Dtiicanĩ cĩg ꞌThooyyiahu 14

Paaulo hĩ Baarnaba ꞌtaaũnaa cĩ Ikonium

1Ma ꞌtaaũnaa cĩ Ikoniumĩ, iita õõt Paaulo hĩ Baarnaba ꞌCieethinii cĩg Laiittak ĩcĩg ꞌJudeei, hĩ gõõng hõdõõkõthĩ. Ma nĩngaata, õõt irrioottĩk nẽẽg eet jurrung, nĩngĩtĩ au ẽlẽmmĩ eeta cĩg ꞌJudeei ꞌcĩg mẽẽlĩg hĩ eet ꞌcĩg hõllõngaa ĩĩn ꞌJudeei thõõth cĩ Makayyiookto. 2Nẽẽthĩ, eeta cĩg ꞌJudeei ꞌcĩg baag abũrĩ Makayyioohit, iita ẽꞌthẽcanit eet ũgĩ ꞌcĩg hõllõngaa ĩĩn ꞌJudeei hĩlĩĩllẽẽcõ hutuhuyyioothĩk nuyyiook cĩg Makayyiooktak. 3Nẽẽthĩ, baa aattĩg Paaulo hĩ Baarnaba nĩngaata ĩꞌthõng, hillimatteek eet eliinit cĩ Makayyiookto ꞌtirriaana. Nẽ baa aaꞌnyĩk Makayyioohiti nyeemuut cĩnĩĩng ko hĩĩ dĩdĩ, ngaatĩ ẽẽlĩ ĩhõõggõ hidticanit thooꞌthiok ꞌcĩg ĩnaat eeta. 4Nẽẽthĩ, baa hinnia eꞌngerri eeta ꞌtaaũna thõng. Baa ẽlẽmĩ ũgẽẽgĩ thõõth cĩ eet cĩg ꞌJudeei nẽ elemit ũgẽẽgĩ thõõth cĩ ꞌthooyyiahu. 5Ma ho, iꞌthiattaaĩ eeta ũgẽẽgĩ ꞌcĩg hõllõngaa ĩĩn ꞌJudeei hĩ eet ꞌcĩg ĩĩn ꞌJudeei hĩ makayyiook cĩggĩĩng, utuhanit thõõth ꞌcĩ adĩmanĩ Paaulo hĩ Baarnaba ꞌbuth, hĩ ngaatĩ õhõdaanĩ ĩhõõggõ biyyiẽẽnĩ hadaahito. 6Ma baa ummuddia ꞌthooyyiaha thõõth icci ẽlẽk, iita ukulit õõt ꞌtaaũnnioohĩĩ cĩg Liꞌthira hĩ ꞌDerbe, dhoortaa cĩ looc cĩ Likaonia hĩ loonyinii ꞌcĩg õbõhõõ nĩngaata, 7ngaatĩ baa aallanĩ nẽẽg irriõõnĩ nẽ illimatteek eet nyeemuut ꞌcĩ abũnnaa.

Paaulo hĩ Baarnaba ꞌtaaũnnioohĩĩ cĩg Liꞌthira hĩ ꞌDerbe

8Baa aaĩ eet umwaa ꞌcĩ ahuuli ꞌthoona ꞌtaaũnaa cĩ Liꞌthira, baa ahuuli eet tĩho nganĩngĩtĩ arrittiaanĩ nẽ nga hõtõ ũdũt. 9Baa athĩhĩ ẽẽtĩ ciee ꞌrioon cĩ Paaulo. Ma baa akannĩ Paaulo ĩnõõnnõ hẽbẽrĩ ho, adtuuha hinnia aꞌnyak lemiinit hĩ Yeesu ꞌcĩ occa aaꞌnyĩk ĩnõõnnõ hũbũna, 10ma ho, uduhaak Paaulo ĩnõõnnõ moloohaa cobbi ĩĩnnĩk, “Tĩnga bĩĩl ꞌjieena!” Ma hĩdĩĩkoothong, ĩꞌngõth tuhuulliahiti nicciee hĩbĩl ꞌjieena nẽ iꞌthianaaĩ õtõ.

