1 Timotteeo 6

Itingolli makayyiook cugguung

1Má aaĩ appahaca ꞌcĩ ĩĩn lemmioohit cĩ Nyekuci, occa itieelli nẽẽ makayyioohit cĩnnĩ gẽrrẽẽt ũdũt, hátĩ hiittiõõ hõllõngaa aaꞌnyĩk ꞌthaar cĩg Nyekuci hĩ ꞌlimman cĩnnĩ ngaaoni. 2Má aꞌnyaku niig eeta ꞌcĩg iiginnu appahacaaꞌnya makayyiook cugguung ꞌcĩg ĩĩn lemmiook cĩg Nyekuci, ma hamaaccu makaaꞌthĩt cĩnĩĩng, hĩnĩngĩtĩ ĩĩn nẽẽg ꞌgotoonogu ꞌthaarĩĩ cĩg Yeesu nẽ ammĩnannu niig buúk ĩhõõggõ. ꞌLimman thooꞌthiok iccig jurrung.

Mĩnnan cĩ ꞌrabbeetu

3Má alliman ẽẽtĩ umwaa thõõth ꞌcĩ ꞌrĩĩng, ꞌcĩ hõllõngaa õõkõrõõ hĩ ꞌlimman ꞌcĩ ĩĩn dĩdĩ ꞌcĩ aku hĩ Makayyioohit cĩnaac Yeesu Krĩstõ ho, 4aduul ẽlẽ cĩnnĩ haaga nẽ ẽrẽk thõõth ꞌcĩ aga buúk. Õmmõõrĩ õõ cĩnnĩ, adiim ẽppẽhanõõnĩ hĩ ꞌgõõnõgĩ thooꞌthiok ꞌcĩg aꞌnyaha bathi, hĩ ngaatĩ alĩĩlĩ hẽlẽggĩ cĩg ꞌgoonoginni, 5hĩ jore hĩ ngaatĩ õdõõmĩ ꞌgõõnõgĩ hĩ muhẽẽnĩt ꞌcĩ abathĩ nẽ aꞌnyak nẽẽ õõ ꞌcĩ abathĩ, ꞌcĩ hõllõngaa agaĩ thooꞌthiok ꞌcĩg ĩĩn dĩdĩ. Ammuk nẽẽg aĩ, ĩĩn thõõth cĩ Nyekuci ꞌcĩ hammũdaanĩ ꞌrabbẽẽta.

6Haballi naag dĩdĩ, hatĩ hiꞌngolli thõõth cĩ Nyekuci nẽ heꞌnyeenenit hẽlẽggẽẽnnĩĩ ꞌcĩg haꞌnyahĩ. 7Hĩnĩngĩtĩ baa hiꞌthihi ꞌgiimwa ꞌcĩ baa haꞌnyaha naag loota nĩnga, ma hatĩ kõr umwa, hiꞌthihi hatĩ ꞌgiimwa ꞌcĩ hõõĩ buúk. 8Nẽẽthĩ, má nẽẽ haꞌnyak ꞌgẽẽn hĩ ceremwa, ũũppanneet ꞌthẽk hẽlẽggĩ nicciag ngagĩĩta. 9Eeta ꞌcĩg adiim baliinit, adhuhoothĩk nẽẽg ꞌtĩmman, ꞌgõõlaa ꞌcĩ ẽdẽtĩ ĩhõõggõ thooꞌthioha ꞌcĩg abathĩ ꞌcĩg abũraneek nẽẽg, ꞌcĩg aaꞌnyĩk ĩhõõggõ hẽꞌthẽcattĩ. 10Hĩnĩngĩtĩ má haangal ꞌrabbẽẽtĩ, hau hadtican thooꞌthiok vẽlẽk ꞌcĩg abathĩ. Aauto eeta ũgẽẽgĩ ꞌcĩg ꞌthẽk ummuhit ꞌrabbẽẽt diooni nẽ ataarriothĩ thõõth cĩ lemiinit cĩ Nyekuci nẽ aaꞌnyĩk ĩhõõggõ hiita haccanattĩ nẽ ummuddia pĩĩrnanĩt ꞌcĩ ahuci gẽrrẽẽt haaga noho.

