ꞌThianaattõ 39

Yothebo hĩ ngaa cĩ Potivarẽ

1Ma baa ootti eeta cĩg Ithimaĩlĩ Yothebo Ijjiba, õõt utuuyyiõĩ nẽẽg ĩnõõnnõ hĩ eet ꞌcĩ haĩ Potivarẽ ꞌcĩ ĩĩn makayyioohit cĩ ũũrũta ꞌcĩg ẽbẽk habu cĩ Ijjibi.

2Nẽ baa aaĩ Makayyioohiti hĩ Yothebo nẽ aaꞌnyĩk ĩnõõnnõ habalõ, baa aaĩ nẽẽ ꞌcieethaa cĩ ꞌgaalac cĩnnĩ cobbi cĩ Ijjibi. 3Ma baa adtuuha ꞌgaalacĩ ciee ngaatĩ aꞌthũũnnĩ Makayyioohiti Nyekuci Yothebo gẽrrẽẽt ngaatĩ aaꞌnyĩkĩ hĩĩ buulenit ꞌcĩ alalĩ ꞌthĩnĩt kũc ko, 4ikia aꞌnyĩĩk nẽẽ Yothebo hĩĩ bekioohit cĩnnĩ nẽ aaꞌnyĩk hũꞌthũũtĩ ijjio cĩg halang cĩnnĩ vẽlẽk. 5Nganĩngĩtĩ kõr ꞌcĩ aaꞌnyĩhõõthĩkĩ Yothebo makaaꞌthĩt cĩ õlõ cĩnnĩ hĩ ijjio baagĩnnĩg, iꞌthianaaĩ aggatan Makayyioohiti õlõ cĩ Potivarẽ, hĩnĩngĩtĩ Yothebo. Baa akũmanoothĩk hẽlẽggĩ cĩg õlõ cĩnnĩ vẽlẽk jurrung nẽ ittirit manẽẽna hĩ hẽlẽggĩ cĩgĩnnĩg vẽlẽk jurrung. 6Ma baa ikia aꞌnyĩĩk Potivarẽ Yothebo makaaꞌthĩt ꞌcĩ aꞌthũũnnĩ halang cĩnnĩ, baa aallak Potivarẽ ꞌgẽẽn ꞌcĩ adak thõng diooni nẽ ĩĩ Yothebo ꞌcĩ aga autheꞌnya cĩg õlõ cĩnnĩ vẽlẽk.

Ma baa irkiꞌnyia nicciag, ikia ĩtĩlĩtha Yothebo ĩĩ eet ꞌcĩ vikahĩ nẽ ẽllẽẽm gẽrrẽẽt, 7nĩngĩtĩ aku abũranẽẽkĩ ngaa cĩ makayyioohit cĩnnĩ ho nẽ allaba ĩnõõnnõ kõr umwa waath ĩĩnnĩk, “Ijjia baaĩ hõõt hatagguuth hõdẽĩ.”

8Abũrĩ hinnia Yothebo thõõth nicci nĩngĩtĩ ẽdẽcĩ ngaa nicci annẽẽkĩ, “Hattiha occa gõõng ꞌthĩnĩt ꞌcĩ occa hadĩmanĩĩ thõõth ꞌcĩ aaĩ noho ho ngaana? 9Haga ngaatĩ ũũnnĩka baattĩ olu makaaꞌthĩt ꞌcĩ haggamĩ ꞌgii vẽlẽk cĩ õlõ icci, nẽẽthĩ hinnia, nga haaꞌnya makaaꞌthĩt cĩ occa hooginni hĩ nganiita. Hõllõngaa occa hadĩmani thõõth ꞌcĩ aaĩ hoti, hĩnĩngĩtĩ ĩĩn ꞌthẽccan hĩ Nyekuc.” 10Baa ĩĩdĩ ngaa cĩ ꞌgaalacõ ho Yothebo waathinniook ꞌcĩg mẽẽlĩg ꞌrĩng nẽ aalla abũrĩ Yothebo thõõth cĩnnĩ ho noho nẽ tarĩ ũtũbũr ngaatĩ occa õbõhõõnĩ hĩ ngaa nicci haaga buúk.

