ꞌThianaattõ 11
11
Aaꞌnyĩk Nyekuci eet hothoothito cũũmõ cũũmõ
1Baa ꞌthianaatta, baa õthõõth eeta loota nĩnga vẽlẽk thõõth hõdẽẽthõng. 2Ma baa õõ eeta ĩĩcĩ uruto ho, õõt ummuddia nĩngĩmwa ꞌcĩ ĩĩn unak ꞌcĩ haĩ ꞌThĩnaar, nĩngĩtĩ õlõmanĩ nĩngaata.
3Ma nĩngaata, othoothito ĩĩtõ, “Hutturria namatavvaalĩ nẽ hĩwaadito jurrung.” Baa adticaniini nẽẽg namatavvaalĩ hirigithit biyyiẽẽn nẽ idticattõõĩ ꞌgiimwa ꞌcĩ aĩ maccahadak ꞌcĩ aaĩ hĩ ꞌthooyyi hirigith ꞌthomoti. 4Nẽ othoothito nẽẽg ĩĩtõ, “Nẽẽthĩ ꞌyioko, hẽtẽhẽnyta ꞌtaaũn cĩnaac ꞌcĩ aꞌnyak ꞌcieeth ꞌcĩ uuni ꞌcĩ õdõlan hẽẽtkujjieen, hátĩ hubulli ꞌthaara cĩggaac ũdũt nẽ iittiõõ hõllõngaa hĩꞌthanothoothĩk looc nicci vẽlẽk.”
5Ma ho, ulluuccia Makayyioohiti Nyekuci loota hikia hĩcĩn ꞌtaaũn hĩ ꞌcieeth ꞌcĩ uuni ꞌcĩ ẽhẽnyĩt eeta niccieeg ko, 6nẽ ĩĩ Makayyioohiti, “Adticanni eeta cieeg hoti, hĩnĩngĩtĩ õthõõth nẽẽg vẽlẽk thõõth hõdẽẽthõng. Ĩĩn ꞌyioko ciee ꞌthianaanĩt cĩ hẽlẽggĩ ꞌcĩg hatĩ õõ adtican nẽẽgĩ. Nẽ hatĩ hĩdĩĩkoothong, iita agaacõ nẽ idticanit hẽlẽggĩ vẽlẽk ꞌcĩg adiim adtican nẽẽgĩ! 7Hõõt hatalmanyanit ĩhõõggõ hothoothito thooꞌthiok cũũmõ cũũmõ, hátĩ hiittiõõ hõllõngaa athĩknõõ tarĩ.”
8Nĩngĩtĩ atalmaanyanĩ Makayyioohiti ĩhõõggõ ĩꞌthõng hibilli tehenyiinit cĩ ꞌtaaũn tĩho. Ma ho, iita ĩꞌthaattothoothĩk nẽẽg looc nicci vẽlẽk. 9Ĩnõõ ꞌcĩ akannõõthĩkĩ ꞌtaaũn tĩho ꞌthaara ꞌcĩg haĩ Babel#11:9 Babel: Aĩ ꞌthaara ꞌcĩg haĩ Babel ko Ebereeiyyi, talmanyaniinit nẽ hĩĩtõ ꞌthaar ũgĩ, Babilonnia. ko. Hĩnĩngĩtĩ baa atalmaanyan Makayyioohiti thõõth cĩ eetu nĩngaata nẽ ĩꞌthaanĩk ĩhõõggõ looc nicci vẽlẽk.
Lõhõlĩ cĩg ꞌThẽẽmĩ
10Thõõth ꞌcĩ eterꞌtheekeet eet ꞌcĩ haĩ ꞌThẽm cieeni.
Baa irkiꞌnyiaannĩĩ ꞌcĩg ĩĩn ꞌramma urutaa cĩ tawaanõ, baa iita ĩĩtõ irkiꞌnyia cĩg ꞌThẽmĩ ꞌmiia hõdẽĩ (100). Ma baa urutaa cĩnnĩ, ikia ittira nẽẽ ngeerĩnĩ ꞌcĩ haĩ Arpakthad. 11Ma baa urutaa cĩ ittirriaaĩ Arpakthadĩ, ikia aau ꞌThẽmĩ ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiiaꞌnya ꞌtur (500) nẽ aꞌnyak lõhõlĩ ũgĩ tarĩ.
12Ma baa õdõlanit Arpakthad irkiꞌnyia ĩĩtõ hẽẽn iyyio hĩ ꞌtur (35), ikia ittira ngeerĩnĩ ꞌcĩ haĩ ꞌThẽẽla. 13Ma baa urutaa ꞌcĩ ittiraaĩ ꞌThẽẽla, ikia aau Arpakthadĩ ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiiaꞌnya ꞌwec hĩ iyyio (403) nẽ aꞌnyak lõhõlĩ ũgĩ tarĩ.
14Ma baa õdõlan ꞌThẽẽla irkiꞌnyia hẽẽn iyyio (30), ikia ittira ngeerĩnĩ ꞌcĩ haĩ Ẽbẽr. 15Ma baa ittirria Ẽbẽrĩ, ikia aau ꞌThẽẽla ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiiaꞌnya ꞌwec hĩ iyyio (403) nẽ ikia aꞌnyak lõhõlĩ ũgĩ tarĩ ꞌcĩg maacĩg hĩ ꞌcĩg ngayyig.
