1 Yõaannẽ 4

ꞌGõõl ꞌcĩ hattĩmanĩ loriẽẽta

1ꞌGotoonoga hĩ ngoonoga, ma helemmu eet vẽlẽk ꞌcĩg aĩ haꞌnyaka Lori cĩ Nyekuci. Ĩttĩmanit ĩhõõggõ vẽlẽk, hátĩ ummuddia, hatĩ aꞌnyak nẽẽg lori ꞌcĩ aku hĩ Nyekuc dĩdĩ. Mẽẽlĩg põrõvẽtaaꞌnya ꞌcĩg ĩĩn oloꞌngiaak ꞌcĩg ĩꞌthaattothoothĩk looc nicci ẽlẽk. 2ꞌGõõl ꞌcĩ occa agayyu niig Lori cĩ Nyekuci ho cieeni. Má aduha ẽẽtĩ ꞌcĩ ẽlẽmĩ aĩ, aku Yeesu Krĩstõ loota nĩnga hĩ ẽẽtĩ ꞌcĩ holli õõ, aꞌnyak ẽẽtĩ tĩho Lori ꞌcĩ aku hĩ Nyekuc. 3Nẽẽthĩ, má õthõõth ẽẽtĩ umwaa aĩ, hĩĩnĩ põrõvẽtaac ne iitiõõ hõllõngaa ẽlẽmĩ thõõth ꞌcĩ ĩĩn dĩdĩ cĩ Yeesu ho, aitiõõ ẽẽtĩ tĩho hõllõngaa aku hĩ Nyekuc. Aꞌnyak ẽẽtĩ tĩho lori ꞌcĩ abũrrĩ thõõth cĩ Krĩstõ, lori baa ĩthĩktu niig aĩ, aku hatĩ loota nĩnga nẽ dĩdĩ ikia ẽlẽk.

4Niig lohollia, ĩĩgĩnnu niig cĩg Nyekuci nẽ ĩllõõattu põrõvẽtaaꞌnya ꞌcĩg ĩĩn oloꞌngiaak ko. Hĩnĩngĩtĩ ĩllõõan Lorii ꞌcĩ aaĩ hĩ ngagiit ko, lori ꞌcĩ aaĩ loota nĩnga ho. 5Ĩĩn eeta tĩko eet cĩg looc nicci nẽ õthõõth nẽẽg thooꞌthiok cĩg looc nicci nẽ athĩhĩ eeta cĩg looc nicci ĩhõõggõ. 6Hĩĩgĩn naag eet cĩg Nyekuci nẽ athĩkneet hatĩ eeta vẽlẽk ꞌcĩg aga Nyekuc ngagĩĩta. Nẽẽthĩ, hõllõngaa occa athĩkneet eeta ꞌcĩg hõllõngaa aga Nyekuc ngagĩĩta. ꞌGõõl ꞌcĩ occa hammũdaanĩ Lori ꞌcĩ aduha thõõth ꞌcĩ ĩĩn dĩdĩ hĩ lori ꞌcĩ aduha õlõng cieeni.

Mĩnnan cĩ Nyekuci hĩ cĩnaac

7ꞌGotoonoga hĩ ngoonoga, hĩmmĩnanit eleeti cĩggaac, hĩnĩngĩtĩ aku mĩnnanĩ hĩ Nyekuc. Ẽẽtĩ ꞌcĩ aꞌnyak mĩnnan, ĩĩn nẽẽ loholeec cĩ Nyekuci nẽ aga nẽẽ Nyekuc. 8Ĩĩn Nyekuci mĩnnan nẽ ẽẽtĩ ꞌcĩ hõllõngaa ammĩnan ꞌgõõnõgĩ, nga haga Nyekuc. 9ꞌGõõl ꞌcĩ baa eterꞌtheekeet Nyekuci mĩnnan cĩnnĩ cieeni, kõr baa ĩꞌthõõanĩ Ngeerĩnĩ ꞌcĩ odoyyii, hikia haaꞌnyeet rũgẽt. 10Mĩnnan ꞌcĩ ĩĩn dĩdĩ ꞌcĩ ammĩnnaneet Nyekuci ngagĩĩt, ngaatĩ ĩꞌthõõanĩ Ngeerĩnĩ ꞌcĩ odoyyi hikia hĩĩ ꞌgaarrieenit ꞌcĩ attik ꞌthẽccanẽẽt cĩggaac battaala, hõllõngaa hĩnĩngĩtĩ hammĩnan naag Nyekuc. 11ꞌGotoonoga hĩ ngoonoga, hĩcĩ ammĩnanneet Nyekuci ngagĩĩt ko, adiim hammĩnan naag buúk eleeti cĩggaac. 12Nga hĩcĩn eet umwaa Nyekuc. Nẽẽthĩ, má hammĩnan naag eleeti cĩggaac, aaĩ Nyekuci eleetinii cĩggaac nẽ edeeꞌnyia mĩnnanĩ cĩnnĩ ho hĩ ngagĩĩt, ꞌgõõlaa ꞌcĩ hammĩnanĩ eet ũgĩ.

