NASEPTE 23

1Tuachi`n Paul in vaihawmtute tangtak in a en a, “Ka chipih Israelmite aw! Tuni chiangdong in Pasian mitmuh a hoih a katheih taphot bawl in ka omjing hi,” achi hi. 2Tualeh siampi Anania in, Paul geia dingte kiangah akam beksak dingin thu apia a. 3Tuachi`n Paul in akiang ah, Nang bang kinuhkangpa, “Pasian in nang ahung bengjaw ding hi, nang dan bang a ka thu ngaihtuah dingin natou a, danlou bang a kei bek ding nungchih maw!” achi a. #Mat. 23.27,28.

4Tualeh akiang a dingte`n, “Nang Pasian siampi na housia vial a!” achi ua.

5Tuachi`n Paul in, “Ka chipih Israelmite aw, siampi ahih ka theikei a ahi. ‘Na chihpihte lamkai tung ah thuhoihlou genken,’ ” chih gelh ahi, achi hi. #Exo. 22.28.

6Hinanleh Paul in khenkhat Sadukaite ahi ua, adangte Pharisaite ahih uh atheih takin, vaihawmtute lak ah a kikou a, “Unaute! Kei pen Pharisai tapa Pharisai ka hi. Kinepna leh misi thohkikna ah vaihawmsak a om ka hi!”

7Tualeh aman hichi a agen zohzoh in Pharisaite leh Sadukaite kal ah kiselna ahung om a, tualeh mipi aki langkhenta uhi. 8Ajiak Sadukaite`n misi thohkikna a om kei, vantungmi zong a om mawng mawng kei, achi ua, hinanleh Pharisaite`n huategel a om hi chi`n agum uhi. #Mat. 22.23; Mrk. 12.18; Luk. 20.27. 9Tuachi`n hahbuai in ahung buaita ua, “Hihmipa ah gitlouhna bangmah ka mukei uh! Kha in hiam, vantungmi in hiam akiang a thu gen ahihleh idou kei ding uh!” achi ua.

10Tualeh ahung kiselsang deuhdeuh tak un, galkap lianpenpan Paul abohtel uh alau a, galkapte vapaisuk a, alak ua pan a Paul vapum mat a, kulhsung a hung paipih dingin thu apia hi.

11Tualeh tuajan in Toupa Paul kiangah ahung ding a, “Paul, lauken! Khamuang takin om in, Jerusalem a ka thu na theihsak bangin Rom khua ah zong na theihsak ding ahi,” achi hi.

Paul thah asawm uh

12Tualeh khua ahung vak takin, Judate lawikhat a kithukim ua. Paul athah masiah ua bangmah nelou dawnlou dingin aki chiamta uhi. 13Tualeh mi thahsawm a kithukimte mi sawmli sang a tamjaw ahi ua. 14Tuachi`n amauh siampite leh upate kiangah apai ua, “Paul ka thah masiah ua bangmah nelou dingin nasatakin ka kichiam uhi. 15Tuajiakin nou vaihawmte tawh athu kichian jawsem a ngaihtuah ding kipang in na kiang uah puikhia dingin galkap lamkai lianpen kiangah va ngen un. Tualeh aman na kiang uh ahung phak masanga na that ding a mansa ka hi uhi,” achi ua.

16Hinanleh Paul sanggamnu tapa in, aguk a ata`ng thu uh anaja a, kulh ah avalut a, Paul ahilhta hi. 17Tuachi`n Paul in, galkap jalamkai khat akiang ah asam a, “Hih tangvalnou galkap lianpenpa kiangah paipih in, akiang ah gen ut anei hi,” achi hi. 18Tuatakin aman galkap lianpenpa kiang ah apaipih a, “Paul thong ngakpa`n akiang ah ahung sam a, hih tangvalnou in na kiangah banghiam gen ut aneih jiakin na kiang a hungpaipih dingin ahung sawl hi,” achi hi.

19Tuachi`n galkap lianpenpa`n akhut in atu a, atuam in apaikhiat pih a, “Ka kiang a nagen ut bang ahiam?” chi`n agu`k in adong hi.

20Tualeh aman, “Paul thu kichian sem a ngaihtuah sawm bangin, jingchiang a vaihawmtute kiang a puisuk dingin Judate`n hungnget lem asata uhi. 21Hinanleh athu uh na gingta ken, ajiak alak ua mi sawmli sang a tamjaw in agu`k in ata`ng uhi. Huamite`n amah athah masiah ua bangmah nelou ding leh dawnlou dingin a kichiam uhi,” achi hi.

22Tuatakin galkap lianpenpa`n tangvalnou apaisak a, “Hihthu nung theisakta chih kuamah hilhken,” chi`n thu apia hi.

Paul gam ukpa Felik kiang ah

23Tualeh aman galkap jalamkai nih asam a, “Jan dakkua chiang a Kaisaria khua a paiding in galkap zanih tawh, sakawl tungtuangmi sawmsagih tawh, tei tawimi zanih tawh kimansa in koih un, achi a. 24Tualeh gam ukpa Felik kiang a bittak a tuttheihna dingin Paul tuanna ding sakol zong guatsak un,” achi hi. 25Tuachi`n galkap lianpenpa in hichibang in laikhak agelh hi: 26“Klaudia Lisia in, gam uktu hoihpen Felik: Chibai abuk hi. 27Hihpa Judate`n amat ua athah ding kuan un, kei galkapte tawh kava pai a, amah pen Rommi ahih ka thei a, ka hunkhiata hi. 28Tualeh ahekna pen uh theih ka ut a, vaihawmtute kiang ah kapaipih a. 29Amah pen adanthu uh bang ahiam a kihek ahi chih ka thei a, hinanleh ahekna uh thu ah sihna ding leh kol bulhna ding hial bangmah a om kei hi. 30Tualeh Judate`n amah atang uh chih mi`n a hunghilh takin na kiang ah amah kintakin kung sawlta hi. Tualeh ahektute`n atung a thubuai aneih jousiah uh namai a gen ding in thu kapia hi,” Mangpha, chi in.

31Tuachi`n galkapte`n athupiak bangin Paul pen jan in apaipih ua, antipatri atunpih ua. 32Ajingni in sakol tung tuangmite amah tawh akitonsak ua, amauh kulh ah ahung kilehkikta uhi. 33Amauh Kaisaria atung ua, gam ukpa kiangah laikhakpen apia ua, Paul zong amai uah a dingsak uhi. 34Tualeh gam ukpa`n laikhak asim zoh in Paul omna gam adong a, tualeh Silisia gam ahi chih a theihtak in, 35“Nang hung hekte a hungtun chiang un, na thu ka ngaikhia ding,” achi a. Tualeh Herod vaihawmna innsung a koihding in thu apia hi.

Currently Selected:

NASEPTE 23: THKHBSI

Highlight

Copy