ꞌThianaattõ 32
32
Ĩꞌthooĩk Yakobo ꞌgõtõnĩ ꞌbaaninit
1Ma baa ũũk Yakobo buúk ꞌgõõlaa cĩnnĩ, õõt ommottio hĩ aajĩlẽẽt cĩg Nyekuci ꞌgõõla. 2Ma baa acĩn Yakobo ĩhõõggõ ho, ikia ummuk ĩĩ, “Nĩngĩtĩ cĩ Nyekuci cieeni.” Nĩngĩtĩ akannẽẽkĩ nĩngĩtĩho ꞌthaar ꞌcĩg kaĩ, “Mahanaim.”#32:2 Mahanaim: Aĩ ꞌthaara ꞌcĩg haĩ Mahanaim ko Ebereeiyyi, Tabanwa ꞌramma cĩg ꞌyiommaanak.
3Ma nĩngaata, ĩꞌthõ Yakobo dticcianniook cĩgĩnnĩg hutuattĩ hõõt hĩcĩnĩt ꞌgõtõnĩ cĩnnĩ Eꞌthaau looccaa ꞌcĩ haĩ Their, Edoma. 4Baa aduhaak nẽẽ dticcianniook anneek, “Õõt uduktaak makayyioohit caannĩ Eꞌthaau ĩĩttĩk, ‘Nganĩĩt Yakobo dticciannioohit cunni ciee hikia ho. Acini haayyia ĩꞌthõng ko, baa nga harũmeenna hĩ maarneet cĩnaac Laban. 5Nẽ ꞌyioko, haꞌnyaha hẽlẽggĩ ꞌcĩg abadtẽc noho, haꞌnyahi tĩĩn hĩ aꞌtha hĩ ẽẽtha hĩ thigirẽẽt hĩ dticcianniook ũgĩ buúk. Nẽ hĩꞌthõõakii ꞌyioko nganiit makayyioohit caannĩ nyeemuut icci, hátĩ nuun hiita haaut lõꞌngõõc.’ ”
6Ma baa oboddia dticcianniooha, iita uduktaak nẽẽg Yakobo ĩĩttĩk, “Hõdõlatta ꞌgotonu. Ovvooyyia nẽẽ ꞌyioko ꞌgõõla, õõkõra hĩ eet ꞌcĩg maacĩg ꞌmiiaꞌnya ꞌwec, adiim au ommotoonnu hĩ nganiita.” 7Ma baa athĩhĩ Yakobo nyeemuut icci ho, ikia itiẽẽlĩ nẽ õmmõthĩ gẽrrẽẽt. Nĩngĩtĩ ẽꞌngẽrĩ eet cĩgĩnnĩg ko, hĩĩtõ ꞌgoolliok ꞌramma nẽ ẽꞌngẽr hẽlẽggĩ buúk hĩĩtõ ꞌgoolliok ꞌramma. 8Baa ammuk nẽẽ aĩ, “Má aku Eꞌthaau jora nẽ iꞌthianaaĩ urukto hĩ eet ꞌcĩg oou, arũgĩ hatĩ nuun eeta ꞌcĩg urutaak.”
