Eevvetho 5

ꞌGõõl ꞌcĩ haattiyyi lanyita

1Nẽẽthĩ hoti ho, ĩthahithit Nyekuc hĩ lohollia cĩgĩnnĩg ꞌcĩg ammĩnan nẽẽnĩ 2nẽ ĩmmĩnattoou hĩ baa ammĩnanneet Krĩstõ ngagĩĩt nẽ ẽlẽmana ẽlẽ cĩnnĩ hĩĩ ꞌgaarrieenit ꞌcĩ õꞌngõlĩ ẽmmẽdĩ, ꞌcĩ abũnnaa ꞌcĩ aaꞌnyĩhoothĩk Nyekuc.#5:2 ꞌGaarrieenit ꞌcĩ abũnnaa: Baa ẽlẽmana Yeesu ẽlẽ cĩnnĩ hĩĩ ꞌgaarrieenit haau hĩ baa ĩbboorĩk eeta cĩg ꞌJudeei Nyekuc ꞌgaarriẽẽn. Tigiil ꞌBuuk cĩ Luugithõõ 29:18.

3Ma haaꞌnyiku thooꞌthiok ꞌcĩg ĩĩn ꞌriiring hẽdẽẽnyta hõrggẽẽnaa cunuung hode ainnu ngaam ngaam, hĩnĩngĩtĩ ĩĩn cieeg thooꞌthiok ꞌcĩg abathĩ ꞌcĩg occa hõllõngaa adĩman eeta ꞌcĩg ẽllẽẽmĩth cĩg Nyekuci. 4Hode ma hothooꞌthu thooꞌthiok ꞌcĩg ĩĩn ꞌriiring ꞌcĩg occa aꞌnyaha ngaaoni, hode thooꞌthiok ꞌcĩg occa hõllõngaa eelluunga, ꞌcĩg hõllõngaa abũnnaa, nẽẽthĩ, othoothit thooꞌthiok ꞌcĩg occa anneeku Nyekuc ĩlaallẽ. 5Hĩnĩngĩtĩ thooꞌthiok iccig agaac jurrung ĩĩtõ, aitiõõ ẽẽtĩ ꞌcĩ adĩman hẽlẽggĩ ꞌcĩg ĩĩn ꞌriiring hode ẽẽtĩ ꞌcĩ aĩ ngaam ngaam, hõllõngaa hatĩ arigith ꞌgiimwa habuccieetaa cĩ Krĩstõ hĩ ĩcĩ Nyekuci, hĩnĩngĩtĩ ala eet ꞌcĩ aaĩ hoti, hẽlẽggĩ ꞌcĩg aar eeta hĩĩtõ nyekuꞌnya. 6Ma haaꞌnyiku eet umwa higgooluung õlõnga haaga, hĩnĩngĩtĩ thooꞌthiok iccig, alĩĩllĩk Nyekuci eet ꞌcĩg hõllõngaa athĩhĩ thõõth cĩnnĩ. 7Nẽẽthĩ hoti ho, ma hadĩmannu thooꞌthiok ꞌcĩg adĩman nẽẽgĩ.

8Hĩnĩngĩtĩ baa gõõng aattiyyu niig hĩ eeta ꞌcĩg aattĩg muguuratõõ, nẽẽthĩ ꞌyioko, iittu eet cĩg lanyitaak, hĩnĩngĩtĩ iittu eet cĩg Makayyiooktak. Nẽẽthĩ ꞌyioko, aaut hĩ lohollia cĩg lanyitaak, 9hĩnĩngĩtĩ aꞌnyaha lanyit ciee aaĩ hĩ ngagiit ko, thõõth ꞌcĩ abũnnaa hĩ ꞌcĩ aũlanĩ hĩ ꞌcĩ ĩĩn dĩdĩ diooni. 10Nẽ ummuddia thõõth ꞌcĩ aaꞌnyĩk Makayyioohit haccamanoothĩk. 11Ũtũbũrĩt thooꞌthiok cĩg muguurak ꞌcĩg aꞌnyaha thooꞌthiok ꞌcĩg hõllõngaa abũnnaa, etereꞌthieek eet vẽlẽk hagaacõ bathi cĩnĩĩng. 12Hĩnĩngĩtĩ thooꞌthioha ꞌcĩg adĩman eeta ꞌcĩg hõllõngaa athĩhĩ Nyekuc burkiitina, haꞌngaaõn ngaatĩ occa habbũũngĩ. 13Nẽ ꞌgii vẽlẽk ꞌcĩ attũhũl lanyita, appulanniaa hedeeꞌnyia, 14hĩnĩngĩtĩ lanyit ꞌcĩ aaꞌnyĩk ꞌgii vẽlẽk hedeeꞌnyia. Ĩnõõ ꞌcĩ aĩnnĩ ꞌBuuhi cĩ Nyekuci,

