ꞌThianaattõ 28

Irrioonĩk Iꞌthaako Yakobo

1Nĩngĩtĩ avvaanĩ Iꞌthaako ngeerĩnĩ Yakobo nẽ aggatan nẽ ĩĩnnĩk, “Ma haꞌthũwanaa ngaa looccaa cĩ Kanaanĩ ho. 2Bĩĩt Paddan Arama hĩ Bethuele maaꞌnyĩ maaconu nẽ ũũk icinu maarnu Laban. Aꞌnyĩĩk ĩnõõnnõ haaꞌnyi loholeec umwa cĩnnĩ nĩngaata nẽ aꞌnyaha hikia hĩĩ ngaa cunni.” 3Nẽ aggatan tarĩ ĩĩnnĩk, “Aꞌnyĩĩk haggatanii Nyekuci ꞌTirriannioohiti ꞌcĩ ĩllõõan vẽlẽk nẽ aaꞌnyi ꞌtira lõhõlĩ ꞌcĩg mẽẽlĩg ĩꞌthõng ĩĩ maaꞌnyĩ eet ꞌcĩg mẽẽlĩg looccaa nĩĩcĩ. 4Aꞌnyĩĩk Nyekuc haaꞌnyi nganiit hĩ lõhõlĩ cugunnig ꞌgattan ꞌcĩ aaĩ hĩ baa aaꞌnyĩk nẽẽ Abũrahaamõ, hátĩ bĩtĩ looc nicci aayyi ho, baa ippotaneek nẽẽ Abũrahaamõ.”

5Nĩngĩtĩ ĩꞌthõõĩ Iꞌthaako Yakobo hũũk Paddan Arama, hũmmũdoothĩk maarnĩ Laban ngeertĩ Bethuele ꞌgõtõnĩ Rẽbẽka aattĩ Yakobo hĩ Eꞌthaau.

Ũꞌthũwan Eꞌthaau tĩnaatĩ Ĩthĩmaĩlĩ

6Baa ũmmũda Eꞌthaau ngaatĩ aggatanĩ Iꞌthaako Yakobo nẽ itilo ĩnõõnnõ hiittiõõ hõllõngaa aꞌthũwana ngaa, ngaaĩnĩĩ cĩg looc cĩ Kanaanĩ. Nẽ tarĩ ikia ũmmũda ngaatĩ baa ĩꞌthõõĩ Iꞌthaako Yakobo, hũũk hũꞌthũwana ngaa Paddan Arama looccaa cĩ Thiiria ĩĩcĩ holooc. 7Ma tarĩ ho, ikia aga Eꞌthaau ngaatĩ athĩknĩ Yakobo maaꞌnyĩ hĩ aattĩnnĩ. 8Ma ngaati, ikia agaõõthĩ Eꞌthaau ngaatĩ hõllõngaa accamanaanĩ maaꞌnyia Iꞌthaako, ngaaĩ cĩg looc cĩ Kanaanĩ. 9Nĩngĩtĩ õkõõĩ Eꞌthaau ĩĩcĩ õlõ cĩ ꞌgõtõnĩ maacõnĩ Ĩthĩmaĩl nẽ ũũk ũꞌthũwan tĩnaatĩ Ĩthĩmaĩlĩ ꞌcĩ haĩ Mahalath, hũrũmeek hĩ ngaaĩ baag aꞌnyak nẽẽ ẽlẽk. Baa ĩĩn Mahalaathĩ ngõõnĩ Nẽbaiõõthĩ nẽ ĩĩ tĩnaatĩ Ĩthĩmaĩlĩ ngeertĩ Abũrahamĩ.

