Luugithõõ 14
14
Abaaktĩ eeta Bũlũc ꞌcĩ Marihi
1Uduhaak Makayyioohiti Mũũꞌtha ĩĩnnĩk, 2“Duhaak eet cĩg Ĩꞌthĩraẽlĩ hoboddioothĩ hõõt hetteedito tuggẽẽt ngaatĩ õbõhõõ hĩ Pi Hahirooth, hõrggẽẽnaa cĩ Migdolĩ hĩ bũlũc. Aꞌnyĩĩk hetteedito tuggẽẽt hõbõktõ hĩ bũlũc habahiꞌthiõõ hĩ ꞌBaal ꞌThevvon. 3Ammuk hatĩ habuui cĩ Ijjibi aĩ, ‘Arahan hatĩ eeta cĩg Ĩꞌthĩraẽlĩ horrwaa ꞌcĩ õdõhõhĩĩ kak nẽ atalmaanyattĩ haaga.’ 4Nẽ haaꞌnyihi hatĩ naa habu cĩ Ijjibi hĩllõõr nẽ ũnũõõthĩ ĩhõõggõ. Nẽẽthĩ hatĩ hũmmũda naa bulẽẽnĩt cĩ ẽlẽ caannĩ, ngaatĩ hĩllõõanĩĩ habu cĩ Ijjibi hĩ ũũrũta cĩgĩnnĩg vẽlẽk, nẽẽthĩ hatĩ iita agaacõ eeta cĩg Ijjibi ngaatĩ hĩĩnnĩ naa Makayyioohit dĩdĩ.” Nĩngĩtĩ adĩmanĩ eeta cĩg Ĩꞌthĩraẽlĩ thõõth icci.
5Ma baa udukiaak habu cĩ Ijjibi aĩ ukulit eeta, iita ũtũkẽẽcõ habuui cĩ Ijjibi hĩ makayyiook cĩgĩnnĩg muhẽẽnĩt cĩnĩĩng, hĩnĩngĩtĩ eet cĩg Ĩꞌthĩraẽlĩ nẽ ĩĩtõ, “Ne hatĩ ꞌcĩ hĩdĩmanit naag ko? Halahatteek bẽrẽ naag eet cĩg Ĩꞌthĩraẽlĩ hõõt nẽ iittiõõ appahacaaꞌnya ꞌcĩg nga adticanoothĩkeet tõõ!” 6Nĩngĩtĩ aaꞌnyĩkĩ nẽẽ ꞌgadiggadi cĩnnĩ cĩ joro ꞌcĩ agurut nyangõõllẽẽ hũkũmanoothĩk nẽ ookorit hĩ ũũrũta cĩgĩnnĩg. 7Baa õkõõĩ nẽẽ ꞌgadiggadiꞌnya ꞌmiiaꞌnya tõrkõnõn ꞌcĩg agurut nyangõõllẽẽꞌnya, ꞌcĩg ĩllõõan ꞌgoonoginni vẽlẽk ĩcĩg joraak, hĩ ꞌgadiggadiꞌnya ũgĩ vẽlẽk cĩg Ijjibi hĩ makayyiook cĩggĩĩng vẽlẽk. 8Ma nĩngata, ikia aaꞌnyĩk Makayyioohiti habu cĩ Ijjibi hĩllõõr, nĩngĩtĩ anũõõꞌthĩ eet cĩg Ĩꞌthĩraẽlĩ ꞌcĩg baag ariheek ꞌgõõlaa cĩnĩĩng ꞌthinneetinii ꞌcĩg õkõmĩ. 9Ma ho, itiggiayyiõõthĩ athegereeꞌnya cĩg Ijjibi eet cĩg Ĩꞌthĩraẽlĩ athegereeꞌnyanĩ vẽlẽk ĩcĩg habu cĩ Ijjibi, athegereeꞌnya ꞌcĩg avvir nyangõõllẽẽꞌnyanĩ, hĩ ꞌcĩg aꞌthuhan nyangõõllẽẽꞌnya ꞌcĩg agurut ꞌgadiggadiꞌnya, hĩ ꞌcĩg õvvõ ꞌthõõnĩ, nĩngĩtĩ õdõlanẽẽkĩ ĩhõõggõ dẽmẽtaa cĩ bũlũcõ ngaatĩ õbõhõõ hĩ Pi Hahirooth ꞌcĩ abakꞌthõõ hĩ ꞌBaal ꞌThevvon.
