Dtiicanĩ cĩg ꞌThooyyiahu 24

Ibilli eeta Paaulo muumaa cĩ Pelicce

1Ma urutaa cĩ waathinniook ꞌtur, ĩtĩnga paadĩrĩ cobbi ꞌcĩ haĩ Anania hĩ nyakangaaꞌnya ũgĩ hĩ eet ꞌcĩ haĩ ꞌTertullio ꞌcĩ aganeek nyattal, õõt ĩĩcĩ ꞌtaaũn cĩ Caetharea. Baa au abĩllĩ nẽẽg Paaulo muumaa cĩ ꞌgaalac cobbi Pelicce. 2Ma baa utuvvuyyiaa Paaulo hikia lokihooa, ĩtĩnga ꞌTertullio itigiil thõõth ꞌcĩ abĩllĩ Paaulo ho muumaa cĩ Pelicce aĩ, “ꞌGaalac cobbi, haccamattoothĩha naag gẽrrẽẽt ganõõna, hĩnĩngĩtĩ nganiita. Nẽẽthĩ hoti ho, ũkũmanoothĩk lõõcĩ aau lõꞌngõõc, hĩnĩngĩtĩ aꞌthũũnnĩ eet ꞌlẽẽmĩtha. 3Hatalla gẽrrẽẽt ũdũt ꞌgaalac cobbi Pelicce, hĩnĩngĩtĩ bũnnai ꞌcĩ aꞌnyaha nii ho. 4Nẽẽthĩ ꞌyioko, hõllõngaa occa haccanannii nganiit haaga, halayyi nuun thĩheet ngagĩĩt hĩdĩĩc.

5“Hummuddiaawa eet icci haĩ Paaulo ho, ngaatĩ ĩĩnnĩ eet ꞌcĩ abathĩ gẽrrẽẽt ũdũt, akannẽẽkĩ eeta cĩg ꞌJudeei looc hũtũrũũr hurukto. Ĩĩn nẽẽ makayyioohit cĩ lothippit cĩ eet ꞌcĩg anũ Yeesu cĩ Naaꞌtharẽtĩ, 6baa adiim ẽꞌthẽcan ꞌCieeth cĩ Nyekuci, ĩnõõ ꞌyioko ꞌcĩ baa haggama ĩnõõnnõ nẽ occa baa hetteeddiha thõõth nyattaalaa cĩnaang ẽmmẽn. 7Tõjõhõ hikia ꞌgaalacĩ cobbi cĩ ũũrũta ꞌcĩ haĩ Lithia athegereeꞌnyanĩ noho, hikia huvvucanaeet ĩnõõnnõ, athĩnĩĩ cĩggaang hũũhĩ nẽ uduhaak eet ꞌcĩg abĩllĩ ĩnõõnnõ ho, hiita hĩ nganiita. 8ꞌYioko ꞌthẽk jiin ĩnõõnnõ buúk, occa ammũda ngaatĩ ĩĩnnĩ thooꞌthioha cĩggaang ho dĩdĩ.”

9Nĩngĩtĩ awacahĩ eeta cĩg ꞌJudeei nẽ elemit thõõth ꞌcĩ aduha ꞌTertullio ho.

Ẽtẽõõĩ Paaulo ẽlẽ cĩnnĩ

10Ma baa uduhaak ꞌgaalacĩ cobbi Paaulo hõthõõth, ẽdẽc Paaulo ĩĩ, “Haga irkiꞌnyia ꞌcĩg mẽẽlĩg ngaatĩ ĩĩnnĩ ꞌgaadĩ cĩ looc icci nẽ ꞌyioko, haccamanoothihi gẽrrẽẽt ngaatĩ heteiini ẽlẽ caannĩ. 11Occa ꞌthẽk ammũda nii buúk, nga hallaꞌnganit waathinniooha õmmõtõ hĩ ꞌramma, baa hõkõ ꞌJeruꞌthalẽma laiitta. 12Nga hummuddieeha eeta ꞌcĩg abĩlla ho, ngaatĩ baa hegernyoonna hĩ eet umwa ꞌCieethaa cĩ Nyekuci hode hakannẽẽkĩ lothippit ꞌCieethinii cĩg Laiittak, hode nẽẽ ngaamwaanĩ ꞌtaaũna. 13Nẽ ꞌyioko ꞌthẽk hõllõngaa tarĩ ẽddẽẽbakii thooꞌthiok ꞌcĩg aũlan ꞌcĩg abĩlla nganĩĩt ko buúk. 14Nẽẽthĩ ꞌyioko helemi dĩdĩ, hala naa Nyekuc cĩ hĩbaangĩ cĩggaac hĩ nuyyioohiti cĩ ꞌgõõl cĩ Makayyioohit Yeesu, ꞌcĩ akanneek nẽẽg õlõng ko. Helemi thooꞌthiok vẽlẽk ꞌcĩg õõkõrõõ hĩ nyattal hĩ thooꞌthiok ꞌcĩg ẽhẽẽd põrõvẽtaaꞌnya, 15nẽ haꞌnyahi naa buúk muhẽẽnĩt hõdẽẽthõng hĩ Nyekuc, hĩcĩ ꞌthẽk aꞌnyak eeta cieegi. Aaĩ ꞌthẽk hatĩ rũgaanĩtĩ cĩ eet ꞌcĩg abũnnaa hĩ ꞌcĩg ĩĩn ꞌthẽccanniook. 16Nẽ harrĩcanaa hõdõõkõthĩ ngaatĩ haꞌnyahĩ ꞌthĩnĩt ꞌcĩ tẽllĩ muumaa cĩ Nyekuci hĩ muumtinii cĩg eetuk.

