Аман өһө 26
26
1Сай ортото хаар түһэрэ, хомуур үгэнигэр ардах кэлэрэ куһаҕанын курдук,
акаарыны арбааһын эмиэ сиэрэ суох быһыы.
2Барабыай көтөн баран хааларыныы, хараҥаччы харах далыттан сүтэринии,
олоҕо суох кырыыс туолбат.
3Ат кымньыыланар, өсүөл үүннэниллэр,
оттон акаары таһыллар.
4Акаары киһи ааргы ыйытыытыгар эппиэттиэҥ –
бэйэҥ киниэхэ тэҥнэһиэҥ.
5Эн киниэхэ, халы мааргытык ыйыппытын өйдүүрүн курдук, хардар,
инньэ гымматаххына, өйдөөхпүн дэниэҕэ.
6Акаарыны сорукка ыыппыт киһи атаҕын быстыбытын тэҥэ –
сору булунан ылбыт.
7Доҕолоҥ ыраах кыайан хаампатын курдук,
акаары эмиэ ох тылы кыайан таба туттубат.
8Акаарыны арбыыр киһи, айатын иитэн баран,
элбэрээгин хам баайан кэбиспит булчукка холоонноох.
9Ох тылы туттарга холонор хоҥ мэйии
илиитигэр киирбит хатыыны таһаара сатыыр итириккэ холоонноох.
10Хас ааргыны, ааһан иһээччини барытын үлэҕэ ылааччы,
дьону, ким да буоллун, ох саанан ытыалааччыга холоонноох#26:10 Былыргы еврей тылынан суруллубут тиэкис бу кэрчигин ис хоһооно чуолкайа суох..
11Ыт кулгуйбут сиригэр төннөн кэлэрин курдук,
акаары оҥорбут алҕаһын хатылыы турар.
12Муударайбын дэнэр киһини көрбүтүҥ дуо?
Киниэхэ эрэниэхтээҕэр акаарыга эрэммит ордук.
13Сүрэҕэ суох үлэлии барымаары этэр:
«Суолга хахай турар! Уулуссаҕа хахай сылдьар!»
14Аан иэччэҕэр эргийэринии,
күөх көппө эмиэ оронугар сытан уҥа-хаҥас эргийэр.
15Сүрэҕэ суох, илиитин астаах иһиккэ уган баран,
айаҕар тиэрдэрин ыарырҕатар.
16Сүрэҕэ суох акаарыбын дэниэ суоҕа –
үтүө тыллаах-өстөөх сэттэ муударайдааҕар да өйдөөхпүн дэниэҕэ.
17Атын дьон иирээнигэр кыттыһыы
ааһан иһэр ыты кулгааҕыттан харбаабыкка тэҥнээх.
18Иирбитэ буолан кубулунар киһи
дьону уоттаах оноҕоһунан ытыалаан өлөртүү сыһарын курдук,
19сорох-сорохтор доҕотторун албыннаан баран,
оонньоон эппитим диэн куотуналлар.
20Хардаҕаһа бүппүт оһох умуллан хааларыныы,
хобуоччу суох буоллаҕына, иирээн эмиэ намырыыр.
21Чох – ититэргэ, мас – уматарга,
оттон хобуоччу – иирээни тардарга.
22Хобуоччу тыла-өһө минньигэһэ сүрдээх –
искэр-үөскэр дириҥник өтөн киирэр.
23Абааһы көрөрүн кистэнэн амаҕаччылаан кэпсэтээччи
көмүс дуйдаах туой боччук кэриэтэ.
24Уодаһыннаах утарынан бэрт буолуо гынан баран,
оҕуруктуурун толкуйдуу олоруоҕа.
25Төһө да тылын-өһүн минньиттин, кинини итэҕэйимэ –
иһигэр сэттэ сидьиҥ санаалаах буолуоҕа.
26Сирэйгэр бэрт эрээри, иһигэр эйигин абааһы көрөр киһи
өһүөннээх санаатын улахан мунньахха биллэриэҕэ.
27Киһи суолугар иин хаһааччы бэйэтэ ииҥҥэ түһүөҕэ,
дьоҥҥо тааһы үҥкүрүтээччи бэйэтэ тааска баттатыаҕа.
28Түөкэй киһи үктэтэр дьонун абааһы көрөр,
ньылаҥ эмиэ охторгун оҥорор.
Currently Selected:
Аман өһө 26: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
