Dtiicanĩ cĩg ꞌThooyyiahu 15

Mõtõõnĩt cĩ makayyioohu ꞌJeruꞌthalẽma

1Baa au eeta ũgẽẽgĩ ĩĩcĩ looc cĩ ꞌJudeea, au õõ ĩĩcĩ ꞌtaaũn cĩ Antiohĩ, hõõt hiꞌthiattaaĩ hillimanit nuyyiook ꞌcĩg Makayyiooktak ꞌcĩg hõllõngaa ĩĩn ꞌJudeei hĩĩttĩk, “Hõllõngaa occa eelliannu niig hatĩ nga hetteeddi eleeti, hĩcĩ aduha nyattalĩ cĩ Mũũꞌtha.” 2Nẽ baa aaꞌnyĩk thõõth ciee Paaulo hĩ Baarnaba hẽppẽhattõõ hĩ ĩhõõggõ gẽrrẽẽt, hĩnĩngĩtĩ ꞌlimman icci. Ma ho, iita eberria lemmiooha Paaulo hĩ Baarnaba hĩ eet ũgĩ ꞌcĩg abadtẽc nẽ ĩꞌthõõcõ hõõt ꞌJeruꞌthalẽma, hõõt hothoothito thõõth icci hĩ ꞌthooyyiak hĩ makayyiook cĩg lemmioohu. 3Nĩngĩtĩ ĩꞌthõõĩkĩ lothippiti cĩ lemmioohu ĩhõõggõ ꞌgõõl hõõt. Ma baa õdõlanit nẽẽg looc cĩ Venicia hĩ looc cĩ Thamaria, õõt uduktaak eet ꞌgõõl ꞌcĩ baa ẽlẽmmĩ eeta ꞌcĩg hõllõngaa ĩĩn ꞌJudeei Nyekuc. Baa aaꞌnyĩk nyeemuut ciee nuyyiook cĩg Makayyioohit Yeesu haccamattoothĩk gẽrrẽẽt. 4Ma baa õdõlanit Paaulo hĩ Baarnaba ꞌJeruꞌthalẽm, ikia ĩꞌtha lothippiti cĩ lemmioohu hĩ ꞌthooyyiak hĩ makayyiook ĩhõõggõ. Ma nĩngaata, uduktaak Paaulo hĩ Baarnaba eet thõõth vẽlẽk ꞌcĩ ẽẽlĩ Nyekuci ĩhõõggõ hĩdĩmanit.

5Nẽẽthĩ, baa iita ĩĩtõ Variꞌtheei#15:5 Variꞌtheei: Ĩĩn Variꞌtheei lothippit cĩ ꞌJudeei ꞌcĩg aꞌthũũnnĩ nyattal cĩ Mũũꞌtha nẽ elemit thõõth ꞌcĩ arũgnaanĩ daakiaha tarĩ nẽ elemit aajĩlẽẽt hĩ loriẽẽta. Tigiil ꞌBuuk cĩ Dtiicanĩ cĩg ꞌThooyyiahu 23:8. ũgẽẽgĩ nuyyiook cĩg Makayyiooktak. Ma nĩngaata, ĩtĩngaacõ nẽ ĩĩtõ, “Eeta ꞌcĩg hõllõngaa ĩĩn ꞌJudeei ꞌcĩg ẽlẽmĩ Makayyioohit, aꞌnyĩĩk hetteeddi eleeti hũnnẽẽcõ nyattal cĩ Mũũꞌtha.”

