2 KORINTE 4

Leibelte sung a khalam gou

1Tuajiakin, hehpihna ka muh bang ua hih nasepna katan jiak un, ka lungkia kei uhi. 2Hinanleh sil jumhuai kiphualte ka tawpsan ta ua, zulhjauna a hilou in, ahihkeileh, Pasian thu mikhemna a zanglou in. Hinanleh thutak hihlatna a zangjaw in, Pasian mitmuh ah michih sia leh pha theihna ka hihtungjaw uhi. 3Hinanleh ka tangthupha uh phual a aom leh mangthangte kiangah ahi phual a a om. 4Pasian mel bakpih Krist tangthupha thupina vak in amauh asalhvak theihlouhna dingin, huate ah hih leitung pasian in agingta loute lungsim ahihmial sakta hi. 5Ajiak kou leh kou ka kigen thang kei ua, hinanleh Krist Jesu hih Toupa ahi chih leh, koupen na sila uh ka hi uh chih ka gen jaw uhi. 6Ajiak, Jesu Krist mel a Pasian thupina theihna vak hungpia dingin, miallak a kipan a vak hung vakkhia ding a thupiatu Pasian in ka lungtang uh asalhvakta hi. #Gen. 1.3.

7Hinanleh sil bawltheihna thupina pen kou a pat hilou a, Pasian a pat ahihjawk theihna dingin hua gou pen leibel ah kakem uhi. 8Ka kimkawt uah nehgawp in ka om ua, hilehzong sukguai in ka om naikei uhi, lungkham in ka om ua, hinanleh ka lungkia kei uhi; 9gawt in ka om ua, hinanleh taisan in ka om kei uh, satgawp in ka om ua, hinanleh hihsiat in ka om naikei uhi. 10Jesu hinna ka pumpi ua hihlat a a omtheihna dingin, bangchiklai peuhin Jesu sihna kapua kawikawi uhi. 11Ajiak pen Jesu hinna zong ka pumpi uh sithei a hihlat a a omtheihna dingin, kou ahing nalaite pen bangchiklai peuhin Jesu jiak a si dingin piakkhiat in ka om uhi. 12Tuachi`n kou ah sihna in asem a, hinanleh nou ah hinna in asem hi.

13“Ka gingta a, tuachi`n ka gen ta hi,” chih gelh bangin. Hua ginna kha mah nei in, kou zong ka gingta ua, tuajiakin ka gen uh ahi. #Psa. 116.10 (LXX). 14Ajiak Toupa Jesu kaithou kikpa in, kou zong Jesu tawh ahung kaithou ding a, noutawh amai ah ahung tutding hi, chih ka thei uhi. 15Ajiak Pasian thupina ding a mi tampite kipahthu gen jiak a hehpihna akhansem theihna dingin sil jousiah nouding jiak a omsiang ahi.

Ginna a hinna

16Tuajiakin ka lungkia kei uh, hinanleh ka pualam mihing uh kiam hiaihiai nanleh, ka sunglam mihing uh niteng a hihhalh in a omjing hi. 17Ajiak tomnoukhat sung ka gimthuakna uh jangnoukhat in tangtawn thupina giktak thupi jawsem in ahung bawlsak hi. 18Sil muhtheihte enlou in, hinanleh sil muhtheihlouhte ka enjaw uhi, ajiak sil muhtheihte tomnoukhat sung a ding ahi a, hinanleh sil muhtheihlouhte pen tangtawn a ding ahijaw hi.

Currently Selected:

2 KORINTE 4: THKHBSI

Highlight

Copy