ꞌThianaattõ 34
34
ꞌDiina hĩ ꞌThẽkẽm
1Kõr umwa, baa eheronoothĩk ꞌDiina tĩnaatĩ Yakobo hĩ Lẽẽa, carama ũgĩ ꞌcĩg baag aattĩg looccaa tĩho. 2Ma baa acĩn ꞌThẽkẽmĩ ngeertĩ Hamõrĩ ꞌDiina ho, ũũk aggam ĩnõõnnõ ꞌtirriaana nẽ atanguuyyi hĩ ngaa cĩnnẽẽnĩ. Baa ĩĩn Hamõrĩ maaꞌnyĩ ꞌThẽkẽmĩ, habu cĩ habuccieet cĩ Hiivvi looccaa cĩ Kanaanĩ. 3Ma baa adtuuha ꞌThẽkẽmĩ ngaatĩ ĩĩnnĩ ꞌDiina tĩnaatĩ Yakobo bũhẽẽc ꞌcĩ ẽllẽẽmĩth gẽrrẽẽt ko, ikia accamana ĩnõõnnõ gẽrrẽẽt nẽ ũllũlũũman aĩ, hátĩ hẽlẽm ĩnõõnnõ. 4Nĩngĩtĩ aduhaakĩ ꞌThẽkẽmĩ maaꞌnyĩ annẽẽkĩ, “Hadiimi naa bũhẽẽc nicci hĩĩ ngaa caannĩ.”
5Ma baa õdõlan nyeemuut ciee Yakobo ho, ikia ĩjjaahõĩ Yakobo thõõth icci ĩꞌthõng hoboddia buul cĩgĩnnĩg tũhaiitta.
6Ma baa ho, iita Hamõrĩ hĩ ngeerĩnĩ ꞌThẽkẽm aĩ hiita hothooꞌthia thõõth icci hĩ Yakobo. 7Ma baa õdõlan nyeemuut ciee buul cĩg Yakobo ho, iita ĩlĩĩllẽẽcõ nẽẽg gẽrrẽẽt, nĩngĩtĩ õbõdaanĩ õlõ. Baa ĩĩn thõõth ꞌcĩ aggamĩ ꞌThẽkẽmĩ ngõõnĩ buul iccig ꞌtirriaana ho, ngaaoni cobbi gẽrrẽẽt hĩ eet cĩg Ĩꞌthĩraẽlĩ hũtũrũũr. Baa ꞌthẽk thõõth ꞌcĩ occa hõllõngaa adĩmanni ũdũt cieeni.
8Ma õdõlan nẽẽg õlõ ho, ammũdeek hinnia Hamõr aduhaak Yakobo anneek, “Accamana nganĩĩt buuleniti ꞌThẽkẽmĩ bũhaanyuni gẽrrẽẽt. Aꞌnyĩĩk nuun ĩnõõnnõ hũꞌthũwan. 9Haarrik da thõõth ꞌcĩ hatĩ gõõng haꞌthũwanõõnĩ lõhõlĩ, hátĩ hũꞌthũwanit lohollia cugunnig lõhõlĩ cĩggaang nẽ ũꞌthũwanit cĩggaang buúk cugguung. 10Nẽ nuun hõlõmanit hõdẽĩ hĩ ngagĩĩta, haaꞌnyuung hatĩ ngagiit õlõmanit looccaa cĩnaang ko, ngaatĩ adiimmu niiga. Nẽ idticattu tũũẽẽnĩt cunuung lõꞌngõõc ĩꞌthõng umuddia baliinit vẽlẽk ꞌcĩ adiimmu ngaati.”