Honoothi cĩ Yakobo Bẽẽthẽla

10Ma nĩngaata, ĩtĩnga Yakobo ũtũngeek looc cĩ Bẽẽrthẽba nẽ ũũk ĩĩcĩ ꞌtaaũn cĩ Haraanĩ. 11Ma baa okoloothĩk kõrra, ũũk õdõlan nẽẽ nĩngĩmwa, nĩngĩtĩ oongiyyi nĩngaata, hĩnĩngĩtĩ baa utub lõõcĩ. Ma ngaatĩho, ittiha bẽẽ umwa nẽ uruhaaĩ õõ. 12Ma ũꞌnyaahĩtõõ, õhõnõõthĩ nẽẽ ĩcĩn lõkĩrrĩhĩ umwa ꞌcĩ uuni akatĩ looc hõdõlan õlõ cĩ Nyekuci hẽẽtahujjieen. Baa adtuuha nẽẽ aajĩlẽẽt cĩg Nyekuci ngaatĩ õtõdĩ õõĩ hẽẽtahujjieen nẽ ulluuccia ũgẽẽgĩ iita loota lõkĩrrĩhaa nĩĩcĩ. 13Baa abĩllaa Makayyioohiti hẽẽtahujjieen nẽ õthõõthak ĩnõõnnõ ĩĩnnĩk, “Nganĩĩt Makayyioohit Nyekuc cĩ maaconu Abũrahaamõ hĩcĩ Iꞌthaako. Haaꞌnyii hatĩ naa nganiit hĩ lõhõlĩ cugunnig, looc ꞌcĩ ꞌyioko oongiyyii nii ho. 14Mẽẽlĩg hatĩ lohollia cĩg lõhõlĩ cugunnig haauto hĩ ꞌthẽẽma cĩg lootu. Ĩꞌthanothoothĩk hatĩ nẽẽg looc ĩĩ gõõng õkõlõõthĩkĩ kõrra hĩ ĩĩcĩ uruto nẽ ĩꞌthaattothoothĩk ĩĩcĩ hujjieen hĩ ĩĩcĩ holooc buúk. Ĩĩn hatĩ eeta cĩg õlõ cunni ꞌgattan cĩ eet vẽlẽk. 15Haꞌthuunni hatĩ naa nganiit ꞌgoolliohĩ vẽlẽk ĩcĩg õvvõõĩ nẽ hõbõdaayyi ĩꞌthõng looc cunni ho. Hõllõngaa hatĩ huunnikii naa nganiit ĩꞌthõng hĩdĩman hẽlẽggĩ vẽlẽk ꞌcĩg haduhaakii ho.”

16Ma baa acĩnĩ Yakobo ho, ikia ummuk ĩĩ, “Ĩko aaĩ Nyekuci Makayyioohiti ngaati dĩdĩ nẽ baa hõllõngaa haga ũdũt!” 17Nĩngĩtĩ itieelini nẽẽ gẽrrẽẽt nẽ ummuk ĩĩ, “Nĩngĩtĩ occa gõõng ꞌcĩ aaĩ hutuno ciee! Occa ꞌthẽk ꞌgõõl cĩ hattũũg cĩ õlõ cĩ Nyekuci cieeni!”

18Ma baa ngerrenita, ĩtĩnga Yakobo nẽ ittiha bẽẽ baa aruhaanĩ õõ adaeek hĩbĩl ꞌcũl nẽ udduuttik ngõõrrõ lokora, hátĩ hubuluth Nyekuc. 19Tananga agayyi ꞌtaaũnĩ ꞌcĩ baa õbõhõõ hĩ nĩngĩtĩho haĩ ꞌLuuth, ũũk akateek nẽẽ ꞌthaar ꞌcĩg haĩ Bẽthẽl.#28:19 Bẽthẽl: Aĩ ꞌthaara ꞌcĩg haĩ Bẽthẽl ko Ebereeiyyi, ꞌCieeth cĩ Nyekuci.

20Ma nĩngaata, ũbũtan Yakobo muumaa cĩ Nyekuci ĩĩ, “Má aaĩ Nyekuci hĩ nganĩĩt nẽ ũꞌthũũtta ꞌgõõlaa ꞌcĩ hõkõõĩ ho nẽ aaꞌnya ꞌgẽẽn hĩ ceremwa buúk, 21nẽ aaꞌnya hõbõda lõꞌngõõc ĩꞌthõng õlõ cĩ baaba, aku thĩ hatĩ ĩĩn Makayyioohiti Nyekuc caannĩ dĩdĩ. 22Nẽ bẽẽ ciee hadaeehi naa hĩbĩl ngaati ho, ĩĩn hatĩ gõõng nĩngĩtĩ abulꞌthĩ eeta Nyekuc. Nẽ hẽlẽggẽẽnnĩ vẽlẽk ĩcĩg aaꞌnyaa nii nganĩĩta, hẽꞌngẽraakii hatĩ gõõng naa nganiit Nyekuc ꞌgiimwa ꞌcĩ abadtẽc.”#28:22 ꞌGiimwa ꞌcĩ abadtẽc: Má aꞌnyak Yakobo hẽlẽggĩ õmmõtõ, occa ẽꞌngẽraak nẽẽ Nyekuc ꞌgii hõdẽẽthõng.

Currently Selected:

ꞌThianaattõ 28: did

Highlight

Copy

Compare