ꞌThianaattõ 30

Inyigaaran Rakĩlẽ Lẽẽa

1Ma baa aga Rakĩlẽ ngaatĩ hõllõngaa arritaanĩ lõhõlĩ hĩ Yakobo ho, ikia inyigaaran nẽẽ Lẽẽa nẽ ĩĩnnĩk maac cĩnnĩ, “ꞌTiraahaa lõhõlĩ, má aitiõõ tõõ, hathingti ꞌyioko hatĩ thõng.”

2Baa alĩĩlĩ Yakobo thõõth ꞌcĩ aduhaak ĩnõõnnõ ngaa cĩnnĩ ho gẽrrẽẽt, nĩngĩtĩ annẽẽkĩ ĩnõõnnõ, “Aitiõõ hõllõngaa hĩĩnĩ naa Nyekuc. Ĩnõõnnõ ꞌcĩ hõllõngaa aaꞌnyi nganiit lõhõlĩ ho.”

3Ma ho, uduhaak Rakĩlẽ maac cĩnnĩ ĩĩnnĩk, “Bĩtĩ thĩ Bĩlha, dticciannioohit caannĩ ꞌcĩ ngayyi ho nẽ atagguuꞌthu hĩ ĩnõõnnõ, hátĩ hittiraaha lõhõlĩ. Ĩnõõ ꞌcĩ hatĩ hakuu hĩĩnnĩ naa buúk ngaa.”

4Nĩngĩtĩ ooginni Yakobo hĩ Bĩlha. 5Ma ho, ikia aꞌnyahõ Bĩlha nẽ ittiraak ĩnõõnnõ loholeec ꞌcĩ maacĩ. 6Nẽ õthõõth Rakĩlẽ ĩĩ, “Udhukiaaha aattĩ bũnnai cĩ Nyekuci nganĩĩta. Ĩthĩk nẽẽ laiinit caannĩ nẽ aaꞌnya loholeec ꞌcĩ maacĩ.” Nĩngĩtĩ akannẽẽkĩ loholeec ꞌthaar ꞌcĩg haĩ ꞌDaan.#30:6 ꞌDaan: Aĩ ꞌthaara ꞌcĩg haĩ ꞌDaan ko Ebereeiyyi, ẽẽla aattĩ Nyekuci nganĩĩta.

7Ma urutaa cĩ loholeec ꞌcĩ oou ho, ikia aꞌnyahõ Bĩlha dticciannioohiti cĩ Rakĩlẽ tarĩ nẽ ittiraak Yakobo loholeec ꞌcĩ maacĩ ꞌcĩ ĩĩn ꞌramma. 8Nĩngĩtĩ õthõõthĩ Rakĩlẽ aĩnnĩ, “Hoꞌngonytooa hĩ ngõõna gẽrrẽẽt nẽ hĩllõõana.” Nĩngĩtĩ akannẽẽkĩ loholeec ꞌthaar ꞌcĩg haĩ Navtali.#30:8 Navtali: Aĩ ꞌthaara ꞌcĩg haĩ Navtali ho Ebereeiyyi, hoꞌngonytooa.

9Ma baa aku adtuuha Lẽẽa ngaatĩ abĩllĩ nẽẽ ꞌnyahiitta ho, ikia ittiha ꞌThĩlpa, dticciannioohit cĩnnĩ nẽ aaꞌnyĩk hatagguutho hĩ Yakobo. 10Nĩngĩtĩ arritaakĩ ꞌThĩlpa dticciannioohiti cĩ Lẽẽa Yakobo, loholeec ꞌcĩ oou ꞌcĩ maacĩ. 11Nẽ õthõõth Lẽẽa ĩĩ, “Ayyia! Uruheeka dtõõdtõrĩ ꞌcĩ adhukiaaka bũnnai.” Nĩngĩtĩ akannẽẽkĩ loholeec ꞌthaar ꞌcĩg haĩ ꞌGad.#30:11 ꞌGad: Aĩ ꞌthaara ꞌcĩg haĩ ꞌGad ko Ebereeiyyi, uruheeka dtõõdtõrĩ ꞌcĩ adhukiaaka bũnnai.

