ꞌThianaattõ 20

Ĩggõõl Abũrahamĩ Abimelek

1Baa ikia uluug Abũrahamĩ ũũk õlõman Negeve hõrggẽẽnaa cĩ Kadẽẽthĩ hĩ ꞌThur. Ma urutaa cĩnnĩ, ikia ũũk ĩĩcĩ ꞌtaaũn ꞌcĩ haĩ ꞌGerar. Ma baa nga aaĩ nĩngaata, 2uduhaak eet vẽlẽk ĩĩnnĩk, “Ĩĩn Thaara ngõõna.” Nĩngĩtĩ ĩꞌthõõĩ habuui ꞌcĩ haĩ Abimelek cĩ looc cĩ ꞌGerarĩ eet hõõt haꞌnyaktaak ĩnõõnnõ Thaara.

3Ma baalin umwa, uppwaannak Nyekuci Abimelek honoothittatõõ nẽ ĩĩnnĩk, “Ĩĩnu nii eet ꞌcĩ adaahu ẽlẽk, hĩnĩngĩtĩ thõõth ꞌcĩ õkõõĩ ngaa cĩ eeto.”

4Nẽ ammũdaak Abimelek buúk nga hatagguutho hĩ Thaara, nĩngĩtĩ annẽẽkĩ nẽẽ Nyekuc, “Makayyioohit, occa ꞌthẽk aruhi eet ꞌcĩg ammĩrĩ? Ma haꞌngaaꞌnyeet haaga. 5Hõllõngaa nooyyia aduhaaka nganĩĩt Abũrahamĩ anneeka ĩĩn Thaara ngõõnĩ nẽ tarĩ uduhaaha Thaara buúk ĩĩnnĩhaa, ĩĩn Abũrahamĩ ꞌgõtõnĩ? Nẽ ꞌyioko hadĩmani thõõth icci ꞌgõõlaa ꞌcĩ hõllõngaa haga buúk. Nẽ nga hĩdĩman thõõth ꞌcĩ abathĩ.”

6Nĩngĩtĩ ẽdẽcĩ Nyekuci ĩnõõnnõ honoothittatõõ annẽẽkĩ, “Eei, haga naa ammiri niina, ĩnõõ ꞌcĩ haꞌthuunni naa nganiit ngaatĩ occa adĩmanĩĩ ꞌthẽccan nẽ occa hõllõngaa haaꞌnyii huum Thaara. 7Nẽ ꞌyioko, bõdẽẽhĩ Abũrahaamõ ngaa cĩnnĩ, hĩnĩngĩtĩ ĩĩn nẽẽ põrõvẽtaac#20:7 Põrõvẽtaac: Ĩĩn põrõvẽtaacĩ eet ꞌcĩ aduhaak eet nyeemuut ꞌcĩ aduhaak Nyekuci ĩnõõnnõ. caannĩ. Alaiini hatĩ nẽẽ nganiit, hátĩ hiittiõõ hõllõngaa adaahi. Nẽ má hõllõngaa õbõdẽẽkĩ ngaa icci hĩ maac cĩnnĩ, haduhaakiina, adaaknu hatĩ hĩ eet cugunnig vẽlẽk!”

8Ma baa ngerrenita, ũtũvva Abimẽlẽhĩ ꞌgaala cĩgĩnnĩg vẽlẽk nẽ uduhaak ĩhõõggõ thõõth icci. Ma athĩhĩ ꞌgaala thõõth icci ho, iita abarritit gẽrrẽẽt. 9Ma ho, ũtũvvũ Abimẽlẽhĩ Abũrahaamõ nẽ ijin ĩĩnnĩk, “Ne ꞌcĩ adĩmaneekeet nii ngagĩĩt ko? Ne baa ꞌcĩ hadĩmaneekii naa nganiit ꞌcĩ abathĩ gẽrrẽẽt, ĩꞌthõng ꞌnyahaahaa thõõth ꞌcĩ abathĩ hĩ eet cĩgannĩg ko? Aitiõõ hatĩ ẽẽtĩ umwaa ꞌcĩ adtican thõõth ꞌcĩ adĩmaneekaa nii nganĩĩt ko tõõ.” 10Nẽ ijin Abimẽlẽhĩ Abũrahaamõ ĩĩnnĩk, “Inni ꞌthẽk dĩmaneeheet thõõth ꞌcĩ aaĩ hoti ho?”

11Ẽdẽcĩ Abũrahamĩ ĩnõõnnõ anneek, “Baa hammuhi naa haini, ‘Aitiõõ ẽẽtĩ umwaa ngaati ꞌcĩ iꞌngolli Nyekuc tõõ, aruhaanna hatĩ nẽẽg nganĩĩt ngaa caannĩ ho.’ 12Nẽ dĩdĩ, ĩĩn ngaa ciee ngõõna, hĩnĩngĩtĩ odoyyii nyakangaana nẽ ĩĩn morwaha nyigar nẽ baa hũꞌthũwana naa ĩnõõnnõ. 13Baa avvaanna Nyekuci nganĩĩt hũtũngeek õlõ cĩ baaba nẽ hõtõõa lõkõrẽẽt vẽlẽk, baa haduhaahi Thaara hanneehi, ‘Má amĩnannaanĩĩ, migithooyya nẽ uduhaahu eet ꞌcĩg hõmmõtõõ ꞌgõõla vẽlẽk anneek, hĩĩnĩ naa ꞌgotonu.’ ”

14Nĩngĩtĩ õbõdẽẽkĩ Abimẽlẽhĩ Abũrahaamõ ngaa cĩnnĩ Thaara nẽ tarĩ aaꞌnyĩk aꞌtha hĩ tĩĩn hĩ appahacaaꞌnya ꞌcĩg ngayyig hĩ ꞌcĩg maacĩg, 15nẽ ĩĩnnĩk, “Looc caannĩ ciee ngaati vẽlẽk, lõman ngaatĩ adiimi niina.” 16Nẽ uduhaak ꞌcĩ ĩĩn Thaara ĩĩnnĩk, “Haaꞌnyĩha naa ꞌgotonu Abũrahaamõ maccĩrẽẽn#20:16 Maccĩrẽẽn: Ĩĩn maccĩrẽẽna ꞌrabbẽẽt ꞌcĩg tiirik gẽrrẽẽt. aalib hõdẽĩ, hĩĩ terethiinit ꞌcĩ ẽtẽrꞌtha aĩ, iittiõõ thõõth umwaa ꞌcĩ abathĩ hõrggẽẽnaa cĩnaac tõõ.”

17Nĩngĩtĩ alaĩ Abũrahamĩ Nyekuc nẽ aaꞌnyĩk Nyekuci Abimelek hĩ ngaa cĩnnĩ hĩ dticcianniook ꞌcĩg ngayyig cĩgĩnnĩg hũbũttaathõ haꞌnyahit lõhõlĩ. 18Hĩnĩngĩtĩ baa aaꞌnyĩk Makayyioohiti ngaaĩ vẽlẽk hiittiõõ hõllõngaa arrit, hĩnĩngĩtĩ thõõth ꞌcĩ õkõõĩ Abimẽlẽhĩ ngaa cĩ Abũrahaamõ Thaara.

Currently Selected:

ꞌThianaattõ 20: did

Highlight

Copy

Compare