ꞌThianaattõ 31
31
Ukul Yakobo õlõõ cĩ Labanĩ
1Baa aku athĩhĩ Yakobo lõhõlĩ cĩg Labanĩ õthõõth aĩ, “Ũũhĩ bẽrẽ Yakobo hẽlẽggĩ cĩg nyakangaan cĩnaac ko vẽlẽk. Aku baliinit cĩnnĩ vẽlẽk hĩ nyakangaan cĩnaac.” 2Ma ho, ikia ũmmũda Yakobo ngaatĩ aharrẽẽkĩ Labanĩ ĩnõõnnõ, iittiõõ hõllõngaa ĩĩn ꞌgõõnĩ hĩ baa gõõng. 3Nĩngĩtĩ annẽẽkĩ Nyekuci Makayyioohiti ĩnõõnnõ, “Bodooth looccaa cĩ maajihu cugunnig hĩcĩ ittioonniok cugunnig. Haꞌthũũnnĩ hatĩ naa nganiita.”
4Nĩngĩtĩ ĩꞌthõõĩkĩ Yakobo Rakĩlẽ hĩ Lẽẽa nyeemuut annẽẽkĩ ĩhõõggõ, “Hommottio ngaatĩ ẽgẽĩ hẽlẽggĩ.” 5Nẽ ũũk uduhaak ĩhõõggõ ĩĩnnĩk, “Iittiõõ maaꞌnyu hõllõngaa abũnnaa haau hĩ baa gõõng. Nẽẽthĩ nẽẽꞌthẽk, aꞌthũũnna nganĩĩt Nyekuci cĩ baaba. 6Nẽ agayyu niig baa hidticanoothĩha naa maaꞌnyu mũlũhĩĩ cĩgannĩg vẽlẽk, 7nẽ ĩggõõla nẽẽ nganĩĩt nẽ ũtũhũ dũman caannĩ tabattĩ õmmõtõ. Nẽẽthĩ, baa aꞌthũũnna nganĩĩt Nyekuci ngaatĩ hõllõngaa ẽlẽmaakĩ maaꞌnyu hĩdĩmanaa nganĩĩt ꞌbuth. 8Má baa aĩ maaꞌnyu, ‘Hadũmannii hatĩ naa nganiit hẽlẽggẽẽnnĩĩ ꞌcĩg buꞌthattĩg,’ arrita hinnia hẽlẽggĩ vẽlẽk mĩꞌnyõ ꞌcĩg buꞌthattĩg. Ma baa aĩ nẽẽ, ‘Hadũmannii hatĩ hẽlẽggẽẽnnĩĩ ꞌcĩg lõbaacĩg,’ arrita hinnia hẽlẽggĩ vẽlẽk mĩꞌnyõ ꞌcĩg lõbaacĩg. 9Nĩngĩtĩ aggamaanĩ Nyekuci maaꞌnyu hẽlẽggĩ vẽlẽk nẽ aaꞌnya nganĩĩta.