12Ma ho, ittiraak ꞌThĩlpa dticciannioohiti cĩ Lẽẽa Yakobo loholeec umwa tarĩ ꞌcĩ maacĩ, 13nẽ õthõõth Lẽẽa tarĩ ĩĩ, “Haccamanoothĩha naana! Nẽ kõr nicci, ĩĩttĩhaa hatĩ ngaaĩ vẽlẽk tallioohit.” Nĩngĩtĩ akannẽẽkĩ loholeec ꞌthaar ꞌcĩg haĩ Aathẽr.#30:13 Aathẽr: Aĩ ꞌthaara ꞌcĩg haĩ Aathẽr ko Ebereeiyyi, taliinit.

14Ma baa nyĩlõhaa ꞌcĩ ajanĩ eeta ꞌgẽẽmẽ, ikia ũmmũda ꞌRuubenĩ hẽẽt umwa ꞌcĩ ĩĩn ẽgẽrnaac ꞌcĩ aaꞌnyĩk ngaa hode eet ꞌcĩ maacĩ hittir gẽrrẽẽt nẽ aꞌnyahoothĩk aattĩnnĩ Lẽẽa. Ma adtuuha Rakĩlẽ ho, ala ĩnõõnnõ ĩĩnnĩk, “Aꞌnyaa baaĩ ẽgẽrnaac aa aꞌnyaha ngeeruni nĩnga umwa.”

15Ẽdẽcĩ hinnia Lẽẽa nyigaarrĩ anneek, “Nga hũũppanii maac caannĩ ꞌcĩ aggamaannaa ho?” Nẽ ẽdẽc Rakĩlẽ nyigaarrĩ ĩĩnnĩk, “Aꞌnyaa thĩ nõõ ẽgẽrnaac nicci umwa nẽ halahaneeki Yakobo atagguuth hatĩbaal.”

16Ma baa õbõda Yakobo manatõõ ꞌjiaatĩn niccia ho, ikia uduhaak Lẽẽa ĩnõõnnõ ĩĩnnĩk, “Oongi aattĩ nii baalin nicci ꞌcieethaa caannĩ, hĩnĩngĩtĩ hũdũmanaaii ẽlẽk ẽgẽrnaacaa ĩĩcĩ aa aꞌnyaha loholeec caannẽẽnĩ.” Nĩngĩtĩ ooginni Yakobo hĩ Lẽẽa baalin niccia.

17Nĩngĩtĩ athĩknĩ Nyekuci laiinit cĩ Lẽẽa nẽ ikia aꞌnyahõ hittiraak Yakobo loholeec ꞌcĩ maacĩ tarĩ hĩĩtõ ꞌtur. 18Nẽ õthõõth nẽẽ ĩĩ, “Aaꞌnya aattĩ Nyekuci ꞌbaaninit ꞌcĩ abũnnaa gẽrrẽẽt, hĩnĩngĩtĩ baa haaꞌnyihi naa dticciannioohit caannĩ hatagguutho hĩ Yakobo.” Nĩngĩtĩ akannẽẽkĩ loholeec ꞌthaar ꞌcĩg haĩ Iꞌthakar.#30:18 Iꞌthakar: Aĩ ꞌthaara ꞌcĩg haĩ Iꞌthakar ko Ebereeiyyi, ꞌbaaninit.

19Ma urutaa cĩnnĩ, ikia aꞌnyahõ Lẽẽa tarĩ nẽ ittiraak Yakobo loholeec ꞌcĩ maacĩ. 20Nĩngĩtĩ õthõõthĩ Lẽẽa aĩnnĩ, “Aaꞌnya aattĩ Nyekuci ꞌbaaninit umwa tarĩ ꞌcĩ anyũttĩĩ. Nẽ kõr nicci, ikia aattĩ hatĩ itingoleea maac caannĩ gẽrrẽẽt, hĩnĩngĩtĩ hittiraaha lõhõlĩ tõrkõnõn ꞌcĩg maacĩg.” Nĩngĩtĩ akannẽẽkĩ ĩdõlĩ ꞌthaar ꞌcĩg haĩ ꞌThebulun.#30:20 ꞌThebulun: Aĩ ꞌthaara ꞌcĩg haĩ ꞌThebulun ko Ebereeiyyi, tingõlĩ.

21Ma urutaa cĩnnĩ tarĩ, ikia ũtũhũa Lẽẽa loholeec ꞌcĩ ngayyi nẽ akateek ꞌthaar ꞌcĩg haĩ ꞌDiina.

