Dtiicanĩ cĩg ꞌThooyyiahu 23

1Baa nẽẽ akatĩ Paaulo makayyiook cĩg lokihooak hẽbẽrĩ nẽ ĩĩ, “ꞌGotoonoga hĩ ngoonoga, kõr icci hadticanoothihi naa Nyekuc thõõthaa ꞌcĩ tẽllĩ.” 2Ma ho, uduhaak Anania ꞌcĩ ĩĩn paadĩr cobbi eet ꞌcĩg abĩlĩ hĩ Paaulo nĩngaata hatabaangito Paaulo ũtũg. 3Nĩngĩtĩ annẽẽkĩ Paaulo ĩnõõnnõ, “Atabaaꞌngi hatĩ Nyekuci nganiit buúk, ꞌcĩ aaĩ hĩ dilat ꞌcĩ arrũũbĩ doobaa ꞌcĩ õõrĩ ho! Iccioloongani nĩngaata ĩꞌthõng nẽ etteedĩhaa nganĩĩt thõõth nyattaalaa cĩ Mũũꞌtha, ĩko nẽẽ ẽꞌthẽcani nii nyattal ngaatĩ aduhaakĩ eet hatabangta nganĩĩta!”

4Ma nĩngaata, ĩĩtõ eeta ꞌcĩg baag abĩlĩ hĩ Paaulo, “Ẽlẽ, hõllõngaa aga nii ngaatĩ õdõõmĩ paadĩr cobbi cĩ Nyekuci?”

5Ẽdẽcĩ Paaulo aĩ, “ꞌGotoonoga, iyyia mĩĩ hõllõngaa haga ngaatĩ ĩĩnnĩ nẽẽ paadĩr cobbi, hĩnĩngĩtĩ eheeddi ꞌBuuhaa cĩ Nyekuci aĩ, ‘Ma hothoothi makayyioohit cĩ eet cugunnig ꞌbuth.’ ”#Tigiil ꞌBuuk cĩ Luugithõõ 22:28

6Ma baa õrõõta Paaulo ngaatĩ ĩĩnnĩ eeta cĩg lokihooak ũgẽẽgĩ Thadutheei nẽ ĩĩtõ ũgẽẽgĩ Variꞌtheei ho, ikia õthõõth ĩĩ, “ꞌGotoonoga, hĩĩnĩ naa Variꞌtheenit, ngeertĩ Variꞌtheetto. Habili ꞌyioko lokihooa, hĩnĩngĩtĩ muhẽẽnĩt caannĩ ꞌcĩ arũkꞌthaanĩ eeta ꞌcĩg adaahito.” 7Ma baa uduha Paaulo thõõth icci, iita ẽppẽhattõõ Variꞌtheei hĩ Thadutheei, nĩngĩtĩ eꞌngeriini eeta lokihooatõõ. 8Baa aĩ Thadutheei aitiõõ eeta ꞌcĩg adaahito hõllõngaa arũgna nẽ hiꞌthihi aajĩlẽẽt hode loriẽẽta. Nẽẽthĩ, baa ẽlẽmĩ Variꞌtheei ngaatĩ arũgnaanĩ eeta ꞌcĩg adaahito hĩ aajĩlẽẽt hĩ loriẽẽt vẽlẽk.

9Nẽ baa ĩĩ maka wacahõõnĩ, nĩngĩtĩ ĩꞌngaannĩ ꞌlimmanniooha ũgẽẽgĩ cĩg Nyattaalak ꞌcĩg baag ĩĩn Variꞌtheei nẽ eggerenyit gẽrrẽẽt. Baa aĩ nẽẽg, “Nga hummuddiaawa naag ꞌgiimwa ꞌcĩ abathi ꞌcĩ ẽꞌthẽcan ẽẽtĩ cieeni. Horoong ꞌyioko baa othoothĩk aajĩlõ hode lorii ĩnõõnnõ dĩdĩ.” 10Ma nĩngaata, ikia abathõõthĩ pẽkanõõnĩ gẽrrẽẽt habarrit ꞌgaalacĩ cobbi cĩ ũũrũta hummuk hĩĩ, ẽrrẽẽc mõnõ hatĩ eeta cieeg Paaulo hĩ gõõng cẽrẽm thõng. Ma ho, uduhaak athegereeꞌnya hõõt hutugurria Paaulo hõrggẽẽnatõõ cĩnĩĩng ꞌtirriaana hoboddiaaĩ õlõõ cĩ athegereeꞌnyanu.

