ꞌThianaattõ 33
33
Ommottio Yakobo hĩ Eꞌthaau
1Ma baa ĩtĩnga Yakobo ũtũngeek Penieele, acĩnoothi hinnia Eꞌthaau ngaatĩ õõkõraanĩ hĩ eet ꞌcĩg maacĩg ꞌcĩg ĩĩn ꞌmiiaꞌnya ꞌwec ko. Ma nĩngaata, uduhaak nẽẽ lõhõlĩ hũrũmtĩ hĩ ngaaggi cũũmõ cũũmõ. Aaꞌnyĩk Lẽẽa hũrũmtĩ hĩ cĩgĩnnĩg, Rakĩlẽ hĩ cĩgĩnnĩg nẽ ũrũmtĩ ngaaĩ ꞌramma baag ĩĩn dticcianniook buúk hĩ lõhõlĩ cĩggĩĩng. 2Ma ho, ikia ũkũmaneek Yakobo ngaaĩ ꞌcĩg ĩĩn dticcianniook hĩ lõhõlĩ cĩggĩĩng haauto ĩĩcĩ oou, nẽ unuyyiẽẽhĩ Lẽẽa hĩ lõhõlĩ cĩgĩnnĩg, nẽẽthĩ, udtuurria Rakĩlẽ hĩ ngeerĩnĩ Yothebo. 3Nĩngĩtĩ uwwattẽẽkĩ Yakobo ngaaĩ cĩgĩnnĩg vẽlẽk. Ma baa õbõktõ nẽẽ hĩ ꞌgõtõnĩ, ũũk akateek ĩnõõnnõ huruꞌnyia tabattĩ tũrkĩramma.
4Aira hinnia Eꞌthaau hikia harabũũt Yakobo nẽ ĩꞌthaayyio gẽrrẽẽt taliitta, nĩngĩtĩ akannĩ nẽẽg vẽlẽk ulwa. 5Ma nĩngaata, ĩcĩn Eꞌthaau ngaaĩ hĩ lõhõlĩ nẽ ijin ꞌgõtõnĩ ĩĩnnĩk, “Cĩg nganĩ eeta cieeg õõkõraannu ho?”
Ẽdẽcĩ Yakobo anneek, “Ĩĩn cieeg lõhõlĩ ꞌcĩg baag aaꞌnya Nyekuci mĩnnaniitta cĩnnĩ.” 6Nĩngĩtĩ auuni ngaaĩ baag ĩĩn dticcianniook ko hĩ lõhõlĩ cĩggĩĩng vẽlẽk nẽ akattieek Eꞌthaau huruꞌnyia. 7Ma nĩngaata, unuyyiẽẽhĩ Lẽẽa hĩ lõhõlĩ cĩgĩnnĩg iita akatit huruꞌnyia. Ma urutaa cĩnĩĩng, iita akatit Rakĩlẽ buúk hĩ ngeerĩnĩ Yothebo huruꞌnyia.
8Ma baa ĩꞌthaayyio nẽẽg ẽlẽk, ijin Eꞌthaau Yakobo ĩĩnnĩk, “Cĩheeggi hẽlẽggĩ ꞌcĩg ĩꞌthõõakaa hommotoonna ꞌgõõla ho?”
Ẽdẽcĩ Yakobo anneek, “Ĩĩn ꞌbaaninit ꞌcĩ nuun haaꞌnyii naa nganiit, hátĩ haaut lõꞌngõõc.”
9Ẽdẽcĩ hinnia Eꞌthaau anneek, “ꞌGõtõna, habalõ naa buúk gẽrrẽẽt. Ma haaꞌnyaa ꞌgiimwa, ꞌthũũtĩ ꞌcĩg adiim aaꞌnyaa ho hĩĩtõ cugunnig.”
