1 Timotteeo 1

Ĩꞌtha Paaulo Timotteeo

1Nganĩĩt Paaulo ꞌthooyyiahit cĩ Yeesu Krĩstõ, ꞌcĩ hẽhẽẽda waraga icci ho. Baa ẽbẽraanna nganĩĩt Nyekuci Ellioohiti hĩ Yeesu Krĩstõ ꞌcĩ aaꞌnyeet ngagĩĩt muhẽẽnĩt ꞌcĩ abũnnaa.

2Heheedihi naa waraga Timotteeo, loholeec caannĩ dẽẽdẽ lemiitta.

Aꞌnyĩĩk Nyekuc Baangeet cĩnaac hĩ Makayyioohit cĩnaac Yeesu Krĩstõ hatamaattihii nẽ aanyti bũnnai hĩ ganõn.

Tilooinit cĩ ꞌlimmanniook ꞌcĩg ĩĩn oloꞌngiaak

3Ma baa hũũha naa ĩĩcĩ Maccedoonia, baa haduhaakii nganiit hanneekii au nõõ ꞌtaaũnaa cĩ Eevvetho, hátĩ bĩlĩ eet ꞌcĩg allimaneek eet thõõth ꞌcĩ hõllõngaa ĩĩn dĩdĩ. 4Duhaak eet hũtũngteek thooꞌthiok ꞌcĩg ara nẽẽg athithan, õthõõthĩ dtẽẽllẽn ꞌcĩg ĩĩn õlõng hĩ ngaatĩ agiilanĩ hattũũgẽt baag maajihi cĩggĩĩng baag baangaani, ꞌcĩg aaꞌnyĩk ĩhõõggõ hẽppẽhattõõ haaga nẽ hõllõngaa aaꞌnyĩk ĩhõõggõ hidticanit thõõth cĩ Nyekuci, ꞌcĩ hammũda ꞌgõõlaa ꞌcĩ hẽlẽmmĩ thõõth cĩnnĩ diooni. 5ꞌLimman eet haꞌnyahit mĩnnan ꞌthinneetini dĩdĩ nẽ aꞌnyahit ꞌthinneeti ꞌcĩg tẽllĩg hĩ lemiinit dĩdĩ. 6Ũtũngteek eeta ũgẽẽgĩ thooꞌthiok iccig ĩĩn dĩdĩ ho nẽ araacõ othoothito thooꞌthiok ꞌcĩg ĩĩn õlõng. 7Ẽhẽggẽẽnyan aĩ hadiimma hagaiinna hĩĩgĩnna ꞌlimmanniook cĩg nyattal cĩ Mũũꞌtha nẽ hõllõngaa aga thõõth ꞌcĩ õthõõth nẽẽg ko, tananga hummuhit hĩĩtõ hõthõõꞌtha thõõth ꞌcĩ ĩĩn dĩdĩ.

8Haaga nẽẽꞌthẽk naag haĩ, abũnnaa nyattalĩ, hatĩ hanũ jurrung ꞌgõõlaa ꞌcĩ ĩĩn dĩdĩ. 9Nẽ haaga naag tarĩ haĩ, hõllõngaa ẽhẽnytaa nyattalĩ hĩĩ cĩ eet ꞌcĩg abũnnaa, ẽhẽnytaa hĩĩ cĩ eet ꞌcĩg abũrĩ nyattal hĩ eet ꞌcĩg ĩĩn ꞌloorriak hĩ eet ꞌcĩg hõllõngaa aga Nyekuc nẽ ẽꞌthẽcan thooꞌthiok, aruk eet tahatak, tananga maajihi hode ngaaggi. 10Ẽhẽnytaa nyattalĩ hĩnĩngĩtĩ eet ꞌcĩg ajanĩ tirrii tahatak, hode eet ꞌcĩg õdõra ꞌgõõnõgĩ ꞌcĩg maacĩg aar hĩ ngaaĩ, hĩ eet ꞌcĩg ĩgõrĩth ꞌgõõnõgĩ õõ ũũtẽnĩ thõng, hĩ oloꞌngiaak, hĩ eet gõõng hõllõngaa aduha thõõth ꞌcĩ ĩĩn dĩdĩ lokihooa, hĩ eet ũgĩ buúk ꞌcĩg ẽppẽhan ꞌlimman ꞌcĩ ĩĩn dĩdĩ, 11ammuddiaa ꞌlimmanĩ niccia nyeemuutaa ꞌcĩ abũnnaa, ĩcĩ aaꞌnya nganĩĩt Nyekuci ꞌcĩ abuli nẽ ẽllẽẽm gẽrrẽẽt.