9Ma nĩngaata, alaõ Yakobo ĩĩ, “Nyekuc cĩ hĩbaangĩ cĩgannĩg Abũrahaamõ hĩ Iꞌthaako, nii Makayyioohiti baa aduhaaka nganĩĩt anneeka, ‘Bodooth looccaa cunuung, bĩĩt mũdoothĩk ittioonniok cugunnig nẽ hatĩ haaꞌnyii baliinit.’ 10Hĩĩnĩ naa eet umwa haaga ꞌcĩ occa hõllõngaa hũũppani tarbalꞌthẽẽt cunni hĩ thõõth ꞌcĩ adĩmaneekaa nganĩĩt dticcannioohit cunni. Baa hĩĩnĩ hullahaac umwa ꞌcĩ haꞌnyahi hĩbahĩt haaga, baa habaakia hidioo cĩ ꞌJõrdanĩ. Nẽẽthĩ ꞌyioko, aaꞌnyaa nii nganĩĩt habalõ gẽrrẽẽt, haꞌnyak eet ꞌgoolliok ꞌramma. 11Halayyii gẽrrẽẽt, ẽlaa nganĩĩt hatĩ adiim aku aruka ꞌgõtõna Eꞌthaau. Hiꞌngolli haini aku mõnõ hatĩ acũdaanneet nẽẽ ngagĩĩt ngaaĩnĩ hĩ lõhõlẽẽnĩ noho thõng! 12Baa aduhaakaa nii nganĩĩt anneekaa, ‘Aaĩ hatĩ nii lõꞌngõõc. Haaꞌnyii hatĩ naa nganiit lõhõlĩ ꞌcĩg mẽẽlĩg ꞌcĩg ĩĩkĩ hathaac cĩ dẽmẽt cĩ bũlũcõ, ꞌcĩg hõllõngaa occa agiili.’ ”
13Nĩngĩtĩ oongiyyi Yakobo nĩngaata. Ma baa ngerrenita, ikia ẽbẽra nẽẽ hẽlẽggĩ ũgĩ, hátĩ haaꞌnyĩk ꞌgõtõnĩ Eꞌthaau hĩĩtõ ꞌbaaninit. 14Baa ẽbẽra nẽẽ ẽẽtha ꞌcĩg ngayyig ꞌmiiaꞌnya ꞌramma, hõõnyĩt hẽẽn ꞌramma nẽ ẽbẽra aꞌtha ꞌmiiaꞌnya ꞌramma hĩ mẽrkẽcĩ hẽẽn ꞌramma buúk. 15Nẽ ahala nyaakaalnya hẽẽn iyyio ꞌcĩg ahurti nẽ tarĩ ahala tĩĩn ꞌcĩg ngayyig hẽẽn ꞌwec hĩ olĩꞌnya õmmõtõ. Ma tarĩ ho, ahala thigirẽẽt ꞌcĩg ngayyig hẽẽn ꞌramma hĩ ꞌcĩg maacĩg õmmõtõ. 16Ma ho, ẽꞌngẽr hẽlẽggĩ vẽlẽk haauto cũũmõ cũũmõ nẽ aaꞌnyĩk dticcianniook cĩgĩnnĩg huꞌthuutti nẽ uduhaak ĩhõõggõ ĩĩnnĩk, “Utuwattõõĩ hẽlẽggĩ, aanytĩk hõtõõcõ cũũmõ cũũmõ hĩĩtõ ꞌrẽẽttĩg.” 17Ma baa ho, uduhaak dticciannioohit ꞌcĩ uwwattĩ ĩĩnnĩk, “Ma ommottioou hĩ Eꞌthaau nẽ ijini iinnihii, ‘Makayyioohit cunni nganĩ? Ooyyu ĩĩna? Cĩg nganĩ hẽlẽggĩ ꞌcĩg aꞌngĩddu ho?’ 18Duhaak anneek, ‘Hẽlẽggĩ ꞌcĩg ĩꞌthõõakii dticciannioohiti cunni Yakobo, hĩĩ ꞌbaaninit cĩnnĩ makayyioohit cĩnnĩ Eꞌthaau. Nga aku nẽẽ buúk urutaa cĩnaang.’ ”
19Nẽ uduhaak tarĩ dticciannioohit ꞌcĩ anũẽẽkĩ ꞌcĩ oou hĩ ꞌcĩg au uruta vẽlẽk thõõth hõdẽẽthõng anneek, “Thõõth ꞌcĩ hatĩ õõ aduhaaku Eꞌthaau hatĩ ommottioou hĩ ĩnõõnnõ nicciaani. 20Õõt uduktaak ĩĩttĩk, ‘Ma hakidani, nga aku dticciannioohiti cunni Yakobo urutaa cĩnaang.’ ” Baa ammuk Yakobo aĩ, “Má hĩꞌthooĩha Eꞌthaau hẽlẽggĩ iccig ĩĩcĩ oou, horoong hatĩ aaꞌnyĩk ĩnõõnnõ halal ꞌthĩnĩt nẽ accamanaawaanĩ.” 21Nĩngĩtĩ ĩꞌthõõĩkĩ Yakobo Eꞌthaau ꞌbaaninit cĩnnĩ ho hutuwattõõĩ dticcianniooha nẽ atangu nẽẽ baalin niccia nĩngaata.