6Baa nẽ ommottio ꞌthooyyiaha hĩ makayyiook cĩg lemmioohu nẽ irrioonito thõõth cĩ eet ꞌcĩg hõllõngaa ĩĩn ꞌJudeei ho. 7Ma baa othooꞌthio hĩ ĩhõõggõ ĩꞌthõng, ikia ĩtĩnga Pẽẽtũrũ nẽ õthõõth ĩĩ, “ꞌGotoonoga hĩ ngoonoga, agayyu niig hũnũũk ngaatĩ ẽbẽraanna nganĩĩt Nyekuci hõrggẽẽnaa cunuung, hillimaneek eet ꞌcĩg hõllõngaa ĩĩn ꞌJudeei nyeemuut ꞌcĩ abũnnaa. Baa adĩman Nyekuci hoti, hátĩ hĩthĩktõ nẽẽg nẽ elemit ĩnõõnnõ. 8Aga Nyekuci ꞌthinneeti cĩg eetuk nẽ ẽlẽm eet ꞌcĩg hõllõngaa ĩĩn ꞌJudeei, ngaatĩ aaꞌnyĩkĩ ĩhõõggõ Lori ꞌcĩ Ẽllẽẽmĩth, hĩ baa aaꞌnyeet ngagĩĩt buúk. 9Baa hõllõngaa ahal Nyekuci ĩhõõggõ hĩ ngagĩĩta, hĩnĩngĩtĩ ũtũũny nẽẽ ꞌthinneeti cĩggĩĩng hĩĩtõ tẽllĩg, hĩnĩngĩtĩ lemiinit cĩnĩĩng. 10Aattiyyu occa gõõng ĩꞌthõng nẽ ĩttĩmattu Nyekuc ngaatĩ aaꞌnyiku nuyyiook dtiic ꞌcĩ adĩddĩngĩĩ ꞌcĩ occa hõllõngaa hũũlũ naag hode hĩbaangĩ cĩggaac buúk inni? 11Aitiõõ hõlõ! Hẽlẽmĩ naag ngaatĩ akuuni elliaanĩtĩ cĩnaac bũnnaiittaa cĩ Makayyioohit Yeesu, haau hĩcĩ ꞌthẽk eelliaa eeta ꞌcĩg hõllõngaa ĩĩn ꞌJudeei ho.”

12Ma ho, ĩjjaaktõ eeta vẽlẽk hĩthĩhĩt thõõth ꞌcĩ aduha Baarnaba hĩ Paaulo. Baa aduhaak nẽẽg eet ꞌgõõl ꞌcĩ baa aaꞌnyĩkĩ Nyekuci ĩhõõggõ ꞌtirrian ꞌcĩ adticanĩ thooꞌthiok ꞌcĩg ĩnaat eeta ꞌcĩg hõllõngaa ĩĩn ꞌJudeei. 13Ma baa ẽdẽcaak nẽẽg ngaatĩ õthõõthĩ ho, ĩtĩnga eet umwaa ꞌcĩ haĩ ꞌJeemith õthõõth ĩĩ, “ꞌGotoonoga hĩ ngoonoga, ĩthĩktaangu nganĩĩta. 14Ẽddẽbaheet ꞌThimõõnẽ ꞌgõõl ꞌcĩ baa akuuni Nyekuci ĩĩcĩ oou hĩ eet ꞌcĩg hõllõngaa ĩĩn ꞌJudeei nẽ aaꞌnyĩk ũgĩ hĩĩtõ eet cĩgĩnnĩg. 15Õõkõrõõ thooꞌthioha cĩg põrõvẽtaaꞌnyanu hĩ thõõth baa eheeddi aĩ,

16“ ‘Hõbõda hatĩ naa Makayyioohiti Nyekuci

hikia hẽtẽhẽny ꞌcieeth cĩ Daavide

baa irribanĩ.

Hehenyiti ꞌthẽk, hátĩ hĩbĩl tarĩ.

17Au hatĩ loonyini ũgẽẽgĩ hĩ nganĩĩt

hĩĩtõ eet cĩgannĩg ꞌcĩg eberriaa.

Nganĩĩt Nyekuc Makayyioohit ꞌcĩ haduha thõõth icci ho.#Tigiil ꞌBuuk cĩ Aamoth 9:11-12

18Baa huduha naa thõõth icci baangaani ẽlẽk.’