22Nẽ baa hõllõngaa ataarrothi Nyekuci Rakĩlẽ, nĩngĩtĩ aku athĩknĩ nẽẽ laiinit cĩnnĩ, nẽ aaꞌnyĩk ĩnõõnnõ haꞌnyahõ. 23Ma ho, aꞌnyahõ Rakĩlẽ noho nẽ ikia ũtũhũa loholeec ꞌcĩ maacĩ nẽ õthõõth ĩĩ, “Ittiheeha Nyekuci ngaaoni gõõng haꞌnyahi vẽlẽk ngaatĩ aaꞌnya loholeec ꞌcĩ maacĩ. 24Ĩttoorĩka occa hatĩ Makayyioohiti umwa tarĩ nuun!” Nĩngĩtĩ akannẽẽkĩ loholeec ꞌthaar ꞌcĩg kaĩ Yothebo.#30:24 Yothebo: Aĩ ꞌthaara ꞌcĩg kaĩ Yothebo ho Ebereeiyyi, ĩttoorĩka occa hatĩ nẽẽ umwa nuun.

Yakobo hĩ Laban

25Ma baa ittira Rakĩlẽ Yothebo ẽlẽk, ikia ĩĩnnĩk Yakobo Laban, “Aꞌnyaa ngaaĩ hĩ lõhõlĩ cĩgannĩg vẽlẽk baag hadtũhaniini nẽ alahaneehaa hũũk looccaa cĩnaang. 26Aga ꞌthẽk nii noho, baa hadticanoothikii naa nganiit jurrung nẽ hataba ꞌyioko hũũha.”

27Ẽdẽcĩ hinnia Labanĩ Yakobo anneek, “Má ammĩnannaa nii nganĩĩta, au. Aduhaaka bõllõõha#30:27 Baa aduhaaka bõllõõha: Baa aꞌngirannii ngaatĩ õõĩ eeta cĩg Nyekuci hĩ ngarĩta, hode ngaatĩ iiyyielĩ hũlũtteec hagaacõ thõõth cĩ horumwa. Tigiil Levitiko 19:26; Ditoronomi 18:10, 14. aĩ, aggatanaa nganĩĩt Makayyioohiti, hĩnĩngĩtĩ nganiita. Hũrũmtĩ baaĩ nuun hõdẽĩ ũdũt. 28Duhaahaa dako ꞌgii ꞌcĩ adiimi, hátĩ hũdũmaniina.”

29Ẽdẽcĩ Yakobo anneek, “Aga ꞌthẽk nii buúk hidticanoothihii naa nganiit gẽrrẽẽt, ĩnõõ ꞌcĩ ꞌyioko abaliini ho. 30Baa ngatũrĩg hẽlẽggĩ cugunnig haaga, baa nga hakuu naa thõng nẽ ꞌyioko, aggatanii Makayyioohiti nganiit ꞌgoolliohĩ vẽlẽk ĩĩ baag haayyi naana. Nẽẽthĩ ꞌyioko, hidiima haꞌnyaha caha cĩgannĩg ẽmmẽn.”

31Nĩngĩtĩ ajini Labanĩ ĩnõõnnõ annẽẽkĩ, “Hũdũmanii ꞌyioko niiyyia?”

Ẽdẽcĩ Yakobo aĩ, “Aitiõõ ꞌgii ꞌcĩ hadiimi naa hĩ nganiit tõõ. Má elemi thõõth ꞌcĩ hatĩ haduhaakii naana, occa hatĩ haalla hũhaothikiina. 32Nẽ haini naa nẽẽ, aꞌnyaa dako hiiyyiel hẽlẽggĩ cugunnig ko vẽlẽk, hátĩ hẽbẽra aꞌtha hĩ ẽẽtha ꞌcĩg buꞌthattĩg, hĩ mĩꞌnyõ ꞌcĩg kollig vẽlẽk hĩĩtõ dũmaniinit ꞌcĩ hadiimi naa hĩ nganiit ko. 33Ma hatĩ kõr umwa, ma aku iiyyielĩ hẽlẽggĩ nẽ atabu ẽꞌngẽraaha nganĩĩt cĩgannĩg, ammũdeehi hatĩ aꞌtha hĩ ẽẽtha ꞌcĩg buꞌthattĩg diooni hĩ mĩꞌnyõ ꞌcĩg kollig nẽ hatĩ agau ngaatĩ hõllõngaa higgoolli naa nganiita.”

