Luugithõõ 13

Aanytĩhoothĩk lohollia ꞌcĩg oou Nyekuc

1Baa aduhaak Makayyioohiti Mũũꞌtha anneek, 2“Aanytaangu nganĩĩt lõhõlĩ ꞌcĩg arrittiaa ĩĩcĩ oou eetinii cĩg Ĩꞌthĩraẽlĩ. Lohollia ꞌcĩg au arrittiaa ĩĩcĩ oou, hode maala hĩ mĩꞌnyõ vẽlẽk ꞌcĩg au arrittiaa ĩĩcĩ oou, ĩĩn cĩgannĩg.”

3Ma ho, ĩĩnnĩk Mũũꞌtha eet, “Ĩĩn ciee kõr ꞌcĩ hatĩ gõõng hammuha naag ooo, kõr baa haluuganĩ naag Ijjiba, looccaa baa hĩĩgĩnnĩ appahacaaꞌnya. Nẽẽthĩ kõr nicci, õõgauung Makayyioohiti ngagiit attiaa cĩnnĩ ĩĩcĩ attiran gẽrrẽẽt. Ummuhuttooth ngaatĩ hõllõngaa occa adaku ꞌgẽẽn ꞌcĩ aarĩhoothĩk abũũlana. 4Kõr icci, nyĩlõõhaa cĩ Abiibi uluugtu niiga.#13:4 Abiib: Baa ĩĩn Abiibi nyĩlõk ꞌcĩ oou hĩ eet cĩg Ĩꞌthĩraẽlĩ, hĩnĩngĩtĩ baa ĩĩn nyĩlõk ꞌcĩ aluuganĩ nẽẽg Ijjiba. Aĩ ꞌthaara ꞌcĩg haĩ Abiib ko Ebereeiyyi, nyĩlõk ꞌcĩ nga ẽꞌnyẽrkĩ thõng, ꞌcĩ abbiirri mana, looccaa cĩ Ĩꞌthĩraẽlĩ. Hĩ ngagĩĩt Dĩdĩngaayyi, iꞌthianaanĩ nyĩlõhĩ ciee hõrggẽẽnaa cĩ nyĩlõk cĩ iyyio ĩꞌthõng horggeeni cĩ nyĩlõk cĩ ꞌwecĩ irkitaa cĩnaac. 5Adiim adaku karrama icci nyĩlõõhaa cĩ irkiꞌnyiaannĩ vẽlẽk, hatĩ uukuung Makayyioohiti looccaa cĩ eet cĩg Kanaanĩ hĩ looccaa cĩ eet cĩg Hiiti hĩ looccaa cĩ eet cĩg Amoorĩ hĩ looccaa cĩ eet cĩg Hiivvi hĩ looccaa cĩ eet cĩg ꞌJeebu, baa ĩĩn ciee looc baa aduha Nyekuci aĩ hippotaneehi hatĩ hĩbaangĩ cugguung hĩ ngagiita, looc ꞌcĩ abatanĩ irana hĩ loteec. Occa adaku karrama cĩ kõr icci nyĩlõhaa cĩ. 6Waathinniook tũrkĩramma, uduhit ũbũnẽẽt ꞌcĩg nga harrihoothĩk abũũlana, nẽ waathinnioohĩĩ ꞌcĩg ĩĩn tũkĩramma ho, adahit karrama cĩ Makayyiookto. 7Uduhit ũbũnẽẽt ꞌcĩg nga harrihoothĩk abũũlana waathinnioohĩĩ ꞌcĩg ĩĩn tũkĩramma ho, occa ꞌthẽk hõllõngaa edeeꞌnyia ꞌgiimwaa ꞌcĩ aarĩhoothĩk abũũlana hõrggẽẽnaa cunuung, hode nẽẽ occa edeeꞌnyia abũũlana ngaatĩ aattiyyu niiga. 8Kõr niccia, duhaak loholeec cunni ꞌcĩ maacĩ anneek, ‘Hadĩmani naa hoti, hĩnĩngĩtĩ thõõth ꞌcĩ baa adĩmaneeka Makayyioohiti kõr baa haluuganĩĩ Ijjiba.’ 9Ĩĩn karrama ciee cunni haau hĩ nyamacaar ꞌcĩ aaĩ attiaa cunni nẽ aau hĩ nyamacaar ꞌcĩ aꞌnyahi nii attia hode muumaa cunni. Aꞌnyĩĩk hatĩ gõõng hummuhaahi karrama ciee hõdõõkõthĩ, hátĩ tigiil ꞌlimman icci Makayyiookto ho, ‘Baa ẽẽlannuung Makayyioohiti ngagiit looccaa cĩ Ijjibi attiaa cĩnnĩ ĩĩcĩ attiranĩ.’ 10Uꞌthuutti nyattal icci kõrraa cĩnnĩ irkiꞌnyiaannĩ vẽlẽk.

11“Urutaa ꞌcĩ aꞌnyahaauung Makayyioohiti ngagiit looccaa cĩ eet cĩg Kanaanĩ nẽ aaꞌnyuung looc hĩĩ cunuung, hĩ baa aduhaakuung ngagiit hĩ maajihu cugguung, 12aanytĩk Makayyioohit lõhõlĩ ꞌcĩg arrittiaa ĩĩcĩ oou. Ĩĩn hẽlẽggĩ ꞌcĩg arrittiaa ĩĩcĩ oou ꞌcĩg maacĩg cĩg Makayyiooktak. 13Occa ataalliaa moolĩtĩ cĩ thigiiro hĩ Makayyioohit mĩꞌnyõõnaa cĩ aꞌtheeto hode ĩĩcĩ eetho, nẽẽthĩ, ma hõllõngaa ataalliaa mĩꞌnyõõnaa cĩ aꞌtheeto hode ĩĩcĩ eetho, ũdũrkũũnyanit ꞌthĩ iꞌnyia cĩnnĩ thõng. Adiim ataalliaa lohollia ꞌcĩg maacĩg ꞌcĩg arrittiaa ĩcĩ oou vẽlẽk.

