ꞌThianaattõ 19

Utuuꞌthi ꞌThõõdõmĩ hĩ ꞌGõmõõra

1Ma baa ꞌjiaatĩn niccia, uppwaattĩ aajĩlẽẽta baag ĩĩn ꞌramma ꞌtaaũnaa cĩ ꞌThõõdõmĩ nẽ õõt ummuddioothĩk Loot iccioloongan ngaatĩ õbõhõõ hĩ hattũũg cobbi cĩ ꞌtaaũnõõ. Ma baa adtuuha Lõõtĩ ĩhõõggõ ho, ĩtĩnga ũꞌthũkũcoothĩk nĩngĩtĩ õkõ ĩꞌthaaĩ, 2nẽ othoothĩk ĩhõõggõ ĩĩnnĩk, “Makayyiook cĩgannĩg, iita baaĩ nuun hõõt õlõõ caannĩ, hátĩ hĩdĩmanaahuung ꞌgẽẽn ꞌcĩ abadtẽc. Õõt nuun ucuurria ꞌthoo nẽ atagguuꞌthu nẽ nuun hatĩ ĩcĩttu ꞌgõõl ꞌcĩ ooyyu lohotha.”

Ẽdẽcĩ aajĩlẽẽta niccieeg ĩnõõnnõ anneek, “Aitiõõ, hooginna hatĩ naag battaala nga gõõng iyyiomanĩ eeta hata.”

3Ikia ĩĩlaleek Lõõtĩ ĩhõõggõ ĩꞌthõng helemit thõõth cĩnnĩ ho, nĩngĩtĩ õõkõrĩ õõĩ ĩĩcĩ olu. Ma ho, ũũk ũthũha Lõõtĩ ũbũnẽẽt ũgĩ noho nẽ aaꞌnyĩk ĩhõõggõ.

4Ma baa nga hõõt eeta ũꞌnyaahĩ, iita irriamatteek nyakangaaꞌnya hĩ buul vẽlẽk cĩg ꞌThõõdõmĩ õlõ cĩ Lõõtĩ 5nẽ ũtũvvẽẽcõ Loot nẽ ijittõõthĩ ĩĩttĩk, “Õõt eeta aag au õlõõ cunni ngaati ĩĩna? ꞌNyahaaheet ĩhõõggõ battaala ngaati haarria hĩĩ ngaaĩ cĩggaang.”

6Ma baa athĩhĩ Lõõtĩ ho, ĩtĩnga uduhun battaala nẽ ũꞌnyũũg hattũũg, 7nẽ ĩĩnnĩk ĩhõõggõ, “Hõlõ, hammaannikuung baaĩ nuun thõng, ma hadĩmannu thõõth ꞌcĩ abathĩ ꞌcĩ aaĩ noho! 8Ĩthĩhĩt dako nõõ, haꞌnyahi naa lõhõlĩ ꞌramma ꞌcĩg ĩĩn buheeci ꞌcĩg nga hatagguutho hĩ eet ũgĩ ũdũt, ĩꞌnya nuun haꞌnyahaahuung ĩhõõggõ nẽ ĩdĩmattu ꞌgii ꞌcĩ adiimmu ho. Ma hadĩmaneekaangu eet iccig ꞌbuth, ĩĩn eeta cieeg heerinniook cĩgannĩg, hadiimi ꞌthẽk haꞌthũũnnĩ ĩhõõggõ.”

9Ẽdẽcĩ hinnia eeta niccieeg Loot anneek, “ꞌNyẽẽhĩ ꞌgõõlaa cĩnaang! Ĩĩnĩ nõõ nii eet cĩ looc ꞌcĩ ꞌrĩĩng haaga, nganiit ꞌyioko ꞌthẽk nganĩ ꞌcĩ occa eterꞌtheekeet ngagĩĩt ꞌgii ꞌcĩ occa hadĩmanna ho? Tũngeeheet ngagĩĩt ẽmmẽn. Má illoori hadĩmannii ꞌyioko hatĩ nganiit buúk ꞌbuth hĩllõõan ĩhõõggõ.” Ma ho, eektĩk eeta niccieeg Loot ngadiiha, nĩngĩtĩ adiim avvahanĩ hattũũg cĩ ꞌcieethu.

