Eevvetho 1

Ĩꞌtha Paaulo lemmiook cĩg Eevvetho

1Waraga ciee ꞌcĩ aku hĩ nganĩĩt Paaulo, eet ꞌcĩ ẽbẽraanna Nyekuci tabiittaa cĩnnĩ, hĩĩ ꞌthooyyiahit cĩ Yeesu Krĩstõ.

Heheedihi naa waraga icci eet ꞌcĩg ẽllẽẽmĩth cĩg Nyekuci ꞌtaaũnaa cĩ Eevvetho. Eet ꞌcĩg aꞌthũũnnĩ thõõth cĩ Yeesu Krĩstõ nẽ ĩĩtõ nuyyiook cĩgĩnnĩg.

2Halayyi naa, hátĩ hĩĩtõ Nyekuci Baangẽẽtĩ hĩ Makayyioohit cĩnaac Yeesu Krĩstõ, tarbalĩg hĩ ngagiit nẽ aggatattuung ngagiit ganõõna.

Aꞌnyaha Krĩstõ ꞌgattan Loriia

3Hĩdĩhĩthĩt Nyekuc Maaꞌnyĩ Makayyioohit cĩnaac Yeesu Krĩstõ ꞌcĩ aꞌnyahaakeet ngagĩĩt ꞌgattan hẽẽtahujjieen. 4Baa nga hẽtẽhẽnya Nyekuci looc, baa ammĩnanneet nẽẽ ngagĩĩt nẽ aaꞌnyĩk Krĩstõ hẽbẽraeet ngagĩĩt hĩĩtõ eet cĩgĩnnĩg ꞌcĩg hẽllẽẽmĩth ꞌcĩg hammĩrĩ muumaa cĩ Nyekuci. Hĩnĩngĩtĩ baa ammĩnanneet Nyekuci ngagĩĩta, 5ikia ẽbẽraeet nẽẽ ngagĩĩt baa hũnũũk nẽ aareet hĩĩtõ lõhõlĩ cĩgĩnnĩg, hĩnĩngĩtĩ Yeesu Krĩstõ. 6Baa tarbal nẽẽ gẽrrẽẽt hĩ ngagĩĩt, ngaatĩ aaꞌnyeet Ngeerĩnĩ ꞌcĩ ammĩnan nẽẽ gẽrrẽẽt, nẽẽthĩ hoti ho, occa hadĩhĩth naag Nyekuc.

7Abal Nyekuci tarbalꞌthẽẽt hĩ bũnnai hĩ ꞌgẽẽnyĩth nẽ ũtũũwa oggiaanĩt cĩnaac biyyiẽẽtĩĩ cĩg Ngeerĩnĩ nẽ ũtũngeek ꞌthẽccanẽẽt cĩggaac. 8Aaꞌnyeet Nyekuci ngagĩĩt bũnnai cĩnnĩ cobbi gẽrrẽẽt hõdẽĩ hĩ ꞌgẽẽnyĩth hĩ thĩhẽẽnĩt, hátĩ hagaac thõõth cĩnnĩ. 9Nẽẽthĩ ꞌyioko, eteretheeheet Nyekuci ngagĩĩt hagaac muhẽẽnĩt cĩ thooꞌthiok cĩgĩnnĩg ꞌcĩg ĩllõõan ꞌgẽẽnyĩth cĩ eetu, hĩnĩngĩtĩ Krĩstõ, muhẽẽnĩt ꞌcĩ attũbanẽẽkĩ nẽẽ thõõth cĩnnĩ ꞌcĩ abũnnaa. 10Nẽẽthĩ, muhẽẽnĩt tĩho cieeni. Ma ũttũbanoothĩk kõrra, aaꞌnyĩk hatĩ Nyekuci Krĩstõ haggam hẽlẽggĩ vẽlẽk cĩg hẽẽtkujjieen hĩ cĩg lootu.