11Ma baalin niccia, uppwaanna Makayyioohiti Yeesu hikia hĩbĩl ngaatĩ aayyi Paaulo nẽ ĩĩ, “Aꞌnyĩĩk ꞌthĩnĩt hõkõm! Hĩcĩ eteretheehu nii eet thõõth caannĩ ꞌJeruꞌthalẽma ho, õkõ ꞌthẽk hatĩ eterꞌtheehi ꞌRoomattĩ buúk.”

Muhẽẽnĩt ꞌcĩ adiim aruhẽẽnĩ Paaulo

12Ma loohoth cĩnnĩ, iita ulutti eeta cĩg ꞌJudeei nẽ ũbũtanit lõbũtĩ ꞌcĩ hõllõngaa aduhẽẽnĩ hode ahũdẽẽnĩ, ĩꞌthõng huruhit Paaulo. 13Baa mẽẽlĩg eeta ꞌcĩg aarĩk muhẽẽnĩt ꞌcĩ atabĩ aruhi Paaulo ho hĩllõõanit eet hẽẽn ꞌwec. 14Nĩngĩtĩ õõĩ nẽẽg hĩ makayyiook cĩg paadĩrꞌnyaannu hĩ nyakangaaꞌnya nẽ õõt ĩĩtõ, “Iyyia hũbũtatta naag lõbũtĩ ꞌcĩ aꞌngirannii, ꞌcĩ hõllõngaa hadaka ꞌgiimwa ĩꞌthõng hurukta Paaulo. 15Nẽ niig hĩ eet cĩg lokihooak vẽlẽk, õõt nẽẽ niig iggoolit ꞌgaalac cobbi, ꞌgõõlaa ꞌcĩ adiim ammuddiaanĩ nyeemuut ꞌcĩ aũlan thõõthaa cĩ. Hadiimma haruka naag ĩnõõnnõ nga hikia ngaati.”

16Ma baa ĩthĩk ngeerĩ ngõõnõnĩ Paaulo thõõth icci, ũũk ĩĩcĩ õlõ cĩ athegereeꞌnyanu hũũk huduhaak Paaulo.

17Ma ho, ũtũvva Paaulo ꞌgaalac umwa cĩ ũũrũta ĩĩnnĩk, “Ẽlẽ bĩtĩ nyahaappan icci hĩ ꞌgaalac cobbi, hĩnĩngĩtĩ aꞌnyak thõõth umwa ꞌcĩ atab aduhaak ĩnõõnnõ.”

18Nĩngĩtĩ aꞌnyahõõthĩkĩ ꞌgaalacĩ nyahaappan nicci, ꞌgaalac cobbi cĩ ũũrũta nẽ ũũk ĩĩnnĩk, “Aduhaaka nganĩĩt baabutheeniti ꞌcĩ haĩ ꞌthaar Paaulo haꞌnyahaahii nganiit nyahaappan icci, hĩnĩngĩtĩ aꞌnyak thõõth ꞌcĩ adiim aduhaakiina.”

19Ma ho, aggam ꞌgaalacĩ cobbi nyahaappan nicci aꞌthiit, nĩngĩtĩ õkõõyyĩ ĩnõõnnõ ngadiiha nẽ ũũk ijin ĩĩnnĩk, “Thõõth ꞌcĩ aaĩ hutuno ꞌcĩ adiim aduhaaka nii nganĩĩt ko?”

20Ẽdẽcĩ nyahaappanĩ aĩ, “Ũkũmatteek eeta cĩg ꞌJudeei ũgẽẽgĩ thõõth ꞌcĩ au iggoolli nganiit ꞌnyaha Paaulo hikia lohotha muumaa cĩ lokihoo, ꞌgõõlaa ꞌcĩ adiim ammũdaanĩ thõõth ꞌcĩ aũlan, hĩnĩngĩtĩ ĩnõõnnõ. 21Ma baa nuun helemi thõõth cĩnĩĩng ko, hĩnĩngĩtĩ au ooginneek eeta ꞌcĩg ĩllõõan eet hẽẽn ꞌwec ĩnõõnnõ ꞌgõõla. Iyyia ũbũtanit nẽẽg ĩĩtõ, hõllõngaa occa haduheenna hode hahũdeenna ĩꞌthõng hurukta Paaulo. Ũkũmattoothĩk nẽẽg ẽlẽk, ẽrẽẽcõ thõõth ꞌcĩ attacanĩĩ nii tabiinit cĩnĩĩng ko diooni.”

