2 KORINTE 5

1Ajiak hih puanbuk, ilei inn uh suksiat in om nanleh khut a lam hilou, Pasian lamsa tangtawn inn det van ah inei uh chih ithei uhi. 2Ajiak pen van a kipan a i inn ding uh silhsak a om ut mahmah in hihsan ah ithum jing uhi. 3Tuachibang a silhsak a i om leh saguak in i om nawn kei ding uhi. 4Ajiak ei puanbuk a omte pen puakgik pua in ithum jing uh, silhlou a i omna ding uh hilou in, sithei pen hinna valhzoh a a omtheihna ding a silhsak a i om ut jiak uh ahijaw hi. 5Tuin hihbang ding a hung siamtu Pasian ahi a, khamna kha hung piatu zong ahi hi.

6Tuajiakin pumpi inn a i om laisiah uh, Toupa kiang a omlou ihi uh chih thei in, bangchiklai peuh in muangtak in i om uhi. 7Ajiak muthei a pai hilou in, ginna in ipaijaw uhi. 8Muangtak in i om uh, ahi, pumpi a omlou a Toupa kiang a om i utjaw uhi. 9Tuajiakin, om in om takeilei zong amah kipahpih lam i hihtheihna ding uh itum uhi. 10Ajiak michih in pumpi a asilbawlte asia apha, abawl bangbang a amuhtheihna dingin Krist vaihawmna touna mai ah i un un hihlat in i om ding uhi. #Rom. 14.10.

Krist jiak a Pasian tawh kipawlna

11Tuajiakin Toupa lauhuaidan thei in mite kajawl teitei uhi, hinanleh Pasian kiangah hihlat in ka om ua, tualeh na sia leh pha theihna ua hihlat a ka om uh zong ka kinem uhi. 12Ajiak na kiang uah hung kigen phat utkik ka hikei a, lungsung lam a hilou a apualam a kisuangte na dawnna ding uh banghiam na neihtheihna ding un, koulam a kisuanna hung bawlsak in ka gen jaw hi. 13Ajiak kamot uleh Pasian a dingin ahi a, kapil uleh nou a dingin ahi hi. 14Krist itna in ahung sawl teitei hi, ajiak hichi`n ka ngaihtuah uhi, mi jousiah sihtang a mikhat asih leh mi jousiah si ahita hi. 15Tualeh ahingte zong amauh a ding a hing hinawnlou in, hinanleh asih tanga si a, tualeh thoukikpa ding a, ahihzokna ding, amah pen mi jousiah a dingin asi hi.

16Tuajiakin, tu a pat in taksa lam a, kuamah kathei nawn kei uhi, ahi, taksa dan in Krist nathei mahle ung, tuin kathei nawn kei uhi. 17Tuajiakin, mi kuapeuh Krist a aom leh, silsiamthak ahita hi, silluite abeita a, ngaiun, sil jousiah ahung thaksiangta hi. 18Tualeh sil jousiah Pasian a kipan ahi a, aman Jesu Krist in amah tawh kilem in a hungbawl a, tualeh ka kiang uah kilepna nasep a hungpia hi. 19Tuachi`n Pasian pen Krist a om in, leitung amah tawh kilem in abawl a, akhialhnate uh khialhna a simsaklou in, ka kiang uah kilepna thu ahung kemsakta hi.

20Tuajiakin, koupen, Krist palaite ka hi ua, Pasian in kou zang a nou a hungnget bang in, Pasian tawh kilem un, chi`n Krist tang in kung ngen uhi! 21Ajiak amah ah Pasian diktatna ihung hihtheihna dingin, khialhna mawng mawng theilou amah pen Pasian in eite jiakin khial in abawlta hi.

Currently Selected:

2 KORINTE 5: THKHBSI

Highlight

Copy