“Anneek uꞌnyaakiahit tĩnga,

rũga daahĩtha,

hátĩ haaꞌnyi Krĩstõ lanyit.”#Tigiil ꞌBuuk cĩ Iꞌthaia 26:19; 51:17; 52:1; 60:1

15Nẽẽthĩ, ĩcĩnĩt authet ꞌcĩ aattiyyu jurrung. Ma haattiyyu hĩ ꞌgiiꞌthiaha, aaut hĩ ꞌgeeꞌnyiaha. 16Ĩdĩmanit thooꞌthiok ꞌcĩg abũnnaa hõdõõkõthĩ, hĩnĩngĩtĩ ĩĩn cieeg korriook ꞌcĩg abathĩ.#Tigiil Waraga cĩ Kolooꞌthe 4:5 17Nẽ ma haggiithennu, agaac tabiinit cĩ Makayyiookto. 18Aanytĩk Lori ꞌcĩ Ẽllẽẽmĩth haggam rũgẽt cunuung. Ma hiꞌnyiathanaannu eleeti dũũtĩtha, hĩnĩngĩtĩ aĩnanaakuung dũũtĩthĩ ĩdĩmanit thooꞌthiok ꞌcĩg mẽẽlĩg ꞌcĩg abathĩ. 19Ma alũteennu hõdẽĩ laiitta, ebenit tegellwa cĩg laiittak nẽ idihiꞌthu Makayyioohit ꞌthinneetinii cugguung vẽlẽk.#Tigiil Waraga cĩ Kolooꞌthe 3:16-17 20Ĩĩttĩk Nyekuc Baangeet ĩlaallẽ hõdõõkõthĩ, hĩnĩngĩtĩ thooꞌthiok vẽlẽk, ꞌthaarĩĩ cĩg Makayyioohit cĩnaac Yeesu Krĩstõ.

Ngaaĩ hĩ maaccwa

21Ĩthĩhĩt ꞌgoonogu ꞌcĩg ĩĩn lemmiook tẽẽlꞌthĩtaa cĩ Krĩstõ. 22Ĩnõõ ꞌcĩ occa athiknu niig ngaaĩ maaccwa cugguung, haau hĩcĩ occa athiknu Makayyioohit ko.#Tigiil Waraga cĩ Kolooꞌthe 3:18; 1 Pẽẽtũrũ 3:1 23Hĩnĩngĩtĩ maac ꞌcĩ ĩĩn makayyioohit cĩ ngaa cĩnnĩ, hĩcĩ ĩĩn Krĩstõ makayyioohit cĩ lothippit cĩ lemmiook ꞌcĩg ĩĩn ẽlẽ cĩnnĩ nẽ ĩĩ Ellioohit cĩnĩĩng. 24Hĩcĩ athĩhĩ lothippiti cĩ lemmioohu Krĩstõ, noho buúk aꞌnyĩĩk ngaaĩ hĩthĩhĩt maaccwa cĩggĩĩng thooꞌthiohĩ vẽlẽk.

25Niig maaccwaana, ĩmmĩnanit ngaaĩ cugguung hĩ baa ammĩnan Krĩstõ lothippit cĩ lemmioohu nẽ ẽlẽmana ẽlẽ cĩnnĩ, hĩnĩngĩtĩ ĩhõõggõ.#Tigiil Waraga cĩ Kolooꞌthe 3:19; 1 Pẽẽtũrũ 3:7 26Baa aaꞌnyĩk Krĩstõ lemmiook helleemito ngaatĩ ũũnyĩ ĩhõõggõ maamĩ, ꞌtirriaanaa cĩ thõõth cĩ Nyekuci. 27Baa adĩman Krĩstõ hoti, hátĩ haaꞌnyĩk lothippit cĩ lemmioohu ꞌcĩ ĩĩn ẽlẽ cĩnnĩ, hĩĩ lothippit ꞌcĩ abuli ꞌcĩ ẽllẽẽmĩthĩ, ꞌcĩ aitiõõ thooꞌthioha ꞌcĩg ĩĩn ꞌriiring ꞌcĩg abathĩ tõõ. Nẽẽthĩ hinnia, ẽllẽẽmĩth hatĩ nẽẽ nẽ iittiõõ bathi tõõ.

28ꞌGõõlaa ꞌcĩ aduhõõ thõng, adiim ammĩnan maaccwaana ngaaĩ cĩggĩĩng, haauto hĩcĩ ammĩnan nẽẽg eleeti cĩggĩĩng. Ẽẽtĩ ꞌcĩ ammĩnan ngaa cĩnnĩ, ammĩnan nẽẽ ẽlẽ cĩnnĩ buúk. 29Nẽẽthĩ nẽẽꞌthẽk, aitiõõ ẽẽtĩ ꞌcĩ occa aaburreek ẽlẽ cĩnnĩ tõõ, nẽẽthĩ hinnia, occa aꞌthũũnnĩ ẽẽtĩ ẽlẽ cĩnnĩ nẽ itirok haau hĩcĩ aꞌthũũnnĩ Krĩstõ lothippit cĩ lemmiook cĩgĩnnĩg, 30hĩnĩngĩtĩ hĩĩgĩn naag dhooriꞌnya cĩg ẽlẽ cĩnnĩ. 31Hĩcĩ aduha ꞌBuuhi cĩ Nyekuci aĩ, “Ũũnnĩk hatĩ ẽẽtĩ maaꞌnyĩ hĩ aattĩnnĩ nẽ õõt ũrũmtĩ hĩ ngaa cĩnnĩ hĩĩtõ ẽlẽ hõdẽẽthõng.”#Tigiil ꞌBuuk cĩ ꞌThianaattõ 2:24 32Ĩĩn ciee thõõth ꞌcĩ ĩllõõan ꞌgẽẽnyĩth cĩ eetu, nẽẽthĩ, hothoothi naa Krĩstõ hĩ lothippit cĩ lemmioohu. 33Nẽẽthĩ ꞌthẽk, adiim ammĩnan maac ngaa cĩnnĩ hĩcĩ ammĩnan nẽẽ ẽlẽ cĩnnĩ, nẽ adiim iꞌngolli ngaa maac cĩnnĩ.

Currently Selected:

Eevvetho 5: did

Highlight

Copy

Compare