10Ma baa adtuuha eeta cĩg Ĩꞌthĩraẽlĩ habu cĩ Ijjibi ngaatĩ õõkõraanĩ hĩ athegereeꞌnya cĩgĩnnĩg ko, iita abarritit nẽ ĩĩlallieek Makayyioohit hẽẽl ĩhõõggõ. 11Ma nĩngaata, iita ijinit nẽẽg Mũũꞌtha ĩĩttĩk, “Inni baa ꞌthẽk luugayyeet nii ngagĩĩt hiita hadaakta horrwaa ꞌcĩ õdõhõhĩĩ kak ko? Hĩdĩcĩg baa ꞌthẽk ꞌlõõhĩta ꞌcĩg occa baa hadaiinna naag Ijjiba thõng? Ne ꞌcĩ adĩmaneekeet nii ngagĩĩt ko? Inni ꞌnyahaaeet ngagĩĩt hũtũngteeha looc cĩ Ijjibi ho? 12Nga nooyyia baa hiittihii naag nganiit Ijjiba, ‘Tũngeeheet ngagĩĩt ẽmmẽn, ĩꞌnya hidticattoothĩha eet cĩg Ijjibi’? Occa baa mẽẽn ngaatĩ hadticanoothĩka eet cĩg Ijjibi, hĩllõõan ngaatĩ hau hadaakna horrwaa ꞌcĩ õdõhõhĩĩ kak ko haaga!”
13Ẽdẽcĩ hinnia Mũũꞌtha eet anneek, “Ma hiteelinnu. Aanytĩk ꞌthinneeti hokomit nẽ hatĩ icittu ꞌgõõl ꞌcĩ ẽẽlannuung Makayyioohiti kõr nicci. Eeta cĩg Ijjibi ꞌcĩg acinnu niig ko, hõllõngaa hatĩ acinnu tarĩ. 14Eteiinnuung hatĩ Makayyioohiti ngagiita, emmeeꞌthik haaga nẽ ma hadĩmannu ꞌgiimwa.”
15Ma ho, uduhaak Makayyioohiti Mũũꞌtha ĩĩnnĩk, “Allweekaa inni? Duhaak nẽẽ nii eet cĩg Ĩꞌthĩraẽlĩ hõõt ĩĩcĩ oou. 16Dongeek aꞌthiit cunni hĩbahĩta noho bũlũc, hẽꞌngẽr maam, hátĩ habaaktĩ eeta cĩg Ĩꞌthĩraẽlĩ bũlũcatõõ ꞌgõõlaa ꞌcĩ õdõhõhĩĩ. 17Haaꞌnyihi hatĩ naa eet cĩg Ijjibi hilloorito nẽ unuyyiõõthĩ ĩhõõggõ. Nẽẽthĩ, edeeꞌnyia hatĩ bulẽẽnĩtĩ caannĩ ngaatĩ hĩllõõanĩĩ habu cĩ Ijjibi, ũũrũtaannĩ cĩgĩnnĩg noho hĩ ꞌgadiggadiꞌnya cĩgĩnnĩg hĩ athegereeꞌnya ꞌcĩg õvvõ nyangõõllẽẽꞌnyanĩ vẽlẽk. 18Au hatĩ aga eeta cĩg Ijjibi vẽlẽk ngaatĩ hĩĩnnĩ naa Makayyioohit, hatĩ edeeꞌnyia bulẽẽnĩtĩ caannĩ hĩ habu, acĩn hatĩ eeta cĩg Ijjibi vẽlẽk bulẽẽnĩt caannĩ nẽ agaacõ ĩĩtõ, hĩĩnĩ naa Makayyioohit dĩdĩ!”
19Ma nĩngaata, ikia aajĩlõ cĩ Nyekuci ꞌcĩ baa uwwattẽẽkĩ athegereeꞌnya cĩg Ĩꞌthĩraẽlĩ, õbõdõõthĩ nẽ ũũk ũnũa ĩhõõggõ uruta. Baa uwwattĩ loduruui ꞌcĩ aaĩ hĩ uuro ho buúk õkõ ĩĩcĩ oou. 20Baa aku aaĩ loduruui ciee hõrggẽẽnaa cĩ tuggẽẽt cĩg eet cĩg Ijjibi hĩ cĩg eet cĩg Ĩꞌthĩraẽlĩ. Ma baa ĩĩ lõõcĩ muguur, ikia ũtũhũĩ loduruui ĩĩ ꞌgwoo hũttũhũlõõ muguuratõõ. Nẽẽthĩ hinnia, baa hõllõngaa õmmõtõõ eeta cĩg Ijjibi hĩ eet cĩg Ĩꞌthĩraẽlĩ ũdũt, ĩꞌthõng haalĩhĩ lõõcĩ.
