Dtiicanĩ cĩg ꞌThooyyiahu 11

Uduha Pẽẽtũrũ dtiicanĩ cĩgĩnnĩg

1Ĩthĩhĩt ꞌthooyyiaha hĩ nuyyiook ꞌJudeea hũtũrũũr, ngaatĩ allimanõõthĩkĩ eet ꞌcĩg hõllõngaa ĩĩn ꞌJudeei thõõth cĩ Nyekuci. 2Ma baa ũũk Pẽẽtũrũ ĩĩcĩ ꞌJeruꞌthalẽmĩ, õõt ẽppẽhattõõ lemmiooha ꞌcĩg etteeddi eleeti hĩ ĩnõõnnõ 3nẽ ĩĩtõ, “Õkõ aduhuni nii ꞌcieeth cĩ eet ꞌcĩg nga hetteeddi eleeti nẽ uduktoou hĩ ĩhõõggõ inni?”

4Ma ho, iꞌthianaaĩ Pẽẽtũrũ ithithanaak ĩhõõggõ thõõth jurrung, ꞌgõõlaa ꞌcĩ baa adtuuhanĩ nẽẽ edeeꞌnyianĩ. 5Baa anneek nẽẽ ĩhõõggõ, “Baa halayyi naa ꞌtaaũnaa cĩ ꞌJõõppa, ma ho, hikia hĩcĩna ꞌgiimwa ꞌcĩ aaĩ hĩcĩ hacini honoothittatõõ, ꞌgiimwa ꞌcĩ aaĩ hĩ ngĩtõõga cobbi, ꞌcĩ alluuccia hẽẽtahujjieen nẽ aꞌnyak õkĩcẽẽt ꞌwec, hikia loota ngaatĩ baa haayyi. 6Ma baa hacini ho, hadtuuha hinnia idiꞌngwa cĩg lootu gõõng aꞌnyak ꞌthoo ꞌwec, hũkaaꞌnya hĩ hĩbaallĩ cĩg hẽẽtkujjieen. 7Ma ho, hĩthĩha molook umwa ꞌcĩ anneeka, ‘Tĩnga Pẽẽtũrũ. Ruuk idiꞌngwa niccig nẽ adahu.’

8“Hedeci hanneehi, ‘Aitiõõ Makayyioohit! Gõõng nga hadak idiꞌngwa ꞌcĩg ĩĩn ꞌriiring ꞌcĩg aattĩg noho.’

9“Õbõdẽẽkĩ mõlõõhĩ nicciee õthõõtha hẽẽtahujjieen tabattĩ ꞌramma aĩ, ‘Ma haini ꞌgii ꞌcĩ ẽhẽnyta Nyekuci tẽlla ĩĩn ꞌriiring!’ 10Baa õbõdẽẽkĩ thõõth ciee tabattĩ iyyio, nĩngĩtĩ odongiini ngĩtõõga nicciee hẽẽtahujjieen tarĩ.

11“Ma nĩngaata, iita ĩbĩlĩt eeta iyyio ꞌcĩg baag auunakaa nganĩĩt ĩĩcĩ ꞌtaaũn cĩ Caetharea, ꞌcieethaa ꞌcĩ baa haayyi naa ho. 12Nĩngĩtĩ aduhaaka Lorii ꞌcĩ Ẽllẽẽmĩth hookorria hĩ ĩhõõggõ. Baa hõõkõrra hĩ nuyyiook iccig ĩĩn tõrkõnõn ko nẽ hoottia huduhutta halang cĩ eet baa aũũyyeet ngagĩĩta. 13Ma ho, uduhaaheet ẽẽtĩ cĩ halang tĩho ꞌgõõl ꞌcĩ baa acĩnĩ nẽẽ aajĩlõ ngaatĩ uppwaannanĩ ꞌcieethaa cĩnnĩ nẽ ĩĩ, ‘ꞌThõõ eet ũgĩ hõõt ꞌJõõppa hottieek ꞌThimõõnẽ ꞌcĩ haĩ ꞌthaar ũgĩ Pẽẽtũrũ. 14Aꞌnyahaaki hatĩ Pẽẽtũrũ nganiit hĩ halang cunni nyeemuut ꞌcĩ eelliannu niiga.’

15“Ma hiꞌthianaanĩ hothoothi ho, ikia Lorii ꞌcĩ Ẽllẽẽmĩth hĩ ĩhõõggõ hĩ baa aku hĩ ngagĩĩt ĩĩcĩ oou. 16Nĩngĩtĩ hammuhunõõꞌthĩ thõõth baa aduha Makayyioohiti Yeesu aĩ, ‘Aggameekuung ngagiit Yõaannẽ baattithimo maamĩ haaga, nẽẽthĩ aggammu hatĩ niig baattithimo Loriiaa ꞌcĩ Ẽllẽẽmĩthĩ.’#Tigiil ꞌBuuk cĩ Dtiicanĩ cĩg ꞌThooyyiahu 1:5 17Nẽẽthĩ, má aaꞌnyĩk Nyekuci ĩhõõggõ ꞌbaaninit hõdẽẽthõng hĩ baa aaꞌnyeet ngagĩĩt baag hẽlẽmĩ Makayyioohit Yeesu Krĩstõ, nganĩĩt occa baa nganĩ ꞌcĩ occa hammuhi ngaatĩ baa habũrrĩ thõõth cĩ Nyekuci ho?”