11Nĩngĩtĩ õthõõthĩkĩ ꞌThẽkẽmĩ maaꞌnyĩ ꞌDiina hĩ ꞌgõtõõnõgĩ annẽẽkĩ, “Hõlõ, atamaattihaangu baaĩ nuun hũꞌthũwan ꞌDiina, nẽ hatĩ haaꞌnyuung ꞌgii vẽlẽk ꞌcĩ atabbu niiga. 12Uduktaahaangu ꞌgii vẽlẽk ꞌcĩ adiimmu hũdũmanõ. Tananga hĩĩ tĩĩn ꞌcĩg mẽẽlĩg gẽrrẽẽt, haruheekuung ꞌthẽk hatĩnĩ. Aanytaangu ꞌthẽk hũꞌthũwan ꞌDiina hĩĩ ngaa caannĩ.”
Urukta buul cĩg Yakobo oolo
13Hĩnĩngĩtĩ adĩman ꞌThẽkẽmĩ ꞌDiina ꞌbuth, iita edecit buul cĩg Yakobo ꞌThẽkẽm hĩ Hamõr ꞌgoolitta ĩĩttĩk, 14“Hõllõngaa occa hẽlẽmaanna naag ngõõna hũꞌthũwan ẽẽtĩ ꞌcĩ nga hẽttẽẽdĩ ẽlẽ.#34:14 Eet ꞌcĩg etteeddi eleeti: Ĩĩn cieeg eet ꞌcĩg etteeddi eleeti ꞌcĩg eet ꞌcĩg maacĩg. Tigiil thõõth icci ꞌbuuhaa cĩ ꞌThianaattõ 17:9-14. Ĩĩn ngaaoni cobbi gẽrrẽẽt hĩ ngagĩĩta. Nẽ aitiõõ ꞌthẽk hõllõngaa occa hadĩmanna ꞌgii ꞌcĩ aaĩ noho. 15Aaĩ thõõth hõdẽẽthõng ꞌcĩ hadiim haduhaakuung naag ngagiita. Má etteeddu eleeti cugguung ꞌcĩg eet ꞌcĩg maacĩg vẽlẽk haauto hĩ cĩggaang, occa thĩ hatĩ hẽlẽmaakuung ũꞌthũwanit ꞌDiina. 16Nẽẽthĩ hatĩ ũꞌthũwanit eeta cugguung lõhõlĩ cĩggaang, nẽ ũꞌthũwanit lohollia cĩggaang buúk cugguung. Nẽẽthĩ hatĩ hũrũmtĩ hĩ ngagiit hõdẽĩ. 17Má aburru ngaatĩ etteedinnu, haggamannuung hatĩ ngooneet cĩnaang ko nẽ huluukta.”
18Baa aaĩ hĩcĩ abũnnaa thõõth ciee hĩ Hamõr hĩ ngeerĩnĩ ꞌThẽkẽm buúk. Nĩngĩtĩ ẽlẽmmĩ nẽẽgĩ. 19Nẽ baa ammũdeek ĩĩn ꞌThẽkẽmĩ buulenit ꞌcĩ ammĩnan eeta halaangatõõ cĩnĩĩng gẽrrẽẽt ũdũt, nĩngĩtĩ mĩĩ airi hĩdĩĩkoothong hũũk hĩdĩman hĩ baa aduhaak lohollia cĩg Yakobo, hĩnĩngĩtĩ baa aau ꞌthĩnĩt cĩnnĩ hĩ ꞌDiina.
20Ma ho, ookorit ꞌThẽkẽmĩ hĩ maaꞌnyĩ ĩꞌthõng hattũũg cobbi cĩ ꞌtaaũnõõ ngaatĩ gõõng õthõõthĩ eeta lokihẽẽt hĩ thooꞌthiok cĩg lootu nẽ õõt uduktaak eet cĩg ꞌtaaũnaak ĩĩttĩk, 21“Hõlõ, ĩĩn eeta cieeg eet ꞌcĩg abũnnaa gẽrrẽẽt, haanytĩk hõlõmanit hõdẽĩ nẽ hutuuyyiõõ lõꞌngõõc. Maka lõõcĩ ciee occa ũũppan ĩhõõggõ nẽ tarĩ hũꞌthũwattõõ hatĩ gõõng lõhõlĩ buúk. 22Au hatĩ ẽlẽmĩ eeta cieeg ngaatĩ harũmẽẽnĩ hõdẽĩ thõõthaa hõdẽẽthõng, ĩĩcĩ occa etteedini ngagĩĩt eet ꞌcĩg maacĩg vẽlẽk eleeti haaut hĩ nẽẽgĩ. 23Ma hĩdĩmanit hoti, hõllõngaa occa hatĩ au ĩĩn hẽlẽggĩ cĩggĩĩng vẽlẽk cĩggaac? Helemit thõõth cĩnĩĩng ko nẽ hũrũmtĩ hĩ ĩhõõggõ hõdẽĩ.”