17“Urutaa cĩ irkiꞌnyia ꞌcĩg mẽẽlĩg ꞌcĩg baag haitõõnnĩ tõõ, hikia ꞌJeruꞌthalẽma haꞌnyahaaha eet cĩgannĩg ꞌcĩg appĩĩrna ꞌbaaninit nẽ hikia haaꞌnyĩha Nyekuc buúk ꞌbaaninit. 18Baa huunyi ẽlẽ baa au ammũdeeka eeta halaangatõõ cĩ ꞌCieeth cĩ Nyekuci, ngaatĩ hadĩmanĩĩ thõõth icci. Baa aitiõõ lothippiti ꞌcĩ harũmeenna tõõ, hode nẽẽ heggernyoonna hĩ eet haaga. 19Nẽẽthĩ, aattĩg eeta cĩg ꞌJudeei ũgẽẽgĩ cĩg looc cĩ Aaꞌthia, ꞌcĩg occa ꞌyioko aattĩg ngaati muumaa cunni nẽ aꞌnyakta thooꞌthiok cĩggĩĩng ꞌcĩg abĩlla nganĩĩta. 20Hode eeta cieeg aattĩg ngaati ho, occa ꞌthẽk athithana ꞌthẽccan ꞌcĩ baa ammũda hĩ nganĩĩt, baa habili muumtinii cĩg ꞌgaala cĩg lokihooak. 21Nẽẽthĩ nẽẽꞌthẽk, thõõth hõdẽẽthõng ꞌcĩ occa abĩlla nẽẽg nganĩĩt baa hẽggẽrnyĩ lokihooatõõ kõr baa haĩnnĩ, ‘Habili naa lokihooa kõr icci, hĩnĩngĩtĩ helemi haini, arũgna daakiaha daahĩtha.’ ”

22Baa aga Pelicce ꞌgõõl cĩ Makayyioohit Yeesu. Ma ho, immiir lokiho nẽ ĩĩ, “Hacini hatĩ naa thõõth cunni, hatĩ uppwaanna Lithia ꞌgaalacĩ cobbi cĩ ũũrũta.” 23Nĩngĩtĩ aduhaakĩ Pelicce ꞌgaalac cĩ ũũrũta hẽbẽk Paaulo jurrung, nẽẽthĩ, hõllõngaa occa ẽcẽb ĩnõõnnõ thõng. Aaꞌnyĩk ꞌgõõnõgĩ hiita heelito Paaulo.

24Ma urutaa cĩ waathinniook ũgĩ, ookorria Pelicce hĩ ngaa cĩnnĩ Duruthilla ꞌcĩ baa ĩĩn ꞌJudeeinit. Ma ho, ũtũvva nẽẽ Paaulo nẽ ĩthĩk ĩnõõnnõ ngaatĩ õthõõthĩ thõõth cĩ lemiinit cĩ Yeesu Krĩstõ. 25Ma baa õthõõth Paaulo thõõth cĩ Nyekuci ꞌcĩ aũlan hĩ ꞌgõõl ꞌcĩ haꞌthũũnnĩ ẽlẽ hĩ thõõth ꞌcĩ etteedini thooꞌthioha, ikia itiẽẽlĩ Pelicce gẽrrẽẽt nẽ ĩĩ, “Ẽlẽ, ĩnẽẽnĩ, ũũppanit nicciaag cĩg kõr icci! Bĩĩt da nõõnĩ. Ma hatĩ hammũda ꞌthaa kõr umwa, hauyyi hatĩnĩ.” 26Kõr niccia, ĩko nẽẽ baa ammuhuneek Pelicce hippirriidan Paaulo ĩnõõnnõ thõng. Nĩngĩtĩ aũyyĩ ĩnõõnnõ hiriiri hiita hothooꞌthio.

27Ma baa allacattĩ irkiꞌnyia ꞌramma, irigith ẽẽtĩ ꞌcĩ haĩ Porcio Vẽẽthtõ, Pelicce. Nẽẽthĩ, hĩnĩngĩtĩ baa adiim Pelicce haccamattoothĩk eeta cĩg ꞌJudeei, ikia ũtũngeek nẽẽ Paaulo baabuuthatõõ.

Currently Selected:

Dtiicanĩ cĩg ꞌThooyyiahu 24: did

Highlight

Copy

Compare