11Ma baa adtuuha lothippiti thõõth ꞌcĩ adtican Paaulo ho, awacahit thõõthaa cĩ Likaonia ĩĩtõ, “Utuhuyyi nyekuꞌnya aauto hĩ eeta nẽ iita hĩ ngagĩĩt loota nĩnga!” 12Ma ho, akattieek nẽẽg Baarnaba ꞌthaar ꞌcĩg haĩ, ꞌTheu nẽ akattieek Paaulo ꞌthaar ꞌcĩg haĩ Hẽẽrmẽ,#14:12 ꞌTheu hĩ Hẽẽrmẽ: Baa gõõng ẽlẽmĩ ꞌGirihi nyekuꞌnya ꞌcĩg mẽẽlĩg. Baa ĩĩn ꞌTheu habu cĩ nyekuꞌnyaannu nẽ ĩĩ Hẽẽrmẽ ꞌthooyyiahit cĩ ꞌTheu haꞌnyahoothĩk nyekuꞌnya ũgĩ nyeemuut. hĩnĩngĩtĩ baa ĩĩn Paaulo baattĩ thootho. 13Baa õbõhõõ ꞌcieeth cĩ Nyekuc ꞌcĩ haĩ ꞌTheu ho, hĩ hattũũg cĩ ꞌtaaũnõõ. Ma ho, idiim paadĩrĩ cĩ ꞌTheu hĩ lothippit, ibboorrik Baarnaba hĩ ꞌThaaulo ꞌgaarrieenit. Nĩngĩtĩ aꞌnyahaanĩ paadĩrĩ olĩꞌnya ũgĩ hĩ nyetturꞌnya hattũũgaa cobbi ĩĩcĩ ꞌtaaũnõõ.

14Ma baa athĩhĩ ꞌthooyyiaha cieeg haĩ Paaulo hĩ Baarnaba thõõth icci ho, iita ĩlĩĩllẽẽcõ nẽẽg gẽrrẽẽt ĩꞌthõng, herreecito ceremwa cĩggĩĩng, nẽ ivvirit õõt eetinitõõ hõrggẽẽna nẽ eggerenyit ĩĩtõ, 15“Hõlõ, ne ꞌcĩ adĩmannu niig hoti ho? Hĩĩgĩnna naag eet haaga hĩ niiga. Haꞌnyahaakuung naag ngagiit nyeemuut ꞌcĩ abũnnaa, hanneekuung ũtũngteek thooꞌthiok iccig abathĩ ho, elemit Nyekuc ꞌcĩ arũgĩ, ꞌcĩ ẽhẽnyta hẽẽtkujjieen hĩ looc hĩ bũlũc hĩ hẽlẽggĩ vẽlẽk ꞌcĩg aattiyyi ĩhõõggõ. 16Baarkit, baa aaꞌnyĩk Nyekuci loonyin vẽlẽk haꞌnyahit nyeppiteeꞌnya cĩggĩĩng ꞌgoolliohĩĩ cĩggĩĩng cũũmõ cũũmõ. 17Nẽẽthĩ, ẽtẽrꞌtha Nyekuci ẽllaa cĩnnĩ, ngaatĩ adĩmanĩ hẽlẽggĩ ꞌcĩg abũnnaa. Ĩꞌthõõa nẽẽ tammu hẽẽtahujjieen nẽ aaꞌnyĩk manẽẽn cugguung hitiliꞌthia. Ĩbbaannuung nẽẽ ngagiit ꞌgẽẽn nẽ aaꞌnyĩk ꞌthinneeti cugguung haccamattoothĩk.” 18Tananga baa õthõõth ꞌthooyyiaha hoti, aalla adiim eeta ĩbboorĩk ĩhõõggõ ꞌgaarrieenit noho.