10Ma ngaati, utugurrieek hẽẽrõnĩ tĩko Loot ꞌcieetõõ nẽ ũꞌnyũũgĩtõ hattũũg. 11Ma nĩngaata noho, aanytĩk aajĩlẽẽta niccieeg eet vẽlẽk ꞌcĩg adiim ĩhõõggõ ho, hĩĩtõ rubettĩg hiittiõõ hõllõngaa acĩn ꞌgõõl ꞌcĩ aayyi hattũũg buúk.

Ũtũngeek Lõõtĩ ꞌThõõdõm

12Ma ho, ijinit aajĩlẽẽta niccieeg Loot ĩĩttĩk, “Má aꞌnyahi ittioonniok cugunnig ꞌtaaũnaa cĩ, hode hõmõnnẽẽn hode lõhõlĩ hĩ eet ũgĩ cugunnig, duhaak hũtũngteek ꞌtaaũn icci. 13Hĩnĩngĩtĩ hobokteea naag ngaatĩ hau hatũũꞌtha ꞌtaaũn icci obbi ho hĩĩ ꞌthĩĩ. Ĩthĩk Makayyioohiti thooꞌthiok ꞌcĩg mẽẽlĩg ꞌcĩg abathĩ cĩg nĩngĩtĩ nẽ ĩꞌthõõaeet ngagĩĩt hiita hutuuꞌthia ꞌtaaũn.”

14Nĩngĩtĩ õkõ aduhaakĩ Lõõtĩ nyahaappanĩt ꞌcĩg baag adiim aꞌthũwan lõhõlĩ cĩgĩnnĩg ko annẽẽkĩ, “Ĩtĩngaac ngaati hĩdĩĩkoothong, idiim Makayyioohiti akatĩ ꞌtaaũn icci ꞌgwoo!” Baa hinnia ammuk nyahaappanĩta niccieeg aĩ, ĩggõõl Lõõtĩ ĩhõõggõ thõng.

15Ma baa ngerrenita ꞌrĩng, ũbũbũũranit aajĩlẽẽta Loot ĩĩttĩk, “Bĩtĩ ngaa hĩ lõhõlĩ cugunnig ꞌcĩg ngayyig ko ꞌrammaattiyyiaak hĩdĩĩkoothong battaalaa cĩ ꞌtaaũnõõ, hátĩ hiittiõõ hõllõngaa atũũthĩ hatĩ ĩꞌthooyyia ꞌgwaa.”

16Baa ammũdeek awanĩt Lõõtĩ looc aĩ gigigigi, nĩngĩtĩ aggamĩ aajĩlẽẽta ĩnõõnnõ aꞌthiit hĩ ngaa cĩnnĩ hĩ lõhõlĩ cĩgĩnnĩg buúk nẽ ootti ĩhõõggõ battaalaa cĩ ꞌtaaũnõõ, hĩnĩngĩtĩ baa ammaannĩk Makayyioohiti ĩhõõggõ.

17Ma baa õdõlanit nẽẽg battaali cĩ ꞌtaaũnõõ ho, ũũk uduhaak aajĩlõ umwaa ꞌcĩ ittioon ĩhõõggõ ho ĩĩnnĩk, “Ukulit thõng, õõt utuguꞌthi nẽ ma habbuudennu hode ma habĩllu ngaamwaanĩ unaahatõõ ũdũt! Ivvirit ꞌthẽk edeccieek muurriõhĩ hujjieen, hátĩ hiittiõõ hõllõngaa ommotoonnu hĩ daahĩth.”