16Ma baa ĩĩtõ Ẽbẽr irkiꞌnyia hẽẽn iyyio hĩ ꞌwec (34), ikia ittira nẽẽ ngeerĩnĩ ꞌcĩ haĩ Pẽlẽk. 17Urutaa ꞌcĩ ittiraaĩ Pẽlẽhĩ, ikia aau Ẽbẽrĩ ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiiaꞌnya ꞌwec hĩ hẽẽn iyyio (430) nẽ aꞌnyak lõhõlĩ ũgĩ tarĩ.
18Ma baa ĩĩtõ Pẽlẽk irkiꞌnyia hẽẽn iyyio (30), ikia ittira ngeerĩnĩ ꞌcĩ haĩ ꞌReu. 19Urutaa ꞌcĩ ittiraaĩ ꞌReu, ikia aꞌnyak Pẽlẽhĩ lõhõlĩ ũgĩ ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiiaꞌnya ꞌramma hĩ tũrkũwwec (209).
20Ma baa tarĩ ĩĩtõ ꞌReu irkiꞌnyia hẽẽn iyyio hĩ ꞌramma (32), ikia ittira ngeerĩnĩ ꞌcĩ haĩ Theruk. 21Urutaa ꞌcĩ ittiraaĩ Theruhi, ikia aau ꞌReu ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiiaꞌnya ꞌramma hĩ tũrkĩramma (207) nẽ aꞌnyak lõhõlĩ ũgĩ tarĩ.
22Ma baa ĩĩtõ Theruk irkiꞌnyia hẽẽn iyyio (30), ikia aꞌnyak ngeerĩnĩ ꞌcĩ haĩ Naahõr. 23Urutaa ꞌcĩ ittiraaĩ Naahõrĩ, ikia aꞌnyak nẽẽ lõhõlĩ ũgĩ tarĩ nẽ aau ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiiaꞌnya ꞌramma (200).
24Ma baa ĩĩtõ Naahõr irkiꞌnyia hẽẽn ꞌramma hĩ tũrkũwwec (29), ikia ittira ngeerĩnĩ ꞌcĩ haĩ ꞌTẽra. 25Urutaa ꞌcĩ ittiraaĩ ꞌTẽra, ikia aau Naahõrĩ ĩꞌthõng hõdõlanit irkiꞌnyia cĩgĩnnĩg hĩĩtõ ꞌmiia hõdẽĩ hĩ õmmõtõ hĩ tũrkũwwec (119) nẽ aꞌnyak lõhõlĩ ũgĩ tarĩ.
Lõhõlĩ cĩg ꞌTẽra
26Ma baa ĩĩtõ irkiꞌnyia cĩg ꞌTẽra hẽẽn tũrkĩramma (70), ikia ittira nẽẽ Abũraamõ hĩ Naahõr hĩ Haraan.
27Thõõth ꞌcĩ eterꞌtheekeet ꞌTẽra cieeni.
Baa ĩĩn ꞌTẽra maaꞌnyĩ Abũraamõ hĩ Naahõr hĩ Haraan. Baa ĩĩn Haraanĩ maaꞌnyĩ Lõõtĩ. 28Ma baa nga arũgĩ ꞌTẽra, ikia adaak Haraanĩ ꞌtaaũnaa cĩnĩĩng ĩĩcĩ haĩ Ur, looccaa cĩ Kaldea nga baa arrittiaanĩ nẽẽnĩ. 29Ma nĩngaata, ikia ũꞌthũwan Abũraamõ bũhẽẽc ꞌcĩ haĩ Tharaĩ nẽ ũꞌthũwan Naahõrĩ bũhẽẽc ꞌcĩ haĩ Mĩĩlka, tĩnaatĩ Haraanĩ. Baa ĩĩn Haraanĩ maaꞌnyĩ buulenit ꞌcĩ haĩ Ĩthka. 30Ammũdeek hinnia aitiõõ hõllõngaa aꞌnyaki Tharaĩ.
31Ma ho, ikia ũtũngeek ꞌTẽra ꞌtaaũn cĩ Uri looccaa cĩ Kaldea,#11:31 Looc cĩ Kaldea: Baa haĩ looc cĩ Kaldea ꞌthaar ũgĩ Babiloonnia. nẽ idiim ũũk ĩĩcĩ Kanaanĩ. Baa õõkõr nẽẽ hĩ ngeerĩnĩ Abũraamõ hĩ Loot, ngeertĩ Haraanĩ, hĩ alaan cĩnnĩ Tharaĩ, ngaa cĩ Abũraamõ. Baa õõ nẽẽg ĩꞌthõng looc ꞌcĩ haĩ Haraan, nĩngĩtĩ õlõmanĩ nĩngaata.
32Ma ho, aau ꞌTẽra nĩngaata ĩꞌthõng hadaak baa ĩĩtõ irkiꞌnyia ꞌmiiaꞌnya ꞌramma hĩ ꞌtur (205).
Currently Selected:
ꞌThianaattõ 11: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
