2 Tẽꞌthaloonika 3
3
Alayyiooyyieetu ngagĩĩta
1Nẽ thõõth ꞌcĩ adtuurna ꞌgotoonoga hĩ ngoonoga, alayyiooyyieetu ngagĩĩt, hátĩ hĩꞌthanothoothĩk thõõth cĩ Nyekuci looc vẽlẽk hĩdĩĩkoothong, hátĩ hĩthĩhĩt eeta thõõth cĩnnĩ haau hĩcĩ athiknu niig ko. 2Alayyiooyyieetu ngagĩĩt, hátĩ hũꞌthũtteet Nyekuci eetinii ꞌcĩg abathĩ ĩcĩg ĩĩn ꞌloorriak hĩ ĩcĩg ĩĩn ꞌthẽccanniook, hĩnĩngĩtĩ aitiõõ eeta vẽlẽk hõllõngaa aꞌnyak lemiinit hĩ Nyekuc. 3Nẽẽthĩ, aꞌthũũnnĩ Makayyioohiti thõõth, hátĩ haaꞌnyuung hokomit ꞌthinneeti nẽ uꞌthuuttuung ngagiit hiittiõõ hõllõngaa ommotoonnu hĩ bathi cĩ ꞌThĩttaanõ. 4Haꞌnyakta naag lemiinit hĩ Makayyioohit ꞌcĩ aduhaakeet ngagĩĩt aĩ, aꞌthuunnu niig thooꞌthiok baag hallimaneekuung naag ngagiit nẽ hatĩ aalla aꞌthuunnu noho. 5Hala naa Makayyioohit, hátĩ heteretheehuung ngagiit aꞌnyahit mĩnnan ꞌthinneetinii cugguung, haau hĩcĩ aꞌnyak Nyekuci nẽ etemeeꞌthu thooꞌthiok aauto hĩ Krĩstõ.
Eggerꞌnyeek Paaulo nyamuttiook
6Nẽ ꞌyioko niig ꞌgotoonoga hĩ ngoonoga, haduhaakuung dĩdĩ ꞌthaarĩĩ cĩg Makayyioohit cĩnaac Yeesu Krĩstõ hanneekuung, ma hookorru hĩ lemmiook ꞌcĩg ĩĩn nyamuttiook, ꞌcĩg abũrĩ ꞌlimman baa hallimaneekuung naag ngagiita. 7Abũnnaa agayyu niig jurrung ngaatĩ occa ĩthahĩꞌtheetu ngagĩĩta nẽ unuyyu thooꞌthiok baag hadĩmanna naaga. Baa hõllõngaa hĩĩgĩnna naag nyamuttiook, baa nga harũmĩ hĩ ngagiita. 8Nẽ nga huduktooa athĩnĩĩ cĩg eet ũgĩ haaga, ĩnõõ baa hadticaniinna naag waathĩn hĩ baalin gẽrrẽẽt, hátĩ hiittiõõ hõllõngaa haccananna eet umwa hõrggẽẽnaa cunuung.
9Baa nẽẽꞌthẽk hõllõngaa haĩnna naag occa habũrra eliinit cunuung, nẽẽthĩ hinnianĩ, hiita hidticattooa, hĩnĩngĩtĩ hadiimma hetereꞌthuung ngagiit, hátĩ ĩcĩtta niig ꞌgõõl ꞌcĩ adticaniinnu hĩ ngagĩĩt hatĩ unuyyieetu. 10Baa nga harũmĩ naag hĩ ngagiita, baa gõõng haduhaakuung naag hanneekuung, “Má hõllõngaa adticanni ẽẽtĩ, edettia ĩnõõnnõ ꞌgẽẽna.” 11Hõthõõꞌtha naag hoti, hĩnĩngĩtĩ hathĩkna aĩ, aattĩg eeta ũgẽẽgĩ hõrggẽẽnaa cunuung, ꞌcĩg alatan haaga nẽ hõllõngaa adticanni nẽ ara ngaatĩ ẽdtẽbanĩ ꞌgõõnõgĩ dioo. 12Nẽẽthĩ hoti ho, haduhaanna naag dĩdĩ ꞌthaarĩĩ cĩg Makayyioohit cĩnaac Yeesu Krĩstõ haĩnna, eeta ꞌcĩg aattĩg noho ho, anneek aaut loota nẽ iꞌthiattaayyu ngaatĩ adticanaannu ꞌgeenniok cugguung, hátĩ ũrũgĩt hĩ eeta vẽlẽk. 13ꞌGotoonoga hĩ ngoonoga, ma happĩĩrnannu ngaatĩ adticannu thooꞌthiok ꞌcĩg abũnnaa ũdũt.
14Ĩcĩnĩt eet ꞌcĩg abũrĩ thõõth ꞌcĩ hẽhẽẽdanna naag waragaawaa cĩ ho jurrung. Iliittia eet tĩko thõng, aꞌngaaõn hatĩ nẽẽg ẽmmẽn. 15Ma hinnia hainnu ĩĩtõ nẽẽg mĩrõk. Irrioottĩk nẽẽꞌthẽk ĩhõõggõ hĩcĩ occa irrioonĩku ꞌgotoonogu hĩ ngoonogu ꞌcĩg ẽlẽmĩ thõõth cĩ Nyekuci.
Laiinit cĩ Paaulo ꞌcĩ adtuurna
16Halayyi naa haini, aꞌnyĩĩk Makayyioohit cĩ ganõõnõ haaꞌnyuung ngagiit ganõn waathinniook vẽlẽk hĩ ꞌgoolliohĩ vẽlẽk. Aꞌnyĩĩk Makayyioohit haau hĩ ngagiit vẽlẽk.
17Nẽ ꞌyioko, ꞌthaainit caannĩ ꞌcĩ heheedi naa Paaulo attiaa caannĩ cieeni. Gõõng heheedi waragẽẽt vẽlẽk hoti dtuurnatta, hátĩ agaac aĩ ĩĩn waragẽẽt cĩgannĩg dĩdĩ.
18Aꞌnyĩĩk bũnnai cĩ Makayyioohit cĩnaac Yeesu Krĩstõ haau hĩ ngagiit vẽlẽk.
Currently Selected:
2 Tẽꞌthaloonika 3: did
Highlight
Share
Compare
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