10Ẽdẽcĩ Yakobo anneek, “Aitiõõ ẽlẽ, má nuun accamanannaanĩ, lẽẽm ꞌbaaninit caannĩ ho. Nẽ ꞌyioko, ma hacinnii nganiit ngaatĩ accamanaanna nganĩĩt hoti ho, aaĩ hĩcĩ hacini muum cĩ Nyekuci. 11Baa aaꞌnya nganĩĩt Nyekuci ꞌgii vẽlẽk ꞌcĩ hadiimi. Ẽlẽ, lẽẽm nuun ꞌbaaninit ꞌcĩ haꞌnyahaakii ho.” Baa ara Yakobo ĩĩlaleek Eꞌthaau ĩꞌthõng hẽlẽm.
12Ma urutaa ꞌcĩ ẽlẽmĩ Eꞌthaau ꞌbaaninit cĩ Yakobo ho, ikia õthõõth ĩĩ, “Hũkũmattoothĩk thĩ hátĩ hĩtĩngaac.”
13Ẽdẽcĩ hinnia Yakobo ĩnõõnnõ anneek, “Makayyioohit caannĩ, nga hĩdĩcĩg lohollia nẽ tarĩ ippiirria ẽẽtha hĩ mĩꞌnyõ hĩ tĩĩn hĩ maala buúk. Aꞌnyaa hiitowa ĩhõõggõ uruta hĩdĩĩc hĩdĩĩc. Má habũũhaneehi weet huutub, occa hinnia hatĩ adaahĩ hĩĩ ꞌthĩĩ. 14Tuanĩ nẽẽ niina makayyioohit caannĩ, hanũaannii nuun hatĩ naa hĩ lõhõlĩ uruta hĩdĩĩc hĩdĩĩc, ĩꞌthõng hõdõlanii nganiit looccaa cĩ Edomĩ, makayyioohit caannĩ.”
15Ẽdẽcĩ Eꞌthaau Yakobo anneek, “Abũnnaa, ĩꞌnya thĩ hutungeeki eet ũgĩ eetinii ĩcĩgannĩg ko hebekti nganiita.”
Ẽdẽcĩ Yakobo anneek, “Aitiõõ hõllõngaa aaddi, ũũppanaa nganĩĩt thõõth ꞌcĩ ẽlẽmma nii nganĩĩt taliitta makayyioohit caannĩ.” 16Nĩngĩtĩ õbõdõõꞌthĩ Eꞌthaau Edoma. 17Ma baa ũũk Eꞌthaau ẽlẽk, ĩꞌngaathĩ hinnia Yakobo õkõ ĩĩcĩ looc umwa ꞌcĩ haĩ Thukoth. Nĩngĩtĩ õkõ õlõmanẽẽkĩ hõrõõk ĩtĩho. Ĩnõõ ꞌcĩ akannõõthĩkĩ looc tĩho ꞌthaara ꞌcĩg kaĩ Thukoth#33:17 Thukoth: Aĩ ꞌthaara ꞌcĩg haĩ Thukoth ho Ebereeiyyi, tuggẽẽt. ko.
Uppwaanĩ Yakobo ꞌThẽkẽma
18Ma baa urutaa cĩnnĩ, ikia ĩtĩnga Yakobo Paddan Arama, ũũk õdõlan ꞌtaaũn cĩ ꞌThẽkẽmĩ looccaa cĩ Kanaanĩ lõꞌngõõc, nĩngĩtĩ õlõmanĩ nĩngaata. 19Baa lõhõlĩ cĩg Hamõrĩ, maaꞌnyĩ ꞌThẽkẽmĩ ꞌcĩg ũũtanĩ nẽẽ looc ko. 20Ma nĩngaata, ikia ẽtẽhẽnya Yakobo nĩngĩtĩ ĩbbõõrĩkĩ Nyekuc ꞌgaarrieenit nẽ akateek ꞌthaar ꞌcĩg haĩ El Elohe Ĩꞌthĩraẽl.#33:20 El Elohe Ĩꞌthĩraẽl: Aĩ ꞌthaara ꞌcĩg haĩ El Elohe Ĩꞌthĩraẽl ko Ebereeiyyi, ĩĩn Nyekuci Nyekuc cĩ Ĩꞌthĩraẽlĩ.
Currently Selected:
ꞌThianaattõ 33: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