10“Ma baa nyĩlõhẽẽnnĩ ĩĩ gõõng irroohonĩ hẽlẽggĩ, baa hohonooꞌthi hacini hõõnyĩt ꞌcĩg lõbaacĩg hĩ ꞌcĩg buꞌthattĩg ꞌcĩg irrooki. 11Ma ho, ĩĩnnĩhaa aajĩlõ cĩ Nyekuci honoothittatõõ, ‘Ẽlẽ Yakobo!’ Hedeci hanneehi, ‘Ee!’ 12Nẽ ẽdẽc ĩnnĩhaa, ‘Cĩĩn nõõ hõõnyĩt ꞌcĩg irrooki ho, buꞌthattĩg ũgẽẽgĩ nẽ lõbaacĩg#31:12 Hõõnyĩt ꞌcĩg buꞌthattĩg hĩ ꞌcĩg lõbaacĩg: Baa eterꞌtheek aajĩlõ Yakobo ẽẽtha ꞌcĩg buꞌthattĩg hĩ ꞌcĩg lõbaacĩg ꞌcĩg occa adiim haaꞌnyĩk Labanĩ ĩnõõnnõ. ũgẽẽgĩ, hĩnĩngĩtĩ hĩcĩna naa dtiic vẽlẽk ꞌcĩ adĩmaneeki nganiit Labanĩ ho. 13Hĩĩnĩ naa Nyekuc baa huppwanakii Bẽẽthẽla, nga baa anĩĩbĩ nii bẽẽ ngõõrra nẽ ĩdĩmaneehaa nganĩĩt lõbũtĩ. Nẽẽthĩ ꞌyioko, bodooth ĩĩcĩ looc baa arrittiaanĩ hataman.’ ”
14Ma nĩngaata, edecit Rakĩlẽ hĩ Lẽẽa Yakobo ĩĩttĩk, “Iittiõõ ꞌgii ꞌcĩ ũũnnĩkeet nyakangaan cĩnaang ngagĩĩt tõõ. 15Ĩcĩneet nẽẽ ngagĩĩt hĩ lohollia cĩg looc ꞌcĩ ꞌrĩĩng haaga nẽ ũtũũoyyeet ngagĩĩt hĩ nganiita. Ẽdẽcaak nẽẽ dioo hẽlẽggĩ baag arukiaa, hĩnĩngĩtĩ ngagĩĩt hĩĩ ꞌthĩĩ. 16Ĩĩn baliiniti#31:16 Baliinit: Baa ĩĩn baliiniti niccia, ẽẽtha ꞌcĩg buꞌthattĩg, hĩ ꞌcĩg karrik. baa aggama Nyekuci nyakangaan cĩnaang vẽlẽk cĩnaang hĩ cĩ lõhõlĩ cĩggaang. Dĩman nẽẽ nii thõõth vẽlẽk hĩcĩ aduhaaki nganiit Nyekuci ho.”
17Nĩngĩtĩ aduhaakĩ Yakobo ngaaĩ hĩ lõhõlĩ cĩggĩĩng hotodit nyaakaalnya, 18nẽ ĩꞌngĩd hẽlẽggĩ vẽlẽk utuanõõĩ ĩĩcĩ oou. Baa alũt nẽẽ ijjio cĩgĩnnĩg vẽlẽk baag athada Paddan Arama nẽ ũũk ĩĩcĩ looc cĩ Kanaanĩ, ĩĩcĩ baa aayyi maaꞌnyia Iꞌthaako.
19Ma baa kõr ꞌcĩ ĩꞌngaannĩ Labanĩ õkõ aꞌthudanĩ aꞌtha#31:19 ꞌThuddan cĩ aꞌthaannu: Baa gõõng aꞌthudan eeta cĩg Ĩꞌthĩraẽlĩ aꞌtha ĩma nẽ etehenyit hĩĩ ceremwa. cĩgĩnnĩg ko, ikia ĩgõrĩth Rakĩlẽ nyekuꞌnya ꞌcĩg ẽhẽnytaa athĩnĩ ꞌcieethaa cĩ maacõnĩ.
20Baa hõllõngaa aduhaak Yakobo Laban eet cĩ looc cĩ Aramĩ, ngaatĩ adiim aluugi nẽẽnĩ. 21Nẽ baa aꞌthũũnnĩ Yakobo hẽlẽggĩ cĩgĩnnĩg vẽlẽk ĩꞌthõng habaahĩ hidioo cĩ Euvaratẽthĩ hũũk hõdõlan muurriok ꞌcĩg kaĩ ꞌGilead.
Ũnũõõthĩ Labanĩ Yakobo
22Ma baa allacattĩ waathinniooha iyyio, iita uduktaak eeta Laban ĩĩttĩk, “Ukul Yakobo.” 23Nĩngĩtĩ alũtaanĩ Labanĩ eet cĩgĩnnĩg nẽ unuyyiõõthĩ Yakobo waathinniook tũrkĩramma nẽ õõt õdõlanit ĩnõõnnõ muurriõhĩĩ cĩg ꞌGileadĩ. 24Ma baalin niccia ũꞌnyaahĩtõõ uduhaak Nyekuci Laban eet cĩ Arameea, ĩĩnnĩk, “ꞌMuuk jurrung, ma hõkõ hadĩmani Yakobo ꞌbuth.”
