Dtiicanĩ cĩg ꞌThooyyiahu 25

Paaulo muumaa cĩ Vẽẽthtõ

1Ma urutaa cĩ waathinniook iyyio, baa ikia irigith Vẽẽthtõ Pelicce, ĩtĩnga Vẽẽthtõ ꞌtaaũnaa cĩ Caetharea nẽ ũũk ꞌJeruꞌthalẽma. 2Ma ĩĩca, iita makayyiooha cĩg paadĩrꞌnyaannu hĩ makayyiook ũgĩ cĩg eet cĩg ꞌJudeei, uduktaak ĩnõõnnõ thooꞌthiok ꞌcĩg au abĩllĩ nẽẽg Paaulo. 3Ma hĩdĩĩkoothong, alaacõ nẽẽg Vẽẽthtõ huluugi Paaulo hũũhĩ ꞌJeruꞌthalẽma, hĩnĩngĩtĩ baa õõ ooginneek nẽẽg Paaulo ꞌgõõla. 4Ẽdẽcĩ Vẽẽthtõ anneek, “Ecebbi Paaulo baabuuthatõõ Caetharea nẽ hõkõ hatĩ naa dẽẽdẽ ĩĩca hataman. 5Aꞌnyĩĩk makayyiook ũgĩ cugguung hiita hookorria hĩ nganĩĩt hõdẽĩ, hõõt hudukta thooꞌthiok ꞌcĩg abĩllĩ nẽẽg Paaulo ho ĩĩca, hatĩ baa ꞌthẽk ẽꞌthẽcanõõ.”

6Nĩngĩtĩ aayyi Vẽẽthtõ ꞌJeruꞌthalẽma waathinniook turkiyyio hode waathinniook ũgĩ õmmõtõ, nga hũũk Caetharea. Ma loohoth cĩnnĩ, ikia ĩĩ nẽẽ ꞌgaadĩ, nĩngĩtĩ aku aduhaakĩ eet, haꞌnyakta Paaulo lokihooa. 7Ma baa uppwaanna Paaulo ho, ĩtĩngaacõ eeta cĩg ꞌJudeei baag au ꞌJeruꞌthalẽma, itigirria thooꞌthiok ꞌcĩg abathĩ ꞌcĩg mẽẽlĩg ꞌcĩg abĩllĩ nẽẽg Paaulo, nẽ tarĩ hõllõngaa ẽtẽrꞌtha thooꞌthiok iccig ngaatĩ ĩĩnnĩ dĩdĩ buúk.

8Ma ho, ẽtẽõõĩ Paaulo ẽlẽ cĩnnĩ ĩĩ, “Nga hẽꞌthẽcan Nyattal cĩ ꞌJudeei hode cĩ ꞌCieeth cĩ Nyekuci hode cĩ habu cobbi cĩ ꞌRooma.”

9Nẽẽthĩ, baa atab Vẽẽthtõ hĩmĩnaacõ ĩnõõnnõ eeta cĩg ꞌJudeei, nĩngĩtĩ ajini Paaulo annẽẽkĩ, “Occa õkõ nii ꞌJeruꞌthalẽma bĩĩt bĩĩl lokihooa muumaa caannĩ, hĩnĩngĩtĩ thooꞌthiok iccig?”

10Ẽdẽcĩ Paaulo aĩ, “Habili naa ꞌyioko lokihooa cĩ habu cobbi cĩ ꞌRooma nẽ hõkõ hatĩ hattĩmannii ꞌJeruꞌthalẽma. Nga hẽꞌthẽcan naa ꞌgiimwa cĩ eet cĩg ꞌJudeei, hĩcĩ ꞌthẽk aga nii buúk ẽllaa cunni ẽmmẽn ko. 11Má baa hĩĩ eet ꞌcĩ hẽꞌthẽcana thõõth ꞌcĩ occa hẽttẽẽdõõthĩkĩĩ daahĩth, aitiõõ hõllõngaa haburi naa daahĩth. Nẽẽthĩ, má ĩĩn thooꞌthioha ꞌcĩg abĩlla nganĩĩt eeta cĩg ꞌJudeei cieeg ko õlõng, occa aitiõõ ẽẽtĩ ꞌcĩ aaꞌnyĩk hoottia nẽẽg nganĩĩt tõõ. Hatabi ꞌyioko naa hũũk hĩttĩmanaa habuui cobbi cĩ ꞌRooma nẽẽ ẽmmẽn.”

12Ma baa othoothito Vẽẽthtõ hĩ ꞌgõõnõgĩ cĩ lokihooak thõõth icci, ĩĩnnĩk nẽẽ Paaulo, “Iyyia atabi nii hũũk hĩttĩmanii habuui cobbi cĩ ꞌRooma nẽ õkõ hatĩ nii hĩ ĩnõõnnõ!”

Othooꞌthio Paaulo hĩ Agirippa hĩ Bernicce

13Ma urutaa cĩ waathinniook ꞌcĩg abadtẽc, ikia habuui Agirippa ookorria hĩ Berenicce, ẽhẽẽrõttaak Vẽẽthtõ ꞌtaaũnaa cĩ Caetharea. 14Baa au aattĩg nẽẽg nĩngaata waathinniook ꞌcĩg mẽẽlĩg, nĩngĩtĩ ahĩkĩĩmanaakĩ Vẽẽthtõ habu thõõth cĩ Paaulo. Baa anneek nẽẽ habu, “Aaĩ ẽẽtĩ umwaa ngaati ꞌcĩ baa ũũnnĩk Pelicce baabuuthatõõ. 15Ma baa hũũha naa ꞌJeruꞌthalẽma, iita makayyiooha cĩg paadĩrꞌnyaannu hĩ makayyiook cĩg ꞌJudeei ibilli Paaulo nẽ ijitta nganĩĩt hetteedĩk ĩnõõnnõ daahĩth.

