Eevvetho 4

Rũmẽẽnĩt ẽllaa cĩ Krĩstõ

1Halayyuung naa ngagiit baabutheeniti cĩ Makayyiookto, aaut ꞌgõõlaa ꞌcĩ abũnnaa hĩ baa ẽbẽraauung Nyekuci ngagiit ĩĩtõ eet cĩgĩnnĩg. 2Ĩĩtõ tarbalĩg gẽrrẽẽt nẽ aꞌnyaktu ꞌthinneeti ꞌcĩg alalĩ, aꞌnyahit ꞌthinneeti ꞌcĩg makatĩg hĩ ꞌgoonogu nẽ etemeeꞌthu thooꞌthiok vẽlẽk mĩnnaniitta. 3Ĩttĩmanit ngaatĩ aꞌthuunnu rũmẽẽnĩt cĩ Lori cĩ Nyekuci ꞌthinneetinii cugguung. Ĩdĩmanit hoti, ꞌgõõlaa ꞌcĩ aattiyyu lõꞌngõõc. 4Iiginnu niig vẽlẽk eet cĩg ẽlẽ hõdẽẽthõng. Ĩĩn Lorii cĩ Nyekuci hõdẽẽthõng, hĩ baa aaꞌnyuung ngagiit Nyekuci muhẽẽnĩt hõdẽẽthõng ꞌcĩ abũnnaa. 5Haꞌnyak naag Makayyioohit hõdẽẽthõng diooni hĩ lemiinit hõdẽẽthõng hĩ baattithimo hõdẽẽthõng. 6Aaĩ Nyekuci hõdẽẽthõng ꞌcĩ ĩĩn Maaꞌnyĩ eet vẽlẽk. Hõllõngaa ĩllõõan nẽẽ eet vẽlẽk diooni, adticaninneet nẽẽ ngagĩĩt vẽlẽk nẽ aaĩ nẽẽ hĩ ngagĩĩt vẽlẽk.

7Baa eꞌngereeheet Krĩstõ ꞌthĩnĩtaa cĩnnĩ ꞌcĩ callĩ ꞌbaaninit ngagĩĩt vẽlẽk. 8Hĩcĩ aduha ꞌBuuhi cĩ Nyekuci aĩ,

“Ma baa ũũk nẽẽ lokora ngaatĩ uuni gẽrrẽẽt,

ikia ũũhĩ nẽẽ baabuuthnya ꞌcĩg mẽẽlĩg

nẽ aaꞌnyĩk eet ꞌbaaninit.”#Tigiil ꞌBuuk cĩ Tegellwaanu 68:18

9Ma aĩ, “Baa õtõd nẽẽ hẽẽtahujjieen,” aĩ thõõth ciee, baa aaĩ Krĩstõ loota nĩnga. 10Nẽ tarĩ ĩĩ thõõth ciee buúk, ẽẽtĩ baa aaĩ loota, ĩnõõnnõ ꞌcĩ õtõd hũũk hẽẽtahujjieen ko, hátĩ haau nẽẽ hẽẽtahujjieen hĩ loota vẽlẽk. 11Baa ĩnõõnnõ ꞌcĩ ẽbẽra eet ũgĩ hĩĩtõ ꞌthooyyiak nẽ ẽbẽra ũgĩ hĩĩtõ põrõvẽtaaꞌnya nẽ ẽbẽra ũgĩ hĩĩtõ eet ꞌcĩg allimaneek eet thõõth cĩ Nyekuci nẽ ẽbẽra ũgĩ hĩĩtõ paadĩrꞌnya hĩ ꞌlimmanniook, 12hillimanit eeta cĩg Nyekuci ꞌgõõl ꞌcĩ adticanõõthĩkĩ eet ũgĩ, hátĩ hĩtĩlĩth ẽlẽ cĩ Krĩstõ hittiran. 13Õkõ hatĩ dtiici ciee ĩĩcĩ oou ĩꞌthõng hũrũmeet lemiiniti nẽ hagaacõ Ngeertĩ Nyekuci. Nẽẽthĩ hatĩ hiita hĩtĩlĩthĩt naag hĩĩtõ makatĩg, lemiittaa hĩ Yeesu Krĩstõ nẽ hiita haauto naag hĩ nẽẽnĩ.

14Occa hõllõngaa haattĩg naag hĩ lohollia ꞌcĩg hidiciẽẽgĩ. Occa hõllõngaa haaꞌnyĩk eet ꞌcĩg ĩĩn oloꞌngiaak higgoollieet ꞌlimmaanaa cĩnĩĩng ĩcĩ ĩĩn õlõng, ĩcĩ aaĩ hĩ ngõõtĩ ꞌcĩ uuhan tahatak. 15Nẽẽthĩ hinnianĩ, ma hõthõõth naag thõõth ꞌcĩ ĩĩn dĩdĩ mĩnnaniitta, halĩthĩ hatĩ naag thooꞌthiohĩ vẽlẽk, hiita haauto hĩ nẽẽ ꞌcĩ ĩĩn Makayyioohit, ĩnõõnnõ Krĩstõ. 16Arũm Krĩstõ ẽlẽ cĩnnĩ ho hĩĩ hõdẽẽthõng nẽ aaꞌnyĩk hidticattõõ dhooriꞌnya vẽlẽk jurrung, hĩcĩ alĩthĩ hokomit hĩnĩngĩtĩ mĩnnani.

