2 Korinthia 8

ꞌBaaninit ꞌcĩ alũta lemmiooha

1ꞌGotoonoga hĩ ngoonoga, hadiimmuung naag ngagiit agaac bũnnai ꞌcĩ baa aaꞌnyĩk Nyekuci lothippiꞌnya cĩg lemmiook cĩg looc ꞌcĩ Maccedoonia. 2Tananga baa haꞌnyahit nẽẽg authet ꞌcĩ õkõmĩ nẽ tarĩ ĩĩtõ pĩĩrnattiaak, baa accamanoothĩk nẽẽg nẽ itikta ꞌbaaninit taliitta. 3Nẽ haduha dĩdĩ haini, baa attiha nẽẽg ꞌbaaninit ꞌcĩ maka hĩllõõan ꞌcĩ occa baa attiha nẽẽg ẽmmẽn. Hĩnĩngĩtĩ baa adiim nẽẽg adĩman noho. 4Iita alayyieet lemmiooha ngagĩĩt aĩ, hátĩ hẽlẽmtaaha naag ĩhõõggõ haꞌnyahit taliinit, ngaatĩ attihaanĩ ꞌrabbẽẽt cĩggĩĩng nẽ eelli lemmiook cĩg Nyekuci ꞌJeruꞌthalẽma. 5Iita itikta nẽẽg ꞌbaaninit ꞌcĩ maka hĩllõõan baa hammuhuneeka naaga. Atiman nõõ nẽẽg ngaatĩ aaꞌnyĩkĩ eleeti cĩggĩĩng hĩ Makayyioohit Yeesu, hĩ ngagĩĩt buúk, haau hĩ baa adiim Nyekuci ĩhõõggõ hidticanit.

6Baa Tiito ꞌcĩ baa ꞌthẽk aaꞌnyuung iꞌthiattaaĩ dtiic icci abũnnaa ho. Nĩngĩtĩ haduhaaka ĩnõõnnõ heeluung ngagiit edecciaak dtiic baa iꞌthianaannu niig ko. 7Adticaniinnu niig gẽrrẽẽt hĩllõõan eet vẽlẽk. Aꞌnyaku niig lemiinit ꞌcĩ õkõmĩ, othooꞌthu niig jurrung nẽ agayyu thõõth ꞌcĩ maka. Hõllõngaa appĩĩrnannu ngaatĩ aaꞌnyiku ꞌbaaninit hĩ Nyekuc nẽ ĩmmĩnatteetu niig ngagĩĩt buúk jurrung. Nẽẽthĩ ꞌyioko, hadiimma aaꞌnyiku ꞌbaaninit taliittaa cĩ ꞌthinneeti cugguung hĩllõõan eet vẽlẽk.

8Hõllõngaa hattĩnganeekuung naa ngagiit ngaatĩ haĩ idticanit hoti, hadiimi hattĩmannuung naa ngagiit thõng, hatĩ ꞌthẽk ĩĩn mĩnnanĩ cunuung dĩdĩ, ngaatĩ ĩthakꞌtheeku mĩnnan cunuung hĩ bũraneehinit ꞌcĩ ẽtẽrꞌtha eeta ũgẽẽgĩ. 9Agayyu niig bũnnai cĩ Makayyioohit cĩnaac Yeesu Krĩstõ, ngaatĩ ũũnnĩkĩ baliinit cĩnnĩ hẽẽtahujjieen nẽ ikia ĩĩ hullahaac, hátĩ habalithuung ngagiita.

10Nẽ tilooinit caannĩ cieeni, irkit baa gõlla baa ngagiit ꞌcĩg iꞌthianaannu ꞌbaaninit ĩĩcĩ oou nẽ baa attihaannu niig ꞌbaaninit icci, hĩnĩngĩtĩ baa adiimmu niiga. 11Nẽ ꞌyioko, edecciaak dtiic cunuung baa iꞌthianaannu ho. Má aaꞌnyiku niig ꞌbaaninit cunuung hĩ baa aggatannuung Nyekuci, au hatĩ agayyu niig ꞌbaaninit tĩho hĩ baa abũraneeku niig ꞌthinneetinii cugguung. 12Má adiimmu niig aaꞌnyiku ꞌbaaninit cunuung ꞌthinneetinii cugguung dĩdĩ, elemmi hatĩ ꞌbaaniniti hẽlẽggẽẽnnĩĩ cĩg aꞌnyaku niiga, hõllõngaa hĩnĩngĩtĩ hẽlẽggĩ ꞌcĩg aitiõõ hĩ ngagiit tõõ.

