2 Tẽꞌthaloonika 2
2
Kõr ꞌcĩ hatĩ õbõdaanĩ Yeesu
1Nẽẽthĩ ꞌyioko, ꞌgotoonoga hĩ ngoonoga, hummuddia da jurrung ꞌgõõl ꞌcĩ hatĩ õbõdaanĩ Makayyioohiti cĩnaac Yeesu Krĩstõ, hĩ ꞌgõõl ꞌcĩ hatĩ halũttiaanĩ naag hõõt hommottio hĩ ĩnõõnnõ. Nẽ hanneekuung naag ngagiit nẽẽ, 2ma haaꞌnyiku eet ꞌcĩg aĩ, “hĩĩgĩnna põrõvẽtaaꞌnya” higgoolluung hĩĩttĩhuung, ikia Makayyioohiti ẽlẽk. Horoong iggoolluung hatĩ nẽẽg anneekuung ĩĩn thõõth ciee, ꞌcĩ hathĩknaanna cũrũmũũm hĩ Lori ꞌcĩ Ẽllẽẽmĩthĩ, hode hĩ eet umwa hode aĩ, haggiilanna waragẽẽtĩĩ baag heheedi naa Paaulo. 3Ma haaꞌnyiku eet umwa higgooluung ũdũt, hĩnĩngĩtĩ hõllõngaa hatĩ aku kõrra niccia nga hedeeꞌnyia jõrẽẽĩ. Nẽ tarĩ hõllõngaa aku kõrra niccia nga hedeeꞌnyia ẽẽtĩ ꞌcĩ abũrĩ thõõth cĩ Nyekuci, nẽẽthĩ, eet ꞌcĩ hatĩ aruk Nyekuci ho niccia. 4Irrian hatĩ ẽẽtĩ tĩho nẽ ũtũbũr hẽlẽggĩ vẽlẽk ꞌcĩg ẽllẽẽmĩth hode ꞌcĩg aꞌngirannii. Nẽẽthĩ tarĩ, iccioloongan hatĩ nẽẽ ꞌCieetõõ cĩ Nyekuci nẽ uduha ĩĩ hĩĩnĩ Nyekuc. 5Hõllõngaa ammuhooꞌthu niig thõõth baa haduhaakuung naa baa nga harũmĩ hõdẽĩ ho?
6Nẽẽthĩ ꞌyioko, agayyu niig ꞌgii ꞌcĩ alaam eet ꞌcĩ abũrĩ thõõth cĩ Nyekuci ho, hatĩ ũttũbanoothĩk kõrra ꞌcĩ akuuni nẽẽnĩ. 7Hĩnĩngĩtĩ adticaniini hatĩ nẽẽ ꞌtirrian cĩnnĩ ꞌcĩ ammiꞌthi cĩ ꞌthẽccaanõ. Nẽẽthĩ, ẽẽtĩ ꞌcĩ ꞌyioko alaam ꞌtirrian cĩ eet ꞌcĩ aĩ hĩĩnĩ Nyekuc ko, aalla hatĩ alaam ĩꞌthõng hẽꞌnyẽẽhĩ ꞌgõõla. 8Nẽ ma edeeꞌnyia ẽẽtĩ ꞌcĩ abũrĩ thõõth cĩ Nyekuci ho, aruk hatĩ Makayyioohiti Yeesu ĩnõõnnõ ꞌlaũhẽẽnnĩĩ cĩgĩnnĩg nẽ tarĩ, uruk bulẽẽttaa ꞌcĩ õbõdaanĩ nẽẽnĩ.
9Ma ikia ẽẽtĩ ꞌcĩ abũrĩ thõõth cĩ Nyekuci ho, aku hatĩ adtican dtiic cĩ ꞌThĩttaanõ nẽ ĩdĩman thooꞌthiok ꞌcĩg ĩnaat eeta hĩ terethiinit ꞌcĩ ĩĩn õlõng. 10Aku hatĩ ĩggõõl nẽẽ eet cĩg iꞌngittõõthĩ, hĩnĩngĩtĩ thooꞌthiok cĩgĩnnĩg ꞌcĩg abathĩ. Uuk hatĩ Nyekuci eet ꞌcĩg ĩggõõl ꞌThĩttaanĩ ho, hĩnĩngĩtĩ baa abũrĩ nẽẽg ngaatĩ ammĩnanĩ thõõth ꞌcĩ ĩĩn dĩdĩ, ꞌcĩ occa baa aaꞌnyĩk Nyekuc hẽẽla ĩhõõggõ. 11Hĩnĩngĩtĩ thõõth icci, ĩꞌthõõak hatĩ Nyekuci ĩhõõggõ õlõng ꞌcĩ attiran gẽrrẽẽt, hátĩ helemit nẽẽg õlõng. 12Uuk hatĩ Nyekuci ĩhõõggõ vẽlẽk, hĩnĩngĩtĩ ẽlẽmĩ nẽẽg thõõth ꞌcĩ hõllõngaa ĩĩn dĩdĩ nẽ accamatta ꞌthẽccan.
Ĩbĩlĩt okomit
13Nẽẽthĩ, hadiimma naag hanneeka Nyekuc hõdõõkõthĩ ĩlaallẽ ꞌgotoonoga hĩ ngoonoga, hĩnĩngĩtĩ ammĩnannuung Makayyioohiti Yeesu ngagiita nẽ ẽbẽraauung Nyekuci ngagiit dtiicaa cĩ Lori ꞌcĩ Ẽllẽẽmĩthĩ hĩ ngaatĩ elemmu thõõth ꞌcĩ ĩĩn dĩdĩ. 14Avvaannuung nẽẽ ngagiit nyeemuutaa ꞌcĩ abũnnaa ĩcĩnaang, hátĩ otholit bulẽẽnĩt cĩ Makayyioohit cĩnaac Yeesu Krĩstõ. 15Nẽẽthĩ, ꞌgotoonoga hĩ ngoonoga, ĩnõõ ꞌcĩ hanneekuung, ĩbĩlĩt okomit nẽ uꞌthuuttu thooꞌthiok baag hallimaneekuung naag jurrung, hode haduhaakuung ũtũũgaa hode hẽhẽẽdakuung waragaawa.
16Aꞌnyĩĩk Makayyioohit cĩnaac Yeesu Krĩstõ hĩ Nyekuc Baangeet cĩnaac ꞌcĩ ammĩnanneet ngagĩĩt bũnnaiitta cĩnnĩ nẽ aaꞌnyeet kũttan ꞌcĩ aalla ooo hĩ muhẽẽnĩt ꞌcĩ abũnnaa, 17hũkũtattuung hokomit ꞌthinneeti nẽ eelluung hõdõõkõthĩ ĩdĩmanit thooꞌthiok ꞌcĩg abũnnaa nẽ uduktaau thooꞌthiok ꞌcĩg ĩĩn dĩdĩ.
Currently Selected:
2 Tẽꞌthaloonika 2: did
Highlight
Share
Compare
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