ꞌThũũtĩ thõõth cĩ Nyekuci

11Nẽ nii Timotteeo, ĩĩnĩ nii eet cĩ Nyekuci, ma hadĩmani thooꞌthiok ꞌcĩg abathĩ ꞌcĩg aattĩg noho, ꞌtĩmman gẽrrẽẽt ngaatĩ adĩmanĩĩ thõõth cĩ Nyekuci, hátĩ bũna au hĩ nẽẽnĩ, lẽẽm ĩnõõnnõ, mĩnnan ĩnõõnnõ nẽ etemeethu thooꞌthiok ꞌcĩg aꞌnyahaaki nẽẽnĩ nẽ ĩĩ tarballioohit. 12ꞌTĩmman gẽrrẽẽt ngaatĩ anũĩ thõõth cĩ Nyekuci, hátĩ mũda rũgẽt ꞌcĩ aalla ooo, baa auyyi nganiit Nyekuci, kõr baa aduhaanĩ lemiinit cunni cĩ thõõth cĩ Nyekuci lothippitaa cĩ eet ꞌcĩg mẽẽlĩg. 13Haduhaakii muumaa cĩ Nyekuci ĩcĩ aaꞌnyĩk hẽlẽggĩ vẽlẽk hũrũgĩt, hĩ muumaa cĩ Yeesu Krĩstõ ꞌcĩ baa aduhaak Ponthio Pĩlaatõ lemiinit cĩnnĩ lothippita, 14bũtan ĩĩ athihi hatĩ thõõth ꞌcĩ haduhaaki naa ho vẽlẽk jurrung, ĩꞌthõng kõr ꞌcĩ hatĩ õbõdaanĩ Makayyioohiti cĩnaac Yeesu Krĩstõ, 15ꞌcĩ hatĩ aꞌnyaha Nyekuci kõr ꞌcĩ hatĩ ẽbẽra nẽẽnĩ, Nyekuc ꞌcĩ abuli, ꞌcĩ ĩĩn Makayyioohit ꞌcĩ odoyyii, Habu cobbi cĩ habueetu, Makayyioohit cobbi cĩ makayyioohu. 16Ĩnõõnnõ dioo ꞌcĩ arũgĩ ũdũt, aaĩ nẽẽ lanyitatõõ ꞌcĩ hõllõngaa occa õdõlan ẽẽtĩ umwaa hõbõktõ. Nga hĩcĩn eet umwaa Nyekuc nẽ aitiõõ hatĩ eet umwaa ꞌcĩ acĩn ĩnõõnnõ ũdũt tõõ. Hĩdĩhĩthĩt Nyekuc, aalla hatĩ makaaꞌthĩt cĩnnĩ ooo, Aamẽn!

17Duhaak balliook cĩg looc nicci thõõthaa ꞌcĩ õkõmĩ anneek, ma hathĩngõõnyannu eleeti baliitta ꞌcĩ hatĩ aꞌnginoothi hĩdĩĩkoothong. Aꞌnyĩĩk haarrik muhẽẽnĩt cĩnĩĩng hĩ Nyekuc, ꞌcĩ aaꞌnyeet ngagĩĩt hẽlẽggĩ vẽlẽk ꞌcĩg haccamanõõthĩkĩ. 18Duhaak ĩhõõggõ hĩdĩmanit thooꞌthiok ꞌcĩg abũnnaa ꞌcĩg mẽẽlĩg, hĩĩtõ tõrõmĩ, hotholit baliinit cĩnĩĩng hĩ eet ꞌcĩg appĩĩrna. 19ꞌGõõl ꞌcĩ hatĩ aarĩkĩ nẽẽg baliinit cĩnĩĩng õlõõ cĩ Nyekuci ĩcĩ hatĩ horumwa cieeni, nẽẽthĩ hatĩ ummuddia rũgẽt ꞌcĩ ĩĩn dĩdĩ ꞌcĩ aalla ooo.

20Ẽlẽ Timotteeo, ꞌthũũtĩ thooꞌthiok baag aduhaaki Nyekuci, ma hathihi thooꞌthiok ꞌcĩg õthõõth eeta ꞌcĩg hõllõngaa õõkõrõõ hĩ thõõth cĩ Nyekuci nẽ ẽppẽhattii ĩĩtõ, hẽggẽẽꞌnya gẽrrẽẽt, ĩko nẽẽ aitiõõ tõõ. 21Aauto eeta ũgẽẽgĩ ꞌcĩg ũtũbũrĩt ngaatĩ ẽlẽmmĩ thõõth cĩ Nyekuci, ngaatĩ anũĩ thooꞌthiok ꞌcĩg aattĩg hĩ cieegi.

Aꞌnyĩĩk Nyekuc haggatanii nganiita.

Currently Selected:

1 Timotteeo 6: did

Highlight

Compare

Copy