ꞌThianaattõ 21

Ittirria Iꞌthaako

1Baa accamana Makayyioohiti Thaara gẽrrẽẽt, nĩngĩtĩ adĩmanẽẽkĩ ĩnõõnnõ thõõth baa aduha nẽẽnĩ. 2Baa nẽ ikia aꞌnyahõ Thaara nẽ ũtũhũa loholeec ꞌcĩ maacĩ, tananga ꞌthẽk baa atahaanyito nẽẽg vẽlẽk hĩ Abũrahaamõ gẽrrẽẽt. Baa arrittiaa loholeec ciee waathinnioohĩĩ ĩbaag aduha Nyekuci dẽẽdẽ. 3Baa nẽ akateek Abũrahamĩ loholeec baa arritaak ĩnõõnnõ Thaara, ꞌthaar ꞌcĩg haĩ Iꞌthaako.#21:3 Iꞌthaako: Aĩ ꞌthaara ꞌcĩg haĩ Iꞌthaako ho Ebereeiyyi, tarari. 4Ma baa ĩĩtõ loholeec waathinniooha turkiyyio, ikia ẽttẽẽd maaꞌnyia ẽlẽ cĩ loholeeco,#21:4 Eet ꞌcĩg etteeddi eleeti: Ĩĩn cieeg eet ꞌcĩg etteeddi eleeti ꞌcĩg eet ꞌcĩg maacĩg. hĩ baa aduhaak Nyekuci ĩnõõnnõ. 5Baa ĩĩn Abũrahaamõ irkiꞌnyia ꞌmiia hõdẽĩ, baa irkit ꞌcĩ arrittiaanĩ Iꞌthaako ho.

6Ma ho, õthõõth Thaara ĩĩ, “Aꞌnyahaaha Nyekuci taliinit hĩ tarari cobbi gẽrrẽẽt. Nẽ eeta vẽlẽk ꞌcĩg athĩhĩ thõõth icci, ararĩ hatĩ taliitta. 7Nganĩ ꞌyioko baa umwaa ꞌcĩ occa anneek Abũrahaamõ, ‘Aꞌnyak hatĩ ngaa cunni Thaara ĩdõlĩ?’ Cĩĩn da ngaatĩ harritaanna loholeec morwaꞌthẽẽta hõrggẽẽna.”

Itiggia Abũrahamĩ Hagaar hĩ ngeerĩnĩ

8Ma baa õtõ Iꞌthaako nẽ iittiõõ hõllõngaa õrõõktĩ, ikia aarĩk maaꞌnyia karrama cobbi gẽrrẽẽt. 9Ma baa kõr cĩ karramaaõ ho, ikia udtuuha Thaara ngaatĩ õdõõmĩ Ĩthĩmaĩlĩ loholeec cĩ Hagaarĩ Iꞌthaako. Baa ĩĩn Hagaarĩ Ijjibeenit. 10Nĩngĩtĩ annẽẽkĩ Thaara Abũrahaamõ, “Tiggia appahaca icci hĩ ngeerĩnĩ vẽlẽk hõõt, hĩnĩngĩtĩ aitiõõ loholeec cĩ ngaa icci hõllõngaa occa õthõl hĩ loholeec caannĩ baliinit ꞌcĩ hatĩ arigith loholeec caannĩ Iꞌthaako ho.”

11Nẽ baa õꞌngõnyõõ Abũrahamĩ hĩ ꞌthĩnĩt gẽrrẽẽt, hĩnĩngĩtĩ baa ĩĩn Ĩthĩmaĩlĩ buúk loholeec cĩnnĩ. 12Ma ho, õthõõthak Nyekuci Abũrahaamõ ĩĩnnĩk, “Ma homoꞌthi thõõth cĩ Ĩthĩmaĩlĩ hĩ dticciannioohit cunni ꞌcĩ ngayyi ho, dĩman hĩcĩ aduhaaki Thaara ho, hĩnĩngĩtĩ Iꞌthaako hatĩ ꞌcĩ aku ĩĩn maaꞌnyĩ lõhõlĩ baag haduhaakii naana. 13Nẽẽthĩ nẽẽꞌthẽk, haaꞌnyihi hatĩ naa ngeertĩ dticciannioohit cunni ꞌcĩ ngayyi buúk lõhõlĩ ꞌcĩg mẽẽlĩg ꞌrĩng, hĩnĩngĩtĩ ĩĩn nẽẽ buúk loholeec cunni.”

14Ma baa ngerrenita, ittiha Abũrahamĩ ꞌgẽẽn hĩ maam deera nẽ õdõngẽẽhĩ Hagaar iꞌnyiaawa nẽ ĩĩnnĩk, “Õõtõ.” Nĩngĩtĩ õõ atawwaꞌnyini nẽẽg mõrõtõõ tõõ cĩ looc ꞌcĩ haĩ Bẽẽrthẽba.

15Ma baa edeccia maama deeratõõ, ũũk aarĩk Hagaarĩ ngeerĩnĩ tumuthatõõ 16nẽ ũũk aau ngadiiha. Nĩngĩtĩ õthõõthĩ aĩnnĩ, “Occa hõllõngaa hadiimi hacini ꞌgõõl ꞌcĩ adaaknĩ loholeec caannẽẽnĩ.” Ma nĩngaata, akatĩ ulwa.

17Ma ho, ĩthĩha Nyekuci buulenit ngaatĩ arruuẽnĩ nẽ õthõõtha aajĩlõ cĩ Nyekuci hẽẽtahujjieen ĩĩ, “Hagaar, ne ꞌcĩ abathĩ? Ma homoꞌthi, ĩthĩha Nyekuci buulenit ngaatĩ arruuẽnĩ tumuthatõõ. 18Tĩnga bĩĩt dõõng ĩnõõnnõ, haaꞌnyihi hatĩ naa ĩnõõnnõ hĩĩ maaꞌnyĩ eet cĩg looc cobbi gẽrrẽẽt.”