25Nĩngĩtĩ õdõlanĩ Labanĩ Yakobo nga baa aarĩkĩ Yakobo taban muurriõhĩĩ cĩg ꞌGileadĩ nẽ atagguutho Labanĩ hĩ ittioonniok cĩgĩnnĩg ko buúk nĩngaata. 26Ma ho, uduhaak Labanĩ Yakobo ĩĩnnĩk, “Avviri lõhõlĩ cĩgannĩg hĩ ngaaĩ ꞌcĩg aggammiaa jora inni? 27Ĩggõõllaa nẽ ukulu hõllõngaa aduhaakaa buúk inni? Má baa duhaahaanĩ, occa baa haarikuung karrama cobbi ꞌcĩ adtahĩ eeta illieerẽẽt hĩ tũũrẽna nẽ uruhit bohollwa. 28Nẽ tarĩ nga aꞌnyaa hĩꞌthaaĩk lõhõlĩ cĩgannĩg hĩ lõhõlĩ cĩggĩĩng ꞌgõõl buúk. Ĩdĩmanuu thõõth ꞌcĩ ẽꞌngẽjĩ gẽrrẽẽt ũdũt. 29Haꞌnyahi naa ꞌtirriani ꞌcĩ occa haruki nganiita, nẽẽthĩ hinnia, uppwaannahaa Nyekuci cĩ maaconu aabaal nẽ ĩnnĩhaa, ‘ꞌMuuk jurrung, ma hõkõ hadĩmani Yakobo ꞌbuth.’ 30Haga naa thõõth ꞌcĩ aaꞌnyi nganiit diim bodooth ĩĩcĩ õlõ cĩ maaconu ho. Nẽẽthĩ nẽẽ, ĩgorĩtheehaa hẽlẽggĩ ꞌcĩg ĩĩn nyekuꞌnya cĩgannĩg buúk inni?”
31Ẽdẽcĩ Yakobo Laban anneek, “Baa hiteellinnii haini aggamaannaa mõnõ hatĩ lõhõlĩ cugunnig nẽ ũũhĩ thõng. 32Nẽẽthĩ ꞌyioko, má ammũda eet umwa ꞌcĩ aꞌnyak hẽlẽggĩ ꞌcĩg aari nii hĩĩ nyekuꞌnya cugunnig ko ngaati, aꞌnyĩĩk eet tĩho huruhi thõng. Diim hẽlẽggĩ cugunnig ko ijjiõõnnĩtõõ ĩcĩgannĩg hẽbẽrẽẽnnĩĩ cĩg ittioonniok cĩggaac ko, má ũmmũda nẽ ũũhĩ.” Baa hõllõngaa aga Yakobo ngaatĩ ĩgõrĩthaaĩ Rakĩlẽ hẽlẽggĩ ꞌcĩg ĩĩn nyekuꞌnya cĩg Labanĩ ho.
33Nĩngĩtĩ õkõ adiimẽnĩ Labanĩ tuggatõõ cĩ Yakobo nẽ ũũk atarraaban cĩ Lẽẽa buúk, hĩ cĩg ngaaĩ ꞌcĩg ĩĩn ꞌramma ꞌcĩg ĩĩn dticcianniook ko buúk nẽ hõllõngaa ammũda hẽlẽggĩ niccig bũtĩ. Nĩngĩtĩ adukni tuggu cĩ Rakĩlẽ. 34Ĩko baa ĩgõrĩth Rakĩlẽ hẽlẽggĩ ꞌcĩg aar maaꞌnyia hĩĩ nyekuꞌnya ho dĩdĩ nẽ utuguny ijjiõõnnĩĩ ꞌcĩg irriongan nyaakaalĩ nẽ aavvi thõng. Baa atarraaban Labanĩ tuggu cĩ Rakĩlẽ ĩꞌthõng nẽ hõllõngaa ammũda buúk.
35Nĩngĩtĩ annẽẽkĩ Rakĩlẽ maaꞌnyĩ, “Baaba, ma baaĩ nuun halĩĩllĩkaanĩ, aꞌnyaa haala loota, hĩnĩngĩtĩ õvvõ ẽlẽ.” Nẽ idiimo Labanĩ ĩꞌthõng hõllõngaa ammũda nyekuꞌnya cĩgĩnnĩg ko ũdũt.
