Dtiicanĩ cĩg ꞌThooyyiahu 10

Ũtũvvũ Korneellio Pẽẽtũrũ

1ꞌTaaũnaa cĩ Caetharea, baa aaĩ eet umwaa ꞌcĩ haĩ ꞌthaar Korneellio. Baa ĩĩn Korneellio ꞌgaalac cĩ ũũrũta#10:1 ꞌGaalac cĩ ũũrũta: Ĩĩn ꞌgaalacĩ ciee makayyioohit ꞌcĩ aggam ũũrũta ꞌmiia hõdẽĩ. ꞌcĩ aggam athegereeꞌnya ꞌmiia hõdẽĩ, baa agayyi athegereeꞌnya tĩko haĩ athegereeꞌnya cĩg Itali. 2Baa ĩĩn nẽẽ hĩ halang cĩnnĩ vẽlẽk, eet ꞌcĩg iꞌngolli Nyekuc gẽrrẽẽt. Baa ẽẽl Korneellio hullaha nẽ ala Nyekuc hõdõõkõthĩ. 3Ma kõr umwa baa iggiingi kõrra ꞌthaa iyyio, baa udtuuha Korneellio aajĩlõ cĩ Nyekuci, ngaatĩ akuuni hĩ ĩnõõnnõ nẽ ĩĩnnĩk, “Ẽlẽ Korneellio!”

4Baa acĩn Korneellio ĩnõõnnõ tẽẽlꞌthĩta nẽ ĩĩnnĩk, “Aĩ ne Makayyioohit?”

Ẽdẽcĩ aajĩlõ anneek, “Ẽlẽmĩ Nyekuci laiinit cunni hĩ ꞌbaaninit ꞌcĩ aaꞌnyihi nii hullaha ho. 5Nẽ ꞌyioko, ꞌthõõ eet ũgĩ hõõt ꞌJõõppattĩ, hottieek ꞌThimõõnẽ ꞌcĩ haĩ ꞌthaar ũgĩ Pẽẽtũrũ. 6Arũmĩ nẽẽ hĩ ꞌThimõõnẽ eet gõõng attũũb õlẽẽt nẽ õbõhõõ õlõ cĩnnĩ hĩ dẽmẽt cĩ bũlũcõ.”

7Ma baa õbõdõõthĩ aajĩlõ ꞌcĩ õthõõthõõ hĩ Korneellio ho, ikia ũtũvvũ nẽẽ dticcianniook cĩgĩnnĩg ꞌramma hĩ athegereec cĩnnĩ ꞌcĩ gõõng alayyi gẽrrẽẽt. 8Uduhaak ĩhõõggõ thõõth vẽlẽk aa adtuuha nẽẽnĩ nẽ ĩꞌthõ hõõt ꞌJõõppattĩ.

Eheeronoothĩk Pẽẽtũrũ Korneellio

9Ma baa aau kõrra lokora waathĩnaa ꞌcĩ anũẽẽkĩ ĩcĩ heeroni cĩnĩĩng ko, iita õdõlanit nẽẽg ꞌtaaũn cĩ ꞌJõõppa. Ma nĩngaata, ikia ĩtĩnga Pẽẽtũrũ nẽ ũũk alaõ ꞌcieetha lokora, 10nĩngĩtĩ aku adahĩ ĩnõõnnõ magĩthĩ. Ma baa nga akũmaneek eeta ꞌgẽẽn, ikia ĩcĩn nẽẽ ꞌgiimwa ꞌcĩ aaĩ hĩcĩ acĩn honoothittatõõ. 11Baa adtuuha nẽẽ ngaatĩ abbuuhẽnĩ hẽẽtkujjieen nẽ ulluucciak ꞌgiimwaa looc ꞌcĩ uuni aaĩ hĩ nyatõõga ꞌcĩ abĩlĩ kũdũlnyaannĩ ꞌwec. 12Baa aꞌnyak nyatõõga nicciee hallĩbĩꞌnya cĩg idiꞌngwa ꞌcĩg aꞌnyak ꞌthoo ꞌwec, hĩ hũkaaꞌnya hĩ lommorohooꞌnya hĩ hĩbaallĩ cĩg hẽẽtkujjieen. 13Ma ho, ĩĩnnĩk mõlõõhĩ ĩnõõnnõ, “Tĩnga Pẽẽtũrũ. Ruuk idiꞌngwa iccig nẽ adahu.”