18Ẽdẽcĩ hinnia Lõõtĩ ĩhõõggõ anneek, “Aitiõõ, ma hadĩmannaangu nohotaa makayyiook cĩgannĩg. 19Hĩ ꞌyioko etereꞌthiaau bũnnai cunuung ngaatĩ aꞌthũũnnaangu nganĩĩt dticciannioohit cunuung ĩꞌthõng ngaati ho, ꞌrẽẽttĩg muurrioha caak gẽrrẽẽt, hadaahi hinnia hatĩ nga hõdõlan ĩĩca. 20Aaĩ ꞌtaaũnĩ umwaa ꞌcĩ hidici ngaati noho, occa nuun hooyyia haattiyyia hĩ eet cĩg halang caannĩ ho ngaata, hatĩ nuun ẽlẽmaakeetu. Tananga ꞌthẽk hĩdĩca, occa aaꞌnyĩk rũgẽt caannĩ haau lõꞌngõõc.”

21Ẽdẽcĩ aajĩlõ anneek, “Eei, hĩthĩha thõõth cunni hataa, aitiõõ hatĩ naa hõllõngaa hatuuthi ꞌtaaũn iccia. 22Nẽẽthĩ, tĩnga hĩdĩĩkoothong! Aitiõõ hatĩ naa hõllõngaa hadĩmani thõõth umwa ĩꞌthõng õdõlanit nĩngĩtĩ iccia.”

Iꞌthianaanĩ kõr tĩho hĩĩ noho, akattieek eeta ꞌtaaũn ꞌcĩ hidici ꞌthaar ꞌcĩg haĩ ꞌThõõar,#19:22 ꞌThõõar: Aĩ ꞌthaara cieeg Ebereeiyyi, ꞌtaaũn ꞌcĩ hidici. hĩnĩngĩtĩ baa aĩ Lõõtĩ hĩdĩca.

23Nĩngĩtĩ õkõ õdõlanĩ Lõõtĩ ꞌThõõar#19:23 ꞌThõõar: Aĩ ꞌthaara ꞌcĩg haĩ ꞌThõõar ko Ebereeiyyi, ꞌgii ꞌcĩ hidici. ngerrenita baa uppwaanna kõrra. 24Ma ho, udhuha Makayyioohiti Nyekuci ꞌgwoo ꞌcĩ aaburii padtahac hẽẽtahujjieen hikia hũtũũth ꞌThõõdõm hĩ ꞌGõmõõra. 25Nĩngĩtĩ atũũthĩ ꞌgwaa nicciee ꞌtaaũnniook hĩ eet hĩ hẽẽn hĩ arteenit vẽlẽk hĩ hẽlẽggĩ vẽlẽk unaahaa tĩho hĩĩ lõõcĩ ꞌthĩĩ. 26Ma baa ho, abbuudothi hinnia ngaa cĩ Lõõtĩ ho looc uruta, nĩngĩtĩ ũũkcẽnĩ ẽlẽ cĩnnĩ hĩĩ bẽẽ ꞌcĩ ammũccarĩĩ.

27Ma ngerrenitaa cĩnnĩ, ĩtĩnga Abũrahamĩ õbõdõõthĩ nga baa õthõõthõnĩ hĩ Makayyioohit. 28Ma baa acĩnoothi nẽẽ unak cĩ ꞌThõõdõmĩ hĩ cĩ ꞌGõmõõra ho, adtuuhothi hinnia bũrrẽt cobbi gẽrrẽẽt ĩꞌngaanna loota haau hĩ bũrrẽtĩ ꞌcĩ atũũth mõrõ.

29Nẽ hoti ho, ꞌgõõl ꞌcĩ baa atũũthĩ Nyekuci ꞌtaaũnniook cĩg unak baa aayyi Lõõtĩ ho cieeni. Baa ammuhunoothi nẽẽ ĩlaali baa Abũrahamĩ, ĩnõõ ꞌcĩ ẽlẽmaakĩ nẽẽ Loot hũũk hutuguthi nga hũtũũth nẽẽ ꞌtaaũnniook baag aayyi Lõõtĩ ho.