24Ma nĩngaata, iita elemit eeta cĩg ꞌtaaũnaak vẽlẽk muhẽẽnĩt ꞌcĩ aduhaak Hamõrĩ hĩ ꞌThẽkẽm ko, nĩngĩtĩ ẽttẽẽdĩ eeta ꞌcĩg maacĩg vẽlẽk eleeti.
25Ma urutaa cĩ waathinniook iyyio ĩĩcĩ etteeddiõĩ ĩhõõggõ eleeti ẽlẽk nẽ nga ẽkẽdanĩ, iita aggamit lohollia ꞌcĩg maacĩg cĩg Yakobo ꞌramma, ꞌThimiõõnẽ hĩ ꞌLeevi ꞌgõtõõnõgĩ ꞌDiina dẽẽdẽ, nyetubooꞌnya cĩggĩĩng nẽ õõt ĩnĩktoothĩk ꞌtaaũn, nĩngĩtĩ aruhi eet ꞌcĩg maacĩg vẽlẽk hĩĩ lõõcĩ ꞌthĩĩ. 26Baa aruhi Hamõrĩ hĩ ngeerĩnĩ ꞌThẽkẽm buúk. Ma nĩngaata, õõt aꞌnyakta nẽẽg ꞌDiina ꞌcieethaa cĩ ꞌThẽkẽmĩ, nĩngĩtĩ õõĩ ĩĩcĩ õlõ cĩnĩĩng. 27Nẽ baa awaddaangito lohollia ꞌcĩg maacĩg cĩg Yakobo eleeti cĩg eet ꞌcĩg adaahito nẽ ẽbẽlanit ijjio ꞌtaaũnaa cobbi ngaatĩ baa aggamĩ eeta ngõõnĩ nẽ ĩdĩmanit ꞌbuth ko. 28Baa aꞌngĩd nẽẽg ẽẽtha hĩ tĩĩna hĩ thigirẽẽta hĩ hẽlẽggĩ ꞌtaaũnatõõ hĩ cĩg aattĩg battaala vẽlẽk. 29Baa allũngan lohollia cĩg Yakobo ijjio ꞌcĩg ammũda ꞌcieethinii cĩg ꞌtaaũn tĩho vẽlẽk hĩĩ ꞌthĩĩ nẽ ootti ngaaĩ hĩ lõhõlĩ buúk hĩĩtõ dticcianniook.
30Ma nĩngaata, ikia ĩĩnnĩk Yakobo ꞌThimiõõnẽ hĩ ꞌLeevi, “Aꞌnyaktahaangu niig nganĩĩt bathi. Nẽ ꞌyioko, aaburrieeha hatĩ eeta cĩg Kanaanĩ hĩ cĩg Peri, hĩ eet vẽlẽk ꞌcĩg aattĩg looccaa nĩĩcĩ. Agayyu niig ngaatĩ hĩĩgĩnnĩ naag ngatũrĩg haaga, ꞌyioko hũrũmtĩ nẽẽg vẽlẽk nẽ iita jora, occa acũdaanneet hĩĩtõ dtĩng.”
31Ẽdẽcĩ hinnia nẽẽg Yakobo anneek, “Hõllõngaa hatabba naag ngõõna haau hĩ ꞌwaaꞌngiahiti.”
Currently Selected:
ꞌThianaattõ 34: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
