1 Timotteeo 5

ꞌGõõl ꞌcĩ harũmẽẽnĩ hõdẽĩ

1Ma hẽtẽẽtha eet cobbi, tẽẽlĩ ĩnõõnnõ duhaak thõõth hĩdĩĩc, haau hĩcĩ occa aduhaahi maaꞌnyu. Ookorrio hĩ nyahaappanĩt, hĩcĩ aattiyyu hĩ ꞌgotoonogu. 2Tingõlĩ ngaaĩ ꞌcĩg obbitig, haau hĩcĩ iꞌngolli ngaanu. Cĩĩn buheeci hĩcĩ acĩnĩ ngoonogu.

3ꞌThũũtĩ ngaatĩbõyyĩꞌnya dẽẽdẽ cĩg aattĩg pĩĩrnatta. 4Má aaĩ ngaatĩbõyyĩ umwaa ꞌcĩ aꞌnyak lõhõlĩ cĩgĩnnĩg, hode lõhõlĩ cĩg lõhõlĩ cĩgĩnnĩg, aꞌnyĩĩk ĩhõõggõ hidticattoothĩk Nyekuc ngaatĩ aꞌthũũnnĩ aattĩnĩĩng cobbi, haau hĩ baa aꞌthũũnnĩ ngaannia ĩhõõggõ. Thõõth ꞌcĩ accamana Nyekuci niccia. 5Nẽ ngaatĩbõyyĩ ꞌcĩ appĩĩrna dĩdĩ, cĩ aitiõõ ittioonnioha cĩgĩnnĩg tõõ, aarĩk nẽẽ lemiinit hĩ muhẽẽnĩt cĩnnĩ vẽlẽk hĩ Nyekuc nẽ ala ĩnõõnnõ hõdõõkõthĩ waathĩn hĩ baalin vẽlẽk, hátĩ hẽẽl Nyekuci ĩnõõnnõ. 6Nẽ ngaatĩbõyyĩ ꞌcĩ aaĩ authetaa ꞌcĩ uranganĩ ẽlẽ cĩnnĩ, adaak lorii cĩnnĩ ẽlẽk, tananga nga arũgĩ nẽẽnĩ. 7Duhaak eet vẽlẽk thooꞌthiok iccig, hátĩ hĩdĩmanit eeta vẽlẽk thooꞌthiok ꞌcĩg abũnnaa.

8Má aaĩ ẽẽtĩ umwaa ꞌcĩ hõllõngaa aallak ittioonniok cĩgĩnnĩg, ettebehini halang cĩnnĩ dẽẽdẽ, ũtũbũr nẽẽ thõõth cĩ Nyekuci ẽlẽk, abathõõthĩ nẽẽ gẽrrẽẽt, hĩllõõan eet ꞌcĩ nga haꞌnyak lemiinit.

9Ma hagiilihi ngaa ꞌcĩ adaak maac ꞌgoonoginnii ꞌcĩg ĩĩn ngaatĩbõyyĩꞌnya, hatĩ nga hĩĩtõ irkiꞌnyia cĩgĩnnĩg hẽẽn tõrkõnõn nẽ tarĩ, abũnnaa ĩĩn baa ngaa ꞌcĩ arũmĩ hĩ maac hõdẽẽthõng diooni. 10Abũnnaa agayyi nẽẽ gẽrrẽẽt ngaatĩ adticanĩ thooꞌthiok ꞌcĩg abũnnaa, ꞌcĩg aattĩg hĩ ꞌcĩg iroktaanĩ lõhõlĩ cĩgĩnnĩg jurrung, hĩ ngaatĩ akũmanẽẽkĩ hẽẽrõn õlõõ cĩnnĩ, akũmaneek eet cĩg Nyekuci õlõõ cĩnnĩ jurrung, ẽẽl pĩĩrnattiaak nẽ ĩrrĩcana ngaatĩ adticanĩ thooꞌthiok vẽlẽk ꞌcĩg abũnnaa.

11Ma harumeehi ngatĩbõyyĩꞌnya ꞌcĩg nga hidicig hĩ ꞌgõõnõgĩ ꞌcĩg õõ, aaꞌnyĩhoothĩk eliiniti, hĩnĩngĩtĩ occa nga abũraneek nẽẽg ꞌthũwan nẽ hatĩ ataarriothĩ thõõth cĩ Krĩstõ, 12nẽ aꞌnyaktaak eleeti cĩggĩĩng ukẽẽnĩt, ngaatĩ ẽꞌthẽcanĩ thõõth baa abũtan nẽẽgĩ. 13Nẽ tarĩ buúk, má aaꞌnyĩhoothĩk ĩhõõggõ eliiniti, au hatĩ alatan nẽẽg nẽ õtõõcõ olooyyiohĩ tahatak nẽ hatĩ iꞌthiattaaĩ otongomit ꞌgõõnõgĩ nẽ ĩĩtõ nyamuttiook ꞌcĩg õthõõth thooꞌthiok ꞌcĩg occa hõllõngaa õthõõth buúk. 14Ĩnõõ ꞌcĩ haduhaakĩ naa ngaatĩbõyyĩꞌnya ꞌcĩg nga hidicig hũꞌthũwattĩ tarĩ, hátĩ hittirria lõhõlĩ nẽ uꞌthuutti olooyyiok cĩggĩĩng jurrung, hiittiõõ hõllõngaa ongomĩtteet mĩrõha cĩggaac ngagĩĩta. 15Hĩnĩngĩtĩ aauto ngaatĩbõyyĩꞌnya niccieeg ũgẽẽgĩ ꞌcĩg utuhuyyi ũnnẽẽcõ ꞌThĩttaan.

