1 Yõaannẽ 5

Lemiinit loholeecaa cĩ Nyekuci

1Ẽẽtĩ ꞌcĩ ẽlẽmĩ ngaatĩ ĩĩnnĩ Yeesu, Krĩstõ, ĩĩn nẽẽ loholeec cĩ Nyekuci nẽ ẽẽtĩ ꞌcĩ ammĩnan Maaꞌnyĩ, ammĩnan nẽẽ ngeerĩnĩ buúk. 2Má hammĩnan naag Nyekuc nẽ hĩthĩhĩt ĩnõõnnõ, ꞌgõõl ꞌcĩ occa hagaĩ naag haĩnnĩ, hammĩnan naag lõhõlĩ cĩgĩnnĩg buúk niccia. 3Heterꞌtheek naag Nyekuc mĩnnan cĩnaac ꞌgõõlaa ꞌcĩ hathĩknĩ tilooinit cĩnnĩ nẽ hõllõngaa õkõmĩ tilooiniti cĩnnĩ ho. 4Aga lohollia cĩg Nyekuci vẽlẽk, ngaatĩ occa ĩllõõanĩ looc nicci ꞌthẽccaanõ ho nẽ hammũda naag ꞌlõõani icci lemiittaa cĩnaac. 5Hõllõngaa occa ĩllõõan eet umwaa looc cĩ ꞌthẽccaanõ ho, hatĩ hõllõngaa ẽlẽmĩ aĩ, ĩĩn Yeesu Ngeertĩ Nyekuci.

Yeesu nganĩ?

6Baa ẽrrẽnna maama hĩ biyyi habanytaa cĩ Yeesu Krĩstõ. Hõllõngaa maam diooni baa biyyi tõõ. Lori ꞌcĩ Ẽllẽẽmĩth ꞌcĩ aduha thõõth icci ho, hĩnĩngĩtĩ aduha nẽẽ thõõth ꞌcĩ ĩĩn dĩdĩ. 7Ĩĩn hẽlẽggĩ iyyio ꞌcĩg aduha thõõth icci ho. 8Lori ꞌcĩ Ẽllẽẽmĩthĩ hĩ maam hĩ biyyi nẽ ẽlẽmmõõ nẽẽg vẽlẽk. 9Hẽlẽmĩ naag thõõth ꞌcĩ aduhaakeet eeta. Nẽ occa haarĩk ꞌthinneeti thõõth ꞌcĩ aduhaakeet Nyekuci hĩllõõan nẽ Nyekuc ꞌcĩ õthõõth thõõth cĩ Ngeerĩnĩ ho. 10Má hẽlẽmĩ naag Ngeertĩ Nyekuci, helemit naag thõõth ꞌcĩ aduha Nyekuci, hĩnĩngĩtĩ Ngeerĩnĩ. Nẽ má hõllõngaa hẽlẽmĩ naag thõõth ꞌcĩ aduha Nyekuci, hĩnĩngĩtĩ Ngeerĩnĩ, aduhõõ ngaatĩ occa hakannẽẽkĩ Nyekuc õlõng thõng. 11Baa uduha Nyekuci buúk aĩ aaꞌnyeet nẽẽ ngagĩĩt rũgẽt ꞌcĩ aalla ooo nẽ Ngeerĩnĩ ꞌcĩ aꞌnyahaakeet rũgẽt icci ho. 12Nẽẽthĩ, ẽẽtĩ ꞌcĩ aꞌnyak Ngeertĩ Nyekuci, aꞌnyak nẽẽ rũgẽt. Nẽ ẽẽtĩ ꞌcĩ hõllõngaa aꞌnyak Ngeertĩ Nyekuci, hõllõngaa aꞌnyak rũgẽt.

Thõõth ꞌcĩ hagaĩ rũgẽt ꞌcĩ aalla ooo

13Hẽhẽẽdakuung naa ngagiit thooꞌthiok iccig eet ꞌcĩg elemmu ꞌthaar cĩg Ngeertĩ Nyekuci, hátĩ agaac ngaatĩ aꞌnyaktu niig rũgẽt ꞌcĩ aalla ooo. 14Haga naag jurrung haĩ, ẽlẽmĩ hatĩ Nyekuci laiinit cĩnaac, hatĩ hajin naag ĩnõõnnõ thõõth ꞌcĩ accamana nẽẽnĩ. 15Nẽ má hẽlẽmĩ naag haĩ, athĩkneet Nyekuci hatĩ hala ĩnõõnnõ, haga naag jurrung haĩ attacan nẽẽ laiinit cĩnaac ẽlẽk.

16Má acĩn lemmioohiti umwaa ꞌgõtõnĩ hode ngõõnĩ adĩman ꞌthẽccan ꞌcĩ occa hõllõngaa aꞌnyaha daahĩth, alayyiõõĩ ĩnõõnnõ, hátĩ haaꞌnyĩk Nyekuci eet tĩho rũgẽt ꞌcĩ aalla ooo. Nẽẽthĩ, aaĩ ꞌthẽccanĩ ꞌcĩ aꞌnyaha daahĩth nẽ hõllõngaa haini naa alayyiõõĩ eet ꞌcĩg adĩman ꞌthẽccan tĩho ho. 17Ĩĩn ꞌgii vẽlẽk ꞌcĩ abathĩ ꞌthẽccan nẽ hõllõngaa aꞌnyaha ꞌthẽccanẽẽta vẽlẽk daahĩth.

18Haga naag jurrung haĩ, hõllõngaa aalla lohollia cĩg Nyekuci ẽꞌthẽcan thooꞌthiok. Hĩnĩngĩtĩ eteiini Ngeertĩ Nyekuci ĩhõõggõ nẽ hõllõngaa occa adĩman ꞌThĩttaanĩ ĩhõõggõ ꞌbuth. 19Haga naag jurrung haĩ, hau naag hĩ Nyekuc nẽ aggam ꞌThĩttaanĩ eet vẽlẽk ꞌcĩg abathĩ ꞌcĩg looc nicci. 20Hagaacõ naag buúk haĩ, ikia Yeesu Krĩstõ Ngeertĩ Nyekuci nẽ eteretheeheet ngagĩĩt Nyekuc ꞌcĩ ĩĩn dĩdĩ. Nẽ haattĩg naag hĩ ĩnõõnnõ ꞌcĩ ĩĩn dĩdĩ nẽ tarĩ, hũrũmtĩ hĩ Loholeec cĩnnĩ Yeesu Krĩstõ ꞌcĩ ĩĩn Nyekuc dĩdĩ nẽ aaꞌnyeet ngagĩĩt rũgẽt ꞌcĩ aalla ooo.

21Niiga lõhõlẽẽtĩg, ũtũbũrĩt hẽlẽggĩ ꞌcĩg aar eeta hĩĩtõ nyekuꞌnya.

Currently Selected:

1 Yõaannẽ 5: did

Highlight

Copy

Compare