Аман өһө 25
25
Соломуон атын бэргэн этиилэрэ
1Аны бу Соломуон атын бэргэн этиилэрэ бааллар,
маны барытын Иудея ыраахтааҕытын Езекия дьоно хомуйан түмпүттэр.
2Таҥара килбиэннээх быһыыта – кистэлэҥинэн дьайыы,
ыраахтааҕы килбиэннээх быһыыта – кистэлэҥи чинчийии.
3Ыраахтааҕы санаатын ким да ситэн өйдүүр кыаҕа суох;
кини өйө-санаата муҥурун булларбат:
халлаан куйаарыныы үрдүк, сир түгэҕинии дириҥ.
4Үрүҥ көмүстэн уутун араар,
оччоҕо уус киһи онтон бэртээхэй иһити кутан таһаарыа.
5Сидьиҥ киһини ыраахтааҕыттан киэр утаар,
оччоҕо ыраахтааҕы бүрүстүөлэ кырдьыктааҕынан аатырыа.
6Ыраахтааҕы иннигэр туран улуутумсуйума,
үрдүк сололоохтору кытта сэргэстэһэ олорума.
7Ким эрэ биллиилээх тиийэн кэллэҕинэ,
«Киниэхэ туран биэр» дэтэрдээҕэр,
«Кэлэн манна үөһэ олор» диэн ыҥыртарарыҥ эйиэхэ ордук буолуо суоҕа дуо?
Эт хараххынан көрбүт да буоллаххына,
8үҥсэ охсорго тиэтэйимэ;
аны атын туоһу көстөн хаалан алҕаскын арыйдаҕына,
эн хайдах буолуоҥуй?
9Утарсааччыгын кытта бэйэҥ дьыалаҕын-куолугун быһаарыс,
атын киһи кистэлэҥин аһан биэримэ.
10Аны ордук-хоһу тылласпыккын истэн эйигин хомуруйдахтарына,
ол саатыттан ханна куотуоҥуй?
11Кэмигэр этиллибит сиэрдээх тыл
үрүҥ көмүс иигэ кэтэрдиллибит кыһыл көмүс оҥоһук кэриэтэ.
12Болҕомтолоох киһи истэригэр муударай сэмэ
кыһыл көмүс биһилэххэ, биитэр ыраас үрүҥ көмүстэн кутуллубут симэххэ холоонноох.
13Эрэбил киһитин сорукка ыыппыт тойон,
хомуур үлэтин үгэнигэр сөрүүн ууну испиттии, бөҕөхсүйэр;
үлэһитэ кини өйүн-санаатын ол курдук көнньүөрдэр.
14Кураанаҕы эрэннэрэр куба-лахсыыр тыллаах киһи
тыалыран-тыалыран баран түспэккэ ааһан хаалар хара былыт кэриэтэ.
15Улуу тулуур тойону булгурутар,
сымнаҕас тыл уҥуоҕу тоһутар.
16Мүөтү буллаххына, ону дуоһуйа сиэ,
ол эрээри сэрэн, аны сүрэххэр түһүө.
17Доҕоруҥ дьиэтигэр сыбыытаама:
хал гыннаххына, эйигин абааһы көрүө.
18Ыалыҥ киһини утары сымыйа көрдөрүүнү биэрбит буоллаххына,
ол аата кинини үҥүүнэн өтөрү түспүккүн, болотунан аспыккын, сытыы оноҕоһунан ыппыккын.
19Алдьаммыт тиис үчүгэйдик ыстыа, доҕолоҥ атах түргэнник хаамыа дуо?
Кыһалҕалаах күҥҥэр саарбах киһиэхэ эрэнимэ.
20Ыар кутурҕаннаахха үөрүүлээх ырыаны ыллааһын
тымныы күн киниттэн таҥаһын устан ылбыкка,
биитэр бааһыгар#25:20 Бааһыгар – Бу тыл былыргы гректии тылбаастан ылылынна. Былыргы еврейдии тиэкискэ суодаҕа. уксууһу куппукка тэҥнээх.
21Өстөөҕүҥ аччык буоллаҕына аһат,
утаппыт буоллаҕына утаҕын ханнар;
22инньэ гынан, кыбыһыннаран, эн кини баһыгар итии чоҕу тарыйыаҥ.
Киниэхэ оҥорбут үтүөҕүн эйиэхэ Айыы Тойон төлүөҕэ.
23Хотугу тыал ардаҕы аҕалар,
хобуоччу киһи дьону кыыһырдар.
24Киҥнээх дьахтардыын биир дьиэҕэ олоруох кэриэтэ
хоспох муннугар соҕотоҕун олорбут ордук.
25Ыраах дойдуттан үтүө сураҕы тутуу
утата сылдьан сөрүүн ууну уймахтаабыкка холоонноох.
26Куһаҕан сабыдыалга киирэн биэрбит үтүө киһи
илдьи тэпсиллибит дьүүктэҕэ, биитэр сытыйбыт-ымыйбыт холуодьаска холоонноох.
27Аһара элбэх мүөтү сиир,
биитэр өрүү хайҕалы кэтэһэр куһаҕан#25:27 Былыргы еврей тылынан суруллубут тиэкис бу кэрчигин ис хоһооно чуолкайа суох..
28Кыыһырбытын кыатаммат киҥнээх киһи
эркинэ сиҥнэн түспүт куорат кэриэтэ.
Currently Selected:
Аман өһө 25: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
