1 Timotteeo 2

ꞌGõõl ꞌcĩ occa halaĩ Nyekuc

1Nẽẽthĩ ĩĩcĩ oou, hanneekii nõõ naa laõõĩ eet vẽlẽk. Aꞌnyĩĩk Nyekuc hẽẽl nẽ aggatan ĩhõõggõ vẽlẽk nẽ duhaak Nyekuc ꞌgõõl ꞌcĩ annẽẽkĩ ĩnõõnnõ ĩlaallẽ, hĩnĩngĩtĩ ĩhõõggõ vẽlẽk. 2Laõõĩ habuẽẽt ꞌcĩg obbitig hĩ ꞌgaala vẽlẽk, hátĩ haaut naag vẽlẽk lõꞌngõõc, ꞌgõõlaa ꞌcĩ hiꞌngoliini Nyekuc nẽ huꞌthuutti thõõth cĩnnĩ. 3Laiinit ꞌcĩ abũnnaa ꞌcĩ aaꞌnyĩk Nyekuc ꞌcĩ ĩĩn Ellioohit cĩnaac hatal cieeni. 4Adiim Nyekuci eet vẽlẽk heellia, hátĩ hiita hagaacõ thõõth ꞌcĩ ĩĩn dĩdĩ. 5Hĩnĩngĩtĩ aaĩ Nyekuci hõdẽẽthõng diooni nẽ Yeesu Krĩstõ dioo ꞌcĩ ĩĩn jayyio ꞌcĩ aꞌnyaha eet hĩ Nyekuc. 6Baa ẽlẽmana nẽẽ ẽlẽ cĩnnĩ, hátĩ hõõga eet vẽlẽk haauto lõꞌngõõc. Nyeemuut ciee ꞌcĩ aaꞌnyĩk Nyekuci eet loonyini vẽlẽk, hatĩ ũttũbanoothĩk kõrra tĩho. 7Nẽ baa ẽbẽraanna Nyekuci nganĩĩt hĩĩ eet ꞌcĩ hirriooni nyeemuut ꞌcĩ abũnnaa nẽ hĩĩna ꞌthooyyiahit ꞌcĩ hallimaneehi eet ꞌcĩg hõllõngaa ĩĩn ꞌJudeei, nyeemuut cĩ lemiitto hĩ cĩ thõõth ꞌcĩ ĩĩn dĩdĩ. Hõllõngaa hittoorihi naa thõõth umwa, haduha thõõth ꞌcĩ ĩĩn dĩdĩ.

8Hadiimi naa eet ꞌcĩg maacĩg loonyini vẽlẽk, halayyio hodongit athĩn cĩggĩĩng ꞌcĩg ẽllẽẽmĩth ꞌjieena, hiittiõõ liilii hode pẽkanĩ tõõ.

9Hadiimi naa ngaaĩ hitihimti jurrung ꞌgõõlaa ꞌcĩ abũnnaa nẽ abathĩ ngaatĩ ahimtẽẽnĩ tahatak ꞌgõõlaa ꞌcĩ ẽhẽnytĩ ĩma hode ngaatĩ ahimti dihidok ꞌcĩg ĩĩn ꞌdaab hode pẽalꞌnya#2:9 Pẽalꞌnya: Ĩĩn pẽalꞌnya hẽlẽggĩ ꞌcĩg aattĩg hĩ biyyiẽẽna ꞌcĩg õõrĩg ꞌcĩg ẽllẽẽmĩth gẽrrẽẽt. Adĩmanniaa nẽẽg ẽẽlla cĩ ꞌgii ꞌcĩ aaĩ hĩ lõggõõrĩ. hode ceremwa ꞌcĩg adahĩ ꞌrabbẽẽt ꞌcĩg mẽẽlĩg. 10Nẽ ngaaĩ ꞌcĩg aĩ halayya nẽ hĩmmĩnatta Nyekuc, aꞌnyĩĩk hĩdĩmatteek ꞌgõõnõgĩ thooꞌthiok ꞌcĩg abũnnaa.

11Abũnnaa alliman ngaaĩ thõõth ngaatĩ aattiyyi dẽẽ nẽ ĩthĩktõ muguruur. 12Hõllõngaa hẽlẽmaakĩ naa ngaaĩ hillimanit eet ꞌcĩg maacĩg, hode ngaatĩ aꞌnyahẽẽkĩ ĩhõõggõ makaaꞌthĩt, aꞌnyĩĩk hĩjjaaktõ muguruur. 13Hĩnĩngĩtĩ baa ẽhẽnytaa Aadamĩ ĩĩcĩ oou, ma uruta, eteheꞌnyiaa Ẽẽvva.#2:13 Ẽẽvva: Baa ĩĩn Ẽẽvva ngaa ꞌcĩ oou ꞌcĩ ẽhẽnyta Nyekuci nẽ ĩĩ aattĩ eet vẽlẽk loota nĩnga. Tigiil thõõth cĩnnĩ ꞌBuuhaa cĩ ꞌThianaattõ 1-5. 14Baa hõllõngaa Aadam#2:14 Aadam: Baa ĩĩn Aadamĩ eet ꞌcĩ ẽhẽnyta Nyekuci ĩĩcĩ oou, nẽ ĩĩ maaꞌnyĩ eet vẽlẽk loota nĩnga. Ĩĩn ngaa cĩnnĩ Ẽẽvva aattĩ eet vẽlẽk loota nĩnga. Tigiil thõõth cĩnnĩ ꞌBuuhaa cĩ ꞌThianaattõ 1-5. ꞌcĩ ĩggõõl ꞌThĩttaanĩ ho, baa Ẽẽvva ꞌcĩ ĩggõõl ꞌThĩttaanĩ hẽꞌthẽcanõõ ho. 15Nẽẽthĩ, ẽẽla hatĩ Nyekuci ngaaĩ hittirria lõhõlĩ, hatĩ aꞌthũũnnĩ nẽẽg lemiinit cĩnĩĩng hĩ mĩnnan hĩ ꞌlẽẽmĩth hĩ ngaatĩ aattiyyi jurrung.

Currently Selected:

1 Timotteeo 2: did

Highlight

Compare

Copy