14Ẽdẽcĩ Pẽẽtũrũ aĩ, “Aitiõõ Makayyioohit! Gõõng nga hadak idiꞌngwa ꞌcĩg ĩĩn ꞌriiring ꞌcĩg hõllõngaa adak eeta.”#10:14 Idiꞌngwa ꞌcĩg ĩĩn ꞌriiring: Baa aꞌngirannii nyattaalaa cĩ Mũũꞌtha ngaatĩ adahĩ eeta cĩg ꞌJudeei idiꞌngwa ũgĩ ꞌcĩg adukiaa ngaatĩ ĩĩnnĩ idiꞌngwaana tĩko ꞌriiring hode aꞌngirannii hĩ ĩhõõggõ ngaatĩ adahĩ. Tigiil ꞌBuuk cĩ Levitiko 11:1-32.

15Othoothĩk mõlõõhĩ ĩnõõnnõ tabattĩ ꞌramma tarĩ ĩĩ, “Ma haini ꞌgiimwa ĩĩn ꞌriiring ꞌcĩ baa ẽhẽnyta Nyekuci tẽlla.”

16Baa edeeꞌnyia thõõth ciee tabattĩ iyyio, ma hĩdĩĩkoothong, õdõngĩ nyatõõga nicciee ũũk hẽẽtahujjieen.

17Ma baa nga adhirriaangan Pẽẽtũrũ thõõth ꞌcĩ acĩn nẽẽ ho, iita ummuddia eeta baag ĩꞌthõõa Korneellio nĩngĩtĩ aayyi õlõõ cĩ ꞌThimõõnẽ nẽ iita ĩbĩlĩt hattũũga. 18Nĩngĩtĩ avvẽẽnĩ hattũũga battaala ajini eet, hátĩ má aaĩ ꞌThimõõnẽ ꞌcĩ haĩ ꞌthaar ũgĩ Pẽẽtũrũ nĩngaata.

19Ma baa nga ammuk Pẽẽtũrũ thõõth icci, ikia ĩĩnnĩk Lorii ꞌcĩ Ẽllẽẽmĩth ĩnõõnnõ, “ꞌThimõõnẽ, adiimmi eeta iyyio nganiita. 20Tĩnga hataman ꞌlũũcĩ loota. Ma haburi ngaatĩ ookorru hĩ ĩhõõggõ, hĩnĩngĩtĩ nganĩĩt ꞌcĩ hĩꞌthõõa ĩhõõggõ ho.”

21Ma ho, ĩtĩnga Pẽẽtũrũ ũllũũcĩ ũũk ĩĩnnĩk eet tĩko, “Nganĩĩt ꞌcĩ adiimmaangu ho. Auunnu niig inni?”

22Ẽdẽcĩ eeta niccieeg aĩ, “Ĩꞌthõõanneet ꞌgaalacĩ umwaa cĩ ũũrũta ꞌcĩ haĩ Korneellio. Ĩĩn nẽẽ eet ꞌcĩ abũnnaa ꞌcĩ ala Nyekuc nẽ ammĩnan eeta cĩg ꞌJudeei vẽlẽk ĩnõõnnõ. Aduhaak aajĩlõ ꞌcĩ ẽllẽẽmĩth ĩnõõnnõ hutuvvii nganiit õlõõ cĩnnĩ, hátĩ hũũk hĩthĩk nẽẽ thõõth ꞌcĩ aduhaahi niina.” 23Ma ho, ũũhĩ Pẽẽtũrũ ĩhõõggõ halangatõõ, nĩngĩtĩ ooginni baalin niccia nĩngaata.

Pẽẽtũrũ ꞌcieethaa cĩ Korneellio

Ma loohoth cĩnnĩ, ĩtĩngaacõ Pẽẽtũrũ hĩ ĩhõõggõ hĩ nuyyiook ũgĩ cĩg Makayyiooktak ꞌcĩg au ꞌJõõppa. 24Ma baa waathĩn ꞌcĩ ꞌrĩĩng, õdõlanit ꞌtaaũn cĩ Caetharea. Baa ammũdeek ẽrẽ Korneellio ĩhõõggõ, nĩngĩtĩ avvaanĩ ittioonniok cĩgĩnnĩg hĩ ꞌgõõnõgĩ hiita. 25Ma baa õdõlan Pẽẽtũrũ õlõ, iiraak Korneellio ĩnõõnnõ nĩĩcĩ noho nẽ akat huruꞌnyia tẽẽlꞌthĩta ꞌcĩ alaĩ ĩnõõnnõ. 26Ma nĩngaata, õdõng Pẽẽtũrũ ĩnõõnnõ hĩbĩl nẽ ĩĩnnĩk, “Tĩnga ꞌjieena, hĩĩnĩ naa eet ꞌcĩ holli haaga.”