16“Nĩngĩtĩ hannẽẽkĩ ĩhõõggõ, aitiõõ hõllõngaa ĩĩn nyepitee cĩ ꞌRooma, ꞌcĩ occa hẽttẽẽdĩkĩĩ eet umwa thõõth, nga hibillio hĩ eet ꞌcĩg abĩllĩ ĩnõõnnõ ho, nga hẽtẽõõĩ ẽlẽ cĩnnĩ thooꞌthiohĩĩ ꞌcĩg abĩllĩ eeta ho. 17Ma baa õdõlan eeta ꞌcĩg abĩllĩ ĩnõõnnõ ho, baa hõllõngaa hẽdẽcaahi ꞌthaa haaga. Loohoth cĩnnĩ noho, hũũk hiccioloongana dtaabawa cĩ ꞌgaadĩõõ nẽ huduhaaha eet haꞌnyakta Paaulo lokihooa. 18Ma baa ĩꞌngaathĩ eeta ꞌcĩg abĩllĩ Paaulo hothoothito ho, hõllõngaa hinnia aduha thooꞌthiok ꞌcĩg ẽꞌthẽcan nẽẽ ho, ꞌgõõlẽẽ ꞌcĩ baa hammuhuneehi naana. 19Baa hinnia aduha thooꞌthiok ꞌcĩg ẽggẽrꞌnyõõnĩ hĩ Paaulo, hĩnĩngĩtĩ thõõth cĩ Nyekuc cĩnĩĩng hĩ thõõth cĩ eet umwa ꞌcĩ baa adaak ꞌcĩ haĩ ꞌthaar Yeesu, ꞌcĩ aĩ Paaulo ũrũga daahĩtha. 20Ma ngaati, ẽrẽha ngaatĩ occa hanũĩ thooꞌthiok ꞌcĩg aattĩg hoti. Ma nĩngaata, hijina ĩnõõnnõ hatĩ occa adiim õkõ ꞌJeruꞌthalẽma, hũũk hĩbĩl lokihooa thooꞌthiohĩĩ ĩĩcĩg. 21Ma baa uduha Paaulo thõõth ꞌcĩ adiimi nẽẽ haꞌnyĩhoothĩk athĩnĩĩ cĩg habu cobbi cĩ ꞌRooma ho, huduhaaha eet huꞌthuutti ĩnõõnnõ, ĩꞌthõng hatĩ hĩꞌthooĩk ĩnõõnnõ habu cobbi.”

22Ma ho, uduhaak Agirippa Vẽẽthtõ ĩĩnnĩk, “Hatabi da naa dẽẽdẽ hathihi thõõth cĩ eet icci.”

Ẽdẽcĩ Vẽẽthtõ anneek, “Athihi ꞌthẽk hatĩ lohotha ngaalloohoth.”

Othoothĩk Paaulo Agirippa

23Ma loohoth cĩnnĩ, ookorria Agirippa hĩ Berenicce irriana ceremwaanĩĩ ꞌcĩg ẽllẽẽmĩth gẽrrẽẽt nẽ uduhunit ꞌcieeth cĩ lokihoo, õõkõra hĩ ꞌgaala hĩ makayyiook cĩg ꞌtaaũnaak. Nẽẽthĩ, thõõthaa ꞌcĩ aduha Vẽẽthtõ, ikia aꞌnyakia Paaulo lokihooa. 24Ma ho, irrioon Vẽẽthtõ ĩĩ, “Habu Agirippa hĩ eet vẽlẽk ꞌcĩg aattiyyu ngaati ho, acinnu eet icci! Eet ꞌcĩ adiim eeta cĩg ꞌJudeei vẽlẽk ꞌcĩg aattĩg ngaati hĩ ꞌJeruꞌthalẽma, huruhi thõng cieeni.” 25Nẽ muhẽẽttaa caannĩ, aitiõõ ꞌgii ꞌcĩ ẽꞌthẽcan ẽẽtĩ ciee ꞌcĩ abathĩ tõõ, ꞌcĩ occa aaꞌnyĩk ĩnõõnnõ hetteedoothĩk daahĩthĩ. Baa atab nẽẽ thõõth cĩnnĩ hũũk hĩthĩk habuui cobbi cĩ ꞌRooma, nĩngĩtĩ haĩnnĩ naa, aꞌnyĩĩk hũũk ꞌRoomattĩ. 26Nẽ naa buúk, aitiõõ ꞌgii dẽẽdẽ ꞌcĩ hadtuuha hĩ ĩnõõnnõ ꞌcĩ occa hẽhẽẽdĩ waragaawa hĩꞌthooĩk habu cobbi cĩ ꞌRooma tõõ. Nĩngĩtĩ ꞌyioko haꞌnyahaanĩ ĩnõõnnõ ngaati, ettebehini nganiit habu Agirippa, haini hatĩ ĩcĩnĩt niig buúk hẽbẽrẽẽnnĩĩ cugguung. Nẽ urutaa ꞌcĩ hũnũĩ naa thõõth cĩnnĩ, horoong hatĩ hammũda ꞌgiimwa ꞌcĩ occa heheedi. 27Hĩnĩngĩtĩ hammuhi hõllõngaa occa hĩꞌthõ baabutheenit haaga, hiꞌthihi ꞌgiimwa ꞌcĩ edeeꞌnyia ꞌcĩ ẽꞌthẽcan buúk.

Currently Selected:

Dtiicanĩ cĩg ꞌThooyyiahu 25: did

Highlight

Copy

Compare