11Ma kõr umwa, ũũk idticanõõ Yothebo ꞌcieethaa cĩ makayyioohit cĩnnĩ nẽ baa nga aattiyyiaa dticcianniooha ꞌcĩg gõõng adticanni hĩ ĩnõõnnõ hõdẽĩ battaala. 12Ma ho, aku hinnia aggam ngaa nicciee Yothebo cẽrẽm pik nẽ ĩĩnnĩk, “Ijjia hõõt hatagguuth hõdẽĩ.” Ma nĩngaata, appũrccaak hinnia Yothebo ngaa cĩ makayyioohit cĩnnĩ ho cẽrẽm noho pũrũc nẽ ukul ũũk battaala.

13Ma baa adtuuha ngaa nicciee ngaatĩ appũrccaakĩ Yothebo cẽrẽm cĩnnĩ athĩnĩĩ cĩgĩnnĩg ko, 14ũtũvva dticcianniook cĩg halang cĩnnĩ vẽlẽk nẽ ĩĩnnĩk, “Ĩcĩnĩt nõõ! Aaĩ occa gõõng Ebereeiniti ciee nẽ idiim aara hĩĩ ngaa cĩnnĩ inni? Aku aduknaaka ngaati noho nẽ aggamaanĩ, nĩngĩtĩ hoꞌngonyoonna nẽ hũppũrũcaa cẽrẽm cĩnnĩ noho pũrũc, nĩngĩtĩ hõkõlẽẽkĩ luulu. 15Ma adtuuha hadtahi luulu ho, ulub ngaati noho puruth hũtũngeeka cẽrẽm cĩnnĩ ho ngaati.”

16Nĩngĩtĩ iyyangꞌthĩ ngaa nicciee cẽrẽm cĩ Yothebo ho ĩꞌthõng hõbõda maac cĩnnĩ ĩĩcĩ baa õkõõĩ. 17Ma baa uppwaanna maac cĩnnĩ ho, ikia uduhaak ĩĩnnĩk, “Aaĩ occa gõõng appahaca aa nunni ĩĩn Ebereeinit ngaati hutuno? Aku ngaati noho nẽ idiim aara hĩĩ ngaa cĩnnĩ. 18Ma adtuuha hadtahi luulu ho, ulub ngaati noho puruth hũtũngeeka cẽrẽm cĩnnĩ ho ngaati.”

19Ma athĩhĩ makayyioohiti cĩ Yothebo thõõth icci ho, ĩlĩĩlĩ hõdõhõk hẽẽng kak. 20Ma ꞌthẽk ko, aggam Yothebo nẽ ũũhĩ baabuuthaa ꞌcĩ gõõng ecebiini baabuuthnya cĩg habuuak.

Ma baa aarĩhoothĩk Yothebo baabuuthatõõ, 21ũũk ẽẽl Makayyioohiti ĩnõõnnõ nẽ accamana gẽrrẽẽt nẽ tarĩ aaꞌnyĩk ꞌgaalac ꞌcĩ ẽbẽk baabuuthnya buúk hĩĩ tarbal hĩ ĩnõõnnõ. 22Nĩngĩtĩ ẽbẽraanĩ ꞌgaalacĩ cĩ baabuuthnyanu ho Yothebo hĩĩ makayyioohit cĩ baabuuthnyanu, hĩ dtiic vẽlẽk ꞌcĩ adtican baabuuthnya. 23Ma baa ikia ĩĩ Yothebo makayyioohit cĩ baabuuthnyanu, iittiõõ authetĩ ꞌcĩ occa nga ommothiini ꞌgaalacĩ cĩ baabuuthnyanu tarĩ tõõ, hĩnĩngĩtĩ baa aaĩ Makayyioohiti Nyekuci hĩ Yothebo nẽ baa õvvõ dtiici vẽlẽk ꞌcĩ adtican nẽẽ jurrung.

Currently Selected:

ꞌThianaattõ 39: did

Highlight

Copy

Compare