27Nĩngĩtĩ adukni Pẽẽtũrũ ꞌcieetõõ nga õthõõthõõ hĩ Korneellio nẽ ũũk ũmmũdoothĩk lothippit. 28Ma ho ĩĩnnĩk ĩhõõggõ, “Agayyu niig vẽlẽk abũrĩ nyattalĩ cĩnaang ngaatĩ arũmẽẽnĩ eeta cĩg ꞌJudeei ũgẽẽgĩ hĩ eet ꞌcĩg hõllõngaa ĩĩn ꞌJudeei, hode nẽẽ eheronoothĩk ĩhõõggõ haaga. Nẽẽthĩ, ẽtẽrẽthaa nganĩĩt Nyekuci hiittiõõ hõllõngaa occa haini tẽlla eet umwaanĩ nẽ ĩĩ umwa ꞌriiring. 29Ĩnõõ ꞌyioko baa ma ĩꞌthõõannu eet hiitaahaanĩ, hikia nĩĩcĩ noho. Ĩcca occa hõllõngaa aduhaakaangu thõõth ꞌcĩ aũũyyĩaangu nganĩĩt ko?”

30Ma ho, ẽdẽc Korneellio ĩĩ, “Waathinnioohĩĩ ꞌcĩg ĩĩn ꞌwec allacattĩ ho, baa halayyi naa ꞌcieethaa caannĩ kõr ꞌcĩ aaĩ hĩ cieeni, baa ꞌthaa iyyio baa iggiingi kõrra. Ma hĩdĩĩkoothong, ikia ĩbĩl eet umwaa ꞌcĩ attalĩth ceremwaana hĩ õõppẽr ĩĩcĩ muum caannĩ, 31nẽ ĩĩ, ‘Korneellio, ĩthĩk Nyekuci laiinit cunni nẽ ummuhõõthĩ ꞌbaaninit gõõng aaꞌnyihi nii hullaha. 32ꞌThõõ eet hottieek ꞌThimõõnẽ ꞌcĩ haĩ Pẽẽtũrũ ꞌtaaũnaa cĩ ꞌJõõppa. Ĩĩn nẽẽ heerinnioohit cĩ õlõ cĩ ꞌThimõõnẽ gõõng attũũb õlẽẽt nẽ aꞌnyak õlõ cĩnnĩ dẽmẽtaa cĩ bũlũcõ.’ 33Nĩngĩtĩ hĩthõõanĩĩ eet hĩdĩĩkoothong nẽ abũnnaa gẽrrẽẽt ngaatĩ akuuni. Nẽẽthĩ ꞌyioko, hattiyyia naag vẽlẽk ngaati muumaa cĩ Nyekuci, hĩthĩkta thooꞌthiok ꞌcĩg anneeki nganiit Makayyioohiti duhaaheet ngagĩĩta.”

Irrioon Pẽẽtũrũ

34Ma ho, iꞌthianaaĩ Pẽẽtũrũ õthõõth ĩĩ, “Nẽ ꞌyioko hagawa dĩdĩ Nyekuc dioo ꞌcĩ hõllõngaa ahal eeta, 35nẽẽthĩ, ẽlẽmĩ eet loonyini vẽlẽk ꞌcĩg iꞌngolli ĩnõõnnõ nẽ ĩdĩmanit thõõth ꞌcĩ aũlanĩ. 36Ĩĩn ciee nyeemuut ꞌcĩ abũnnaa cĩ eet cĩg Ĩꞌthĩraẽlĩ ꞌcĩ aĩ, aaĩ ganõnĩ hĩ Nyekuc, hĩnĩngĩtĩ Yeesu Krĩstõ ꞌcĩ ĩĩn Makayyioohit cĩ eet vẽlẽk. 37Agayyu niig thooꞌthiok baag aluba looccaa cĩ ꞌJudeea hũtũrũũr, baa iꞌthianaanĩ ꞌGalileea urutaa ꞌcĩ baattithimo baa irrioon Yõaannẽ, 38ꞌgõõl ꞌcĩ aaꞌnyĩkĩ Nyekuci Yeesu cĩ Naaꞌtharẽtĩ Lori ꞌcĩ Ẽllẽẽmĩth hĩ ꞌtirrian hĩ ꞌgõõl ꞌcĩ õvvõõĩ looc vẽlẽk, adticanĩ thooꞌthiok ꞌcĩg abũnnaa, hĩ ngaatĩ ẽẽlanĩ eet ꞌcĩg aggam habuui cĩ loriẽẽt ꞌcĩg abathĩ,#10:38 Habu cĩ loriẽẽt ꞌcĩg abathĩ: Ĩĩn ciee habu cĩ loriẽẽt ꞌcĩg abathĩ ꞌcĩ haĩ ꞌthaar cĩgĩnnĩg ꞌThĩttaan. Baa ĩĩn habuui cĩ loriẽẽt ꞌcĩg abathĩ ho aajĩlõ hẽẽtahujjieen ꞌcĩ baa aĩnanaak aajĩlẽẽt ũgĩ hũtũbũrĩt Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Tigiil ꞌBuuk cĩ Terethiitto 12:7-9. hĩnĩngĩtĩ baa aaĩ Nyekuci hĩ ĩnõõnnõ.