13Haga naag ngaatĩ haattiyyi hĩ ĩnõõnnõ nẽ aau nẽẽ hĩ ngagĩĩta, hĩnĩngĩtĩ aaꞌnyeet nẽẽ ngagĩĩt Lori cĩnnĩ. 14Baa ĩꞌthõõa Nyekuci Ngeerĩnĩ hikia hĩĩ Ellioohit cĩ eet cĩg looc nicci. Baa hĩcĩtta naag Ngeerĩnĩ nẽ ꞌyioko huduktaaha naag eet thõõth cĩnnĩ. 15Arũmĩ Nyekuci hõdẽĩ hĩ eet vẽlẽk ꞌcĩg aduha lothippita aĩ, ĩĩn Yeesu Ngeertĩ Nyekuci. ꞌGõõl ꞌcĩ harũmẽẽnĩ hõdẽĩ hĩ Nyekuc ko niccia, 16nẽ haga naag nẽ helemit dĩdĩ hĩĩtõ, ammĩnanneet Nyekuci ngagĩĩta.

Ĩĩn Nyekuci mĩnnan. Má haalla hammĩnan naag eleeti cĩggaac, haalla hatĩ harũmĩ naag ꞌthinneetinii cĩggaac hõdẽĩ hĩ Nyekuc nẽ hatĩ aala nẽẽ hũrũmtĩ hĩ ngagĩĩta. 17Má hammĩnan naag eleeti cĩggaac dĩdĩ nẽ haauto hĩ baa aaĩ Yeesu loota nĩnga, hõllõngaa hatĩ hiꞌngolli kõr ꞌcĩ etteedini thooꞌthioha kõr cĩ decciaanĩt cĩ lootu. 18Aitiõõ tẽẽlꞌthĩtĩ mĩnnaana tõõ. Nẽẽthĩ, mĩnnanĩ ꞌcĩ ẽllẽẽmĩth gẽrrẽẽt, iiggia tẽẽlꞌthĩt battaala, hĩnĩngĩtĩ aꞌnyaha tẽẽlꞌthĩtĩ ukẽẽnĩt. Nẽ ẽtẽrꞌtha tẽẽlꞌthĩtĩ aĩ, nga hillimanit naag ꞌgõõl ꞌcĩ hammĩnanõõnĩ dĩdĩ.

19Hammĩnanõõ naag, hĩnĩngĩtĩ baa itiman Nyekuci ngaatĩ ammĩnanneet ngagĩĩt baa ĩĩcĩ oou. 20Má aĩ eet umwaa hammĩnani Nyekuc nẽ hõllõngaa ammĩnan ꞌgõtõnĩ hode ngõõnĩ, ĩĩn ẽẽtĩ tĩho oloꞌngiaahit. Hĩnĩngĩtĩ ẽẽtĩ ꞌcĩ hõllõngaa ammĩnan ꞌgõtõnĩ hode ngõõnĩ ꞌcĩ acĩn nẽẽnĩ, hõllõngaa occa ammĩnan nẽẽ Nyekuc ꞌcĩ nga hĩcĩn nẽẽnĩ. 21Nẽ aaꞌnyeet nẽẽ ngagĩĩt tilooinit icci. Eeta ꞌcĩg ammĩnan Nyekuc, aꞌnyĩĩk hĩmmĩnanit ꞌgõtõõnõgĩ hĩ ngõõnõgĩ.

Currently Selected:

1 Yõaannẽ 4: did

Highlight

Copy

Compare