19“ꞌGotoonoga hĩ ngoonoga, hammuhi occa hõllõngaa hahiic eet ꞌcĩg hõllõngaa ĩĩn ꞌJudeei ꞌcĩg ꞌyioko elemit Nyekuc ko. 20Nẽẽthĩ hinnia, occa heheedĩk ĩhõõggõ waraga ꞌcĩ haduhaakĩ hũtũngteek ngaatĩ adahĩ ꞌgiimwa ꞌcĩ aaꞌnyĩhoothĩk hẽlẽggĩ ꞌcĩg aar eeta hĩĩtõ nyekuꞌnya. Occa adukiaak ĩhõõggõ hiittiõõ hõllõngaa adak iding umwa ꞌcĩ acud eeta thõng, hode iding ꞌcĩ nga aꞌnyak biyyi. Nẽ occa adukiaak ĩhõõggõ hũtũngteek ꞌthẽccan ꞌcĩ abathĩ dtẽc ꞌcĩ attihi ngaaĩ tahatak. 21Hummuhuttooth baa allimanni nyattalĩ cĩ Mũũꞌtha õyõyyõr ꞌtaaũnnioohĩ irkiꞌnyia ꞌcĩg mẽẽlĩg nẽ itigiili hĩthĩhĩt eeta ꞌCieethinii cĩg Laiittak, ĩcĩg õmmõtõõnĩ eeta cĩg ꞌJudeei Korrioohĩ vẽlẽk ĩcĩg ꞌYiommaanak.”

Waraga hĩ lemmiook ꞌcĩg hõllõngaa ĩĩn ꞌJudeei

22Ma ho, ummuhit ꞌthooyyiaha hĩ makayyiook hĩ lothippit cĩ lemmioohu hũtũrũũr, heberria eet ũgĩ cĩggĩĩng nẽ ĩꞌthõõcõ hõõt Antioha hookorit hĩ Paaulo hĩ Baarnaba. Nĩngĩtĩ ẽbẽraanĩ nẽẽg ꞌJuuda ꞌcĩ haĩ ꞌthaar ũgĩ Barthaba#15:22 ꞌJuuda Barthaba: Occa oho baa ĩĩn ꞌJuuda Barthaba ꞌgõtõnĩ Yothebo Barthaba. Tigiil ꞌBuuk cĩ Dtiicanĩ cĩg ꞌThooyyiahu 1:23. hĩ ꞌThĩĩla. Baa ĩĩn eeta cieeg ĩĩn ꞌramma ho makayyiook hõrggẽẽnaa cĩ nuyyiook cĩg Makayyiooktak. 23Baa ẽhẽẽd nẽẽg waraga ꞌcĩ aĩ,

Hĩꞌthõõakuung naag ꞌthooyyiaha hĩ makayyiook ꞌthaainit ngagiit vẽlẽk eet ꞌcĩg hõllõngaa iiginnu ꞌJudeei ꞌcĩg aattiyyu Antioha hĩ loonyinii cĩg Thiiria hĩ ꞌCilicia.

24Baa hĩthĩkta naag ꞌJeruꞌthalẽma ngaati aĩ, baa au eeta ũgẽẽgĩ eetinii cĩggaang, hiita huduktaahuung ngagiit thõõth ꞌcĩ abathĩ gẽrrẽẽt ꞌcĩ aliiliyyu. Nẽẽthĩ baa hõllõngaa hĩꞌthõõanna naag ĩhõõggõ. 25Nĩngĩtĩ ꞌyioko homotoonna ngaatĩ hõdẽẽthõng nẽ hummukta ngaatĩ hẽbẽraanna eet ũgĩ nẽ hĩꞌthooyyiahuung ngagiit hookorria hĩ Baarnaba hĩ Paaulo, ꞌgoonoga cĩggaang ꞌcĩg hammĩnanna. 26Eet ꞌcĩg adhuk rũgẽt cĩnĩĩng, hĩnĩngĩtĩ ꞌthaar cĩg Makayyioohit cĩnaac Yeesu Krĩstõ. 27Hĩꞌthõõanna naag ꞌJuuda hĩ ꞌThĩĩla buúk. Eet ꞌcĩg hatĩ au aduhaakuung thõõth ꞌcĩ aduhõõ hĩ ꞌcĩ hẽhẽẽdda naag waragaawa ho thõng.