34Ẽdẽcĩ Labanĩ anneek, “Hẽlẽma thõõth cunni hataa nẽ aꞌnyĩĩk haau hĩcĩ aduha nii ho.” 35Ma kõr niccia, ahala Labanĩ hõõnyĩt ꞌcĩg lõbaacĩg hĩ ẽẽtha ꞌcĩg ngayyig vẽlẽk ꞌcĩg buꞌthattĩg hĩ mĩꞌnyõ ꞌcĩg kollig vẽlẽk haauto ẽmmẽn. Ma nĩngaata, ittiha buul cĩgĩnnĩg hõõt hũtũhaacõ ĩhõõggõ. 36Nĩngĩtĩ aluugi nẽẽ hĩ buul cĩgĩnnĩg õõĩ ꞌrẽẽna ĩĩcĩ looc ꞌcĩ õvvõõĩ eeta waathinniook iyyio ꞌgõõla. Baa ũũnnĩkĩ nẽẽ Yakobo hũtũha hẽlẽggĩ cĩg Labanĩ ꞌcĩg baag idiongan õlõ.

37Ma tũhaiittatõõ, ẽtẽngẽda Yakobo taba cĩg heenu nẽ õbõllõc ũgĩ hĩĩtõ lõbaacĩg. 38Ma ho, ittiha taba niccig aarĩk hõbõktõ hĩ haahũlĩt, hátĩ hudtuukta hẽlẽggĩ hatĩ au ahũdĩ. Hĩnĩngĩtĩ baa ĩĩn waathinniook ꞌcĩg irrõõhõnĩ hẽlẽggĩ gẽrrẽẽt nicciag. 39Ma baa irrõõhõ hẽlẽggĩ ngaatĩ õbõhõõ hĩ taba niccig ko, iita ittirria mĩꞌnyõ ꞌcĩg buꞌthattĩg hode ꞌcĩg lõbaacĩg.

40Baa nga aattĩg aꞌtha ꞌcĩg lõbaacĩg hẽlẽggẽẽnnĩĩ ꞌcĩg ũũha Yakobo ho. Ma baa waathinniook ꞌcĩg irrõõhõnĩ hẽlẽggĩ ho, baa aaꞌnyĩk nẽẽ hẽbẽktõõthĩ looc ĩĩcĩ aattiyyi aꞌtha ꞌcĩg lõbaacĩg ko, hátĩ hittirria mĩꞌnyõ ꞌcĩg lõbaacĩg. Nẽ ꞌgõõlaa cĩ, ũtũhawa Yakobo hẽlẽggĩ cĩgĩnnĩg ẽmmẽn nẽ hõllõngaa aaꞌnyĩk hũrũmtĩ hĩ cĩg Labanĩ.

41Ma baa irrõõhõ hẽlẽggĩ ꞌcĩg atũnyĩ, baa gõõng attiha Yakobo taba ꞌcĩg abũkca ho nẽ aarĩk hõbõktõ hĩ haahũlĩt ꞌcĩg ahũdẽẽnĩ hẽlẽggĩ aĩ, hátĩ hittirit. 42Baa gõõng hõllõngaa aarĩk Yakobo taba niccig hatĩ irrõõhõ ꞌcĩg akaranĩ. Ma hĩdĩĩkoothong, iita ĩĩtõ ẽẽtha hĩ aꞌtha ꞌcĩg atũnyĩ ho vẽlẽk cĩg Yakobo nẽ ĩĩtõ ꞌcĩg akaran vẽlẽk cĩg Labanĩ. 43Nĩngĩtĩ aku abaliini Yakobo gẽrrẽẽt ꞌgõõlaa cĩ. Aꞌnyak hõrõõk cĩ tiinu, hĩ cĩ ẽẽtha hĩ cĩ aꞌthaannu hĩ cĩ nyaakaalnyanu hĩ cĩ thigireetu hĩ appahacaaꞌnya ꞌcĩg mẽẽlĩg ꞌrĩĩng buúk.

Currently Selected:

ꞌThianaattõ 30: did

Highlight

Copy

Compare