36Ma ho, ĩlĩĩlĩ Yakobo nẽ ijin Laban lĩlĩẽẽttaa ĩĩnnĩk, “Ne ꞌcĩ hẽꞌthẽcani naa ꞌcĩ alĩka gẽrrẽẽt noho ho? 37Hĩ ꞌyioko attamanuu ijjio cĩgannĩg vẽlẽk ko, ne ꞌyioko ꞌcĩ ũmmũda nii ꞌcĩ ĩĩn cunni? Daaĩ da hĩcĩnĩt eeta cugunnig hĩ cĩgannĩg buúk vẽlẽk battaalaa ngaati, hátĩ hudukta nẽẽg dẽẽdẽ nganĩ ꞌcĩ aduha thõõth ꞌcĩ ĩĩn dĩdĩ hõrggẽẽnaa cĩnaac.
38“Hũrũmtĩ naag hĩ nganiit irkiꞌnyia hẽẽn ꞌramma nẽ arrit aꞌtha hĩ ẽẽtha cugunnig vẽlẽk jurrung nẽ nga hadak hõõny umwa cunni ũdũt. 39Nga halahaneek hẽlẽggĩ cugunnig hadahit idiꞌngwaana cĩg moru. Nẽ má adak ꞌgii cĩ moru umwa, aku thõõth niccia vẽlẽk hĩ nganĩĩta. Nẽ baa helemi thõõth vẽlẽk ꞌcĩ aggam hẽlẽggĩ cugunnig. Má anneekaa dũman aꞌtheet hode ẽẽth ꞌcĩ ĩgõrꞌthĩ waath hode baal, helemi noho. 40Baa pĩĩrnanĩt caannĩ cieeni. Ĩwaadda kõrra hõdõhõk kak nẽ hõllõngaa hoongi baal buúk, hĩnĩngĩtĩ lajjõ. 41Baa happĩĩrna hoti irkiꞌnyia hẽẽn ꞌramma baag harũmẽẽnĩ hĩ nganiit ko. Hadticanoothikii irkiꞌnyia õmmõtõ hĩ ꞌwec, hĩnĩngĩtĩ lõhõlĩ cugunnig ꞌcĩg ĩĩn ꞌramma ho nẽ irkiꞌnyia tõrkõnõn tarĩ, hĩnĩngĩtĩ hẽlẽggĩ. Nẽ aalla ũũhũ dũman caannĩ tabattĩ õmmõtõ. 42Má hiittiõõ Nyekuci cĩ baaba Abũrahaamõ hĩ Iꞌthaako ngaatĩ ẽbẽka nganĩĩt tõõ, occa baa itiggiawaa haaga hiꞌthihi ꞌgii ꞌcĩ hõkõõĩ buúk. Nẽ ꞌyioko, ĩcĩn Nyekuci pĩĩrnanĩt caannĩ, hĩ dtiic baa hadĩmaneekii naa nganiita, ĩnõõ ꞌcĩ eggerꞌnyeeki nẽẽ nganiit aabaal ko.”
Agayyio Yakobo hĩ Laban
43Nẽ ẽdẽc Labanĩ Yakobo ĩĩnnĩk, “Ĩĩn lohollia cieeg lõhõlĩ cĩgannĩg nẽ lohollia cĩggĩĩng buúk ĩĩn cĩgannĩg nẽ hẽlẽggĩ cieegi, ĩĩn cĩgannĩg buúk noho. Ĩĩn hẽlẽggĩ vẽlẽk ꞌcĩg acini nii ngaati ho vẽlẽk cĩgannĩg. Nẽẽthĩ, aitiõõ ꞌgõõl ꞌcĩ occa halaamĩ naa lõhõlĩ cĩgannĩg hĩ lõhõlĩ cĩggĩĩng ko tõõ. 44Nẽẽthĩ ꞌyioko, ijjia hadahit naag hĩ nganiit lõhõt. Aꞌnyĩĩk hĩĩ lõhõt hebereec caannĩ hĩ nganiita.”