39“Hĩĩgĩn naag hẽbẽrĩ cĩg thooꞌthiok vẽlẽk ꞌcĩg adĩman Yeesu looccaa cĩ ꞌJudeei hĩ ꞌJeruꞌthalẽma. Baa aruk eeta cĩg ꞌJudeei Yeesu nẽ otoddoyyieek hurucceea, 40nẽẽthĩ, baa arũgtha hinnia Nyekuci ĩnõõnnõ daahĩtha, urutaa ꞌcĩ waathinniook iyyio nẽ ẽtẽrẽtha ĩnõõnnõ hĩcĩnĩt eeta tarĩ. 41Baa hõllõngaa adtuuha eeta vẽlẽk Yeesu, baa ngagĩĩt dioo ꞌcĩg baag haduheenna nẽ huhuddieea hĩ ĩnõõnnõ urutaa ꞌcĩ ũrũgaaĩ nẽẽ daahĩtha, ꞌcĩg hacĩnna ĩnõõnnõ. Hĩĩgĩnna naag eet ꞌcĩg ẽbẽranneet Nyekuci huduktaaha eet ũgĩ buúk thõõth cĩnnĩ. 42Aduhaakeet Nyekuci ngagĩĩt hirrioottĩha eet hĩĩttĩha, ẽbẽra Nyekuci Yeesu hẽttẽẽd thooꞌthiok cĩg eet ꞌcĩg arũgĩ hĩ ꞌcĩg adaahito. 43Baa õthõõth põrõvẽtaaꞌnya vẽlẽk aĩ eeta ꞌcĩg ẽlẽmĩ Yeesu, ũũnnothoothĩk hatĩ ꞌthẽccanẽẽta cĩggĩĩng ꞌthaarĩĩ cĩgĩnnĩg.”

44Ma baa nga õthõõth Pẽẽtũrũ thooꞌthiok iccig, ikia ulluucciak Lorii ꞌcĩ Ẽllẽẽmĩth eet vẽlẽk ꞌcĩg baag athĩhĩ nyeemuut ko. 45Lemmiooha ꞌcĩg etteeddi eleeti ꞌcĩg eet ꞌcĩg maacĩg, ꞌcĩg baag õõkõra hĩ Pẽẽtũrũ, iita ukullieek ꞌjieen ngaatĩ akuuni ꞌbaaniniti cĩ Lori ꞌcĩ Ẽllẽẽmĩth hĩ eet ꞌcĩg hõllõngaa ĩĩn ꞌJudeei. 46Hĩnĩngĩtĩ udtuukta nẽẽg ĩhõõggõ ngaatĩ õthõõthĩ thooꞌthiohĩĩ ꞌcĩg ꞌrĩĩng nẽ ĩdĩhĩthĩt Nyekuc.

Nĩngĩtĩ aĩnnĩ Pẽẽtũrũ, 47“Ĩcca occa ꞌthẽk alaam eet umwaa eet iccig ngaatĩ occa aggamõõthĩkĩ baattithimo maamĩ? Aaꞌnyĩhoothĩk ĩhõõggõ buúk Lorii ꞌcĩ Ẽllẽẽmĩth hĩ baa naaga.” 48Nĩngĩtĩ aduhaakĩ Pẽẽtũrũ ĩhõõggõ haggamit baattithimo ꞌthaarĩĩ cĩg Yeesu Krĩstõ. Ma ho, uduktaak nẽẽg Pẽẽtũrũ hũrũmtĩ nõõ hĩ ĩhõõggõ hõdẽĩ waathinniook ꞌcĩg abadtẽc.

Currently Selected:

Dtiicanĩ cĩg ꞌThooyyiahu 10: did

Highlight

Copy

Compare