16Má aaĩ ngaa umwaa ꞌcĩ ĩĩn lemmioohit cĩ Nyekuci, ꞌcĩ aꞌnyak ngaaĩ ꞌcĩg ĩĩn ngaatĩbõyyĩꞌnya halangatõõ cĩnnĩ, aꞌnyĩĩk hũꞌthũũtĩ ĩhõõggõ jurrung, abathĩ ngaatĩ aꞌnyahaakĩ lothippit cĩ lemmiook cĩg Nyekuci pĩĩrnanĩt ꞌcĩ aggamĩ ĩhõõggõ. Abũnnaa aꞌthũũnnĩ eeta cĩg Nyekuci ngaatĩbõyyĩꞌnya ꞌcĩg appĩĩrna dĩdĩ.

17Occa hadũman makayyiook cĩg lothippit cĩ lemmiohu tabattĩ ꞌramma, hatĩ horoong maka dtiici cĩnĩĩng ꞌcĩ irrioonĩkĩ eet nẽ illimatteek thõõth cĩ Nyekuci ho. 18Aduha ꞌBuuhi cĩ Nyekuci aĩ, “Ma hecebi olĩ ũtũg hatĩ athĩan haala,#5:18 Ma hecebi olĩ ũtũg hatĩ athĩan haala: Aaꞌnyĩk eeta cĩg ꞌJudeei olĩꞌnya hutugurit ꞌgii ꞌcĩ adĩddĩngĩĩ hĩthĩattĩ haala.”#Tigiil ꞌBuuk cĩ Ditoronomi 25:4 nẽ “Occa ꞌthẽk aggam dticciannioohiti ꞌrabbẽẽt cĩg dtiic cĩnnĩ.”#Tigiil ꞌBuuk cĩ ꞌLuuka 10:7

19Ma helemi thõõth ꞌcĩ addangaakĩ eeta makayyiook cĩg lothippit cĩ lemmioohu, hatĩ nga hudukta eeta ꞌramma hode iyyio hĩĩtõ, ĩĩn thõõth nicciee dĩdĩ, nẽẽthĩ hatĩ elemtu. 20ꞌGerenyeek makayyioohit cĩ lothippit cĩ lemmioohu, hatĩ ẽꞌthẽcan thooꞌthiok, hátĩ hitingolli ꞌgoonoggia ũgẽẽgĩ vẽlẽk.

21Haduhaaki muumaa cĩ Nyekuci hĩ ĩcĩ Yeesu Krĩstõ, hĩ aajĩlẽẽt cĩgĩnnĩg vẽlẽk baag eberriaa hanneeki, nũũ thooꞌthiok ꞌcĩg haduhaaki naa ho. Nẽ ma hahali eet thõng.

22Ma hangaꞌnganyi ngaatĩ ẽlẽmmĩ eet dtiica cĩ Makayyiookto hĩdĩĩkoothong, ngaatĩ aggatanĩĩ nẽ ataadĩhuu athĩn cugunnig ootinii cĩggĩĩng. Ma hẽꞌthẽcani thooꞌthiok, hĩnĩngĩtĩ ẽꞌthẽcan ꞌgoonogu. ꞌNyaak ꞌthĩnĩt ꞌcĩ tẽllĩ hĩ Nyekuc.

23Ma nga hahudi maam diooni, taar mẽrtĩ cĩ viinoo ꞌcĩ abadtẽc, hátĩ hẽẽl hẽẽng, hĩnĩngĩtĩ gõõng ommoori nii hõdõõkõthĩ.

24Agayyi eet ũgĩ ꞌthẽccanẽẽta cĩggĩĩng nĩĩcĩ noho, nga hõdõlanit kõr ꞌcĩ decciaanĩt cĩ lootu buúk. Nẽ aattĩg eeta ũgẽẽgĩ ꞌcĩg hõllõngaa edeeꞌnyia ꞌthẽccanẽẽta cĩggĩĩng hĩdĩĩkoothong, au edeeꞌnyia uruta ꞌrĩng. 25Aduhõõ thõõth ciee hĩ thooꞌthiok ꞌcĩg abũnnaa. Aattĩg thooꞌthioha ꞌcĩg edeeꞌnyia nĩĩcĩ noho nẽ aitiõõ ꞌcĩg occa ammiꞌthi ũdũt tõõ.

Currently Selected:

1 Timotteeo 5: did

Highlight

Compare

Copy