45Nĩngĩtĩ õdõngaanĩ Yakobo bẽẽ umwa nẽ adaeek hĩbĩl ꞌcũl, hátĩ hĩĩ terethiinit ꞌcĩ aalla ũdũt. 46Ma nĩngaata, uduhaak Yakobo ittioonniok cĩgĩnnĩg huluttia biyyiẽẽn ũgĩ hurruthatteek hĩĩ muur nẽ udukto nĩngaata. 47Nĩngĩtĩ akannẽẽkĩ Labanĩ muur cĩ biyyieenu ho annẽẽkĩ, ꞌJegar ꞌThahadutha#31:47 ꞌJegar ꞌThahadutha: Aĩ ꞌthaara cieeg Ebereeiyyi, muur ꞌcĩ ĩĩn hebereec. nẽ akateek Yakobo ĩĩnnĩk, ꞌGaleed.#31:47 ꞌGaleed: Aĩ ꞌthaara cieeg Ebereeiyyi, biyyiẽẽn ꞌcĩg ĩĩn hẽbẽrĩ.
48Ma ho, uduhaak Labanĩ Yakobo ĩĩnnĩk, “Ĩĩn hatĩ muur ciee biyyieenu ho hebereec cĩnaac vẽlẽk.” Ĩnõõ ꞌcĩ akannõõthĩkĩ nĩngĩtĩho ꞌthaara ꞌcĩg haĩ, ꞌGaleed ko. 49Baa akannoothĩk nĩngĩtĩho buúk ꞌthaara ꞌcĩg haĩ Mĩthpa,#31:49 Mĩthpa: Aĩ ꞌthaara ꞌcĩg haĩ Mĩthpa ho Ebereeiyyi, nĩngĩtĩ ebekeet Nyekuci. hĩnĩngĩtĩ baa alayyi Labanĩ aĩ, “Aꞌnyĩĩk Makayyioohit hebeheet ngagĩĩt vẽlẽk, hatĩ haauto cũũmõ cũũmõ.” 50Ma ho, uduhaak Labanĩ Yakobo ĩĩnnĩk, “Má ĩdĩmanuu lõhõlĩ cĩgannĩg ꞌbuth, hode má ũꞌthũwanaa ngaaĩ ũgĩ ꞌcĩg ĩĩn mĩrõk, tananga hõllõngaa haga naana, gaa ngaatĩ agaĩ Nyekuci.”
51Nẽ uduhaak Labanĩ Yakobo ĩĩnnĩk, “Ĩĩn hatĩ bẽẽ ꞌcĩ adaeehi nii ngaati ho hĩ biyyiẽẽn ꞌcĩg harruthaneehi naa looc ko hẽbẽrĩ cĩggaac. 52Aitiõõ hatĩ naa hõllõngaa hetteedi nĩngĩtĩ nẽ hikia hĩdĩmanii nganiit ꞌbuth nẽ aitiõõ hatĩ nii buúk hõllõngaa etteedi nẽ ikia ĩdĩmanaa nganĩĩt ꞌbuth. 53Aꞌnyĩĩk Nyekuc cĩ Abũrahamĩ hĩ cĩ Naahõrĩ, Nyekuc cĩ nyakangaaꞌnya cĩggĩĩng hẽttẽẽd thõõth cĩnaac ko.”
Nĩngĩtĩ abũtanĩ Yakobo ꞌthaarĩĩ cĩg Nyekuc hõdẽẽthõng baa abuluth maaꞌnyia Iꞌthaako. 54Ma ho, ĩbbõõr Yakobo ꞌgaarrieenit ngaatĩho nẽ ĩwaad hĩĩ ꞌthĩĩ nẽ ũtũvva ittioonniok cĩgĩnnĩg vẽlẽk hiita hudukto. Ma baa udukto nẽẽg ẽlẽk, atagguutho nĩngaata ĩꞌthõng loohoth cĩnnĩ.
55Ma baa ngerrenita, ĩꞌthaaĩk Labanĩ lõhõlĩ cĩgĩnnĩg vẽlẽk ꞌgõõl taliitta, nĩngĩtĩ õbõdõõꞌthĩ nẽẽ ĩĩcĩ õlõ cĩnnĩ.
Currently Selected:
ꞌThianaattõ 31: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
