌnyiaannĩĩ ꞌcĩg ĩĩn tũrkĩramma, ĩbaag nga hikiaaĩ nyarõnĩ. 48Nẽ irkiꞌnyiaannĩĩ tĩko, baa alũta Yothebo haal Ijjiba hũtũrũũr nẽ athadeek ĩragẽẽtĩ ꞌtaaũnnioohĩ. Baa alũt nẽẽ haal nẽ aarĩk ꞌtaaũnaa ꞌcĩ õbõhõõ hĩ olooyyiok tĩko. 49Baa ocooddiaa ꞌgii ꞌcĩ haĩ haalit hẽtẽyẽẽhĩ haau hĩ hathaac haaga. Baa attĩman Yothebo haal ĩꞌthõng hanyamattõõ.

50Ma baa nga hikia nyarõnĩ, iita aꞌnyahit Yothebo hĩ Athẽnath tĩnaatĩ Potivẽra paadĩr cĩ ꞌtaaũn cĩ Õõnĩ ho, lõhõlĩ ꞌramma ꞌcĩg maacĩg. 51Baa akanneek Yothebo ꞌcĩ oou ꞌthaar ꞌcĩg haĩ Manaaꞌthe.#41:51 Manaaꞌthẽ: Aĩ ꞌthaara ꞌcĩg haĩ Manaaꞌthẽ ho Ebereeiyyi, aaꞌnya Nyekuci hataaroth. Ma ho, õthõõth ĩĩ, “Haĩ loholeec icci Manaaꞌthe, hĩnĩngĩtĩ aaꞌnya Nyekuci hataaroth tamaati caannĩ vẽlẽk hĩ õlõ cĩ baaba buúk.” 52Ma baa urutaa cĩnnĩ, ikia akateek ꞌcĩ anũẽẽkĩ ꞌthaar ꞌcĩg haĩ Evaraim#41:52 Evaraim: Aĩ ꞌthaara ꞌcĩg haĩ Evaraim ko Ebereeiyyi, Hittira lõhõlĩ. nẽ tarĩ õthõõth ĩĩ, “Haĩ icci Evaraim, hĩnĩngĩtĩ aꞌnya Nyekuci hittira lõhõlĩ looccaa cĩ tamaati caannĩ ho.”

53Ma baa ũttũbattoothĩk irkiꞌnyia tũrkĩramma baag abatanĩ ꞌgẽẽn looc cĩ Ijjibi vẽlẽk, 54ikia udhukia nyarõnĩ ꞌcĩ adak eet irkiꞌnyia tũrkĩramma habath lõõcĩ dtẽc, hĩ baa aduha Yothebo. Baa adhukiaak nyarõnĩ ciee loonyin vẽlẽk. Nẽẽthĩ, baa Ijjib dioo ꞌcĩ maka ꞌgẽẽna. 55Ma baa aabur nyarõnĩ Ijjiba padtahac, iita utuluuyyik eeta habu, nĩngĩtĩ ĩꞌthõõĩkĩ habuui ĩhõõggõ ꞌgõõl annẽẽkĩ, “Õõt ummuddioothĩk Yothebo nẽ ĩdĩmattu ꞌgii vẽlẽk ꞌcĩ aduhaakuung nẽẽnĩ.”

56Ma baa ꞌthẽk ahahat nyarõnĩ Ijjiba dtum, ikia idtingan Yothebo ĩragẽẽt nẽ ũtũũõĩ haal hĩ eet cĩg Ijjibi, hĩnĩngĩtĩ baa ĩꞌthanothoothĩk nyarõnĩ ciee Ijjib hũtũrũũr. 57Nĩngĩtĩ allũnganiini eeta loonyini vẽlẽk õõĩ Ijjiba hõõt hũttẽẽcõ haal hĩ Yothebo, hĩnĩngĩtĩ baa ĩꞌthaan nyarõnĩ tĩho looc vẽlẽk.

Currently Selected:

ꞌThianaattõ 41: did

Highlight

Copy

Compare