18Ma baa athĩhĩ eeta ꞌcĩg etteeddi eleeti thõõth icci õthõõth Pẽẽtũrũ ho, iittiõõ hõllõngaa ẽppẽhanõõ nẽ iꞌthiattaaĩ ubuluthit Nyekuc. Baa aĩ nẽẽg, “Ikia aaꞌnyĩk Nyekuci eet ꞌcĩg hõllõngaa ĩĩn ꞌJudeei, hũtũngteek ꞌthẽccanẽẽt cĩggĩĩng nẽ aaꞌnyĩk ĩhõõggõ rũgẽt ꞌcĩ aalla ooo!”

Lemmiook ꞌtaaũnaa cĩ Antiohĩ

19Baa ĩꞌthaanni nuyyiooha ũgẽẽgĩ, hĩnĩngĩtĩ pĩĩrnanĩt ꞌcĩ abathĩ gẽrrẽẽt baa iꞌthianaanĩ kõr baa aruhẽẽnĩ Tẽẽvẽnõ. Baa avvir nẽẽg õõ ꞌrẽẽna loonyinii cĩg Venicia hĩ Ciporo hĩ ꞌtaaũnaa cĩ Antiohĩ, nẽẽthĩ hinnia baa õõ aduhaak nẽẽg eet cĩg ꞌJudeei dioo nyeemuut. 20Nẽ eeta ũgẽẽgĩ cĩg Ciporo hĩ Cireene, õõt ĩĩcĩ Antiohĩ nẽ iꞌthiattaaĩ othooꞌthio hĩ ꞌGirik buúk nẽ illimatteek ĩhõõggõ nyeemuut ꞌcĩ abũnnaa cĩ Makayyioohit Yeesu. 21Baa aaĩ ꞌtirriani cĩ Makayyiookto hĩ ĩhõõggõ nẽ iita elemit eeta ꞌcĩg mẽẽlĩg ꞌrĩng Makayyioohit Yeesu.

22Ma ho, õdõlan nyeemuut cĩ thõõth icci lothippit cĩ lemmioohu ꞌJeruꞌthalẽma, nĩngĩtĩ ĩꞌthõõanĩ nẽẽg Baarnaba hikia Antioha. 23Ma baa õdõlan Baarnaba nẽ ikia udtuuha bũnnai ꞌcĩ adĩman Nyekuci ho, accamanoothĩk nẽ irrioonĩk ĩhõõggõ haallattia hĩĩtõ lemmiook dĩdĩ cĩg Makayyiooktak ꞌthinneetinii cĩggĩĩng vẽlẽk. 24Baa ĩĩn Baarnaba eet ꞌcĩ callĩ ꞌthĩnĩt, ꞌcĩ aaĩ Lorii ꞌcĩ Ẽllẽẽmĩth hĩ lemiinit hĩ ĩnõõnnõ, nĩngĩtĩ au ẽlẽmmĩ eeta ꞌcĩg mẽẽlĩg ꞌrĩng Makayyioohit.

25Ma nĩngaata, ũũk nẽẽ ꞌTaartho hũũk hidiimõthĩ ꞌThaaulo. 26Ma baa õkõ ammũda ĩnõõnnõ ho, aꞌnyaha Antioha ngaatĩ õmmõtõõnĩ hĩ lothippit cĩ lemmioohu irkit hũtũrũũr, nĩngĩtĩ allimanĩ eet. Baa ꞌtaaũn cĩ Antiohĩ ho, ꞌcĩ atimanĩ eeta akannẽẽkĩ nuyyiook ꞌthaar anneek Kristiaanĩta.#11:26 Kristiaanĩt: Ĩĩn Kristiaanĩta eet ꞌcĩg ẽlẽmĩ Krĩstõ, hĩnĩngĩtĩ ĩĩn Krĩstõ Makayyioohit nẽ ĩĩ Ellioohit cĩnĩĩng.

27Ma korrioohĩĩ nĩĩcag, iita uppwaatta põrõvẽtaaꞌnya ũgẽẽgĩ ꞌcĩg au ꞌJeruꞌthalẽma au edeceek ꞌtaaũnaa cĩ Antiohĩ. 28Hõrggẽẽnaa cĩ põrõvẽtaaꞌnya iccig, baa aaĩ umwa ꞌcĩ haĩ Agabu. Eliittaa cĩ Loriio, uduha nẽẽ ngaatĩ hatĩ akuuni nyarõnĩ ꞌcĩ abathĩ dtẽc looc cĩ ꞌRooma hũtũrũũr. Nẽ baa uluba nyarõnĩ ciee irkiꞌnyiaannĩĩ baag ĩĩnnĩ Kalaudio habu cobbi. 29Ma ho, ummuhit nuyyiooha ꞌcĩg aattĩg Antioha ngaatĩ ĩꞌthõõĩkĩ ꞌbaaninit cĩnĩĩng ꞌgõõnõgĩ ꞌJudeea. 30Nĩngĩtĩ aduhaakĩ nẽẽg Baarnaba hĩ ꞌThaaulo hootti ꞌbaaninit cĩnĩĩng haꞌnyaktoothĩk makayyiook cĩg lemmioohu ꞌJeruꞌthalẽma.

Currently Selected:

Dtiicanĩ cĩg ꞌThooyyiahu 11: did

Highlight

Copy

Compare