19Ma ho, iita makayyiooha ũgẽẽgĩ cĩg ꞌJudeei Antioha hĩ Ikonium hiita hũlũllũũmanit lothippit hũtũbũrĩt Paaulo. Õhõda ĩnõõnnõ biyyiẽẽnĩ nẽ utugurrieek ꞌtaaũna battaala, muhẽẽttaa ꞌcĩ aĩnnĩ adaak oho ẽlẽk. 20Ma baa iita uluttioothĩk nuyyiooha Paaulo, ikia ĩtĩnga nẽẽ õbõdõõthĩ ꞌtaaũnatõõ. Ma loohoth cĩnnĩ, ookorit hĩ Baarnaba õõt ĩĩcĩ ꞌDerbe.

Oboddioothĩ Paaulo hĩ Baarnaba ꞌtaaũnaa cĩ Antiohĩ

21Baa alliman Paaulo hĩ Baarnaba nyeemuut ꞌcĩ abũnnaa ꞌtaaũnaa cĩ ꞌDerbe, ĩꞌthõng helemit eeta ꞌcĩg mẽẽlĩg hĩĩtõ nuyyiook cĩg Makayyiooktak. Ma ho, oboddioothĩ nẽẽg ĩĩcĩ Liꞌthira hĩ Ikoniuma hĩ Antioha looccaa cĩ Pithidia. 22Baa aaꞌnyĩk nẽẽg ꞌthinneeti cĩg nuyyioohu hokomit nẽ irrioottĩk ĩhõõggõ huꞌthuutti lemiinit. Nĩngĩtĩ aduhaakĩ ĩhõõggõ annẽẽkĩ, “Hippiirria ꞌthẽk nga huduhunit habuccieet cĩ Nyekuci.” 23Ma nĩngaata, eberria Paaulo hĩ Baarnaba makayyiook cĩg lothippiꞌnya cĩg lemmioohu cũũmõ cũũmõ. Ma ho, edettia eleeti ꞌgẽẽna nẽ alaacõ Makayyioohit, hátĩ gõõng hũꞌthũũtĩ makayyiook iccig. 24Ma baa õdõlanit Paaulo hĩ Baarnaba looc cĩ Pithidia, õõt edeccieek ĩꞌthõng looc cĩ Pamvilia, 25ngaatĩ baa õõ allimanĩ eet ꞌtaaũnaa cĩ Pẽrga. Ma nĩngaata, ulluucci õõt ꞌtaaũnaa cĩ Attalia.

26Ma ꞌtaaũnaa cĩ Attalia, õõt otodit haahũl oboddioothĩ ĩĩcĩ Antiohĩ looccaa cĩ Thiiria, ngaatĩ baa alaiini eeta hũꞌthũũtĩ Nyekuci ĩhõõggõ, hĩnĩngĩtĩ dtiic ꞌcĩ adtican nẽẽg hedecciaak ko. 27Ma baa õdõlanit Paaulo hĩ Baarnaba Antiok, iita uluttia nẽẽg lothippit cĩ lemmioohu vẽlẽk ngaatĩ hõdẽẽthõng nẽ uduktaak ĩhõõggõ thooꞌthiok vẽlẽk ꞌcĩg baag ẽẽlĩ Nyekuci ĩhõõggõ hĩdĩmanit, hĩ ꞌgõõl ꞌcĩ aaꞌnyĩkĩ eet ꞌcĩg hõllõngaa ĩĩn ꞌJudeei, haꞌnyahit lemiinit. 28Nĩngĩtĩ arũmẽẽnĩ nẽẽg nĩĩca hĩ nuyyiook waathinniook ꞌcĩg mẽẽlĩg.

Currently Selected:

Dtiicanĩ cĩg ꞌThooyyiahu 14: did

Highlight

Copy

Compare