Саалтыр 54
54
1Хуор салайааччытыгар. Устурууналаах инструмент доҕуһуолунан. Давид үөрэтиитэ.
2Айыы Таҥара, иһит мин үҥэрбин;
Эйигиттэн көрдөстөхпүнэ, киэр хайыһыма.
3Болҕойон иһит миигин уонна миэхэ хардар;
мин, эрииргэ-буруурга түбэһэн, энэлийэн эрэбин;
сүрэҕим мөҕүстэ 4өстөөх үөгүтүттэн,
өһөгөйдөөх киһи күөмчүтүттэн;
иэдээни кинилэр миэхэ тэрийэллэр,
кырыктаах санааларыттан өһүрэллэр.
5Түөһүм иһэ тиҥиргэс буолла,
өлөр куттала миигин хам ылла;
6куйахам күүрдэ, этим саласта,
кутталбыттан уҥуоҕум барыта босхо барда.
7«Холууп курдук кынаттааҕым буоллар! – диэтим мин. –
Хол дойдуга көтөн бараммын, уоскуйуом этэ;
8быдан дуолга быйаһыйан бараммын,
бүччүм сирдэргэ хонуктуом этэ; Села
9хабараан тыалтан, добун буурҕаттан
хахха булуна охсон хорҕойуом этэ».
10Аймаа кинилэри, Айыы Тойон, тыл-тылларын өйдөспөт гына;
мин бу куоракка күөмчүнү уонна иирээни көрөбүн:
11олор түүннэри-күннэри кини эркинин устун хаамаллар;
онон бу дойдуну буруй буулаабыт, кыһалҕа кыпчыйбыт.
12Куоракка алдьархай ааҥнаабыт:
атаҕастабыл уонна албыннааһын
кини уулуссаларыттан арахпакка барбыт.
13Өстөөх миигин үөҕэр буолбатах,
ону мин тулуйуом этэ;
өһөгөйдөөҕүм бэрдимсийэр буолбатах,
киниттэн син хорҕойуом этэ;
14бэйэм тэҥнээҕим – эн миигин үөҕэҕин,
доҕорум, чугас киһим,
15эн-мин дэһэн истиҥник сэһэргэспит,
Таҥара Дьиэтигэр көй дьоннуун аалласпыт аргыһым.
16Дьиэлэрин да, сүрэхтэрин да хара дьай булбутун иһин,
итинниктэри өлөр өлүү буулаатын;
үтүгэн түгэҕэр кинилэр тыыннаахтыы түстүннэр.
17Оттон мин Таҥараны ыҥырабын,
Айыы Тойон миигин быыһыаҕа.
18Киэһэлээх сарсыарда, күн ортото
мин Киниэхэ энэлийэ үҥэбин,
Кини мин саҥабын истиэҕэ.
19Төһө да үгүстэр миигин утары туруммуттарын иһин,
Кини миигин сэрииттэн бүтүн таһаарыаҕа.
20Айыы Таҥара истиэҕэ,
үйэлэр иннилэриттэн бүрүстүөлгэ Олорооччу, Села
уларыйбаттарын, Таҥараттан куттамматтарын иһин,
уодьуганнарын тутуоҕа.
21Аргыһым иллээх дьонугар илиитин көтөхтө,
түһэрсибит сөбүлэһиитин көтүрдэ.
22Арыынан ньылҕарытар намыын саҥалааҕа да,
дьиҥэр, сүрэҕэ өһүөн эбит;
тыла-өһө елейдээҕэр сымнаҕаһа да,
дьиҥэр, сыгынньах кылыс эбит.
23Кыһалҕаҕын Айыы Тойоҥҥо сүктэр –
Кини эйигин өйүөҕэ.
Кырдьыксыты Кини хаһан да тулхадыттарыа суоҕа.
24Айыы Таҥара, Эн хара дьайдаахтары
дириҥ ииҥҥэ түһэртиэҥ;
хаанымсахтар, уодаһыннаахтар
үйэлэрин аҥаарыгар да тиийиэхтэрэ суоҕа.
Оттон мин Эйиэхэ эрэнэбин.
Currently Selected:
Саалтыр 54: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