Loot hĩ lõhõlĩ cĩgĩnnĩg

30Baa ammũdeek iꞌngolli Lõõtĩ eet cĩg ꞌThõõarĩ gẽrrẽẽt, nĩngĩtĩ ĩꞌngaannĩ hĩ lõhõlĩ cĩgĩnnĩg ꞌcĩg ngayyig ꞌcĩg ĩĩn ꞌramma ho nẽ õõt otodit muur umwa nẽ õõt aauto iloomatõõ. 31Ma kõr umwa, ĩtĩnga bũhaanyĩnĩ cobbi nẽ ĩĩnnĩk ngõõnĩ ꞌcĩ hidici, “Atahaany ꞌyioko nyakangaan cĩnaac nẽ hiꞌthihi eet umwa looccaa nĩĩcĩ ꞌcĩ occa aꞌthũwanneet ngagĩĩt, hátĩ hittirria lõhõlĩ. 32Ijjia hõõt hallabteek nyakangaan mẽrtĩ hũdũũt nẽ hõõt hatagguutho hĩ ĩnõõnnõ, hátĩ hittiraheet lõhõlĩ.”

33Ma baalin niccia, idtiillia nẽẽg mẽrtĩ nẽ aanytĩk maaꞌnyĩ hũhũd. Ma baa õhõda maaꞌnyĩ mẽrta ho, ĩtĩnga bũhaanyĩnĩ cobbi ho nẽ ũũk atagguutho hĩ maaꞌnyĩ. Baa aitiõõ maaꞌnyia hõllõngaa aga thõõth icci ũdũt.

34Ma loohoth cĩnnĩ, uduhaak bũhaanyĩnĩ cobbi ho ngõõnĩ ĩĩnnĩk, “Iyyia hatagguuꞌtha naag hĩ nyakangaan aabaal nẽ ꞌyioko, hõõt hallabteek ĩnõõnnõ mẽrtĩ hatĩjjiaat hũdũũt tarĩ nẽ atagguuꞌthu hĩ nganiit buúk, hátĩ hittiraheet lõhõlĩ ꞌcĩg hatĩ ĩĩn cõrrẽẽn cĩg halang cĩnaac.” 35Ma ꞌjiaatĩn niccia allabteek nẽẽg maaꞌnyĩ mẽrtĩ tarĩ, ma baa õhõda maaꞌnyĩ mẽrta ho, ĩtĩnga bũhaanyĩnĩ ꞌcĩ hidici ho buúk õõt atagguutho hĩ maaꞌnyĩ. Baa aitiõõ maaꞌnyia hõllõngaa aga thõõth icci ũdũt.

36Nĩngĩtĩ au aꞌnyahiini lohollia cieeg Lõõtĩ ho ꞌgõõlaa ꞌcĩ ooginni hĩ maaꞌnyĩ ho. 37Ikia ittira bũhaanyĩnĩ cobbi loholeec ꞌcĩ maacĩ nẽ akateek ꞌthaar ꞌcĩg haĩ Mõab.#19:37 Mõab: Aĩ ꞌthaara ꞌcĩg haĩ Mõab ko Ebereeiyyi, ngeertĩ nyakangaan caannĩ. Ĩĩn Mõabĩ maaꞌnyĩ eet ꞌcĩg haĩ Mõab ꞌyioko ho. 38Nẽ ikia ittira bũhaanyĩnĩ ꞌcĩ hidici ho buúk loholeec ꞌcĩ maacĩ nẽ akateek ꞌthaar ꞌcĩg haĩ Ben Ammi.#19:38 Ben Ammi: Aĩ ꞌthaara ꞌcĩg haĩ Ben Ammi ho Ebereeiyyi, ngeertĩ ittioonniokto. Baa ikia ĩĩ Ben Ammi maaꞌnyĩ eet ꞌcĩg looc ꞌcĩ haĩ ꞌyioko Amon ko.

Currently Selected:

ꞌThianaattõ 19: did

Highlight

Copy

Compare