28Eteretheeheet ngagĩĩt Lorii ꞌcĩ Ẽllẽẽmĩth, hiittiõõ hõllõngaa occa hahiiccuung ngagiit thooꞌthiohĩĩ ũgẽẽgĩ ĩĩcĩg ĩllõõan iccig. 29Nẽẽthĩ, ma hadaku ꞌgiimwa ꞌcĩ aaꞌnyĩhoothĩk nyekuꞌnya ꞌcĩg hõllõngaa ĩĩn dĩdĩ. Ma hadaku iding umwa ꞌcĩ nga aꞌnyak biyyi, hode iding ꞌcĩ acudi thõng. Ma hadĩmannu ꞌthẽccan ꞌcĩ thooꞌthiok ꞌcĩg ĩĩn ꞌriiring. Má anuyyu tilooinit icci, adĩmannu hatĩ thooꞌthiok ꞌcĩg abũnnaa.

Hõlõ, ũnnẽẽc baaĩ nuun tilooinit icci jurrung.

30Ma ho, ĩtĩngaacõ eeta ꞌcĩg ĩĩn ꞌwec ko, ũtũngteek ꞌJeruꞌthalẽm nẽ õõt Antioha. Nĩngĩtĩ avvaanĩ lemmiook vẽlẽk ngaatĩ hõdẽẽthõng nẽ aanytĩk ĩhõõggõ waraga. 31Ma baa agiil eeta waraga ho, iita accamattoothĩk gẽrrẽẽt ũdũt, ngaatĩ athĩknĩ nyeemuut cĩnnĩ ꞌcĩ abũnnaa ho. 32Baa ĩĩn ꞌJuuda hĩ ꞌThĩĩla põrõvẽtaaꞌnya nẽ othoothito thooꞌthiok ꞌcĩg mẽẽlĩg ꞌcĩg ẽẽl nuyyiook cĩg Makayyiooktak hokomit ꞌthinneeti. 33Ma urutaa ꞌcĩ aautti nẽẽg nĩĩca hĩdĩhĩdĩĩc, iita iꞌthooyyik nuyyiooha ĩhõõggõ ꞌgattaanaa cĩ ganõõnõ hoboddiõõthĩ hĩ eet baag ĩꞌthõõa ĩhõõggõ. 34Baa nẽẽ ikia idiongan ꞌcĩ ĩĩn ꞌThĩĩla dioo nĩngaata. 35Nẽẽthĩ, baa idionganit Paaulo hĩ Baarnaba Antioha, ngaatĩ baa allimanĩ nẽẽg hĩ ꞌgõõnõgĩ ũgĩ, nyeemuut ꞌcĩ abũnnaa cĩ Makayyiookto.

Eꞌngerrio Paaulo hĩ Baarnaba

36Ma urutaa cĩ waathinniook ũgĩ hĩdĩĩc, ĩĩnnĩk Paaulo Baarnaba, “Hoboddiooth daho nõõ hõõt hĩcĩnĩt nuyyiook ꞌtaaũnnioohĩ vẽlẽk ĩĩ baag hallimani thõõth cĩ Makayyiookto. Hõõt da hĩcĩnĩt adĩman occa nẽẽg hutuno.” 37Baa atab Baarnaba õkõõĩ Yõaannẽ ꞌcĩ haĩ ꞌthaar ũgĩ Maarko, hookorit hĩ ĩhõõggõ. 38Nẽẽthĩ hinnia, baa abũrĩ Paaulo, hĩnĩngĩtĩ baa õkõ ũũnnĩk Maarko ĩhõõggõ Pamvilia nẽ aala iittiõõ hõllõngaa adticanni hĩ ĩhõõggõ. 39Nĩngĩtĩ ẽppẽhanõõnĩ nẽẽg ĩꞌthõng heꞌngerrio. Baa nẽẽ ũũhĩ Baarnaba Maarko nẽ otodit haahũl õõt ĩĩcĩ dtuung cĩ Ciporo. 40Baa õkõõĩ Paaulo ꞌThĩĩla nẽ õõt alayyiõõĩ nuyyiooha hĩ Makayyioohit tarbalꞌthẽẽta cĩnnĩ hũꞌthũũtĩ ĩhõõggõ. 41Nĩngĩtĩ ĩꞌngaannĩ õõ adukni looc cĩ Thiiria hĩ cĩ ꞌCilicia, hõõt hirrioottĩk lothippiꞌnya cĩg lemmioohu.

Currently Selected:

Dtiicanĩ cĩg ꞌThooyyiahu 15: did

Highlight

Copy

Compare