13Hõllõngaa haini naa aꞌnyĩĩk rũgẽt hũmmũc hĩ eet ũgĩ nẽ haaꞌnyĩha hõkõm hĩ ngagiita, nẽẽthĩ, occa ꞌthẽk aduhõõ thõõth hĩ ngagiit vẽlẽk thõng. 14Ma aꞌnyaku niig hẽlẽggĩ ꞌcĩg mẽẽlĩg, otholit hĩ ĩhõõggõ hatĩ aꞌnyak ꞌcĩg abadtẽc haaga nẽ hatĩ uruta, ma aꞌnyahit nẽẽg buúk hẽlẽggĩ ꞌcĩg mẽẽlĩg, au hatĩ othollu hĩ ngagiita, nẽẽthĩ hatĩ uduktoou niig vẽlẽk thõng. 15Hĩcĩ eheeddi ꞌBuuhaa cĩ Nyekuci aĩ, “Ẽẽtĩ ꞌcĩ aꞌnyak hẽlẽggĩ ꞌcĩg mẽẽlĩg, hõllõngaa aꞌnyak ꞌcĩg mẽẽlĩg gẽrrẽẽt nẽ ẽẽtĩ ꞌcĩ aꞌnyak hẽlẽggĩ ꞌcĩg hidicig, hõllõngaa hatĩ aꞌnyak hẽlẽggĩ ꞌcĩg kidicig gẽrrẽẽt.”#Tigiil ꞌBuuk cĩ Luugithõõ 16:18

Tiito hĩ ꞌgõõnõgĩ

16Hatali naa Nyekuc ꞌcĩ aaꞌnyĩk ꞌthĩnĩt cĩ Tiito hĩrrĩcanaauung ngagiit haau hĩcĩ harrĩcanaannuung naa ngagiit ko. 17Baa halayya Tiito, hátĩ hẽhẽẽrõnaahuung ngagiita, baa ĩĩdĩ nẽẽ ngaatĩ akuuni, hĩnĩngĩtĩ aallakuung nẽẽ ngagiit gẽrrẽẽt. 18Hĩꞌthõõanna naag Tiito hookorria hĩ ꞌgõõnĩ umwa ꞌcĩ ĩĩn nuyyioohit cĩ Makayyiookto hĩ nẽẽnĩ, ꞌcĩ agayyi lothippiꞌnyaannĩĩ cĩg lothippit cĩ lemmioohu, ngaatĩ irriõõnĩ nyeemuut ꞌcĩ abũnnaa cĩ Krĩstõ. 19Hõllõngaa nohotaa diooni, baa ẽbẽra lothippiꞌnya cĩg lemmioohu ĩnõõnnõ, hátĩ hookorria hĩ ngagĩĩta, hĩcĩ haꞌnyaka naag ꞌbaaninit icci ꞌcĩ hatĩ aaꞌnyĩk Makayyioohit dĩhĩthẽẽnĩt nẽ ẽtẽrẽtha ĩĩ, habũraneeka naag ngaatĩ heelluunga. 20Hõllõngaa hadiimma eet umwa hongoongoeeheet ngagĩĩt ꞌgõõlaa ꞌcĩ hẽꞌngẽrra ꞌbaaninit icci, baa attihaannu niig ꞌthinneetinii ꞌcĩg abũnnaa ho. 21Nẽ hadiimma naag hadticanna ꞌgii ꞌcĩ aaꞌnyĩk Makayyioohit hatal nẽ aaꞌnyĩk eet hummuhit hĩĩtõ aũlan thõõth cieeni.

22Nẽ thõõth umwa cieeni, hĩꞌthõõanna naag ꞌgotooneet cĩnaang umwa hĩ Tiito, hĩ nuyyioohit cĩ Makayyiookto. Hĩttĩmatta naag ꞌgotooneet icci tabattĩ mẽẽlĩg nẽ hummuddiaawa ĩĩn nẽẽ eet ꞌcĩ aꞌnyak authet ꞌcĩ occa eelluung ngagiita nẽ ꞌyioko, adiim nẽẽ eelluung ngagiit hĩllõõan, hĩnĩngĩtĩ aarihuung nẽẽ ngagiit ꞌthĩnĩta dĩdĩ. 23Nẽẽthĩ, Tiito, ĩĩn nẽẽ eet ꞌcĩ hadticaniinna hõdẽĩ hĩ ngagĩĩta, hĩnĩngĩtĩ ngagiita nẽ ꞌgotoonoga ꞌcĩg ĩĩn ꞌramma hataa, ĩĩn nẽẽg ꞌthooyyiak ꞌcĩg ĩꞌthõõa lothippiꞌnya cĩg lemmiook cĩggĩĩng cũũmõ cũũmõ looccaa cĩ Maccedoonia. Aꞌnyahaak Krĩstõ bulẽẽnĩt thooꞌthiohĩĩ cĩg adtican nẽẽgĩ. 24Ĩdĩmanit ĩhõõggõ jurrung, ꞌgõõlaa ꞌcĩ occa acĩnĩ lothippiꞌnya cĩg lemmioohu mĩnnan cunuung, hátĩ hiita hagaacõ nẽẽg, inni hirriattuung naag ngagiit ko.

Currently Selected:

2 Korinthia 8: did

Highlight

Copy

Compare