22Ma ho, uduhaak ꞌgaalacĩ cobbi ho nyahaappan nicci ĩĩnnĩk, “Ma thĩ hõkõ haduhaahi eet umwa hanneehi iyyia huduhaaha ꞌgaalac thõõth icci, nĩngĩtĩ ĩꞌthõõĩkĩ ꞌgõõl hũũk.”

Ĩꞌthõõĩ Paaulo hũũk ꞌtaaũnaa cĩ Caetharea

23Ma ho, ũtũvva ꞌgaalacĩ cobbi cĩ ũũrũta ꞌgaala ꞌramma, nẽ uduhaak ĩĩnnĩk, “Ũkũmatteek athegereeꞌnya ꞌmiiaꞌnya ꞌramma, athegereeꞌnya cĩg nyangõõllẽẽꞌnyanu hẽẽn tũkĩramma hĩ athegereeꞌnya cĩg dĩlaꞌnyaannu ꞌmiiaꞌnya ꞌramma hõõt ꞌtaaũnaa cĩ Caetharea hatĩbaal ꞌthaa tũrkũwwec. 24ꞌTiha nyangõõllẽẽ umwa kũmanẽẽhĩ Paaulo, hátĩ hõdõlan nẽẽ ꞌgaalac cobbi Pelicce lõꞌngõõc.”

25Ma nĩngaata, ẽtẽhẽẽd ꞌgaalacĩ cobbi cĩ ũũrũta waraga ꞌcĩ agiili aĩ,

26ꞌThaainit ꞌcĩ aku hĩ Kalaudo Lithia, ꞌcĩ õkõ hĩ ꞌgaalac cobbi Pelicce.

27Baa aggam eeta cĩg ꞌJudeei eet icci nẽ ũbũcatta aĩ hurukta ĩnõõnnõ thõng. Tõjõhõ hookorriawa naag hĩ ũũrũta cĩgannĩg hiita heelliawa Paaulo, hĩnĩngĩtĩ baa hikia hagawa ngaatĩ ĩĩnnĩ eet cĩ ꞌRooma. 28Baa hatabi haga, inni hibilli nẽẽg ĩnõõnnõ ho, nĩngĩtĩ haꞌnyahaakĩ ꞌgaadĩꞌnya cĩggĩĩng lokihooa. 29Hammũda hinnia abĩllĩ ĩnõõnnõ, hĩnĩngĩtĩ nyattal cĩnĩĩng. Nẽẽthĩ, baa aitiõõ ꞌthẽk thõõth ꞌcĩ ammuddiaa ꞌcĩ occa etteedoothĩk ĩnõõnnõ ꞌcĩ aruhẽẽnĩ, hode ababuuthaniini thõng tõõ. 30Ma baa aku adukiaaka ngaatĩ atab ooginnẽẽkĩ eeta ĩnõõnnõ hidiimito huruhit thõng ko, hĩꞌthõõahii nganiit nĩĩcĩ noho. Huduhaaha eet ꞌcĩg abĩllĩ Paaulo ho buúk, hiita hẽddẽẽbtahii thõõth ꞌcĩ abĩllĩ nẽẽg ĩnõõnnõ ho nganiita.

31Nĩngĩtĩ mĩĩ athĩknĩ athegereeꞌnya thõõth cĩ ꞌgaalac cobbi nẽ ootti Paaulo baa baal, ĩꞌthõng hõdõlattĩ ꞌtaaũn ꞌcĩ haĩ Antipatiri. 32Ma baa kõr ꞌcĩ ꞌrĩĩng, iita oboddia athegereeꞌnya cĩg ꞌthoonu nẽ ittioonito Paaulo athegereeꞌnya ꞌcĩg õvvõ nyangõõllẽẽꞌnyanĩ diooni. 33Ma baa õdõlanit Caetharea, aanytĩk ꞌgaalac cobbi waraga nẽ aanytĩk Paaulo buúk hũũhĩ nẽẽnĩ. 34Ma ho, itigiil ꞌgaalacĩ cobbi waraga, nẽ ijin Paaulo nẽ ũmmũda ngaatĩ akuuni nẽẽ looccaa cĩ ꞌCilicia. 35Nĩngĩtĩ aĩnnĩ makayyioohiti, “Hathihi hatĩ naa thõõth cunni hatĩ iita eeta ꞌcĩg abilli nganiit ko ngaati.” Ma baa uduha thõõth icci, uduhaak eet huꞌthuutti Paaulo hĩĩ baabutheenit halangatõõ cĩ Ẽrõõdẽ.

Currently Selected:

Dtiicanĩ cĩg ꞌThooyyiahu 23: did

Highlight

Copy

Compare