Bũnnai cĩ Makayyiookto hĩ Paaulo

12Hatali naa Yeesu Krĩstõ Makayyioohit cĩnaac baa aaꞌnya nganĩĩt ꞌtirrian, hĩnĩngĩtĩ acĩnna nẽẽ nganĩĩt ngaatĩ haꞌthũũnnĩ thõõth ꞌcĩ hadticanĩĩ dtiic cĩnnĩ dĩdĩ. 13Tananga baa gõõng hothoothi naa thooꞌthiok ꞌcĩg abathĩ ꞌcĩg hõdõõmĩ Nyekuc, hĩ ꞌcĩg huuki lemmiook cĩgĩnnĩg gẽrrẽẽt, aalla ammaannĩkaa nẽẽ nganĩĩt noho, hĩnĩngĩtĩ baa nga hẽlẽm naa ĩnõõnnõ nẽ nga haga thõõth ꞌcĩ hadticani ho buúk. 14Baa tarbal Makayyioohiti cĩnaac Yeesu Krĩstõ hĩ nganĩĩta. Baa aggatan nẽẽ rũgẽt caannĩ lemiitta, hĩ mĩnnaanaa haau hĩ loholeec cĩnnẽẽnĩ.

15Ĩĩn thõõth ciee thõõth dĩdĩ ꞌcĩ occa hẽlẽmĩ dĩdĩ. Baa aku Yeesu Krĩstõ loota nĩnga, hátĩ hẽẽla ꞌthẽccanniook nẽ ꞌthẽccannioohit umwa naa buúk ꞌcĩ baa habathi gẽrrẽẽt. 16Nẽẽthĩ hinnia, baa aalla Nyekuci ammaannĩkaa nganĩĩt ꞌthẽccannioohit ꞌcĩ habathi noho, aĩ hátĩ hẽtẽrẽth eet ngaatĩ ẽmmẽẽꞌthĩ Yeesu Krĩstõ thooꞌthiok ooo nẽ iita elemit eeta ĩnõõnnõ, hátĩ hummuddia rũgẽt ꞌcĩ aalla ooo. 17Aꞌnyĩĩk eet hĩdĩhĩthĩt nẽ ubuluthit Nyekuc cĩnaac irkiꞌnyia hĩ irkiꞌnyia. Ĩĩn nẽẽ habu ꞌcĩ aalla ũdũt, ꞌcĩ hõllõngaa edeeꞌnyia nẽ hõllõngaa adaahĩ. Ĩĩn nẽẽ dioo Nyekuc. Aamẽn.

Dtiicanĩ cĩg Timotteeo

18Nii Timotteeo loholeec caannĩ ho, thooꞌthiok ꞌcĩg hadiimi haduhaakii nganiit cieegi. Ma hataarroꞌthi thooꞌthiok baag aduha eeta baag ĩĩn põrõvẽtaaꞌnya baag hũnũũk, hĩnĩngĩtĩ nganiita. ꞌThũũtĩ thooꞌthiok iccig, hátĩ dticcian jore jurrung. 19ꞌThũũtĩ thõõth cĩ lemiinit cunni nẽ aꞌnyahu ꞌthĩnĩt ꞌcĩ tẽllĩ, hĩnĩngĩtĩ aauto eeta ũgẽẽgĩ ꞌcĩg arahanit lemiittaa cĩnĩĩng, hĩnĩngĩtĩ hõllõngaa athĩhĩ nẽẽg molook cĩ Nyekuci ꞌcĩ othoothĩk ĩhõõggõ ꞌthinneetinitõõ cĩggĩĩng nẽ ẽꞌthẽcanit lemiinit cĩnĩĩng hĩ Nyekuc. 20Ũgĩ aak haĩ hĩ Himeneeo hĩ Alĩthandoro, hũlũnganẽẽhĩ naa ĩhõõggõ ꞌThĩttaan, hátĩ hũtũngteek nẽẽg thooꞌthiok ꞌcĩg õdõõmĩ Nyekuc ũdũt.

Currently Selected:

1 Timotteeo 1: did

Highlight

Compare

Copy