2 Korinthia 7

1ꞌGotoonoga hĩ ngoonoga, hĩcĩ haꞌnyahit naag thooꞌthiok ꞌcĩg tiirik ꞌcĩg aduha Nyekuci ho, haaut ꞌrẽẽna hẽlẽggẽẽnnĩ vẽlẽk ĩcĩg occa aaꞌnyĩk eleeti hĩ loriẽẽt cĩggaac hĩĩtõ ꞌriiring. Hadiim hĩĩgĩn eet ꞌcĩg abũnnaa nẽ haꞌnyahit authet ꞌcĩ hiꞌngoliini Nyekuc.

Accamanoothĩk Paaulo

2Ubbuuktĩheetu ngagĩĩt ꞌthinneeti cugguung. Hĩnĩngĩtĩ hõllõngaa hadĩmanna naag eet umwa ꞌbuth. Hõllõngaa hĩgõrĩꞌtha ꞌgii cĩ eet umwa nẽ hõllõngaa harratanna eet umwa. 3Hõllõngaa haduha naa hoti, hátĩ hĩdĩmanuung ꞌbuth, nẽẽthĩ, baa huduhaahuung naa ngagiit baa ĩĩcĩ oou hĩĩnnĩhuung, hammĩnannuung naag ngagiit ꞌthinneetinii cĩggaang dĩdĩ, tananga harũmĩ hõdẽĩ, hode hadaahĩ hõdẽĩ hĩ ngagiita. 4Haꞌnyahi naa lemiinit hĩ ngagiit ꞌthĩnĩtaa caannĩ dĩdĩ. Hirriannuung naa ngagiit gẽrrẽẽt buúk nẽ nga õkõmĩ ꞌthĩnĩt caannĩ gẽrrẽẽt. Tananga nga haꞌnyahi pĩĩrnanĩt, aalla haccamanoothihi naa gẽrrẽẽt noho.

5Ma baa hiita hõdõlatta looc cĩ Maccedoonia, iita ippiirria eleeti cĩggaang gẽrrẽẽt nẽ baa hammũdaanna pĩĩrnanĩt ꞌgoolliohĩ vẽlẽk tahatak hĩ mĩrõk cĩggaang, hĩ mothiinit ꞌcĩ aaĩ ꞌthinneetinii cĩggaang. 6Nẽẽthĩ, Nyekuc ꞌcĩ amammaayan eet ꞌcĩg ahayũngattĩ ꞌthinneeti, amammaayanneet ngagĩĩt ngaatĩ ĩꞌthõõakeet Tiito. 7Ee mĩĩ ꞌthẽk, haccamanoothĩka naag ngaatĩ hacĩnna Tiito nẽ ꞌgii dẽẽdẽ ꞌcĩ aaꞌnyeet ngagĩĩt hatallia gẽrrẽẽt, ꞌgõõl baa aaꞌnyiku niig ĩnõõnnõ haccamanoothĩk. Baa ikia uduhaaheet nẽẽ ngagĩĩt ꞌgõõl baa ommothiinnu niiga nẽ ĩrrĩcattaawangu nganĩĩta. Ikia aaꞌnya thõõth ciee nganĩĩt haccamanoothĩk gẽrrẽẽt.

8Tananga haaꞌnyuung ngagiit waraga caannĩ ho mothiinit, hõllõngaa homoꞌthi naana. Tananga nẽẽꞌthẽk homoꞌthi, hacinoothi aaꞌnyuung waraga caannĩ ho liilii hĩdĩĩc haaga. 9Nẽẽthĩ ꞌyioko, haccamanoothĩha naana nẽ hõllõngaa haccamanoothihi, hĩnĩngĩtĩ hadĩmannuung ngagiit ꞌbuth. Haccamanoothihi, hĩnĩngĩtĩ baa ittiha Nyekuci huciith cunuung ko, hĩĩ ꞌgõõl ꞌcĩ obodooꞌthu niig hĩ ĩnõõnnõ nẽ baa aitiõõ ẽẽtĩ umwaa hõrggẽẽnaa cunuung ꞌcĩ hĩdĩmatta naag ꞌbuth tõõ. 10Ma aaꞌnyuung ngagiit Nyekuci mothiinit gẽrrẽẽt, aĩ nẽẽ, hátĩ oboddiooth niig hĩ ĩnõõnnõ, hátĩ heellia eleeti cugguung, occa aitiõõ ꞌgii umwaa ꞌcĩ ommothiinnu niig tõõ, hĩnĩngĩtĩ thõõth icci. Nẽẽthĩ, ma aaꞌnyuung ngagiit lõõcĩ ciee mothiinit, aku hinnia aꞌnyahaakuung ngagiit daahĩth.

11Nẽ ĩcĩnĩt dako nõõ ꞌgii ꞌcĩ adtican Nyekuci ngaatĩ aꞌnyahaakuung ngagiit mothiinit. Adiim ẽtẽrꞌthaannu niig dĩdĩ, ngaatĩ ammĩrru niiga. Alĩĩlĩyyu niiga, akuleeku niig ꞌjieen nẽ ũmũyanuung ngaatĩ acinnu thõõth ꞌcĩ ĩĩn dĩdĩ ngaatĩ adticaniini nẽ etereꞌthiaau iittu, aũlannu niig thõõthaa cĩ vẽlẽk dĩdĩ. 12Tananga baa hẽhẽẽdakuung naa ngagiit waraga, baa hõllõngaa hẽhẽẽda, hĩnĩngĩtĩ eet ꞌcĩ baa ẽꞌthẽcan thõõth hode hẽẽla eet ꞌcĩ baa ĩdĩman ꞌgoonnia ꞌbuth ꞌcannaana. Baa hẽhẽẽda, hátĩ heteretheehuung ngagiit Nyekuci ꞌgõõl ꞌcĩ aallakeetu niig ngagĩĩta. 13Nẽ ikia ũkũtaneet ngagĩĩt thõõth cunuung gẽrrẽẽt.

Nẽ Tiito ꞌcĩ baa aku aalla ĩttoorĩkeet ngagĩĩt taliinit gẽrrẽẽt, hĩnĩngĩtĩ hĩcĩtta naag ĩnõõnnõ ngaatĩ accamanõõthĩkĩ gẽrrẽẽt, hĩnĩngĩtĩ baa iita aanytĩhu niig vẽlẽk muhẽẽnĩt cĩnnĩ hiyyioman. 14Baa hirriannuung naa ngagiit hĩ ĩnõõnnõ, tananga baa hõllõngaa aaꞌnyaangu niig nganĩĩt ngaaoni. Nẽẽthĩ, thooꞌthioha baag haduhaaka naag ĩnõõnnõ vẽlẽk hĩnĩngĩtĩ ngagiita, iita ẽdẽẽnyta ĩĩtõ dĩdĩ nẽ ikia edeeꞌnyia ꞌrianĩĩthĩ cĩnaang buúk hĩ Tiito ĩĩ dĩdĩ. 15Ammĩnannuung ngagiit Tiito gẽrrẽẽt hatĩ ammuhoothi ꞌgõõl baa iꞌngoliinnu niig ĩnõõnnõ nẽ abarritu tẽẽlꞌthĩta, ngaatĩ ẽlẽmaaku niig ĩnõõnnõ hikia hĩ ngagiita. 16Haccamanoothihi naa ꞌyioko gẽrrẽẽt, hĩnĩngĩtĩ õkõm ꞌthĩnĩt caannĩ hẽlẽggẽẽnnĩĩ cĩg adticannu niiga.

Currently Selected:

2 Korinthia 7: did

Highlight

Copy

Compare