19Ma nĩngaata eteretheek Nyekuci Hagaar wĩĩtaneec umwa, nĩngĩtĩ õkõ adtĩĩlanĩ Hagaarĩ maam deera hĩbbĩt nẽ aꞌnyahoothĩk buulenit.

20Baa aꞌthũũnnĩ Nyekuci buulenit icci ĩꞌthõng hĩtĩlĩtha hĩĩ maka. Baa aaĩ nẽẽ mõrõtõõ nẽ ikia ĩĩ eet ꞌcĩ aga lĩhõ lĩꞌthaanĩtĩ gẽrrẽẽt. 21Nẽ ikia õlõman horrwatõõ ꞌcĩ õdõhõhĩĩ kak ĩĩcĩ Paranĩ, nĩngĩtĩ aꞌthũwanaakĩ ngaannia bũhẽẽc umwa ꞌcĩ aku looccaa cĩ Ijjibi nẽ aaꞌnyĩk ĩnõõnnõ hĩĩ ngaa cĩnnĩ.

Ganõn cĩ Abũrahamĩ hĩ Abimelek

22Ma baa waathinniook nicciag, iita ookorit Abimẽlẽhĩ hĩ makayyioohit cĩ ũũrũta cĩgĩnnĩg ꞌcĩ haĩ Vikol nẽ õõt ĩĩttĩk Abũrahaamõ, “Ẽlẽ, eelli nganiit Nyekuci dĩdĩ hẽlẽggẽẽnnĩ vẽlẽk ĩcĩg adticani. 23Nẽ ꞌyioko kõr nicci, bũtan ngaati muumaa cĩ Nyekuci, hátĩ hiittiõõ hõllõngaa ĩggõõllaa nganĩĩt hĩ lõhõlĩ cĩgannĩg, hode lõhõlĩ cĩg lõhõlĩ cĩgannĩg vẽlẽk. Iini nii eet cĩ looc ꞌcĩ ꞌrĩĩng nẽ baa hadĩmannii naag nganiit jurrung, nẽẽthĩ ꞌyioko, dĩmaneet nii buúk ngagĩĩt jurrung.”

24Ẽdẽcĩ Abũrahamĩ Abimelek anneek, “Hũbũtana dĩdĩ.”

25Ma nĩngaata, ikia uduhaak Abũrahamĩ Abimelek thõõth ꞌcĩ aggamaanĩ appahacaaꞌnya cĩg Abimẽlẽhĩ Abũrahaamõ wĩĩtaneec umwa. 26Ẽdẽcĩ hinnia Abimẽlẽhĩ anneek, “Nga hĩthĩk thõõth nicciaa, nganĩ occa baa ꞌcĩ adĩman thõõth ꞌcĩ aaĩ hoti ho? Nẽ nga duhaahaanĩ, kõr ꞌyioko hinnia ꞌcĩ hathĩknĩ naa cieeni.”

27Ma ho, iita agayyio Abũrahamĩ hĩ Abimelek nẽ aaꞌnyĩk Abũrahamĩ ĩnõõnnõ aꞌtha hĩ tĩĩna nẽ adahit eeta ꞌcĩg ĩĩn ꞌramma ho lõhõt. 28Ma urutaa cĩnnĩ, ahala Abũrahamĩ mĩꞌnyõ ꞌcĩg aꞌthaannu tũrkĩramma ꞌgoonoginnitõõ nẽ aarĩk ĩhõõggõ ngadiiha, 29nĩngĩtĩ ajini Abimẽlẽhĩ ĩnõõnnõ annẽẽkĩ, “Adĩmani nohotaa inni?”

30Ẽdẽcĩ Abũrahamĩ aĩ, “Hadĩmani naa hoti, hátĩ gaa nii ĩĩ, baa nganĩĩt ꞌcĩ hadawa wĩĩtaneec tĩho ho. Bĩtĩ aꞌtha ꞌcĩg ĩĩn tũrkĩramma ho hĩĩ terethiinit cĩ thõõth icci.”

31Baa nẽ akattieek eeta looc tĩho ĩĩttĩk, Bẽẽrthẽba,#21:31 Bẽẽrthẽba: Aĩ ꞌthaara ꞌcĩg haĩ Bẽẽrthẽba ho Ebereeiyyi, wĩĩtaneec cĩ lõbũtĩĩõ. hĩnĩngĩtĩ ĩĩn nĩngĩtĩ ꞌcĩ abũtanõõnĩ eeta ꞌcĩg ĩĩn ꞌramma ho.

32Ma urutaa ꞌcĩ ĩdĩmattĩ nẽẽg lõhõt Bẽẽrthẽbattĩ ẽlẽk, ĩtĩngaacõ Abimẽlẽhĩ hĩ Vikol oboddioothĩ ĩĩcĩ õlõ cĩnĩĩng looccaa ꞌcĩ haĩ Viliꞌthia. 33Ma ho, ikia itiboolan Abũrahamĩ motooꞌngĩt Bẽẽrthẽbattĩ nẽ ubuluth Makayyioohit Nyekuc ꞌcĩ aalla ooo nĩngaata. 34Nĩngĩtĩ õkõ aayyi Abũrahamĩ looccaa cĩ Viliꞌthia irkiꞌnyia ꞌcĩg mẽẽlĩg ꞌrĩng.

Currently Selected:

ꞌThianaattõ 21: did

Highlight

Copy

Compare