11Adĩman Nyekuci hõdõõkõthĩ hẽlẽggĩ vẽlẽk ꞌcĩg adiim nẽẽnĩ, ĩnõõ ꞌcĩ aaꞌnyĩkĩ nẽẽ Krĩstõ hẽbẽraeet ngagĩĩt baa hũnũũk ko. 12Baa adĩman nẽẽ hoti, hátĩ hidihiꞌthia naag ꞌJudeei ĩnõõnnõ, hitimatta ngaatĩ haꞌnyaka muhẽẽnĩt ꞌcĩ abũnnaa hĩ Krĩstõ. 13Ikia aꞌnyahaahuung Krĩstõ buúk ngagiit thõõth ꞌcĩ ĩĩn dĩdĩ, ꞌcĩ ĩĩn nyeemuut ꞌcĩ abũnnaa ꞌcĩ occa eelliannu niiga. Baa aarrihu niig lemiinit cunuung hĩ Krĩstõ nẽ aaꞌnyĩhoothĩhuung nyamacaar cĩ Lori ꞌcĩ Ẽllẽẽmĩth baa adukiaa, hátĩ hedeeꞌnyia ngaatĩ iiginnu niig eet cĩg Nyekuci. 14Aaꞌnyeet Lorii ꞌcĩ Ẽllẽẽmĩth ngagĩĩt buúk hagaac hĩĩtõ, hammũda hatĩ naag thooꞌthiok vẽlẽk ꞌcĩg itiangꞌtheek Nyekuci eet cĩgĩnnĩg. Nẽẽthĩ hatĩ heellia naaga, hátĩ hĩdĩhĩthĩ Nyekuci, hĩnĩngĩtĩ bulẽẽnĩt cĩnnĩ.

Laiinit cĩ Paaulo

15Ngaanĩngĩtĩ hathĩknĩ naa thõõth ꞌcĩ elemmu niig Makayyioohit Yeesu hĩ mĩnnan ꞌcĩ ammĩnannu eet vẽlẽk cĩg Nyekuci, 16nga hĩbĩl naa ngaatĩ hannẽẽkĩ Nyekuc ĩlaallẽ, hĩnĩngĩtĩ ngagiita, hammuhaannuung naa ngagiit hatĩ halayyi. 17Hara naa hala Nyekuc Baangeet ꞌcĩ abuli cĩ Makayyioohit cĩnaac Yeesu Krĩstõ, hátĩ haaꞌnyuung Lori ꞌcĩ Ẽllẽẽmĩthĩ. Aaꞌnyuung hatĩ Lorii ꞌcĩ Ẽllẽẽmĩth ko ngagiit eggeenyit nẽ agayyu thõõth ꞌcĩ hagaĩ Nyekuc jurrung. 18Halayyi naa haini aꞌnyĩĩk lanyit cĩ Nyekuci hũttũhũl ꞌthinneeti cugguung, hátĩ agaac thõõth cĩ muhẽẽnĩt ꞌcĩ abũnnaa, baa aaꞌnyuung Nyekuci kõr baa ẽbẽraannuung nẽẽ ngagiita. Nẽẽthĩ hatĩ ummuddiaau ꞌgattan ꞌcĩ abuli ꞌcĩ hatĩ ĩĩn cunuung hõdẽĩ hĩ eet cĩg Nyekuci vẽlẽk. 19Hadiimmuung naa ngagiit agaac ꞌtirrian hĩ makaaꞌthĩt ꞌcĩ aꞌnyaheekeet Nyekuci ngagĩĩt ꞌcĩg hẽlẽmĩ ĩnõõnnõ. Ĩĩn ciee ꞌtirrian baa adticaniini Nyekuci, 20hũrũgũtha Krĩstõ daahĩtha nẽ aaꞌnyĩk ĩnõõnnõ haau attiaa cĩnnĩ ĩcobbi hẽẽtahujjieen.#1:20 Aꞌthiit cobbi: Ĩĩn aꞌthiiti cobbi hĩ Nyekuc aꞌthiit cĩ ꞌtirriaanõ hĩ cĩ makaaꞌthĩtõõ hĩ cĩ bulẽẽttõ. 21Aggam Krĩstõ hẽlẽggĩ vẽlẽk ꞌcĩg attiran hĩ ꞌcĩg aꞌnyak makaaꞌthĩt hĩ ꞌcĩg aggam loonyin vẽlẽk. Aggam nẽẽ hẽlẽggĩ vẽlẽk cĩg looc nicci nẽ hatĩ aggam cĩg looc ꞌcĩ hatĩ horumwa buúk. 22Aaꞌnyĩk Nyekuci Krĩstõ ꞌtirrian haggamĩ hẽlẽggĩ vẽlẽk, hátĩ hẽẽlĩ lothippit cĩ lemmioohu, nẽ aaꞌnyĩk ĩnõõnnõ hĩĩ Makayyioohit cĩ hẽlẽggĩ vẽlẽk. 23Nẽ ĩĩn lothippiti cĩ lemmioohu ẽlẽ cĩ Krĩstõ nẽ aaꞌnyĩk Krĩstõ ĩhõõggõ hẽlẽggĩ vẽlẽk.

Currently Selected:

Eevvetho 1: did

Highlight

Copy

Compare