Aꞌnyaha Yeesu rũgẽt ꞌcĩ ĩĩn ngeju

17Hĩ nuyyioohiti cĩ Makayyiookto, haduhaakuung hanneekuung ibilli authet ꞌcĩ aattiyyu hĩ eeta ꞌcĩg aggiithi ꞌcĩg hõllõngaa aga Nyekuc. 18Adĩĩtĩ ĩhõõggõ ooti pĩd nẽ ĩĩtõ ꞌrẽẽttĩg hĩ authet cĩ Nyekuci, hĩnĩngĩtĩ aggiithi nẽẽg nẽ aalla õkõmĩ ĩhõõggõ ooti kak. 19Aitiõõ ĩhõõggõ ngaaoni tõõ. Ara nẽẽg adĩman thooꞌthiok ꞌcĩg ĩĩn ꞌriiring nẽ aalla arĩnyaneek ngaatĩ adĩmanĩ thooꞌthiok ꞌcĩg ĩĩn ꞌriiring vẽlẽk ko diooni.

20Nẽẽthĩ niiga, baa hõllõngaa au agayyu niig Krĩstõ ꞌgõõlaa nĩĩca. 21Dĩdĩ, iita agayyu niig ĩnõõnnõ nẽ baa illimatteeu niig thõõthaa cĩnnĩ ꞌgõõlaa cĩ thõõth ꞌcĩ ĩĩn dĩdĩ, ꞌcĩ aaĩ hĩ Yeesu. 22Udhukteek authet baalluung ꞌthẽccaneetu baa ꞌrẽẽnĩ tuu, ꞌcĩ ẽꞌthẽcan thooꞌthioha ꞌcĩg ĩĩn ꞌriiring hĩ õlõng.#Tigiil Waraga cĩ Kolooꞌthe 3:9 23Aanytĩk muhẽẽnĩt cunuung hũtũhũĩ hĩĩ ngeju, 24nẽ aaꞌnyuung ĩĩtõ eet ꞌcĩg ĩĩn ngeju. Baa ẽhẽnytaannuung Nyekuci ngagiit aaut hĩ nẽẽnĩ, abũnnaa adĩmannu thooꞌthiok ꞌcĩg adiim nẽẽnĩ nẽ elleemtu dĩdĩ.#Tigiil Waraga cĩ Kolooꞌthe 3:10

Nyattalliook cĩg rũgẽt ꞌcĩ ĩĩn ngeju

25Ma nga hoolongeeku ꞌgoonogu, iꞌthiattaaĩ uduktaak ĩhõõggõ thõõth ꞌcĩ ĩĩn dĩdĩ, hĩnĩngĩtĩ hĩĩgĩn naag ũbũtĩ cĩ ẽlẽ hõdẽẽthõng. 26Ma haaꞌnyĩku liilii hĩĩnanaahuung ꞌthẽccan. Ma hooyyu ũꞌnyaahĩ lĩĩlĩẽẽtta,#Tigiil ꞌBuuk cĩ Tegellwaanu 4:4 27nẽ ma hẽlẽmaaku habu cĩ loriẽẽt ꞌcĩg abathĩ#4:27 Habu cĩ loriẽẽt ꞌcĩg abathĩ: Ĩĩn ciee habu cĩ loriẽẽt ꞌcĩg abathĩ ꞌcĩ haĩ ꞌthaar cĩgĩnnĩg ꞌThĩttaan. Baa ĩĩn habuui cĩ loriẽẽt ꞌcĩg abathĩ ho aajĩlõ hẽẽtahujjieen ꞌcĩ baa aĩnanaak aajĩlẽẽt ũgĩ hũtũbũrĩt Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Tigiil ꞌBuuk cĩ Terethiitto 12:7-9. huduhunaahuung ngagiita. 28Ẽẽtĩ ꞌcĩ baa gõõng ĩgõrꞌthĩ, aꞌnyĩĩk hũtũngeek ĩgõr, adiim ꞌthẽk adtican ẽẽtĩ dtiic ꞌcĩ occa ẽẽl ĩnõõnnõ athĩnĩĩ cĩgĩnnĩg ẽmmẽn, hátĩ hũmmũda ꞌgii ꞌcĩ occa õthõl hĩ pĩĩrnatttiaak.

29Ma hothooꞌthu thooꞌthiok ꞌcĩg abathĩ. Aanytĩk thooꞌthiok ꞌcĩg aduhaannu hĩĩ ꞌcĩg abũnnaa, hátĩ hẽẽl eet ꞌcĩg athiknuunga. 30Nẽ ma haaꞌnyiku Lori ꞌcĩ Ẽllẽẽmĩth cĩ Nyekuci hĩlĩĩlĩ, Lori baa amacaaraniinnu niig, hĩnĩngĩtĩ kõr ꞌcĩ hatĩ ooggiannu ꞌthẽccanẽẽtĩĩ cugguung. 31Ũtũngteek tõngõrõrẽẽꞌthĩt hĩ liilii hĩ ngoongoi hĩ jore hĩ thõõth ꞌcĩ othooꞌthu ꞌgoonogu ꞌbuth hĩ thooꞌthiok vẽlẽk ꞌcĩg abathĩ. 32Nẽẽthĩ hinnianĩ, ĩĩtõ tarbalĩg nẽ atamaattihu ꞌgoonogu, hĩ baa ammaannikuung Nyekuci ngagiit, hĩnĩngĩtĩ Krĩstõ.#Tigiil Waraga cĩ Kolooꞌthe 3:13

Currently Selected:

Eevvetho 4: did

Highlight

Copy

Compare