Amacuuccio Yakobo hĩ Nyekuc
22Ma ꞌjiaatĩn tĩho, ĩtĩngaacõ Yakobo hĩ ngaaĩ hĩ buul cĩgĩnnĩg ꞌcĩg ĩĩn õmmõtõ hĩ hõdẽĩ ho, abaaktĩ hidioo ꞌcĩ haĩ ꞌJabok. 23Ma urutaa ꞌcĩ abaahõĩ nẽẽ ĩhõõggõ baakĩta, ikia abaahõĩ hẽlẽggĩ vẽlẽk ꞌcĩg aꞌnyak nẽẽ buúk baakĩta. 24Ma baa idiongan Yakobo ẽmmẽn, ikia eet umwaa nẽ iita ammacuuccio hĩ ĩnõõnnõ ĩꞌthõng haal lõõcĩ. 25Ma baa acĩn ẽẽtĩ ciee ngaatĩ aꞌnyamanĩ Yakobo ĩnõõnnõ ho, ikia ũdũrkũũnyan nẽẽ pũũc cĩ Yakobo noho dũrrũhũnyũk. 26Ma ho, uduhaak ẽẽtĩ nicciee Yakobo ĩĩnnĩk, “Uppwaanna kõrra, ĩꞌnya hũũhõ.”
Ẽdẽcĩ Yakobo anneek, “ꞌGattaanaa thĩ nõõ thõng, nẽẽthĩ uuhu.”
27Ajin hinnia nõõ ẽẽtĩ nicciee Yakobo anneek, “Hainni ꞌyioko nganiit nganĩ?”
Ẽdẽcĩ Yakobo anneek, “Haĩnna Yakobo.”
28Ẽdẽcĩ ẽẽtĩ nicciee ĩnõõnnõ tarĩ anneek, “Iittiõõ hatĩ hõllõngaa hainni nganiit Yakobo tarĩ. Hiitti hatĩ nganiit Ĩꞌthĩraẽl,#32:28 Ĩꞌthĩraẽl: Aĩ ꞌthaara ꞌcĩg haĩ Ĩꞌthĩraẽl ko Ebereeiyyi, eet ꞌcĩ ammacuucõõ hĩ Nyekuc. hĩnĩngĩtĩ anyamanuu nii Nyekuc hĩ eet vẽlẽk.”
29Ẽdẽcĩ Yakobo anneek “Duhaahaa baaĩ nuun ꞌthaar cugunnig.”
Ẽdẽcĩ hinnia ẽẽtĩ nicciee aĩ, “Inni diim nii gaa ꞌthaar cĩgannĩg ko?” Ma ho, aggatan ẽẽtĩ nicciee Yakobo.
30Ma nĩngaata, õthõõth Yakobo ĩĩ, “Hĩcĩna aattĩ Nyekuc hẽbẽrẽẽnnĩ dẽẽdẽ nga harugi.” Nĩngĩtĩ akannẽẽkĩ nĩngĩtĩho annẽẽkĩ Penieele.#32:30 Penieele: Aĩ ꞌthaara ꞌcĩg haĩ Penieele ho Ebereeiyyi, muum cĩ Nyekuci. 31Ma baa uppwaanna kõrra, ĩtĩnga Yakobo ũtũngeek Penieele nẽ ẽtẽhẽõõthĩ, hĩnĩngĩtĩ pũũc cĩnnĩ ho ũnũõõthĩ eet cĩgĩnnĩg. 32Nganĩngĩtĩ nohota hĩĩ kõr hĩ niccieeni, iittiõõ eeta cĩg Ĩꞌthĩraẽlĩ hõllõngaa adak iding cĩ pũũcõ, hĩnĩngĩtĩ baa adũrkũũnyan Nyekuci Yakobo pũũc.
Currently Selected:
ꞌThianaattõ 32: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