14“Waathinnioohĩĩ ꞌcĩg hatĩ nga au horumwa, má ajinnuung lohollia cugguung anneekuung, ‘Aĩ thõõth ciee neegi?’ Uduktaak ĩhõõggõ ĩĩttĩk, ‘Baa aluuganneet Makayyioohiti ngagĩĩt ꞌtirriaanaa cĩ aꞌthiit cĩnnĩ Ijjiba, looccaa cĩ appahacẽẽthĩtõõ. 15Ma baa ĩllõõr habuui cĩ Ijjibi nẽ etedeyekeet ngagĩĩt ngaatĩ hauunna, ikia uruk Makayyioohiti lõhõlĩ ꞌcĩg arrittiaa ĩĩcĩ oou vẽlẽk Ijjiba hĩĩ dtĩng, lõhõlĩ ꞌcĩg maacĩg hĩ maala hĩ mĩꞌnyõ cĩg heleggeennu. Ĩnõõ ꞌyioko ꞌcĩ hĩbboorĩka naag Makayyioohit ꞌgaarrieenit cĩ hẽlẽggĩ ꞌcĩg maacĩg vẽlẽk ꞌcĩg arittiaa ĩĩcĩ oou nẽ hataalliawa lõhõlĩ ꞌcĩg maacĩg vẽlẽk ꞌcĩg arrittiaa ĩĩcĩ oou ho.’ 16Aaĩ hatĩ karrama ciee hĩ nyamacaar ꞌcĩ amacaaranoothĩk attiaa cunni hode muumaa cunni. Ĩĩn hatĩ ciee terethiinit ꞌcĩ hammuhaanĩ ꞌtirrian cĩ aꞌthiit cĩ Makayyioohit baa aluuganneet ngagĩĩt looccaa cĩ Ijjibi.”

Ũtũhaõõthĩ Makayyioohiti eet cĩgĩnnĩg

17Ma baa alahaneek habuui cĩ Ijjibi eet hõõt, baa hõllõngaa õkõõĩ Nyekuci ĩhõõggõ ꞌgõõlaa cĩ looc cĩ Vilithtiini, tananga baa obokii ꞌgõõl niccia. Hĩnĩngĩtĩ baa aĩ Nyekuci, “Ma ommottio nẽẽg hĩ jore, ũũhũ hinnia hatĩ nẽẽg ꞌthinneeti cĩggĩĩng nẽ oboddiõõthĩ Ijjiba.” 18Nĩngĩtĩ õkõõĩ Nyekuci eet awantĩ ꞌgõõlaa cĩ horu ꞌcĩ õdõhõhĩĩ kak attĩlanõõthĩkĩ Bũlũc ꞌcĩ Marihi.#13:18 Bũlũc ꞌcĩ Marihi: Haĩ ꞌthaar cĩg bũlũc ꞌcĩ Marihi ho ũgĩ, bũlũc cĩ Ĩhaoonnu. Baa ũũnnĩk eeta cĩg Ĩꞌthĩraẽlĩ looc cĩ Ijjibi haauto hĩ athegereeꞌnya ꞌcĩg ũkũmattoothĩk õõt jora.

19Baa õcõõd Mũũꞌtha ẽmmẽ cĩg Yothebo buúk, hĩnĩngĩtĩ baa aaꞌnyĩk Yothebo lõhõlĩ cĩg Ĩꞌthĩraẽlĩ hũbũtanit lõbũtĩ ꞌcĩ aĩ, “Aku hatĩ eelluung Nyekuci ngagiit dĩdĩ. Nẽẽthĩ, ocoodit ẽmmẽ cĩgannĩg hatĩ uluuktu ngaati.”#Tigiil ꞌBuuk cĩ ꞌThianaattõ 50:25

20Ma baa ũtũngteek nẽẽg Thukoth, õõt etehenyit tuggẽẽt ngaatĩ haĩ Etham lokoorriaa cĩ Ijjibi, ngaatĩ õbõhõõ hĩ horu ꞌcĩ õdõhõhĩĩ kak. 21Waath, baa uwwattẽẽkĩ Makayyioohiti ĩhõõggõ loduruuaa ꞌcĩ abĩlĩ hĩ uuro heteretheek ĩhõõggõ ꞌgõõla, nẽ baal uwwattẽẽkĩ Makayyioohiti ĩhõõggõ ꞌgwoyyiaa ꞌcĩ alanyĩt hũttũhũleek ĩhõõggõ ꞌgõõl, hátĩ hõtõõcõ eeta cĩg Ĩꞌthĩraẽlĩ waath hode baal. 22Baa hõllõngaa attik Makayyioohiti loduru ꞌcĩ uwwattẽẽkĩ ĩhõõggõ ĩĩcĩ oou ho, hode ꞌgwoo ꞌcĩ alanyĩt hũttũhũleek ĩhõõggõ ꞌgõõl ko battaala ũdũt.

Currently Selected:

Luugithõõ 13: did

Highlight

Copy

Compare