21Ma ho, odongeek Mũũꞌtha aꞌthiit cĩnnĩ bũlũc, nẽ baalin niccia hũtũrũũr, ikia uuhan Makayyioohiti bũlũc ngõõtaa ꞌcĩ aku ĩĩcĩ uruto, hoboddioothĩ maama uruta hõdõhõk lõõcĩ vẽr. Ma ho, eꞌngerri maama, 22nĩngĩtĩ abaahini Mũũꞌtha eet cĩg Ĩꞌthĩraẽlĩ bũlũcatõõ, ngaatĩ õdõhõhĩĩ hĩccĩnĩt tuduhaac, nẽ baa abĩlĩ dilat cĩ maamu ĩĩcĩ aꞌthiit cĩnĩĩng cobbi hĩ ĩĩcĩ aꞌthiit ꞌcĩ hidici.
23Baa iggiaoothi eeta cĩg Ijjibi ĩhõõggõ nyangõõllẽẽꞌnyanĩĩ cĩg habu cĩ Ijjibi vẽlẽk, hĩ athegereeꞌnya ꞌcĩg aꞌthuhan nyangõõllẽẽꞌnya ꞌcĩg agurut ꞌgadiggadiꞌnya hĩ athegereeꞌnya ꞌcĩg avvir nyangõõllẽẽꞌnyanĩ õõĩ ĩĩcĩ bũlũcõ. 24Nẽẽthĩ baa ngerrenita, ikia ĩcĩna Makayyioohiti ꞌcĩ aaĩ loduruatõõ ꞌcĩ alanyĩt hĩ ꞌgwaa, athegereeꞌnya cĩg Ijjibi loota nẽ atalmaanyan ĩhõõggõ. 25Aaꞌnyĩk Makayyioohiti ꞌthoo cĩg ꞌgadiggadiꞌnyannu huppuurriak tuu, hátĩ hanyaman ĩhõõggõ ꞌgõõl ꞌcĩ airi. Nĩngĩtĩ aĩnnĩ eeta cĩg Ijjibi, “Hõlõ, hũtũngteek eet cĩg Ĩꞌthĩraẽlĩ! Hĩnĩngĩtĩ eteiini Makayyioohiti ĩhõõggõ.”
26Nĩngĩtĩ aduhaakĩ Makayyioohiti Mũũꞌtha annẽẽkĩ, “Dongeek aꞌthiit cunni bũlũc, hátĩ hirikta maama hũmmũlũũnyanit eet cĩg Ijjibi hĩ ꞌgadiggadiꞌnya cĩggĩĩng hĩ eet ꞌcĩg avvir nyangõõllẽẽꞌnyanĩ.” 27Ma baa uppwaanna kõrra, odongeek Mũũꞌtha aꞌthiit cĩnnĩ bũlũc, nĩngĩtĩ arihaanĩ maama õbõdaanĩ nga gõõng hõdõõkõthĩ. Ma baa attĩman eeta cĩg Ijjibi aĩ hivvirria ho, amũlũũnyaneek hinnia Makayyioohiti ĩhõõggõ vẽlẽk bũlũcatõõ. 28Nĩngĩtĩ õbõdaanĩ maama au ammũlũũnyanĩ athegereeꞌnya ꞌcĩg aꞌthuhan nyangõõllẽẽꞌnya ꞌcĩg agurut ꞌgadiggadiꞌnya, hĩ ũũrũta ꞌcĩg avvir nyangõõllẽẽꞌnyanĩ, hĩ ũũrũta vẽlẽk cĩg habu cĩ Ijjibi. Baa adaahĩ eeta cĩg Ijjibi vẽlẽk baag iggiaoothi eet cĩg Ĩꞌthĩraẽlĩ bũlũcatõõ hĩĩ ꞌthĩĩ, hiittiõõ ꞌcĩ nga idiongan tõõ.
29Nẽẽthĩ, baa abaaki eeta cĩg Ĩꞌthĩraẽlĩ bũlũc ngaatĩ õdõhõhĩĩ, abĩlĩ dilat cĩ maamu ĩĩcĩ aꞌthiit cĩnĩĩng cobbi hĩ ĩĩcĩ aꞌthiit ꞌcĩ hidici. 30Kõr niccia, baa ẽẽla Makayyioohiti Ĩꞌthĩraẽl athĩnĩĩ cĩg eet cĩg Ijjibi, nĩngĩtĩ adtuuhanĩ nẽẽg eet cĩg Ijjibi ngaatĩ ĩbbaatini eleeti dẽmẽtaa cĩ bũlũcõ. 31Ma baa acĩn eeta cĩg Ĩꞌthĩraẽlĩ ꞌtirrian cobbi ꞌcĩ uuki Makayyioohiti eet cĩg Ijjibi ho, iita itingolli nẽẽg Makayyioohit nẽ aarrik ꞌthinneeti cĩggĩĩng hĩ ĩnõõnnõ hĩ Mũũꞌtha dticciannioohit cĩnnĩ buúk.
Currently Selected:
Luugithõõ 14: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
