Аман өһө 24
24
– 19 –
1Куһаҕан дьону ордугурҕаама,
кинилэрдиин бодоруһа сатаама:
2кэрээнэ суохтар күөмчүлүүр эрэ өйдөөхтөр,
киһини үктэтэр эрэ мөккүөрдээхтэр.
– 20 –
3Ыал дьиэтэ-уота муудараһынан тутуллар,
мындыр өйүнэн тэриллэр.
4Алаһа дьиэ ис бараанын оҥостуу,
ону үтүөкэн бэйэлээх күндү малынан толоруу сатабылы эрэйэр.
– 21 –
5Ким муударай, ол күүстээх,
ким билиилээх, ол кыахтаах#24:5 Ким муударай, ол күүстээх, ким билиилээх, ол кыахтаах – Былыргы гректии тылбааска Муударай киһи буойуннааҕар күүстээх, билиилээх киһи бухатыырдааҕар кыахтаах..
6Үчүгэйдик ыараҥнатан көрөн баран сэриилэс;
сүбэлэһэр киһи ситиһиилэнэр.
– 22 –
7Акаарыга муударас аһара үрдүк,
онон элбэх дьон ортотугар кини тугу да булан этиэ суоҕа.
– 23 –
8Куһаҕаны оҥорорго сананааччыны
уодаһыннаах диэн ааттыахтара.
9Өйө суохтар аньыылаах суолга туруналлар.
Дьону сиилээччини ким барыта абааһы көрөр.
– 24 –
10Өскөтүн эн кыһалҕалаах күҥҥэр мөлтөөн-ахсаан биэрэр буоллаххына,
ол аата дьиҥ чахчы мөлтөх киһи эбиккин.
– 25 –
11Буруйа суохтарын үрдүнэн, өлөрө илдьэн иһэр дьоннорун өрүһүйэн ыл,
өлөргө ууруллубуттартан киэр хайыһыма.
12Ама: «Суох, ону билбэккэ хаалбыппыт», – диэн куотунуоҥ дуо?
Оттон киһи сүрэҕин-быарын Тургутааччы билбэт үһү дуо?
Кутуҥ-сүрүҥ Харабыла барытын көрөр-билэр –
Кини хас биирдии киһиэхэ тугу оҥорбутунан төлүөҕэ.
– 26 –
13Тоойуом, мүөтү сиир буол, мүөт олус үчүгэй,
амтана да минньигэһэ сүрдээх.
14Муударас эмиэ дууһаҕар ол курдук минньигэс.
Муудараһы буллаххына, кэскилиҥ киэҥ буолуоҕа,
инникигэ эрэлиҥ энчириэ суоҕа.
– 27 –
15Аны хара дьайдаахтары батыһан
көнө дьону халыырга,
кинилэр дьиэлэрин-уоттарын үрэйэргэ сананаайыккыный!
16Кырдьыксыт, сэттэтэ да охтубутун иһин, туруоҕа,
оттон нэгэйдэри иэдээн имири сотуоҕа.
– 28 –
17Өстөөҕүҥ оҕуттаҕына, үөрүмэ,
сүһүөҕүн сүтэрдэҕинэ, өрөгөйдөөмө.
18 Айыы Тойон эн сэтэрииргин сөбүлүү көрүө суоҕа,
онон өстөөххүн уодьуганныыр санаата уларыйыан сөп.
– 29 –
19Хара дьайдаахтарга абарыма,
бардам быһыылаахтарга баҕарыма:
20нэгэй киһи кэскилэ суох –
куһаҕан дьон уота-күөһэ умуллуоҕа.
– 30 –
21Уолум, Айыы Тойонтон уонна ыраахтааҕыттан куттан;
өрө турааччылардыын куодарыһыма –
22кинилэр соһуччу иэдээҥҥэ түбэһиэхтэрэ;
Таҥара уонна ыраахтааҕы эйиэхэ тугу оҥоруохтарын эн хантан билэҕин?
23Муударай өйдөөхтөр өссө маннык этиилэрэ бааллар:
Суукка киһини сирэйиттэн көрөн дьүүллээһин – сиэрэ суох быһыы.
24Буруйдааҕы көрөн туран, «сөпкө гыммыккын» диир судьуйаны
норуоттар кырыахтара, ким барыта абааһы көрүөҕэ.
25Оттон буруйу оҥорооччулары уодьуганныыр судьуйа дьоллоох –
кини бар дьон алгыһын ылыаҕа.
26Киһи киһиэхэ истиҥ эппиэтэ –
кини дьиҥ доҕордуу сыһыанын бэлиэтэ.
27Бастаан тиэргэҥҥин көрүн,
сиргин-уоккун оҥоһун,
дьэ ол эрэ кэннэ олорор дьиэҕин тутун.
28Киһини утары сымыйанан көрдөрүмэ,
кинини хараардан албыны-көлдьүнү саҥарыма.
29«Миэхэ хайдах сыһыаннаспытай да,
мин эмиэ киниэхэ оннук сыһыаннаһыам,
тугу оҥорбутунан көрөн төлүөм!» – диэмэ.
30Биирдэ мин биир сүрэҕэ суох киһи бааһынатынан,
уһуну-киэҥи санаабат күөх көппө бинэгирээтин сиринэн ааһан иһэн көрбүтүм,
31арай сирин барытын эрбэһин саба үүнэн кэбиспит,
бүтэйэ бүтүннүү сиҥнэн түспүт.
32Ону көрөн, мин элбэҕи эргитэ санаабытым,
ол көрбүтүм миэхэ үчүгэй үөрэх буолбута.
33Кырдьык даҕаны, быыкаатык кум гыныаҥ, нуурайан-нухарыйан ылыаҥ,
начааскыга быар куустан сыта түһүөҥ да,
34быстарар муҥуҥ-таҥыҥ, хаамаайы курдук, бу тиийэн кэлиэҕэ,
хаһаамматах кыһалҕаҥ, халабырдьыт курдук, кыһарыйбытынан барыаҕа.
Currently Selected:
Аман өһө 24: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
